ನಟಿ ಜತೆ ರೂಮ್ ಶೇರ್​ ಮಾಡಿ ನಿರ್ಮಾಪಕರಿಗೆ ದುಡ್ಡು ಉಳಿಸುವ ‘ಸ್ಪೈಡರ್ ಮ್ಯಾನ್’ ನಟ

ಹಾಲಿವುಡ್​ ನಟ ಟಾಮ್ ಹಾಲೆಂಡ್​ ಅವರು ಜಗತ್ತಿನಾದ್ಯಂತ ಫೇಮಸ್ ಆಗಿದ್ದಾರೆ. ‘ಸ್ಪೈಡರ್​ ಮ್ಯಾನ್​’ ಸರಣಿಯ ಸಿನಿಮಾಗಳಲ್ಲಿ ನಟಿಸುವ ಮೂಲಕ ಅವರು ಖ್ಯಾತಿ ಗಳಿಸಿದ್ದಾರೆ. ಈಗ ಟಾಮ್ ಹಾಲೆಂಡ್ ಅವರಿಗೆ 28 ವರ್ಷ ವಯಸ್ಸು. ಇಂಗ್ಲೆಂಡ್ ಮೂಲದ ಅವರಿಗೆ ಹಾಲಿವುಡ್​ನಲ್ಲಿ ಸಿಕ್ಕಾಪಟ್ಟೆ ಬೇಡಿಕೆ ಇದೆ. ಅವರ ಜೊತೆ ಸಿನಿಮಾ ಮಾಡಲು ದೊಡ್ಡ ದೊಡ್ಡ ನಿರ್ಮಾಣ ಸಂಸ್ಥೆಗಳು ಕಾದಿವೆ. ಆಸ್ಕರ್​ ಪುರಸ್ಕೃತ ನಿರ್ದೇಶಕ ಕ್ರಿಸ್ಟೋಫರ್​ ನೋಲನ್ ಅವರ ಹೊಸ ಸಿನಿಮಾದಲ್ಲಿ ಟಾಮ್ ಹಾಲೆಂಡ್ ನಟಿಸಲಿದ್ದಾರೆ. ಇತ್ತೀಚೆಗೆ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಕೆಲವು ಇಂಟರೆಸ್ಟಿಂಗ್ ವಿಚಾರಗಳನ್ನು ಹಾಮ್ ಹಾಲೆಂಡ್ ಹಂಚಿಕೊಂಡಿದ್ದಾರೆ.

ಹೊಸ ಸಿನಿಮಾದಲ್ಲಿ ಟಾಮ್ ಹಾಲೆಂಡ್​ ಜೊತೆ ನಟಿ ಝೆಂಡೆಯಾ ಕೂಡ ಅಭಿನಯಿಸಲಿದ್ದಾರೆ. ಇವರಿಬ್ಬರನ್ನು ಒಂದೇ ಸಿನಿಮಾದಲ್ಲಿ ಆಯ್ಕೆ ಮಾಡಿಕೊಂಡರೆ ನಿರ್ಮಾಪಕರಿಗೆ ಸಖತ್ ಲಾಭ ಆಗುತ್ತದೆ. ಯಾಕೆಂದರೆ, ಟಾಮ್ ಹಾಲೆಂಡ್ ಅವರು ಝೆಂಡೆಯಾ ಜೊತೆಗೆ ಹೋಟೆಲ್ ರೂಮ್ ಶೇರ್​ ಮಾಡಿಕೊಳ್ಳುತ್ತಾರೆ. ಆ ಕಾರಣದಿಂದ ನಿರ್ಮಾಪಕರು ಈ ಜೋಡಿಯನ್ನೇ ಆಯ್ಕೆ ಮಾಡುತ್ತಾರೆ ಎಂಬ ತಮಾಷೆಯ ಮಾತು ಚಾಲ್ತಿಯಲ್ಲಿದೆ.

ಹಾಗೆಂದಮಾತ್ರಕ್ಕೆ ಟಾಮ್ ಹಾಲೆಂಟ್ ಅವರು ಎಲ್ಲ ಹೀರೋಯಿನ್​ಗಳ ಜೊತೆ ಈ ರೀತಿ ರೂಮ್ ಶೇರ್​ ಮಾಡಿಕೊಳ್ಳುವುದಿಲ್ಲ. ಈ ಪಾಲಿಸಿ ಕೇವಲ ಝೆಂಡೆಯಾ ಜೊತೆ ಮಾತ್ರ! ಯಾಕೆಂದರೆ, ಝೆಂಡೆಯಾ ಮತ್ತು ಟಾಮ್ ಹಾಲೆಂಡ್​ ಅವರು ಪರಸ್ಪರ ಪ್ರೀತಿಸುತ್ತಿದ್ದಾರೆ. ಈಗಾಗಲೇ ಅವರು ‘ಸ್ಪೈಡರ್​ ಮ್ಯಾನ್​’ ಸರಣಿಯ ಮೂರು ಸಿನಿಮಾಗಳಲ್ಲಿ ಜೊತೆಯಾಗಿ ನಟಿಸಿದ್ದಾರೆ. ಹಾಗಾಗಿ ಹೊಸ ಸಿನಿಮಾದಲ್ಲಿ ಒಟ್ಟಿಗೆ ನಟಿಸಿದರೆ ಶೂಟಿಂಗ್ ಸಂದರ್ಭದಲ್ಲಿ ಅವರಿಬ್ಬರಿಗೂ ಸೇರಿ ಒಂದು ಹೋಟೆಲ್​ ರೂಮ್ ಬುಕ್ ಮಾಡಿದರೆ ಸಾಕು ಎಂದು ಸ್ವತಃ ಟಾಮ್ ಹಾಲೆಂಡ್ ಅವರು ಸಂದರ್ಶನದಲ್ಲಿ ಹೇಳಿದ್ದಾರೆ.

ಇದನ್ನೂ ಓದಿ: ‘ಮಿಷನ್ ಇಂಪಾಸಿವಲ್’ ನಟನಿಗೆ ಕಡೆಗೂ ವಯಸ್ಸಾಯ್ತು; ಅಚ್ಚರಿ ವ್ಯಕ್ತಪಡಿಸಿದ ಫ್ಯಾನ್ಸ್

2016ರಿಂದಲೇ ಝೆಂಡೆಯಾ ಮತ್ತು ಟಾಮ್ ಹಾಲೆಂಡ್ ಅವರು ಪ್ರೀತಿಸುತ್ತಿದ್ದಾರೆ ಎಂಬ ಗಾಸಿಪ್ ಹಬ್ಬಿತ್ತು. ಆದರೆ ಆರಂಭದ ದಿನಗಳಲ್ಲಿ ಅವರಿಬ್ಬರು ಗೌಪ್ಯತೆ ಕಾಪಾಡಿಕೊಂಡಿದ್ದರು. 2021ರಲ್ಲಿ ಕಾರಿನೊಳಗೆ ಝೆಂಡೆಯಾ ಮತ್ತು ಟಾಮ್ ಹಾಲೆಂಡ್ ಕಿಸ್ ಮಾಡುತ್ತಿರುವ ಫೋಟೋ ವೈರಲ್ ಆಯಿತು. ಆ ಬಳಿಕ ಅವರ ರಿಲೇಷನ್​ಶಿಪ್ ಜಗಜ್ಜಾಹೀರಾಯಿತು. ಈಗ ಅವರಿಬ್ಬರು ಕ್ರಿಸ್ಟೋಫರ್​ ನೋಲನ್ ನಿರ್ದೇಶನದ ಸಿನಿಮಾದಲ್ಲಿ ತೆರೆಹಂಚಿಕೊಳ್ಳುತ್ತಾರೆ ಎಂಬ ವಿಷಯ ತಿಳಿದು ಅಭಿಮಾನಿಗಳ ನಿರೀಕ್ಷೆ ಜಾಸ್ತಿ ಆಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.