ಈ ಸಿನಿಮಾಗಳ ಶೂಟಿಂಗ್ ನಡೆದಿದ್ದು ಸೆಲೆಬ್ರಿಟಿಗಳ ಮನೆಯಲ್ಲಿ; ಇಲ್ಲಿದೆ ವಿವರ

ದೊಡ್ಡ ಬಜೆಟ್​ನ ಸಿನಿಮಾಗಳಲ್ಲಿ ಐಷಾರಾಮಿ ಮನೆಗಳ ಬಳಕೆ ಆಗುತ್ತದೆ. ಈ ರೀತಿಯ ಮನೆಗಳನ್ನು ಹುಡುಕಿ ಶೂಟ್ (Movie Shooting) ಮಾಡೋದು ನಿಜಕ್ಕೂ ಒಂದು ದೊಡ್ಡ ಟಾಸ್ಕ್​. ಬಾಲಿವುಡ್​ನ ಅನೇಕ​ ಸೆಲೆಬ್ರಿಟಿಗಳು ಐಷಾರಾಮಿ ಮನೆ ಹೊಂದಿದ್ದಾರೆ. ಈ ಮನೆಗಳು ಸಿನಿಮಾ ಶೂಟಿಂಗ್​ಗೆ ಬಳಕೆ ಆಗಿವೆ. ರಣಬೀರ್​ ಕಪೂರ್ (Ranbir Kapoor) ಅವರ ‘ಅನಿಮಲ್’ ಸಿನಿಮಾ (Animal Movie) ಶೂಟಿಂಗ್​ಗೆ ಬಳಕೆ ಆದ ಮನೆ ಸಾಕಷ್ಟು ಸದ್ದು ಮಾಡುತ್ತಿದೆ. ಇದು ಪಟೌಡಿ ಪ್ಯಾಲೇಸ್ ಎಂದು ಹೇಳಲಾಗುತ್ತಿದೆ. ಈ ರೀತಿ ಬಳಕೆ ಆದ ಸೆಲೆಬ್ರಿಟಿ ಮನೆಗಳ ಬಗ್ಗೆ ಇಲ್ಲಿದೆ ವಿವರ.

ಪಟೌಡಿ ಪ್ಯಾಲೇಸ್​ನಲ್ಲಿ ‘ಅನಿಮಲ್’:

ರಣಬೀರ್ ಕಪೂರ್ ನಟನೆಯ ‘ಅನಿಮಲ್’ ಸಿನಿಮಾ ಸೂಪರ್ ಹಿಟ್ ಆಗಿದೆ. ಈ ಚಿತ್ರದಲ್ಲಿ ರಣಬೀರ್ ಕಪೂರ್ ಅವರು ನಟಿಸಿದ್ದಾರೆ. ಈ ಚಿತ್ರವನ್ನು ಹರಿಯಾಣದಲ್ಲಿ ಇರುವ ಪಟೌಡಿ ಪ್ಯಾಲೇಸ್​ನಲ್ಲಿ ಶೂಟ್ ಮಾಡಲಾಗಿದೆ ಎನ್ನಲಾಗಿದೆ. ಸೈಫ್ ಅಲಿ ಖಾನ್ ಅವರು ಪಟೌಡಿ ಕುಟುಂಬಕ್ಕೆ ಸೇರಿದವರು. ಈ ಮನೆಯ ಬೆಲೆ 800 ಕೋಟಿ ರೂಪಾಯಿ ಎನ್ನಲಾಗುತ್ತಿದೆ. ಸೈಫ್ ಅಲಿ ಖಾನ್ ಇದರ ಮಾಲಿಕತ್ವ ಹೊಂದಿದ್ದಾರೆ.

ಸಲ್ಲು ಫಾರ್ಮ್​ಹೌಸ್​ನಲ್ಲಿ ‘ಬಜರಂಗಿ ಭಾಯಿಜಾನ್’:

ಸಲ್ಮಾನ್ ಖಾನ್ ಅವರ ‘ಬಜರಂಗಿ ಭಾಯಿಜಾನ್’ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಈ ಸಿನಿಮಾದಲ್ಲಿ ಕರೀನಾ ಕಪೂರ್ ಮೊದಲಾದವರು ನಟಿಸಿದ್ದಾರೆ. ಭಾರತ ಹಾಗೂ ಪಾಕ್ ಕಥೆಯನ್ನು ಸಿನಿಮಾ ಹೊಂದಿದೆ. ಈ ಚಿತ್ರದ ಕೆಲವು ದೃಶ್ಯಗಳನ್ನು ಸಲ್ಮಾನ್ ಖಾನ್ ಅವರ ಪನ್ವೆಲ್ ಫಾರ್ಮ್​ಹೌಸ್​​​ನಲ್ಲಿ ಶೂಟ್ ಮಾಡಲಾಗಿದೆ. ಮುಂಬೈ ಹೊರ ವಲಯದಲ್ಲಿ ಸಲ್ಮಾನ್ ಖಾನ್ ಅವರು ಪ್ಯಾಲೆಸ್ ಹೊಂದಿದ್ದಾರೆ.

ಪಟೌಡಿಯಲ್ಲಿ ‘ತಾಂಡವ್’

ಸೈಫ್ ಅಲಿ ಖಾನ್, ಸುನೀಲ್ ಗ್ರೋವರ್ ನಟನೆಯ ‘ತಾಂಡವ್’ ವೆಬ್ ಸೀರಿಸ್ ಸಾಕಷ್ಟು ಗಮನ ಸೆಳೆದಿದೆ. ಈ ವೆಬ್ ಸೀರಿಸ್ ಜನರಿಗೆ ಇಷ್ಟ ಆಗಿತ್ತು. ಇದರ ಕೆಲ ದೃಶ್ಯಗಳನ್ನು ಪಟೌಡಿ ಪ್ಯಾಲೇಸ್​ನಲ್ಲಿ ಶೂಟ್ ಮಾಡಲಾಗಿತ್ತು. ಸೈಫ್ ಅಲಿ ಖಾನ್ ಅವರು ಖುಷಿಯಿಂದ ಇದಕ್ಕೆ ಅವಕಾಶ ನೀಡಿದ್ದರು.

ಇದನ್ನೂ ಓದಿ: ‘ಅನಿಮಲ್​’ ಚಿತ್ರದಲ್ಲಿ ಮಿಂಚಿದ ಬಾಬಿ ಡಿಯೋಲ್​; ಆದರೂ ಫ್ಯಾನ್ಸ್​ಗೆ ಇದೆ ಬೇಸರ

ಮನ್ನತ್​ನಲ್ಲಿ ‘ಫ್ಯಾನ್​’ ಶೂಟಿಂಗ್

ಶಾರುಖ್ ಖಾನ್ ಅವರು ಮುಂಬೈನಲ್ಲಿ ಐಷಾರಾಮಿ ಮನೆ ಹೊಂದಿದ್ದು, ಇದಕ್ಕೆ ಮನ್ನತ್ ಎಂದು ಹೆಸರು ಇಟ್ಟಿದ್ದಾರೆ. ಶಾರುಖ್ ಖಾನ್ ಅಭಿಮಾನಿಗಳಿಗೆ ಇದು ದೇವಾಲಯ ಇದ್ದಂತೆ. ಶಾರುಖ್ ನಟನೆಯ ‘ಫ್ಯಾನ್’ ಸಿನಿಮಾ 2016ರಲ್ಲಿ ರಿಲೀಸ್ ಆಗಿ ಸೋತಿತ್ತು. ಈ ಸಿನಿಮಾದ ಕೆಲವು ಭಾಗವನ್ನು ಮನ್ನತ್​ನಲ್ಲಿ ಶೂಟ್ ಮಾಡಲಾಗಿದೆ ಎನ್ನಲಾಗಿದೆ.

ಸಂಜಯ್ ದತ್ ಮನೆಯಲ್ಲಿ ‘ಸಂಜು’

ಸಂಜಯ್ ದತ್ ಅವರ ಕುರಿತು ‘ಸಂಜು’ ಹೆಸರಿನ ಬಯೋಪಿಕ್ ರಿಲೀಸ್ ಆಯಿತು. ರಾಜ್​ಕುಮಾರ್ ಹಿರಾನಿ ಅವರು ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದರು. ರಣಬೀರ್ ಕಪೂರ್ ಈ ಚಿತ್ರದಲ್ಲಿ ನಟಿಸಿದ್ದಾರೆ. ಈ ಸಿನಿಮಾದ ಕೆಲವು ಭಾಗಗಳನ್ನು ಸಂಜಯ್ ದತ್ ಮನೆಯಲ್ಲೇ ಶೂಟ್ ಮಾಡಲಾಗಿದೆ. ಸಂಜಯ್ ದತ್ ಅವರು ಮುಂಬೈನ ಇಂಪೀರಿಯಲ್ ಹೈಟ್ಸ್ ಅಪಾರ್ಟ್​ಮೆಂಟ್​ನಲ್ಲಿ ಮನೆ ಹೊಂದಿದ್ದಾರೆ.

‘ಮಂಗಲ್ ಪಾಂಡೆ’, ‘ವೀರ್ ಜಾರಾ’, ರಂಗ್ ದೇ ಬಸಂತಿ:

‘ಮಂಗಲ್ ಪಾಂಡೆ’ ಚಿತ್ರದಲ್ಲಿ ಆಮಿರ್ ಖಾನ್, ರಾಣಿ ಮುಖರ್ಜಿ ಮೊದಲಾದವರು ನಟಿಸಿದ್ದಾರೆ. ಈ ಚಿತ್ರವನ್ನು ಪಟೌಡಿ ಪ್ಯಾಲೇಸ್​ನಲ್ಲಿ ಶೂಟ್ ಮಾಡಲಾಗಿದೆ. ಈ ಚಿತ್ರ ಒಳ್ಳೆಯ ಗಳಿಕೆ ಮಾಡಿತ್ತು. ಶಾರುಖ್ ಖಾನ್, ಪ್ರೀತಿ ಜಿಂಟಾ ಹಾಗೂ ರಾಣಿ ಮುಖರ್ಜಿ ನಟನೆಯ ‘ವೀರ್ ಜಾರಾ’ ಸಿನಿಮಾ ಬ್ಲಾಕ್​ಬಸ್ಟರ್ ಎನಿಸಿಕೊಂಡಿದೆ. ಇದನ್ನು ಕೂಡ ಸೈಫ್ ಅಲಿ ಖಾನ್ ಅವರ ಪಟೌಡಿ ಪ್ಯಾಲೇಸ್​ನಲ್ಲಿ ಶೂಟ್ ಮಾಡಲಾಗಿದೆ. ಪ್ರೀತಿ ಜಿಂಟಾ ಮನೆ ಎಂದು ತೋರಿಸಿರುವುದು ಪಟೌಡಿ ಪ್ಯಾಲೇಸ್. ಆಮಿರ್ ಖಾನ್, ಸೋಹಾ ಅಲಿ ಖಾನ್, ಸಿದ್ದಾರ್ಥ್ ನಟನೆಯ ‘ರಂಗ್ ದೇ ಬಸಂತಿ’ ಸಿನಿಮಾದ ಶೂಟಿಂಗ್ ನಡೆದಿದ್ದು ಪಟೌಡಿ ಪ್ಯಾಲೇಸ್​ನಲ್ಲಿ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.