ಪನ್ವೇಲ್​ ಫಾರ್ಮ್​ಹೌಸ್​ ನೆರೆ ಹೊರೆಯವರ ವಿರುದ್ಧ ಕೇಸ್​ ಹಾಕಿದ ಸಲ್ಮಾನ್​ ಖಾನ್​

ಸಲ್ಮಾನ್​ ಖಾನ್​ (Salman Khan) ಅವರಿಗೆ ದೇಶ-ವಿದೇಶಗಳಲ್ಲಿ ಅಭಿಮಾನಿಗಳಿದ್ದಾರೆ. ಅವರ ಸಿನಿಮಾಗಳು ಬಾಕ್ಸ್​ ಆಫೀಸ್​ನಲ್ಲಿ ದೊಡ್ಡ ಮಟ್ಟದಲ್ಲಿ ಗಳಿಕೆ ಮಾಡುತ್ತವೆ. ಅವರನ್ನು ಕಂಡರೆ ಹೊಟ್ಟೆಕಿಚ್ಚು ಪಡುವವವರ ಸಂಖ್ಯೆ ಕೂಡ ದೊಡ್ಡದಿದೆ. ಸಲ್ಮಾನ್​ ಖಾನ್ ವಿರುದ್ಧ ವರ್ಚಸ್ಸಿಗೆ ಧಕ್ಕೆ ಬರುವ ರೀತಿಯಲ್ಲಿ ಹೇಳಿಕೆ ನೀಡಿದ, ಸೋಶಿಯಲ್​ ಮೀಡಿಯಾದಲ್ಲಿ ಪೋಸ್ಟ್ ಹಾಕಿದವರ ಸಂಖ್ಯೆ ದೊಡ್ಡದಿದೆ. ಇದೇ ವಿಚಾರ ಇಟ್ಟುಕೊಂಡು ನೆರೆಯವರ ವಿರುದ್ಧವೇ ಸಲ್ಮಾನ್​ ಕೇಸ್​ ದಾಖಲು ಮಾಡಿದ್ದಾರೆ. ಅಲ್ಲದೆ, ಅವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ. ಅಷ್ಟಕ್ಕೂ ಆಗಿದ್ದೇನು? ಆ ಪ್ರಶ್ನೆಗೆ ಇಲ್ಲಿದೆ ಉತ್ತರ.

ಸಲ್ಮಾನ್​ ಖಾನ್​ ಅವರ ಪನ್ವೇಲ್​ ಫಾರ್ಮ್​ಹೌಸ್​ ಬರೋಬ್ಬರಿ 150 ಎಕರೆ ವಿಸ್ತೀರ್ಣ ಹೊಂದಿದೆ. ಇದರಲ್ಲಿ ಮೂರು ಬೃಹತ್​ ಬಂಗಲೆಗಳಿವೆ. ನೂರಾರು ಅತಿಥಿಗಳ ವಾಸ್ತವ್ಯಕ್ಕೆ ಅನುಕೂಲ ಆಗುವಷ್ಟು ಸೌಲಭ್ಯ ಇದೆ. ಸ್ವಿಮಿಂಗ್​ ಪೂಲ್​ ಮತ್ತು ಜಿಮ್​ ಕೂಡ ಈ ಫಾರ್ಮ್​ಹೌಸ್​ನಲ್ಲಿ ಇದೆ. ಪ್ರತಿ ಬಾರಿ ಸಲ್ಮಾನ್​ ಖಾನ್​ ಅವರು ಇದೇ ಫಾರ್ಮ್​ ಹೌಸ್​ನಲ್ಲಿ ಬರ್ತ್​ಡೇ ಆಚರಿಸಿಕೊಳ್ಳುತ್ತಾರೆ. ಈ ಫಾರ್ಮ್​ಹೌಸ್​ ಪಕ್ಕದಲ್ಲಿ ಕೇತನ್​ ಕಕ್ಕರ್​ ಅವರು ಜಾಗ ಹೊಂದಿದ್ದಾರೆ. ಕೇತನ್​ ಅವರು ಸಲ್ಮಾನ್​ ವಿರುದ್ಧ ಕೆಟ್ಟದಾಗಿ ಹೇಳಿಕೆ ನೀಡಿದ್ದರು. ಈ ಕಾರಣಕ್ಕೆ ಕೇತನ್​ ವಿರುದ್ಧ ಸಲ್ಲು ಮಾನನಷ್ಟ ಮೊಕದ್ದಮೆ ಹೂಡಿಕೆ ಮಾಡಿದ್ದಾರೆ.

ಕೇತನ್​ ಅವರು ಯೂಟ್ಯೂಬ್​ ಚಾನೆಲ್​ ಒಂದರಲ್ಲಿ ಸಲ್ಮಾನ್​ ಖಾನ್​ಗೆ ಮಾನಹಾನಿ ಆಗುವ ರೀತಿಯಲ್ಲಿ ಹೇಳಿಕೆ ನೀಡಿದ್ದರು. ಹೀಗಾಗಿ, ಸಲ್ಲು ಮಾನನಷ್ಟ ಮೊಕದ್ದಮೆ​ ದಾಖಲು ಮಾಡಿದ್ದಾರೆ. ಇದರ ಜತೆಗೆ ಸೋಶಿಯಲ್ ಮೀಡಿಯಾ ಹಾಗೂ ಮಾಧ್ಯಮಗಳಲ್ಲಿ ಸಲ್ಮಾನ್​ ವಿರುದ್ಧ ಯಾವುದೇ ನೆಗೆಟಿವ್​ ಸುದ್ದಿ ಪ್ರಕಟಿಸದಂತೆ ಇಂಜಂಕ್ಷನ್​ ಆರ್ಡರ್​ ಹೊರಡಿಸಬೇಕು ಎಂದು ಕೋರಿದ್ದಾರೆ.

ಇದನ್ನು ಕೇತನ್​ ಪರ ವಕೀಲರು ವಿರೋಧಿಸಿದ್ದಾರೆ. ‘ಯಾವುದೇ ಕಾರಣಕ್ಕೂ ಇಂಜಂಕ್ಷನ್​ ಆರ್ಡರ್​ ನೀಡಬಾರದು. ತಮ್ಮ ವಾದವನ್ನು ಮುಂದಿಡಲು ಸ್ವಲ್ಪ ಸಮಯ ನೀಡಿ’ ಎಂದು ಕೇತನ್​ ಪರ ವಕೀಲರು ಕೋರಿದ್ದಾರೆ. ಕಳೆದ ವರ್ಷ ಸಿನಿಮಾ ವಿಮರ್ಶಕ ಕಮಾಲ್​ ಆರ್​. ಖಾನ್​ ವಿರುದ್ಧವೂ ಸಲ್ಮಾನ್​ ಖಾನ್​ ಮಾನನಷ್ಟ ಮೊಕದ್ದಮೆ ಹೂಡಿಕೆ ಮಾಡಿದ್ದರು.

ಇದನ್ನೂ ಓದಿ: ಶಿಲ್ಪಾ ಶೆಟ್ಟಿ ತಂಗಿಗೆ ಸಲ್ಮಾನ್​ ಖಾನ್ ಖಡಕ್​ ವಾರ್ನಿಂಗ್​​​; ಎಲ್ಲರ ಎದುರು ಕಣ್ಣೀರು ಹಾಕಿದ ಶಮಿತಾ

ಸಲ್ಮಾನ್​ ಖಾನ್ ಫಾರ್ಮ್​ಹೌಸ್​ ಬೆಲೆ 80 ಕೋಟಿ ರೂ.! ಸಲ್ಲು ಮೆಚ್ಚಿನ ಈ ಸ್ಥಳದಲ್ಲಿ ಏನೆಲ್ಲ ಇದೆ?

Published On - 5:29 pm, Sat, 15 January 22