‘ಬಿಗ್ ಬಾಸ್’ ಮನೆಯಲ್ಲಿ ಸುದೀಪ್ ಹೋಲುವ ಮೂರ್ತಿ; ಪ್ರತಿ ವಿಚಾರಕ್ಕೂ ವಿವರಣೆ ನೀಡಿದ ಕಿಚ್ಚ
‘ಬಿಗ್ ಬಾಸ್’ ಮನೆಗೆ ಸುದೀಪ್ ಹಾಗೂ ವಾಸುಕಿ ಆಗಮಿಸಿದ್ದಾರೆ. ಮನೆಯ ಗಾರ್ಡನ್ ಏರಿಯಾ ಬಗ್ಗೆ ವಾಸುಕಿ ತಮ್ಮದೇ ವಿವರಣೆ ನೀಡಿದ್ದಾರೆ. ‘ಜಗತ್ತಿನಲ್ಲಿ ಅತಿ ಹೆಚ್ಚು ಯುದ್ಧಗಳು ಬಹುಶಃ ಇಲ್ಲಿಯೇ ನಡೆದಿರಬೇಕು’ ಎಂದು ಹೇಳಿ ನಕ್ಕಿದ್ದಾರೆ ವಾಸುಕಿ.
‘ಬಿಗ್ ಬಾಸ್ ಒಟಿಟಿ’ (Bigg Boss OTT) ಆರಂಭಕ್ಕೆ ಕ್ಷಣಗಣನೆ ಆರಂಭ ಆಗಿದೆ. ಆಗಸ್ಟ್ 6ರಿಂದ ಹೊಸ ಸೀಸನ್ ಆರಂಭ ಆಗಲಿದೆ. ಈ ಬಾರಿ ಸ್ಪರ್ಧಿಗಳಾಗಿ ಯಾರೆಲ್ಲ ಬರಲಿದ್ದಾರೆ ಎಂಬ ಬಗ್ಗೆ ಒಂದಷ್ಟು ಕುತೂಹಲ ಇದ್ದೇ ಇದೆ. ಇದಕ್ಕೆ ಆಗಸ್ಟ್ 6ರ ಸಂಜೆ 7 ಗಂಟೆಗೆ ಉತ್ತರ ಸಿಗಲಿದೆ. ‘ಬಿಗ್ ಬಾಸ್ ಒಟಿಟಿ’ ಆರಂಭಕ್ಕೂ ಮೊದಲು ದೊಡ್ಮನೆ ಹೇಗಿದೆ ಎಂಬುದನ್ನು ತೋರಿಸಲಾಗಿದೆ. ಸುದೀಪ್ (Sudeep) ಹಾಗೂ ‘ಬಿಗ್ ಬಾಸ್’ ಮಾಜಿ ಸ್ಪರ್ಧಿ, ಸಂಗೀತ ನಿರ್ದೇಶಕ ವಾಸುಕಿ ವೈಭವ್ ಅವರು ದೊಡ್ಮನೆಗೆ ಎಂಟ್ರಿ ಕೊಟ್ಟಿದ್ದಾರೆ. ಈ ಬಾರಿಯ ಮನೆ ಹೇಗಿದೆ ಎಂಬ ಝಲಕ್ ತೋರಿಸಲಾಗಿದೆ.
‘ಬಿಗ್ ಬಾಸ್’ ಮನೆಗೆ ಸುದೀಪ್ ಹಾಗೂ ವಾಸುಕಿ ಆಗಮಿಸಿದ್ದಾರೆ. ಮನೆಯ ಗಾರ್ಡನ್ ಏರಿಯಾ ಬಗ್ಗೆ ವಾಸುಕಿ ತಮ್ಮದೇ ವಿವರಣೆ ನೀಡಿದ್ದಾರೆ. ‘ಜಗತ್ತಿನಲ್ಲಿ ಅತಿ ಹೆಚ್ಚು ಯುದ್ಧಗಳು ಬಹುಶಃ ಇಲ್ಲಿಯೇ ನಡೆದಿರಬೇಕು’ ಎಂದು ಹೇಳಿ ನಕ್ಕಿದ್ದಾರೆ ವಾಸುಕಿ. ನಂತರ ‘ಬಿಗ್ ಬಾಸ್’ ಮನೆಯ ಒಳಗೆ ಇಬ್ಬರೂ ತೆರಳಿದ್ದಾರೆ. ಮೊದಲು ದೇವರ ಮನೆಗೆ ತೆರಳಿ ನಮಿಸಿದ್ದಾರೆ ಸುದೀಪ್ ಹಾಗೂ ವಾಸುಕಿ.
ಈ ಬಾರಿ ದೊಡ್ಮನೆಯಲ್ಲಿ ಒಂದು ಮೂರ್ತಿಯನ್ನು ಇರಿಸಲಾಗಿದೆ. ಆ ಮೂರ್ತಿ ಒಂದು ಕೈಯಲ್ಲಿ ಕಣ್ಣನ್ನು ಮುಚ್ಚಿಕೊಂಡಿದೆ, ಮತ್ತೊಂದು ಕೈ ಕತ್ತಿನ ಮೇಲಿದೆ. ಇದನ್ನು ನೋಡಿದರೆ ಸುದೀಪ್ಗೆ ತಮ್ಮನ್ನೇ ನೋಡಿದಂತೆ ಭಾಸವಾಗುತ್ತಿದೆಯಂತೆ. ಅದಕ್ಕೆ ಅವರು ವಿವರಣೆ ನೀಡಿದ್ದಾರೆ. ‘ಇಲ್ಲಿ ನಡೆಯೋದು ನನ್ನ ಕಣ್ಣಿಗೆ ಕಾಣುತ್ತಿರುತ್ತದೆ. ಆದರೆ, ಏನು ಗೊತ್ತಿಲ್ಲದ ರೀತಿಯಲ್ಲಿ ನಾನು ಇರಬೇಕು. ಇನ್ನು, ಕುತ್ತಿಗೆಯ ಭಾಗದಲ್ಲಿ ಇರುವ ಕೈ ಆನ್ಲೈನ್ಲ್ಲಿ ವೀಕ್ಷಿಸುತ್ತಿರುವ ಜನರು ಹಾಗೂ ಒಳಗಿರುವ ಸ್ಪರ್ಧಿಗಳದ್ದು. ಅವರು ನನ್ನ ಕುತ್ತಿಗೆಗೆ ಕೈ ಹಾಕಿಕೊಂಡಿರುತ್ತಾರೆ. ಈ ಮೂರ್ತಿಗೆ ಕೂದಲು ಮೀಸೆ ಇದ್ದಿದ್ದರೆ ನನ್ನ ರೀತಿಯೇ ಕಾಣುತ್ತಿತ್ತು. ತುಂಬಾ ಸಿಂಬಾಲಿಕ್ ಆಗಿದೆ’ ಎಂದರು ಸುದೀಪ್.
ಇದನ್ನೂ ಓದಿ: ‘ಬಿಗ್ ಬಾಸ್ ಒಟಿಟಿ’ಗೆ ವಾಸುಕಿ ವೈಭವ್ ಎಂಟ್ರಿ; ಮಾಜಿ ಸ್ಪರ್ಧಿ ಕಂಡು ಫ್ಯಾನ್ಸ್ ಖುಷ್
‘ಬಿಗ್ ಬಾಸ್ ಒಟಿಟಿ’ಗೆ ಈ ಬಾರಿ 16 ಸ್ಪರ್ಧಿಗಳು ಇರುತ್ತಾರೆ ಎನ್ನಲಾಗಿದೆ. ಬಿಗ್ ಬಾಸ್ ಮನೆ ಒಳಗೆ ಹೋಗುವ ಸ್ಪರ್ಧಿಗಳು ಯಾರು ಎಂಬ ಬಗ್ಗೆ ಈಗಾಗಲೇ ಸೋಶಿಯಲ್ ಮೀಡಿಯಾದಲ್ಲಿ ಚರ್ಚೆಗಳು ಆರಂಭ ಆಗಿದೆ. ಕೆಲ ಹೆಸರುಗಳು ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿವೆ. ಇದರಲ್ಲಿ ಅಸಲಿ ಯಾವುದು, ನಕಲಿ ಯಾವುದು ಎಂಬ ಪ್ರಶ್ನೆಗೆ ಆಗಸ್ಟ್ 6ರಂದೇ ಉತ್ತರ ಸಿಗಬೇಕಿದೆ.
Published On - 8:29 pm, Fri, 5 August 22
