Tom Hanks: ಹಾಲಿವುಡ್ನಲ್ಲೂ ನೆಪೋಟಿಸಂ; ಮಗನಿಗೆ ಅವಕಾಶ ನೀಡಿದ್ದನ್ನು ಸಮರ್ಥಿಸಿಕೊಂಡ ಟಾಮ್ ಹ್ಯಾಂಕ್ಸ್
Nepotism | Truman Hanks: ಟಾಮ್ ಹ್ಯಾಂಕ್ಸ್ ಅವರು ತಮ್ಮ ಹೊಸ ಸಿನಿಮಾದಲ್ಲಿ ಕಿರಿಯ ಮಗನಿಗೆ ಅವಕಾಶ ನೀಡಿದ್ದಾರೆ. ಅದರಿಂದ ನೆಪೋಟಿಸಂ ಟೀಕೆ ವ್ಯಕ್ತವಾಗಿದೆ.
Updated on:Jan 06, 2023 | 6:46 PM
ಬಣ್ಣದ ಲೋಕದಲ್ಲಿ ನೆಪೋಟಿಸಂ (Nepotism) ಎಂಬುದು ಎಂದಿಗೂ ಮುಗಿಯದ ಚರ್ಚೆ. ಬಹುತೇಕ ಎಲ್ಲ ಖಾಸಗಿ ಕ್ಷೇತ್ರಗಳಲ್ಲಿ ನೆಪೋಟಿಸಂ ಇದೆ. ಆದರೆ ಚಿತ್ರರಂಗದಲ್ಲಿನ ನೆಪೋಟಿಸಂ ಮಾತ್ರ ಭಾರಿ ಟೀಕೆಗೆ ಒಳಗಾಗುತ್ತಿದೆ. ಸೆಲೆಬ್ರಿಟಿಗಳ ಮಕ್ಕಳಿಗೆ ಬೇಗ ಅವಕಾಶ ಸಿಗುತ್ತದೆ ಎಂದು ಅನೇಕರು ಆಗಾಗ ಬೊಬ್ಬೆ ಹೊಡೆಯುತ್ತಾರೆ. ಸ್ಯಾಂಡಲ್ವುಡ್, ಬಾಲಿವುಡ್ ಮಾತ್ರವಲ್ಲ.. ಹಾಲಿವುಡ್ (Hollywood) ಮಂದಿ ಕೂಡ ಇದಕ್ಕೆ ಹೊರತಾಗಿಲ್ಲ. ಹಾಲಿವುಡ್ನ ಖ್ಯಾತ ನಟ ಟಾಮ್ ಹ್ಯಾಂಕ್ಸ್ ಅವರು ಚಿತ್ರರಂಗದಲ್ಲಿ ತಮ್ಮದೇ ಛಾಪು ಮೂಡಿಸಿದ್ದಾರೆ. ಈಗ ಅವರ ಕಿರಿಯ ಪುತ್ರ ಟ್ರೂಮನ್ ಹ್ಯಾಂಕ್ಸ್ ಕೂಡ ಬಣ್ಣದ ಲೋಕಕ್ಕೆ ಎಂಟ್ರಿ ನೀಡಿದ್ದಾರೆ. ಅದರ ಬೆನ್ನಲ್ಲೇ ನೆಪೋಟಿಸಂ ಟೀಕೆ ಜೋರಾಗಿದೆ. ಆದರೆ ಇದನ್ನು ಟಾಮ್ ಹ್ಯಾಂಕ್ಸ್ (Tom Hanks) ಅವರು ಸಮರ್ಥಿಸಿಕೊಂಡಿದ್ದಾರೆ.
ಹಾಲಿವುಡ್ನಲ್ಲಿ ಟಾಮ್ ಹ್ಯಾಂಕ್ಸ್ ಅವರಿಗೆ ಹಲವು ವರ್ಷಗಳ ಅನುಭವ ಇದೆ. ‘ಕಾಸ್ಟ್ ಅವೇ’, ‘ಫಾರೆಸ್ಟ್ ಗಂಪ್’, ‘ಸೇವಿಂಗ್ ಪ್ರೈವೇಟ್ ರಿಯಾನ್’ ಸೇರಿದಂತೆ ಹಲವು ಗಮನಾರ್ಹ ಸಿನಿಮಾಗಳಲ್ಲಿ ಅವರು ನಟಿಸಿದ್ದಾರೆ. ಈಗ ಅವರಿಗೆ 66 ವರ್ಷ ವಯಸ್ಸು. ಇಂದಿಗೂ ಕೂಡ ಬಹುಬೇಡಿಕೆಯ ನಟನಾಗಿ ಟಾಮ್ ಹ್ಯಾಂಕ್ಸ್ ಗುರುತಿಸಿಕೊಂಡಿದ್ದಾರೆ. ಅವರ ಕುಟುಂಬದ ಸದಸ್ಯರು ಕೂಡ ಚಿತ್ರರಂಗದಲ್ಲಿ ಬದುಕು ಕಟ್ಟಿಕೊಂಡಿದ್ದಾರೆ.
ಇದನ್ನೂ ಓದಿ: Nepotism: ಡಾಲಿ ಮೇಲೆ ನೆಪೋಟಿಸಂ ಆರೋಪ; ಪ್ರೇಮ್ ಪುತ್ರಿಗೆ ಚಾನ್ಸ್ ನೀಡಿದ್ದಕ್ಕೆ ನೆಟ್ಟಿಗರ ಟೀಕೆ
ಟಾಮ್ ಹ್ಯಾಂಕ್ಸ್ ನಟನೆಯ ಹೊಸ ಸಿನಿಮಾ ‘ಎ ಮ್ಯಾನ್ ಕಾಲ್ಡ್ ಆಟ್ಟೋ’ ಜನವರಿ 13ರಂದು ಅಮೆರಿಕದ ಚಿತ್ರಮಂದಿರಗಳಲ್ಲಿ ರಿಲೀಸ್ ಆಗಲಿದೆ. ಈ ಸಿನಿಮಾಗೆ ಟಾಮ್ ಹ್ಯಾಂಕ್ಸ್ ನಿರ್ಮಾಪಕ ಕೂಡ ಹೌದು. ಅವರ ಕಿರಿಯ ಪುತ್ರ ಟ್ರೂಮನ್ ಹ್ಯಾಂಕ್ಸ್ ಅವರು ಈ ಚಿತ್ರದಲ್ಲಿ ನಟಿಸಿದ್ದಾರೆ. ಹಾಗಾಗಿ ನೆಪೋಟಿಸಂ ಟೀಕೆ ವ್ಯಕ್ತವಾಗಿದೆ. ಇದಕ್ಕೆ ಟಾಮ್ ಹ್ಯಾಂಕ್ಸ್ ಅವರು ತಮ್ಮದೇ ರೀತಿಯಲ್ಲಿ ಪ್ರತಿಕ್ರಿಯೆ ನೀಡಿದ್ದಾರೆ.
ಇದನ್ನೂ ಓದಿ: ‘ಚಿತ್ರರಂಗದಲ್ಲಿ ನೆಪೋಟಿಸಂಗಿಂತಲೂ ಈ ಸಮಸ್ಯೆ ಬಹಳ ಅಪಾಯಕಾರಿ’; ಮುಕ್ತವಾಗಿ ಹೇಳಿಕೊಂಡ ನವಾಜುದ್ದೀನ್ ಸಿದ್ದಿಕಿ
‘ಇದು ನಮ್ಮ ಕುಟುಂಬದ ವ್ಯವಹಾರ. ಮೊದಲಿನಿಂದಲೂ ನಾವು ಇದನ್ನೇ ಮಾಡಿಕೊಂಡು ಬಂದಿದ್ದೇವೆ. ಇದರಲ್ಲೇ ನನ್ನೆಲ್ಲ ಮಕ್ಕಳು ದೊಡ್ಡವರಾಗಿದ್ದು. ನಮ್ಮದು ಪ್ಲಂಬಿಂಗ್ ಅಥವಾ ಹೂವಿನ ಬಿಸ್ನೆಸ್ ಆಗಿದ್ದರೆ ಅದರಲ್ಲೇ ನಮ್ಮ ಇಡೀ ಕುಟುಂಬ ತೊಡಗಿರುತ್ತಿತ್ತು’ ಎಂದು ಟಾಮ್ ಹ್ಯಾಂಕ್ಸ್ ಹೇಳಿದ್ದಾರೆ. ಸರ್ ನೇಮ್ ಯಾವುದು ಎಂಬುದು ಮುಖ್ಯ ಆಗುವುದಿಲ್ಲ. ಎಲ್ಲರೂ ಉತ್ತಮ ಕೆಲಸ ಮಾಡಲೇಬೇಕು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಇದನ್ನೂ ಓದಿ: ಬಿಗ್ ಬಾಸ್ ಮನೆಯಲ್ಲೂ ಕರಣ್ ಜೋಹರ್ ನೆಪೋಟಿಸಮ್; ಶಮಿತಾ ಶೆಟ್ಟಿಗೆ ಸಿಗುತ್ತಿದೆ ರಾಜ ಮರ್ಯಾದೆ
ಟಾಮ್ ಹ್ಯಾಂಕ್ಸ್ ಪತ್ನಿ ರಿಟಾ ವಿಲ್ಸನ್ ಅವರು ‘ಎ ಮ್ಯಾನ್ ಕಾಲ್ಡ್ ಆಟ್ಟೋ’ ಚಿತ್ರದ ತೆರೆ ಹಿಂದೆ ಕೆಲಸ ಮಾಡಿದ್ದಾರೆ. ನಿರ್ಮಾಣದಲ್ಲೂ ಕೈ ಜೋಡಿಸಿದ್ದಾರೆ. ಟಾಮ್ ಹಾಗೂ ರಿಟಾ ದಂಪತಿಯ ಮೊದಲ ಪುತ್ರ ಚೆಟ್ ಹ್ಯಾಂಕ್ಸ್ ಅವರು ನಟನಾಗಿ ಮತ್ತು ರ‍್ಯಾಪ್ ಸಿಂಗರ್ ಆಗಿ ಗುರುತಿಸಿಕೊಂಡಿದ್ದಾರೆ. ಟಾಮ್ ಅವರ ಮೊದಲ ಪತ್ನಿಯ ಮಗ ಕೊಲಿನ್ ಹ್ಯಾಂಕ್ಸ್ ಕೂಡ ನಟನಾಗಿ ಜನಪ್ರಿಯತೆ ಪಡೆದಿದ್ದಾರೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 6:46 pm, Fri, 6 January 23
