ನೆಟ್​ಫ್ಲಿಕ್ಸ್​ನಲ್ಲಿ ಹೆಚ್ಚುವರಿ ಶುಲ್ಕವಿಲ್ಲದೆ ವಿಡಿಯೊ ಗೇಮ್ಸ್​: ಮಕ್ಕಳಿಗಾಗಿ ಎರಡು ಹೊಸ ಕೊಡುಗೆ ಘೋಷಣೆ

ವಿಶ್ವದ ಒಟಿಟಿ ದೈತ್ಯ ಕಂಪನಿ ನೆಟ್​ಫ್ಲಿಕ್ಸ್​ ವಿಡಿಯೊ ಗೇಮಿಂಗ್ ಉದ್ಯಮಕ್ಕೂ ಶೀಘ್ರದಲ್ಲಿಯೇ ಪದಾರ್ಪಣೆ ಮಾಡಲಿದೆ. ಇದಕ್ಕಾಗಿ ಎಲೆಕ್ಟ್ರಾನಿಕ್ ಆರ್ಟ್ಸ್​ ಅಂಡ್ ಫೇಸ್​ಬುಕ್ ಕಂಪನಿಯಲ್ಲಿ ಈ ಹಿಂದೆ ಕೆಲಸ ಮಾಡುತ್ತಿದ್ದ ಹೆಸರಾಂತ ಪ್ರೋಗ್ರಾಮರ್ ಮೈಕ್ ವೆರ್ಡು ಅವರನ್ನು ನೆಟ್​ಫ್ಲಿಕ್ಸ್​ ತನ್ನ ಸಂಸ್ಥೆಗೆ ಸೇರಿಸಿಕೊಂಡಿದೆ. ಮೈಕ್ ವೆರ್ಡು ಅವರಿಗೆ ಉಪಾಧ್ಯಕ್ಷ ಹುದ್ದೆ ನೀಡಿರುವ ನೆಟ್​ಫ್ಲಿಕ್ಸ್​ ಗೇಮ್​ ಡೆವಲಪ್​ಮೆಂಟ್ ಹೊಣೆ ಒಪ್ಪಿಸಿದೆ.

ಭಾರತ ಸೇರಿದಂತೆ ವಿಶ್ವದ ಹಲವು ದೇಶಗಳ ಒಟಿಟಿ ಕ್ಷೇತ್ರದಲ್ಲಿ ಮುಂಚೂಣಿಯಲ್ಲಿರುವ ನೆಟ್​ಫ್ಲಿಕ್ಸ್​ ಪ್ರಸ್ತುತ ಸಿನಿಮಾಗಳು ಮತ್ತು ಟಿವಿ ಕಾರ್ಯಕ್ರಮಗಳನ್ನು ನೀಡುತ್ತಿದೆ. ಅಮೆರಿಕ ಸೇರಿ ಹಲವು ಶ್ರೀಮಂತ ದೇಶಗಳಲ್ಲಿ ನೆಟ್​ಫ್ಲಿಕ್ಸ್​ ಚಂದಾದಾರರು ವ್ಯಾಪಕವಾಗಿ ಹರಡಿಕೊಂಡಿದ್ದು, ಇನ್ನು ಮುಂದೆ ಈ ಕ್ಷೇತ್ರದಲ್ಲಿ ಕಂಪನಿ ಬೆಳೆಯುವುದು ಸಾಧ್ಯವೇ ಇಲ್ಲ ಎನ್ನುವ ಸ್ಥಿತಿ ಬಂದೊದಗಿದೆ. ಹೀಗಾಗಿಯೇ ನೆಟ್​ಫ್ಲಿಕ್ಸ್​ ಇದೀಗ ಗೇಮಿಂಗ್ ಮತ್ತು ಮಕ್ಕಳ ಮನರಂಜನೆ ಕ್ಷೇತ್ರದತ್ತ ಮನಸ್ಸು ಹರಿಸಿದೆ.

ಈ ಸಂಬಂಧ ನೆಟ್​ಫ್ಲಿಕ್ಸ್​ ಕಂಪನಿಯ ಮೂಲಗಳನ್ನು ಉದ್ದೇಶಿಸಿ ವರದಿ ಮಾಡಿರುವ ಬ್ಲೂಮ್​ಬರ್ಗ್​ ಸುದ್ದಿತಾಣವು, ಮುಂದಿನ ವರ್ಷದಲ್ಲಿಯೇ ನೆಟ್​ಫ್ಲಿಕ್ಸ್​ ತನ್ನ ಗ್ರಾಹಕ ವಲಯ ಮತ್ತು ಸೇವೆಗಳನ್ನು ವಿಸ್ತರಿಸಲಿದೆ ಎಂದು ಹೇಳಿದೆ. ಸಾಕ್ಷ್ಯಚಿತ್ರ ಮತ್ತು ಸ್ಟ್ಯಾಂಡ್​ಅಪ್ ಸ್ಪೆಷಲ್ಸ್​ ಮಾದರಿಯಲ್ಲಿ ಗೇಮ್ಸ್​ ಸಹ ಮುಂದಿನ ದಿನಗಳಲ್ಲಿ ಪ್ರತ್ಯೇಕ ಪ್ರೋಗ್ರಾಮಿಂಗ್ ಜರ್ನ್​ ಆಗಿಯೂ ವಿಕಸನಗೊಳ್ಳಬಹುದು. ಆರಂಭದ ದಿನಗಳಲ್ಲಿ ನೆಟ್​ಫ್ಲಿಕ್ಸ್​ ಹೆಚ್ಚುವರಿ ಶುಲ್ಕವಿಲ್ಲದೆ ಈ ಸೇವೆ ಒದಗಿಸುತ್ತಿದೆ. ವೆರ್ಡು ಅವರು ನೆಟ್​ಫ್ಲಿಕ್ಸ್​ನ ಮುಖ್ಯ ಕಾರ್ಯಾಚರಣೆ ಅಧಿಕಾರಿ ಗ್ರೆಗ್ ಪೀಟರ್ಸ್​ ಅವರಿಗೆ ವರದಿ ಮಾಡಿಕೊಳ್ಳುತ್ತಿದ್ದಾರೆ.

ಕಳೆದ ಕೆಲ ವರ್ಷಗಳಿಂದಲೂ ನೆಟ್​ಫ್ಲಿಕ್ಸ್​ ವಿಡಿಯೊ ಗೇಮಿಂಗ್​ ಮಾರುಕಟ್ಟೆ ಪ್ರವೇಶಿಸುವ ಸೂಚನೆಗಳನ್ನು ನೀಡುತ್ತಿತ್ತು. ಈ ನಿಟ್ಟಿನಲ್ಲಿ ಕಂಪನಿಯ ಮೊದಲು ಘೋಷಣೆಯು 2019ರಲ್ಲಿ ಹೊರಬಿದ್ದಿತ್ತು. ಕಳೆದ ಮೇ ತಿಂಗಳಲ್ಲಿ ಈ ನಿಟ್ಟಿನಲ್ಲಿ ದೃಢವಾದ ಪ್ರಯತ್ನಗಳು ಆರಂಭವಾದವು.

ಮುಂದಿನ ದಿನಗಳಲ್ಲಿ ಮಕ್ಕಳಿಗಾಗಿ ಎರಡು ಹೊಸ ಆಯ್ಕೆಗಳನ್ನು ನೀಡುವುದಾಗಿಯೂ ನೆಟ್​ಫ್ಲಿಕ್ಸ್​ ಘೋಷಿಸಿದೆ. ಕಿಡ್ಸ್​​ ರಿಕ್ಯಾಪ್ ಇಮೇಲ್ ಎನ್ನುವುದು ಇದರಲ್ಲಿ ಒಂದು. ಈ ಆಯ್ಕೆಯ ಮೂಲಕ ಪೋಷಕರ ಇಮೇಲ್​ಗೆ ಮಕ್ಕಳ ಚಟುವಟಿಕೆಯ ಮಾಹಿತಿ ಸಿಗುತ್ತದೆ. ಮಕ್ಕಳು ನೆಟ್​ಫ್ಲಿಕ್ಸ್​ನಲ್ಲಿ ಮಾಡಿಕೊಂಡಿರುವ ಆಯ್ಕೆಗಳ ಬಗ್ಗೆಯೂ ಪೋಷಕರಿಗೆ ಇದು ಮಾಹಿತಿ ನೀಡಲಿದೆ. ಮಕ್ಕಳು ಎಂಥ ಕಾರ್ಯಕ್ರಮ ವೀಕ್ಷಿಸಬಹುದು ಎಂಬುದನ್ನು ಸೂಚಿಸಲು ಅನುವಾಗುವಂತೆ ಪೋಷಕರಿಗೂ ಸಲಹೆಗಳು ಹೋಗುತ್ತವೆ. ಇಂದಿನಿಂದ ಅಂದರೆ, ಜುಲೈ 16ರಿಂದಲೇ ಈ ಆಯ್ಕೆ ಕಾರ್ಯಾರಂಭ ಮಾಡಿದೆ. ನೆಟ್​ಫ್ಲಿಕ್ಸ್​ ಪ್ರೊಫೈಲ್​ನಲ್ಲಿ ಮಕ್ಕಳ ಅಕೌಂಟ್​ ಜೋಡಿಸಿಕೊಂಡಿರುವವರಿಗೆ ಇದು ಕಾಣಿಸಲಿದೆ.

ಕಿಡ್ಸ್​ ಟಾಪ್ 10 ಎನ್ನುವುದು ನೆಟ್​ಫ್ಲಿಕ್ಸ್​ ಪರಿಚಯಿಸುತ್ತಿರುವ ಮತ್ತೊಂದು ಆಯ್ಕೆ. ಇದು 10 ಜನಪ್ರಿಯ ಟೈಟಲ್​ಗಳನ್ನು ಮಕ್ಕಳಿಗಾಗಿ ತೋರಿಸಲಿದೆ. ಈ ಪಟ್ಟಿಯು ಪ್ರತಿದಿನ ಅಪ್​ಡೇಟ್ ಆಗಲಿದೆ. ಯಾವ ಕಾರ್ಯಕ್ರಮ ಅಥವಾ ಸಿನಿಮಾಕ್ಕೆ ನೆಟ್​ಫ್ಲಿಕ್ಸ್​ ಕಿಡ್ಸ್​ ಟಾಪ್​10 ಲೇಬಲ್ ಕೊಡುತ್ತದೆಯೋ ಎಲ್ಲ ಡಿವೈಸ್​ಗಳಲ್ಲಿಯೂ ಅಂಥ ಕಾರ್ಯಕ್ರಮಗಳು ಆ ಬ್ಯಾಡ್ಜ್​ ಸಹಿತ ಕಾಣಿಸಲಿದೆ. ಈ ಪಟ್ಟಿಯನ್ನು ಕಿಡ್ಸ್​ ಪ್ರೊಫೈಲ್​ನ ನ್ಯೂ ಅಂಡ ಪಾಪ್ಯುಲರ್ ವಿಭಾಗದಲ್ಲಿ ನೋಡಬಹುದು. ಕಿಡ್ಸ್​ ಟಾಪ್ 10 ಸಾಲು ಈಗಾಗಲೇ 93 ದೇಶಗಳಲ್ಲಿ ಸಕ್ರಿಯವಾಗಿದೆ.

(Netflix to Offer Video Games on the OTT Platform at No Extra Cost also Announces Two New Kids Features)

ಇದನ್ನೂ ಓದಿ: Tata Sky Binge: ಟಾಟಾ ಸ್ಕೈ Bingeಯಲ್ಲಿ ಸಿಗಲಿದೆ ಹತ್ತು ಒಟಿಟಿ ಕಂಟೆಂಟ್ ಒಂದೇ ಕಡೆಗೆ; ಪ್ಲಾನ್ ಮತ್ತಿತರ ಮಾಹಿತಿ ಇಲ್ಲಿದೆ

ಇದನ್ನೂ ಓದಿ: ರಾಧೆ ತೆರೆಕಂಡ ಬೆನ್ನಲ್ಲೇ ಒಟಿಟಿಗೆ ಗುಡ್​​ ಬೈ ಹೇಳಿದ ಸಲ್ಮಾನ್​ ಖಾನ್​