ಗಳಿಕೆಯಲ್ಲಿ ದಾಖಲೆ ಬರೆದ ‘ಡೆಡ್​ಪೂಲ್ ಆಂಡ್ ವೋಲ್ವರಿನ್’, ವಿಶ್ವದಾದ್ಯಂತ ಕಲೆಕ್ಷನ್ ಎಷ್ಟು?

ಭಾರತದ ಸಿನಿಮಾಗಳ ಪಾಲಿಗೆ 1000 ಕೋಟಿ ಕಲೆಕ್ಷನ್ ಮಾಡುವುದು ಸಿನಿಮಾದ ಭಾರಿ ಗೆಲುವು, ‘ದಬಂಗ್’, ‘ಬಾಹುಬಲಿ 2’ ಅಂಥಹಾ ಸಿನಿಮಾಗಳು ಎರಡು ಸಾವಿರ ಕೋಟಿ ಕಲೆಕ್ಷನ್ ಮಾಡಿವೆ. ಆದರೆ ಹಾಲಿವುಡ್ ಸಿನಿಮಾಗಳಿಗೆ ಎರಡು ಸಾವಿರ ಕೋಟಿ, ಒಂದು ಸಾವಿರ ಕೋಟಿ ಕಲೆಕ್ಷನ್ ಕೇವಲ ಒಂದು ವಾರದ ಕಲೆಕ್ಷನ್ ಅಷ್ಟೆ. ಇತ್ತೀಚೆಗೆ ಬಿಡುಗಡೆ ಆದ ಮಾರ್ವೆಲ್ ಸ್ಟುಡಿಯೋಸ್​ನ ‘ಡೆಡ್​ಪೂಲ್ ಆಂಡ್ ವೋಲ್ವರಿನ್’ ಸಿನಿಮಾ ಬಿಡುಗಡೆ ಆದ ಕೇವಲ ಮೂರು ದಿನಗಳಲ್ಲಿ ವಿಶ್ವದಾದ್ಯಂತ ಸುಮಾರು ನಾಲ್ಕು ಸಾವಿರ ಕೋಟಿ ಹಣ ಗಳಿಕೆ ಮಾಡಿದೆ!

ಜುಲೈ 26ರಂದು ಭಾರತ ಸೇರಿದಂತೆ ವಿಶ್ವದಾದ್ಯಂತ ‘ಡೆಡ್​ಪೂಲ್ ಆಂಡ್ ವೋಲ್ವರಿನ್’ ಸಿನಿಮಾ ಬಿಡುಗಡೆ ಆಗಿತ್ತು. ಸಿನಿಮಾ ಬಿಡುಗಡೆ ಆದ ಮೂರೇ ದಿನದಲ್ಲಿ ಅಂದರೆ ಜುಲೈ 29ರ ವೇಳೆಗೆ ಈ ಸಿನಿಮಾ ವಿಶ್ವದಾದ್ಯಂತ 450 ಮಿಲಿಯನ್ ಡಾಲರ್ ಅಂದರೆ ಸುಮಾರು 4 ಸಾವಿರ ಕೋಟಿ ಮತ್ತು ಅಮೆರಿಕದಲ್ಲಿ 220 ಮಿಲಿಯನ್ ಡಾಲರ್ ಎಂದರೆ ಸುಮಾರು ಎರಡು ಸಾವಿರ ಕೋಟಿ ರೂಪಾಯಿ ಹಣ ಗಳಿಕೆ ಮಾಡಿದೆ. ಇದು ಹಾಲಿವುಡ್ ನಲ್ಲಿ ಹೊಸ ದಾಖಲೆಯನ್ನೇ ನಿರ್ಮಿಸಿದೆ.

‘ಡೆಡ್​ಪೂಲ್’ ಸರಣಿಯ ಮೂರನೇ ಸಿನಿಮಾ ಇದಾಗಿದ್ದು ಈವರೆಗೆ ಇನ್ಯಾವ ‘ಡೆಡ್​ಪೂಲ್’ ಸಿನಿಮಾ ಸಹ ಗಳಿಸದಷ್ಟು ಹಣವನ್ನು ಕೇವಲ ಮೂರೇ ದಿನಕ್ಕೆ ಗಳಿಸಿಕೊಂಡಿದೆ. ಆ ಮೂಲಕ ಹೊಸ ದಾಖಲೆಯನ್ನೇ ಸೃಷ್ಟಿಸಿದೆ ‘ಡೆಡ್​ಪೂಲ್ ಆಂಡ್ ವೋಲ್ವರಿನ್’ ಸಿನಿಮಾ. ಇತ್ತೀಚೆಗೆ ಬಿಡುಗಡೆ ಆದ ಹಾಲಿವುಡ್ ಸಿನಿಮಾಗಳಲ್ಲಿ ಕೇವಲ ಮೂರೇ ದಿನಕ್ಕೆ ಅತಿ ಹೆಚ್ಚು ಹಣ ಗಳಿಸಿದ ಸಿನಿಮಾ ಎಂಬ ಖ್ಯಾತಿಗೂ ಸಹ ‘ಡೆಡ್​ಪೂಲ್ ಆಂಡ್ ವೋಲ್ವರಿನ್’ ಸಿನಿಮಾ ಪಾತ್ರವಾಗಿದೆ.

ಇದನ್ನೂ ಓದಿ:ಹಾಲಿವುಡ್​ಗೆ ಹಾರುವ ಕನಸು ಕಾಣುತ್ತಿರುವ ‘ತೋಬಾ ತೋಬಾ’ ನಟಿ

‘ಡೆಡ್​ಪೂಲ್ ಆಂಡ್ ವೋಲ್ವರಿನ್’ ಸಿನಿಮಾದಲ್ಲಿ ಎಂಸಿಯುನ ಎರಡು ಪವರ್​ಫುಲ್ ಪಾತ್ರಗಳು ಒಟ್ಟಿಗೆ ಬಂದಿವೆ. ಡೆಡ್​ಪೂಲ್ ಮತ್ತು ಎಕ್ಸ್​ಮೆನ್ ಯೂನಿವರ್ಸ್​ನ ವೋಲ್ವರಿನ್ ಇಬ್ಬರೂ ಒಟ್ಟಿಗೆ ನಟಿಸಿದ್ದಾರೆ. ಎರಡೂ ಪಾತ್ರಗಳಿಗೂ ವಿಶ್ವದಾದ್ಯಂತ ಕೋಟ್ಯಂತರ ಅಭಿಮಾನಿಗಳಿದ್ದು, ಎರಡೂ ಪಾತ್ರಗಳ ಅಭಿಮಾನಿಗಳು ಮುಗಿಬಿದ್ದು ‘ಡೆಡ್​ಪೂಲ್ ಆಂಡ್ ವೋಲ್ವರಿನ್’ ಸಿನಿಮಾ ವೀಕ್ಷಿಸಿದ್ದಾರೆ. ಈ ಸಿನಿಮಾವನ್ನು ಶಾನ್ ಲೆವಿ ನಿರ್ದೇಶನ ಮಾಡಿದ್ದಾರೆ. ಅಮೆಜಾನ್ ಪ್ರೈಂನಲ್ಲಿ ‘ಡೆಡ್​ಪೂಲ್ ಆಂಡ್ ವೋಲ್ವರಿನ್’ ಬಿಡುಗಡೆ ಆಗಲಿದೆ ಆದರೆ ರೆಂಟಲ್ ಮಾದರಿಯಲ್ಲಿ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ