ಕಾಫಿ ನಾಡು ಚಂದು ಇನ್ಸ್ಟಾಗ್ರಾಮ್ ಖಾತೆ ಮೇಲೆ ಹ್ಯಾಕರ್ಸ್ ಕಣ್ಣು; ಆದ ಎಡವಟ್ಟು ಏನು?
Coffee Nadu Chandu: ಹ್ಯಾಕರ್ಗಳಿಂದ ಅನೇಕರು ತೊಂದರೆ ಅನುಭವಿಸಿದ ಉದಾಹರಣೆ ಇದೆ. ಈಗ ಕಾಫಿ ನಾಡು ಚಂದು ಇನ್ಸ್ಟಾಗ್ರಾಮ್ ಖಾತೆ ಮೇಲೆ ಸೈಬರ್ ಖದೀಮರ ಕಣ್ಣು ಬಿದ್ದಂತಿದೆ.
Updated on:Sep 12, 2022 | 7:35 AM
ವೈರಲ್ ರೀಲ್ಸ್ ಮೂಲಕ ಕಾಫಿ ನಾಡು ಚಂದು (Coffee Nadu Chandu) ಫೇಮಸ್ ಆಗಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಅವರನ್ನು ಲಕ್ಷಾಂತರ ಮಂದಿ ಫಾಲೋ ಮಾಡುತ್ತಾರೆ. ದಿನದಿಂದ ದಿನಕ್ಕೆ ಅವರ ಫಾಲೋವರ್ಸ್ ಸಂಖ್ಯೆ ಹೆಚ್ಚುತ್ತಲೇ ಇದೆ. ಇನ್ಸ್ಟಾಗ್ರಾಮ್ನಲ್ಲಿ ಪ್ರಸ್ತುತ ಅವರು 4 ಲಕ್ಷ ಫಾಲೋವರ್ಸ್ ಹೊಂದಿದ್ದಾರೆ. ಇಷ್ಟು ಜನರ ಅಭಿಮಾನವನ್ನು ಸಂಪಾದಿಸುವುದು ಸುಲಭವಲ್ಲ. ಆದರೆ ಈಗ ಅವರ ಅಕೌಂಟ್ ಮೇಲೆ ಹ್ಯಾಕರ್ಗಳ (Hacker) ಕಣ್ಣು ಬಿದ್ದಂತಿದೆ. ಅವರ ಇನ್ಸ್ಟಾಗ್ರಾಮ್ (Coffee Nadu Chandu Instagram) ಸ್ಟೋರಿಯಲ್ಲಿ ಕೆಲವು ಅಸಂಬದ್ಧ ಲಿಂಕ್ಗಳನ್ನು ಹಂಚಿಕೊಳ್ಳಲಾಗಿದೆ. ಇದರಿಂದ ಕಾಫಿ ನಾಡು ಚಂದು ಇಮೇಜ್ಗೆ ತೊಂದರೆ ಆಗಬಹುದು.
ಹೆಸರೇ ಸೂಚಿಸುತ್ತಿರುವಂತೆ ಕಾಫಿ ನಾಡು ಚಂದು ಅವರು ಚಿಕ್ಕಮಗಳೂರಿನವರು. ಪ್ರತಿ ದಿನ ಒಂದಿಲ್ಲೊಂದು ವಿಡಿಯೋ ಅಪ್ಲೋಡ್ ಮಾಡುವ ಮೂಲಕ ಅವರು ಜನರನ್ನು ರಂಜಿಸುತ್ತಾರೆ. ಎಲ್ಲರಿಗೂ ಅವರು ಬರ್ತ್ಡೇ ವಿಶ್ ಮಾಡುವ ಶೈಲಿ ಸಖತ್ ಟ್ರೆಂಡ್ ಆಗಿದೆ. ಆರಂಭದಲ್ಲಿ ಅವರನ್ನು ಕೆಲವೇ ಕೆಲವು ಜನರು ಮಾತ್ರ ಫಾಲೋ ಮಾಡುತ್ತಿದ್ದಾರೆ. ಆದರೆ ಈಗ ಬರೋಬ್ಬರಿ 4 ಲಕ್ಷ ಮಂದಿ ಫಾಲೋ ಮಾಡುತ್ತಿದ್ದಾರೆ. ಈ ಸಂದರ್ಭದಲ್ಲಿ ಅವರ ಇನ್ಸ್ಟಾಗ್ರಾಮ್ ಖಾತೆಗೆ ಹ್ಯಾಕರ್ಗಳು ಕೈ ಹಾಕಿದ್ದಾರೆ ಎಂಬ ಅನುಮಾನ ಮೂಡಿದೆ.
ಹಲವರಿಗೆ ಕಾಫಿ ನಾಡು ಚಂದು ಇನ್ಸ್ಟಾಗ್ರಾಮ್ ಖಾತೆ ಕಾಣಿಸಿಲ್ಲ. ಕೆಲವರಿಗೆ ಕಾಣಿಸಿದರೂ ಸ್ಟೋರಿಯಲ್ಲಿ ಪೋಸ್ಟ್ ಆಗಿರುವ ಅಸಂಬದ್ಧ ಲಿಂಕ್ಗಳನ್ನು ನೋಡಿ ಅಚ್ಚರಿ ಆಗಿದೆ. ಇದೆಲ್ಲ ಹ್ಯಾಕರ್ಗಳ ಕೈವಾಡದಿಂದ ಆಗಿರುವ ಎಡವಟ್ಟು ಎನ್ನಲಾಗುತ್ತಿದೆ. ಈ ಬಗ್ಗೆ ಚಂದು ಇನ್ನಷ್ಟೇ ಪ್ರತಿಕ್ರಿಯೆ ನೀಡಬೇಕಿದೆ.
‘ನಾನು ಶಿವಣ್ಣ, ಪುನೀತಣ್ಣ ಅಭಿಮಾನಿ’ ಎಂದು ಹೇಳಿಕೊಂಡು ಎಲ್ಲರ ಗಮನ ಸೆಳೆದ ಕಾಫಿ ನಾಡು ಚಂದು ಕೆಲವೇ ದಿನಗಳ ಹಿಂದೆ ಜೀ ಕನ್ನಡ ವಾಹಿನಿಯ ‘ಡ್ಯಾನ್ಸ್ ಕರ್ನಾಟಕ ಡ್ಯಾನ್ಸ್’ ವೇದಿಕೆಗೆ ಬಂದಿದ್ದರು. ಅಲ್ಲಿ ಶಿವರಾಜ್ಕುಮಾರ್ ಅವರನ್ನು ಭೇಟಿ ಮಾಡಿ ಖುಷಿಪಟ್ಟಿದ್ದಾರೆ. ‘ಇಂಥ ಅಭಿಮಾನಿ ಪಡೆಯೋಕೆ ಪುಣ್ಯ ಮಾಡಿರಬೇಕು’ ಎಂದು ಶಿವಣ್ಣ ಹೇಳಿದ್ದು ಕೂಡ ವೈರಲ್ ಆಗಿತ್ತು.
ಕಾಫಿ ನಾಡು ಚಂದು ಅವರ ಜನಪ್ರಿಯತೆ ಕಂಡು ನಿರೂಪಕಿ ಅನುಶ್ರೀ ಕೂಡ ಫಿದಾ ಆಗಿರುವುದು ನಿಜ. ಚಂದು ಸ್ಟೈಲ್ನಲ್ಲೇ ಅವರು ರೀಲ್ಸ್ ಮಾಡಿದ್ದರು. ಡಿಕೆಡಿ ಶೋ ವೇಳೆ ಭೇಟಿಯಾದ ಚಂದುಗೆ ಅವರು ದುಬಾರಿ ವಾಚ್ ಗಿಫ್ಟ್ ನೀಡಿದ್ದರು. ‘ಚೆನ್ನಾಗಿ ಹಾಡಿ. ಇನ್ನೂ ನಾಲ್ಕೈದು ಜನರಿಗೆ ನೀವು ಸಹಾಯ ಮಾಡಬೇಕು’ ಎಂದು ಅನುಶ್ರೀ ಕಿವಿಮಾತು ಹೇಳಿದ್ದರು.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 7:35 am, Mon, 12 September 22
