ರಾಧೆ ತೆರೆಕಂಡ ಬೆನ್ನಲ್ಲೇ ಒಟಿಟಿಗೆ ಗುಡ್​​ ಬೈ ಹೇಳಿದ ಸಲ್ಮಾನ್​ ಖಾನ್​

ಸಲ್ಮಾನ್​ ಖಾನ್​ ನಟನೆಯ ‘ರಾಧೆ: ಯುವರ್​ ಮೋಸ್ಟ್​​ ವಾಂಟೆಡ್​ ಭಾಯ್​​’ ಚಿತ್ರ ಸಾಕಷ್ಟು ವಿಚಾರಗಳಿಂದ ಚರ್ಚೆಗೆ ಕಾರಣವಾಗಿತ್ತು. ಸಿನಿಮಾ ವಿಮರ್ಶೆಯಲ್ಲಿ ಸೋತಿದ್ದು ಒಂದು ಕಡೆಯಾದರೆ, ರಿಲೀಸ್​ ಆದ ಕೆಲವೇ ಗಂಟೆಗಳಲ್ಲಿ ಚಿತ್ರದ ಪೈರಸಿ ಕಾಪಿ ಹೊರ ಬಂದಿತ್ತು. ಇದು ಸಿನಿಮಾಗೆ ದೊಡ್ಡ ಹೊಡೆತ ನೀಡಿತ್ತು. ಇದೆಲ್ಲವನ್ನೂ ಗಮನದಲ್ಲಿಟ್ಟುಕೊಂಡು ಸಲ್ಮಾನ್​ ಖಾನ್​ ಒಟಿಟಿಗೆ ಗುಡ್​ ಬೈ ಹೇಳುವ ನಿರ್ಧಾರಕ್ಕೆ ಬಂದಿದ್ದಾರೆ.

ಈದ್​ ಹಬ್ಬದ ಪ್ರಯುಕ್ತ ಮೇ 13ರಂದು ರಾಧೆ ತೆರೆಗೆ ಬಂದಿತ್ತು. ಜೀ5ನ ಜೀ ಪ್ಲೆಕ್ಸ್​​ನಲ್ಲಿ ಜನರು ಸಿನಿಮಾ ನೋಡಿ ಸಾಕಷ್ಟು ಟ್ರೋಲ್​ ಮಾಡಿದ್ದರು. ಅಲ್ಲದೆ, ಒಟಿಟಿಯಲ್ಲಿ ರಿಲೀಸ್​ ಆದ ಕಾರಣಕ್ಕೆ ಸಿನಿಮಾದ ಎಚ್​​ಡಿ ಪ್ರತಿಯೇ ಆನ್​ಲೈನ್​ನಲ್ಲಿ ಸೋರಿಕೆ ಆಗಿತ್ತು. ಹೀಗಾಗಿ, ಜನರು ದುಡ್ಡುಕೊಟ್ಟು ನೋಡುವುದನ್ನು ಬಿಟ್ಟು ಕಾಳಸಂತೆಯಲ್ಲಿ ಸಿಗುವ ಪೈರಸಿ ಕಾಪಿಯನ್ನೇ ತೆಗೆದುಕೊಂಡು ನೋಡಿದ್ದರು.

ಚಿತ್ರಮಂದಿರದಲ್ಲಿ ರಿಲೀಸ್​ ಆದ ಮಾತ್ರಕ್ಕೆ ಸಿನಿಮಾ ಪೈರಸಿ ಆಗುವುದಿಲ್ಲ ಎಂದಲ್ಲ. ಸಿನಿಮಾ ಪೈರಸಿ ಆದರೂ ಮೊದಲ ದಿನ ಎಚ್​​ಡಿ ಪ್ರಿಂಟ್​ ಸಿಗುವುದಿಲ್ಲ. ಹೀಗಾಗಿ, ಸಿನಿಮಾ ಲೀಕ್​ ಆದ ಹೊರತಾಗಿಯೂ ಒಂದಷ್ಟು ಮಂದಿಯಾದರೂ ಚಿತ್ರಮಂದಿರದತ್ತ ಹೆಜ್ಜೆ ಹಾಕಿ ಸಿನಿಮಾ ನೋಡುತ್ತಾರೆ. ಹೀಗಾಗಿ, ಒಟಿಟಿಯಲ್ಲಿ ಸಿನಿಮಾ ರಿಲೀಸ್ ಮಾಡಿ ತಪ್ಪು ನಿರ್ಧಾರ ಮಾಡಿದೆ ಎನ್ನುವ ಭಾವನೆ ಸಲ್ಲುಗೆ ಕಾಡಿದೆ.

ಇಷ್ಟಕ್ಕೆ ನಿಂತಿಲ್ಲ. ರಾಧೆ ಸಿನಿಮಾದ ಸಾಕಷ್ಟು ಕ್ಲಿಪ್​ಗಳು ಹಾಗೂ ಸ್ಕ್ರಿನ್​ ಶಾಟ್​ಗಳು ಆನ್​ಲೈನ್​ನಲ್ಲಿ ಹರಿದಾಡಿದ್ದವು. ಇದು ಟ್ರೋಲ್ ಮಾಡುವವರಿಗೆ ಹೆಚ್ಚಿನ ಮಟೀರಿಯಲ್​ ಒದಗಿಸಿಕೊಟ್ಟಂತಾಗಿತ್ತು. ಇನ್ನು, ಸಲ್ಲು ಚಿತ್ರಗಳಲ್ಲಿ ಆ್ಯಕ್ಷನ್​ ಭರಪೂರವಾಗಿರುತ್ತದೆ. ಅವುಗಳನ್ನು ಮೊಬೈಲ್​, ಕಂಪ್ಯೂಟರ್​​ಗಿಂತ ದೊಡ್ಡ ಪರದೆಯಲ್ಲಿ ನೋಡಿದರೆ ಹೆಚ್ಚು ಪ್ರಭಾವಶಾಲಿಯಾಗಿರುತ್ತದೆ. ಈ ಎಲ್ಲಾ ಕಾರಣಕ್ಕೆ ಸಲ್ಮಾನ್​ ಖಾನ್​​ಗೆ​ ಒಟಿಟಿ ಬಗ್ಗೆ ಬೇಸರ ತರಿಸಿದೆ. ಹೀಗಾಗಿ ಮುಂದಿನ ದಿನಗಳಲ್ಲಿ ತಡವಾದರೂ ಸಿನಿಮಾವನ್ನು ಚಿತ್ರಮಂದಿರದಲ್ಲೇ ರಿಲೀಸ್​ ಮಾಡಬೇಕು ಎನ್ನುವ ನಿರ್ಧಾರವನ್ನು ಸಲ್ಲು ತೆಗೆದುಕೊಂಡಿದ್ದಾರೆ.

2017ರಲ್ಲಿ ತೆರೆಕಂಡಿದ್ದ ‘ಟೈಗರ್ ಜಿಂದಾ ಹೇ’ ಚಿತ್ರವೇ ಕೊನೆ. ಅದಾದ ನಂತರದಲ್ಲಿ ಸಲ್ಲುಗೆ ಅಂಥ ಯಶಸ್ಸು ಸಿಕ್ಕಿಲ್ಲ. ‘ರೇಸ್​-3’, ‘ಭಾರತ್’​, ‘ದಬಾಂಗ್​ 3’ ಚಿತ್ರಗಳು ಸೋಲು ಕಂಡಿದ್ದವು. ಈಗ ರಾಧೆ ಸಿನಿಮಾ ಕೂಡ ಮಕಾಡೆ ಮಲಗಿತ್ತು. ಹೀಗಾಗಿ, ಸಲ್ಲು ತೆಲುಗು ಸಿನಿಮಾ ರಿಮೇಕ್​ ಮಾಡಲಿದ್ದಾರೆ ಎನ್ನುವ ಮಾತು ಕೇಳಿ ಬಂದಿದೆ.

ಇದನ್ನೂ ಓದಿ:ರಾಧೆ ನೋಡಿದ ಅಭಿಮಾನಿಗಳಿಗೆ ನಿರಾಸೆ; ತೆಲುಗು ಸಿನಿಮಾ ರಿಮೇಕ್​ ಮಾಡೋಕೆ ಮುಂದಾದ ಸಲ್ಲು 

ಕಾಲಿಗೆ ಬಿದ್ದರೂ ಸರಿಯೇ ನಾನು ಸಲ್ಮಾನ್​ ಸಿನಿಮಾ ವಿಮರ್ಶೆ ಮಾಡಿಯೇ ತೀರುತ್ತೇನೆ; ಜಿದ್ದಿಗೆ ಬಿದ್ದ ಕಮಾಲ್​ ಖಾನ್​