ಹಾಲಿವುಡ್ ಸಿನಿಮಾ ಪರ ಪ್ರಚಾರ ಶುರು ಮಾಡಿದ ಸಲ್ಮಾನ್ ಖಾನ್

ಬಾಲಿವುಡ್ (Bollywood) ನಟ ಸಲ್ಮಾನ್ ಖಾನ್ (Salman Khan), ಬಾಕ್ಸ್ ಆಫೀಸ್​ನಲ್ಲಿ (Box Office) ಒಂದು ದೊಡ್ಡ ಹಿಟ್​ಗಾಗಿ ಎದುರು ನೋಡುತ್ತಿದ್ದಾರೆ. ಆಮಿರ್ ಖಾನ್, ಅಕ್ಷಯ್ ಕುಮಾರ್ ರೀತಿಯಲ್ಲಿಯೇ ಸಲ್ಮಾನ್ ಖಾನ್​ ಸಹ ಸತತ ಸೋಲುಗಳನ್ನು ಕಂಡಿದ್ದಾರೆ. ಅವರು ಹೀರೋ ಆಗಿ ನಟಿಸಿದ ಸಿನಿಮಾ ಒಂದು ಸೂಪರ್-ಡೂಪರ್ ಹಿಟ್ ಆಗಿ ಐದು ವರ್ಷಕ್ಕೂ ಹೆಚ್ಚು ಸಮಯವಾಗಿದೆ. ತಮ್ಮದೇ ಸಿನಿಮಾಗಳು ಬಾಕ್ಸ್ ಆಫೀಸ್​ನಲ್ಲಿ ಮಕಾಡೆ ಮುಳುಗುತ್ತಿರುವ ಈ ಸಮಯದಲ್ಲಿ ಸಲ್ಮಾನ್ ಖಾನ್ ಹಾಲಿವುಡ್ ಸಿನಿಮಾದ ಪ್ರಚಾರಕ್ಕೆ ಇಳಿದಿದ್ದಾರೆ.

ಮಾರ್ವೆಲ್​ನ ಜನಪ್ರಿಯ ಸಿನಿಮಾ ಸರಣಿಗಳಲ್ಲಿ ಒಂದಾಗಿರುವ ಗಾರ್ಡಿಯನ್ಸ್ ಆಫ್ ದಿ ಗ್ಯಾಲೆಕ್ಸಿಯ ಮೂರನೇ ಸಿನಿಮಾ ಬಿಡುಗಡೆ ಆಗುತ್ತಿದ್ದು, ಈ ಸಿನಿಮಾದ ಪರವಾಗಿ ಭಾರತದಲ್ಲಿ ಸಲ್ಮಾನ್ ಖಾನ್ ಪ್ರಚಾರ ಮಾಡಲಿದ್ದಾರೆ. ಅಥವಾ ಈ ಸಿನಿಮಾ ತಂಡವು ಭಾರತದಲ್ಲಿ ಸಲ್ಮಾನ್ ಖಾನ್ ಅನ್ನು ತಮ್ಮ ರಾಯಭಾರಿಯನ್ನಾಗಿ ಆರಿಸಿಕೊಂಡಿದೆ. ಇಂದು ಈ ಕುರಿತು ವಿಡಿಯೋ ಒಂದನ್ನು ಸಲ್ಮಾನ್ ಖಾನ್ ಹಂಚಿಕೊಂಡಿದ್ದು, ಗಾರ್ಡಿಯನ್ಸ್ ಆಫ್ ದಿ ಗ್ಯಾಲೆಕ್ಸಿ ವಾಲ್ಯುಮ್ 3ಗೆ ಸ್ವಾಗತ ಕೋರಿದ್ದಾರೆ.

ಗಾರ್ಡಿಯನ್ಸ್ ಆಫ್ ದಿ ಗ್ಯಾಲೆಕ್ಸಿ ಸಿನಿಮಾದ ಪರವಾಗಿ ಪ್ರಮೋಷನಲ್ ವಿಡಿಯೋ ಹಂಚಿಕೊಂಡಿರುವ ಸಲ್ಮಾಣ್ ಖಾನ್, ಈ ಸಿನಿಮಾ ಸರಣಿಯ ಜನಪ್ರಿಯ ಪಾತ್ರ ಗ್ರೂಟ್​ನಿಂದ ಪ್ರೇರಿತರಾಗಿ ಸುದ್ದಿಗೋಷ್ಠಿಯಲ್ಲಿ ತಮಗೆ ಕೇಳಲಾಗುವ ಎಲ್ಲ ಪ್ರಶ್ನೆಗಳಿಗೂ ಗ್ರೂಟ್ ಹೇಳುವಂತೆಯೇ ಐ ಆಮ್ ಸಲ್ಮಾನ್ ಖಾನ್ ಎಂದಷ್ಟೆ ಉತ್ತರ ನೀಡುತ್ತಾರೆ. ಗಾರ್ಡಿಯನ್ಸ್ ಆಫ್ ದಿ ಗ್ಯಾಲೆಕ್ಸಿ ಸಿನಿಮಾದಲ್ಲಿ ಗ್ರೂಟ್ ಸಹ ಐ ಆಮ್ ಗ್ರೂಟ್ ಎನ್ನುವುದು ಬಿಟ್ಟರೆ ಇನ್ಯಾವುದೇ ಸಂಭಾಷಣೆ ಹೇಳುವುದಿಲ್ಲ. ಸುದ್ದಿಗೋಷ್ಠಿಯ ಕೊನೆಯಲ್ಲಿ ಸಲ್ಮಾನ್ ಖಾನ್ ಹೊರಡುವಾಗ ಧರಿಸಿದ್ದ ಜಾಕೆಟ್ ತೆಗೆದರೆ ಅವರ ಟಿ-ಶರ್ಟ್ ಹಿಂಭಾಗದಲ್ಲಿ ಗ್ರೂಟ್​ನ ಚಿತ್ರವಿರುತ್ತದೆ. ಸಲ್ಮಾನ್ ಖಾನ್ ಸಹ ಐದು ಬೆರಳು ತೋರಿಸಿ ಎಲ್ಲವೂ ಐದನೇ ತಾರೀಖು ತಿಳಿಯಲಿದೆ ಎನ್ನುತ್ತಾರೆ.

ಇದನ್ನೂ ಓದಿ:Salman Khan: ‘ತಪ್ಪೆಲ್ಲ ನನ್ನದೇ’; ಐಶ್ವರ್ಯಾ ರೈ, ಕತ್ರಿನಾ ಕೈಫ್ ವಿಚಾರದಲ್ಲಿ ಮೌನ ಮುರಿದ ಸಲ್ಮಾನ್ ಖಾನ್

ಸಲ್ಮಾನ್ ಖಾನ್​ರ ಈ ವಿಡಿಯೋ ಕೆಲವು ಅನುಮಾನಗಳನ್ನೂ ಹುಟ್ಟುಹಾಕಿದೆ. ಈ ಮೊದಲು ಗ್ರೂಟ್​ ಪಾತ್ರಕ್ಕೆ ಖ್ಯಾತ ಹಾಲಿವುಡ್ ನಟ ವಿನ್ ಡೀಸೆಲ್ ಧ್ವನಿ ನೀಡಿದ್ದರು. ಅವರು ಹೇಳಿದ್ದ ಏಕೈಕ ಡೈಲಾಗ್ ಎಂದರೆ ಐ ಆಮ್ ಗ್ರೂಟ್, ಅಂತೆಯೇ ಈಗ ಗಾರ್ಡಿಯನ್ಸ್ ಆಫ್​ ದಿ ಗ್ಯಾಲೆಕ್ಸಿ 3 ನಲ್ಲಿ ಸಲ್ಮಾನ್ ಖಾನ್ ಗ್ರೂಟ್ ಪಾತ್ರಕ್ಕೆ ಧ್ವನಿ ನೀಡಿರಬಹುದಾ ಎಂಬ ಅನುಮಾನ ಶುರುವಾಗಿದೆ. ಅಥವಾ ಸಿನಿಮಾದ ಹಿಂದಿ ಆವೃತ್ತಿಗೆ ಸಲ್ಮಾನ್ ಖಾನ್ ಧ್ವನಿ ನೀಡಿರಬಹುದಾ ಎಂದು ಸಹ ನೆಟ್ಟಿಗರು ಕುತೂಹಲ ವ್ಯಕ್ತಪಡಿಸಿದ್ದಾರೆ.

ಇನ್ನು ಗಾರ್ಡಿಯನ್ಸ್ ಆಫ್ ದಿ ಗ್ಯಾಲೆಕ್ಸಿ ಸಿನಿಮಾವು ಐದು ಜನರ ಗುಂಪೊಂದು ಅಂತರಿಕ್ಷದಲ್ಲಿ ವಿಲನ್​ಗಳೊಟ್ಟಿಗೆ ಫೈಟ್ ಮಾಡುವ ಕತೆಗಳನ್ನು ಒಳಗೊಂಡಿರುತ್ತದೆ. ಈ ಐದು ಜನರ ಗುಂಪಿನಲ್ಲಿ ಮನುಷ್ಯ, ಇಲಿ ಮಾದರಿಯ ಪ್ರಾಣಿ, ಗಿಡ (ಗ್ರೂಟ್) ಇರುವೆಂತೆ ಆಂಟೆನಾ ಉಳ್ಳ ಯುವತಿ, ಯಂತ್ರಗಳಿಂದಾದ ಯುವತಿ ಹೀಗೆ ಚಿತ್ರ-ವಿಚಿತ್ರ ಜನರಿದ್ದಾರೆ. ಈ ವರೆಗೆ ಎರಡು ಗಾರ್ಡಿನ್ಸ್ ಆಫ್ ದಿ ಗ್ಯಾಲೆಕ್ಸಿ ಸಿನಿಮಾಗಳು ಬಂದಿದ್ದು ಇದೀಗ ಮೂರನೇ ಸಿನಿಮಾ ಮೇ 5 ರಂದು ಭಾರತ ಸೇರಿದಂತೆ ವಿಶ್ವದ ಹಲವು ದೇಶಗಳಲ್ಲಿ ತೆರೆಗೆ ಬರಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ