ಕಿಸ್ ಮತ್ತು ಶರ್ಟ್ ಲೆಸ್ ದೃಶ್ಯದಲ್ಲಿ ಪ್ರಭಾಸ್ಗೆ ಕಿರಿಕಿರಿ; ಈ ವಿಚಾರದಲ್ಲಿ ಅವರದ್ದು ಒಂದೇ ಒಂದು ಕಂಡೀಷನ್
‘ಲವ್ಸ್ಟೋರಿ ಸಿನಿಮಾಗಳಲ್ಲಿ ಕಿಸ್ಸಿಂಗ್ ದೃಶ್ಯಗಳು ಅನಿವಾರ್ಯ. ಈಗಲೂ ಕೂಡ ನನಗೆ ಕಿಸ್ಸಿಂಗ್ ಮತ್ತು ಶರ್ಟ್ ಲೆಸ್ ದೃಶ್ಯಗಳಲ್ಲಿ ನಟಿಸುವಾಗ ಕಿರಿಕಿರಿ ಆಗುತ್ತದೆ’ ಎಂದು ಪ್ರಭಾಸ್ ಹೇಳಿದ್ದಾರೆ.
ನಟ ಪ್ರಭಾಸ್ ಅವರು ಈಗ ‘ರಾಧೆ ಶ್ಯಾಮ್’ (Radhe Shyam Movie) ಸಿನಿಮಾದ ಬಿಡುಗಡೆಯನ್ನು ಎದುರು ನೋಡುತ್ತಿದ್ದಾರೆ. ಮಾರ್ಚ್ 11ರಂದು ಈ ಸಿನಿಮಾ ಬಿಡುಗಡೆ ಆಗಲಿದೆ. ಈ ಚಿತ್ರದಲ್ಲಿ ಪ್ರಭಾಸ್ಗೆ ಜೋಡಿಯಾಗಿ ಪೂಜಾ ಹೆಗ್ಡೆ (Pooja Hegde) ನಟಿಸಿದ್ದಾರೆ. ಈ ಹಿಂದಿನ ಸಿನಿಮಾಗಳಲ್ಲಿ ಆ್ಯಕ್ಷನ್ ಹೀರೋ ಆಗಿ ಮಿಂಚಿದ್ದ ಪ್ರಭಾಸ್ ಅವರಿಗೆ ‘ರಾಧೆ ಶ್ಯಾಮ್’ ಚಿತ್ರದಲ್ಲಿ ಲವರ್ ಬಾಯ್ ಇಮೇಜ್ ಇದೆ. ಅದೇನೇ ಇರಲಿ, ಅವರಿಗೆ ಕಿಸ್ಸಿಂಗ್ ದೃಶ್ಯಗಳೆಂದರೆ ಅಲರ್ಜಿ. ಶರ್ಟ್ ಲೆಸ್ ಆಗಿ ನಟಿಸುವ ಸಂದರ್ಭ ಬಂದರೂ ಕೂಡ ಅವರು ಕಿರಿಕಿರಿ ಪಟ್ಟುಕೊಳ್ಳುತ್ತಾರೆ. ಈ ವಿಚಾರವನ್ನು ಸ್ವತಃ ಪ್ರಭಾಸ್ (Prabhas) ಹೇಳಿಕೊಂಡಿದ್ದಾರೆ. ಕಿಸ್ ಮಾಡುವ ಮತ್ತು ಶರ್ಟ್ ಲೆಸ್ ಆಗಿ ನಟಿಸುವ ಸಂದರ್ಭ ಬಂದರೆ ಅವರು ಒಂದು ಕಂಡೀಷನ್ ಹಾಕುತ್ತಾರೆ. ಏನದು? ಆ ದೃಶ್ಯಗಳ ಚಿತ್ರೀಕರಣದ ವೇಳೆ ಶೂಟಿಂಗ್ ಸೆಟ್ನಲ್ಲಿ ಕಡಿಮೆ ಜನರು ಇರಬೇಕು! ಇದೇ ಪ್ರಭಾಸ್ ಹಾಕುವ ಷರತ್ತು.
‘ನಿರ್ದೇಶಕರು ಆ ರೀತಿಯ ಸ್ಟೋರಿ ಬರೆದಾಗ, ಅದರಲ್ಲಿ ಕಿಸ್ಸಿಂಗ್ ದೃಶ್ಯದ ಅಗತ್ಯ ಇದ್ದರೆ ನಾವು ಅದನ್ನು ತೆಗೆದು ಹಾಕೋಕೆ ಆಗಲ್ಲ. ಕಮರ್ಷಿಯಲ್ ಸಿನಿಮಾಗಳಲ್ಲಿ ಅದನ್ನು ಅವಾಯ್ಡ್ ಮಾಡಬಹುದು. ಆದರೆ ಲವ್ಸ್ಟೋರಿ ಸಿನಿಮಾಗಳಲ್ಲಿ ಅದು ಅನಿವಾರ್ಯ. ಈಗಲೂ ಕೂಡ ನನಗೆ ಕಿಸ್ಸಿಂಗ್ ಮತ್ತು ಶರ್ಟ್ ಲೆಸ್ ದೃಶ್ಯಗಳಲ್ಲಿ ನಟಿಸುವಾಗ ಕಿರಿಕಿರಿ ಆಗುತ್ತದೆ. ಆಗ ಸೆಟ್ನಲ್ಲಿ ಕಡಿಮೆ ಜನರು ಇರುವಂತೆ ನೋಡಿಕೊಳ್ಳುತ್ತೇನೆ ಅಥವಾ ಬೇರೆ ಯಾವುದಾದರೂ ಸ್ಥಳದಲ್ಲಿ ಅದನ್ನು ಚಿತ್ರೀಕರಿಸೋಣ ಎನ್ನುತ್ತೇನೆ. ‘ಛತ್ರಪತಿ’ ಸಿನಿಮಾ ಸಂದರ್ಭದಲ್ಲಿ ರಾಜಮೌಳಿ ಅವರು ನನ್ನ ಶರ್ಟ್ ತೆಗೆಸಿದ್ದರು. ಈಗ ನೀನು ಏನು ಬೇಕಾದರೂ ಮಾಡಬಲ್ಲೆ ಅಂತ ಅವರು ಹೇಳಿದ್ದರು’ ಎಂದಿದ್ದಾರೆ ಪ್ರಭಾಸ್.
ಈಗಾಗಲೇ ‘ರಾಧೆ ಶ್ಯಾಮ್’ ಸಿನಿಮಾ ಟ್ರೇಲರ್ ಮೂಲಕ ನಿರೀಕ್ಷೆ ಹುಟ್ಟುಹಾಕಿದೆ. ಈ ಸಿನಿಮಾ ಮಾರ್ಚ್ 11ರಂದು ತೆರೆಗೆ ಬರುತ್ತಿದೆ. ಈ ಸಿನಿಮಾ ತೆರೆಗೆ ಬರೋಕೆ ಇನ್ನು ಕೆಲವೇ ದಿನಗಳು ಬಾಕಿ ಇವೆ. ರಿಲೀಸ್ ಆದ ಟ್ರೇಲರ್ನಲ್ಲಿ ವಿಲನ್ ಪಾತ್ರದ ಬಗ್ಗೆ ಯಾವುದೇ ಹಿಂಟ್ ನೀಡಿಲ್ಲ. ಸಿನಿಮಾದ ಕಥೆ ನೋಡಿದರೆ, ಈ ಚಿತ್ರದಲ್ಲಿ ವಿಲನ್ ಇಲ್ಲ ಎಂಬುದು ಮೇಲ್ನೋಟಕ್ಕೆ ಕಂಡುಬರುತ್ತದೆ. ಯಾವುದೇ ವೈರತ್ವ ಇಲ್ಲದೆ, ‘ರಾಧೆ ಶ್ಯಾಮ್’ ಸಾಗಲಿದೆ ಎನ್ನಲಾಗುತ್ತಿದೆ.
ರಾಜಮೌಳಿ ಜೊತೆ ಪ್ರಭಾಸ್ ಮತ್ತೆ ಸಿನಿಮಾ:
ಪ್ರಭಾಸ್ ಮತ್ತು ಪೂಜಾ ಹೆಗ್ಡೆ ಅವರು ‘ರಾಧೆ ಶ್ಯಾಮ್’ ಚಿತ್ರದ ಪ್ರಚಾರಕ್ಕಾಗಿ ಊರೂರು ಸುತ್ತುತ್ತಿದ್ದಾರೆ. ದೇಶದ ಪ್ರಮುಖ ನಗರಗಳಲ್ಲಿ ಸಿನಿಮಾದ ಪ್ರಚಾರಕಾರ್ಯ ಮಾಡಲಾಗುತ್ತಿದೆ. ಮುಂಬೈನ ಅಂಧೇರಿಯಲ್ಲಿ ಈ ಸಿನಿಮಾದ ಟ್ರೇಲರ್ ಲಾಂಚ್ ಮಾಡಲಾಯಿತು. ಈ ವೇಳೆ ಪ್ರಭಾಸ್ ಮತ್ತು ರಾಜಮೌಳಿ ಅವರ ಕಾಂಬಿನೇಷನ್ನ ನಾಲ್ಕನೇ ಸಿನಿಮಾದ ಸಾಧ್ಯತೆ ಬಗ್ಗೆ ಪ್ರಶ್ನೆ ಎದುರಾಯಿತು. ಅದಕ್ಕೆ ಪ್ರಭಾಸ್ ಉತ್ತರ ನೀಡಿದ್ದಾರೆ. ‘ರಾಜಮೌಳಿ ಮತ್ತು ನಾನು ಜೊತೆಯಾಗಿ ಮತ್ತೊಂದು ಸಿನಿಮಾ ಮಾಡಬೇಕು ಎಂಬ ಬಗ್ಗೆ ಈ ಹಿಂದೆ ಪ್ಲ್ಯಾನ್ ಮಾಡಿದ್ದು ನಿಜ. ಆದರೆ ರಾಧೆ ಶ್ಯಾಮ್ ಸಿನಿಮಾದ ಬಿಡುಗಡೆ ವಿಳಂಬ ಆಗಿದ್ದರಿಂದ ಆ ಯೋಜನೆಯನ್ನು ಸ್ವಲ್ಪ ಬದಿಗೆ ಇರಿಸಿದ್ದೇವೆ. ಆ ಬಗ್ಗೆ ಶೀಘ್ರದಲ್ಲೇ ಮಾಹಿತಿ ಬಿಟ್ಟುಕೊಡುತ್ತೇವೆ’ ಅಂತ ಪ್ರಭಾಸ್ ಹೇಳಿದ್ದಾರೆ.
ಇದನ್ನೂ ಓದಿ:
‘ನಟ ಸಾರ್ವಭೌಮ’ ಸಿನಿಮಾ ನಟಿಯ ಲಿಪ್ ಕಿಸ್ ಪುರಾಣ; ಸಖತ್ ಟ್ರೋಲ್ ಆಗುತ್ತಿರುವ ಅನುಪಮಾ
ರವಿ ತೇಜ ಜೊತೆಗಿನ ಕಿಸ್ಸಿಂಗ್ ದೃಶ್ಯ ವೈರಲ್; ಮೊದಲ ಬಾರಿಗೆ ಮೌನ ಮುರಿದ ನಟಿ ಮೀನಾಕ್ಷಿ
