Bawaal Teaser: ಗ್ಯಾಸ್ ಚೇಂಬರ್ ಹತ್ಯಾಕಾಂಡದ ಕಥೆ ಹೇಳುತ್ತಾ ‘ಬವಾಲ್’? ವರುಣ್ ಧವನ್-ಜಾನ್ವಿ ಕಪೂರ್ ಚಿತ್ರದ ಟೀಸರ್ ವೈರಲ್
Nitesh Tiwari: ‘ಬವಾಲ್’ ಸಿನಿಮಾದ ಟೀಸರ್ನ ಆರಂಭದಲ್ಲಿ ಪ್ರೇಮಕಥೆ ತೆರೆದುಕೊಳ್ಳುತ್ತದೆ. ಆದರೆ ಟೀಸರ್ನ ಕೊನೆಯಲ್ಲಿ ಗ್ಯಾಸ್ ಚೇಂಬರ್ನ ಭೀಕರ ದೃಶ್ಯ ಕಾಣಿಸುತ್ತದೆ.
Updated on: Jul 05, 2023 | 6:36 PM
ನಿರ್ದೇಶಕ ನಿತೇಶ್ ತಿವಾರಿ (Nitesh Tiwari) ಅವರು ಬಾಲಿವುಡ್ನಲ್ಲಿ ಭರವಸೆ ಮೂಡಿಸಿದ್ದಾರೆ. ಆಮಿರ್ ಖಾನ್ ನಟನೆಯ ‘ದಂಗಲ್’, ಸುಶಾಂತ್ ಸಿಂಗ್ ರಜಪೂತ್ ಅಭಿನಯದ ‘ಚಿಚೋರೆ’ ಸಿನಿಮಾಗಳಿಗೆ ನಿರ್ದೇಶನ ಮಾಡಿದ್ದು ಇದೇ ನಿತೇಶ್ ತಿವಾರಿ. ಇತ್ತೀಚಿನ ಕೆಲವು ದಿನಗಳಿಂದ ಅವರು ಹೆಚ್ಚು ಸುದ್ದಿ ಆಗಿದ್ದು ರಾಮಾಯಣ ಆಧರಿಸಿ ಸಿನಿಮಾದ ಗಾಸಿಪ್ಗಳಿಂದ. ಆದರೆ ಈಗ ಅವರ ಹೊಸ ಸಿನಿಮಾ ‘ಬವಾಲ್’ ಬಗ್ಗೆ ಹೈಪ್ ಕ್ರಿಯೇಟ್ ಆಗಿದೆ. ‘ಬವಾಲ್’ ಸಿನಿಮಾದ (Bawaal Movie) ಟೀಸರ್ ಬಿಡುಗಡೆ ಆಗಿದ್ದು, ಹೊಸ ಚರ್ಚೆ ಹುಟ್ಟುಹಾಕಿದೆ. ಈ ಸಿನಿಮಾದಲ್ಲಿ ವರುಣ್ ಧವನ್ ಮತ್ತು ಜಾನ್ವಿ ಕಪೂರ್ ಅವರು ಜೋಡಿಯಾಗಿ ನಟಿಸಿದ್ದಾರೆ. ಈ ಸಿನಿಮಾದಲ್ಲಿ ಗ್ಯಾಸ್ ಚೇಂಬರ್ ಹತ್ಯಾಕಾಂಡದ (Holocaust) ಬಗ್ಗೆ ಹೇಳಲಾಗುತ್ತಿದೆಯೇ ಎಂಬ ಅನುಮಾನ ಮೂಡಿದೆ.
ಎರಡನೇ ಮಹಾಯುದ್ಧದ ಸಂದರ್ಭಗಳಲ್ಲಿ ಲಕ್ಷಾಂತರ ಯಹೂದಿಗಳನ್ನು ಹತ್ಯೆ ಮಾಡಲಾಗಿತ್ತು. ಹೆಂಗಸರು, ಮಕ್ಕಳು, ವೃದ್ಧರು ಎಂಬ ಕರುಣೆಯೂ ಇಲ್ಲದೇ ಎಲ್ಲರನ್ನೂ ಬೆತ್ತಲೆಗೊಳಿಸಿ ಗ್ಯಾಸ್ ಚೇಂಬರ್ನಲ್ಲಿ ಕೂಡಿಹಾಕಿ, ಅದರೊಳಗೆ ವಿಷಾನಿಲವನ್ನು ಹರಿಸುವ ಮೂಲಕ ಹತ್ಯಾಕಾಂಡ ನಡೆಸಲಾಗಿತ್ತು. ಆ ದುರಂತದ ಬಗ್ಗೆ ಹೇಳಿದರೆ ಇಡೀ ಮನುಷ್ಯ ಕುಲವೇ ಬೆಚ್ಚಿ ಬೀಳುತ್ತದೆ. ಈಗ ‘ಬವಾಲ್’ ಸಿನಿಮಾದ ಕಥೆ ಕೂಡ ಇಂಥ ಗ್ಯಾಸ್ ಚೇಂಬರ್ ಹತ್ಯಾಕಾಂಡದ ಹಿನ್ನೆಲೆಯನ್ನು ಸಾಗುತ್ತದೆಯೇ ಎಂಬ ಪ್ರಶ್ನೆ ಹುಟ್ಟಿಕೊಂಡಿದೆ.
‘ಬವಾಲ್’ ಸಿನಿಮಾದ ಟೀಸರ್ನ ಆರಂಭದಲ್ಲಿ ಪ್ರೇಮಕಥೆ ತೆರೆದುಕೊಳ್ಳುತ್ತದೆ. ಆದರೆ ಟೀಸರ್ನ ಕೊನೆಯಲ್ಲಿ ಗ್ಯಾಸ್ ಚೇಂಬರ್ನ ಭೀಕರ ದೃಶ್ಯ ಕಾಣಿಸುತ್ತದೆ. ಅದನ್ನು ಕಪ್ಪು-ಬಿಳುಪಿನಲ್ಲಿ ತೋರಿಸಲಾಗಿದೆ. ಗ್ಯಾಸ್ ಚೇಂಬರ್ ಒಳಗೆ ಸಿಲುಕಿದ ಜಾನ್ವಿ ಕಪೂರ್ ಮತ್ತು ವರುಣ್ ಧವನ್ ಅವರು ಕೂಗಾಡುವ ದೃಶ್ಯ ಇದರಲ್ಲಿ ಇದೆ. ಆ ಕಾರಣದಿಂದ ‘ಬವಾಲ್’ ಚಿತ್ರದ ಟೀಸರ್ ವೈರಲ್ ಆಗಿದೆ.
ಇದನ್ನೂ ಓದಿ: ಜಲಿಯನ್ ವಾಲಾ ಬಾಗ್ ಹತ್ಯಾಕಾಂಡಕ್ಕೆ 104 ವರ್ಷ, ಬೈಸಾಕಿ ಯುಗಾದಿ ದಿನ ನಡೆದಿದ್ದು ಮಾರಣಹೋಮ
ಯಹೂದಿಗಳ ಹತ್ಯಾಕಾಂಡದ ವಿಷಯವನ್ನು ಇಟ್ಟುಕೊಂಡು ನಿತೇಶ್ ತಿವಾರಿ ಅವರು ಪ್ರೇಮಕಥೆಯ ಸಿನಿಮಾ ಮಾಡುತ್ತಾರೆ ಎಂದಾದರೆ ಅದಕ್ಕೆ ಬಹಳ ಪ್ರಬುದ್ಧತೆ ಬೇಕಾಗುತ್ತದೆ. ಪ್ರಪಂಚದ ಎದುರಿನಲ್ಲಿ ನಗೆಪಾಟಲಿಗೆ ಒಳಗಾಗುವಂತೆ ಮಾಡಬಾರದು ಎಂದು ಒಂದು ವರ್ಗದ ನೆಟ್ಟಿಗರು ಅಭಿಪ್ರಾಯ ತಿಳಿಸುತ್ತಿದ್ದಾರೆ. ನಿತೇಶ್ ತಿವಾರಿ ಅವರಿಗೆ ಸೂಕ್ಷ್ಮತೆಗಳು ಅರ್ಥ ಆಗುತ್ತವೆ. ಅವರ ಹಿಂದಿನ ಸಿನಿಮಾಗಳೇ ಅದಕ್ಕೆ ಸಾಕ್ಷಿ ಎಂದು ಇನ್ನೊಂದು ವರ್ಗದ ನೆಟ್ಟಿಗರು ನಿರ್ದೇಶಕರ ಬೆಂಬಲಕ್ಕೆ ನಿಂತಿದ್ದಾರೆ.
ಇದನ್ನೂ ಓದಿ: 750 ಕೋಟಿ ರೂಪಾಯಿ ಬಜೆಟ್ನಲ್ಲಿ ಸಿದ್ಧವಾಗುತ್ತಿದೆ ಸಿನಿಮಾ; ಈ ಸ್ಟಾರ್ ನಟರ ಸಂಭಾವನೆ 75 ಕೋಟಿ
ಜುಲೈ 21ರಂದು ನೇರವಾಗಿ ಅಮೇಜಾನ್ ಪ್ರೈಂ ವಿಡಿಯೋ ಒಟಿಟಿ ಮೂಲಕ ‘ಬವಾಲ್’ ಸಿನಿಮಾ ಬಿಡುಗಡೆ ಆಗಲಿದೆ. ಸಾಜಿದ್ ನಾಡಿಯದ್ವಾಲಾ ಅವರು ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ಪ್ಯಾರಿಸ್, ಬರ್ಲಿನ್, ಪೋಲ್ಯಾಂಡ್, ಆಮ್ಸ್ಟರ್ಡ್ಯಾಮ್, ವಾರ್ಸಾ, ಲಖನೌ ಮುಂತಾದ ಕಡೆಗಳಲ್ಲಿ ಈ ಸಿನಿಮಾವನ್ನು ಚಿತ್ರಿಸಲಾಗಿದೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
