ರಶ್ಮಿಕಾ ಡೀಪ್​ಫೇಕ್​ ವಿಡಿಯೋ: ಮುಖ್ಯ ಆರೋಪಿ ಬಂಧನ; ಕಿಡಿಗೇಡಿಯ ಹಿನ್ನೆಲೆ ಏನು ಗೊತ್ತಾ?

ನಟಿ ರಶ್ಮಿಕಾ ಮಂದಣ್ಣ ಅವರಿಗೆ ಡೀಪ್​ಫೇಕ್​ (Deepfake) ಕಾಟ ಎದುರಾಗಿತ್ತು. ಬೇರೆ ಯುವತಿಯ ಹಾಟ್​ ವಿಡಿಯೋಗೆ ರಶ್ಮಿಕಾ ಮಂದಣ್ಣ (Rashmika Mandanna) ಅವರ ಮುಖವನ್ನು ಎಡಿಟ್​ ಮಾಡಿ ಹರಿಬಿಡಲಾಗಿತ್ತು. ಅದನ್ನು ನೋಡಿದ ಬಹುತೇಕರು ನಿಜ ಎಂದು ನಂಬಿದ್ದರು. ಇಂಥ ಬಟ್ಟೆ ಧರಿಸಿದ್ದಕ್ಕೆ ರಶ್ಮಿಕಾಗೆ ಅನೇಕರು ಪಾಠ ಮಾಡಿದ್ದರು. ಸೋಶಿಯಲ್​ ಮೀಡಿಯಾದಲ್ಲಿ ಟ್ರೋಲ್​ ಜೋರಾಗುತ್ತಿದ್ದಂತೆಯೇ ಅಸಲಿ ವಿಚಾರ ಬಯಲಾಯಿತು. ಅದು ರಶ್ಮಿಕಾ ಅವರ ನಿಜವಾದ ವಿಡಿಯೋ ಅಲ್ಲ. ಬದಲಿಗೆ, ಡೀಪ್​ಫೇಕ್​ ವಿಡಿಯೋ (Rashmika Mandanna Deepfake Video) ಎಂಬುದು ತಿಳಿದುಬಂತು. ಈಗ ಆ ವಿಡಿಯೋ ಮಾಡಿದ ಪ್ರಮುಖ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ರಶ್ಮಿಕಾ ಮಂದಣ್ಣ ಅವರ ಡೀಪ್​ಫೇಕ್​ ವಿಡಿಯೋ ಮಾಡಿದ ಪ್ರಮುಖ ಆರೋಪಿಯು ದೆಹಲಿ ಪೊಲೀಸರ ಬಲೆಗೆ ಬಿದ್ದಿದ್ದಾನೆ. ಈತನನ್ನು ಆಂಧ್ರದ ಗುಂಟೂರಿನ ಏಮಾನಿ ನವೀನ್​ ಎಂದು ಗುರುತಿಸಲಾಗಿದೆ. 23 ವರ್ಷದ ಈ ವ್ಯಕ್ತಿ ಈಗ ಪೊಲೀಸರ ಕೈಗೆ ಸಿಕ್ಕಿ ಬಿದ್ದಿದ್ದಾನೆ. ಅಚ್ಚರಿ ಏನೆಂದರೆ, ಇವನು ರಶ್ಮಿಕಾ ಮಂದಣ್ಣ ಅವರ ಫ್ಯಾನ್​ ಪೇಜ್​ ನೋಡಿಕೊಳ್ಳುತ್ತಿದ್ದ! ಆತನಿಂದಲೇ ಈ ರೀತಿ ಕೃತ್ಯ ಆಗಿರುವುದು ಶಾಕಿಂಗ್​ ಸಂಗತಿ.

ಇದನ್ನೂ ಓದಿ: Deepfake: ರಶ್ಮಿಕಾ ಮಂದಣ್ಣ, ಕಾಜೋಲ್​ ಬಳಿಕ ನಟಿ ಆಲಿಯಾ ಭಟ್​ಗೆ ಶುರುವಾಯ್ತು ಡೀಪ್​ಫೇಕ್​ ಕಾಟ

ಪೊಲೀಸರ ಹೇಳಿಕೆ ಪ್ರಕಾರ, ಬಿ.ಟೆಕ್​ ಓದುತ್ತಿರುವ ಏಮಾನಿ ನವೀನ್​ 2019ರಲ್ಲಿ ಗೂಗಲ್​ ಗರಾಜ್​ ಮೂಲಕ ಡಿಜಿಟಲ್​ ಮಾರ್ಕೆಟಿಂಗ್​ ಕೋರ್ಸ್​ ಮಾಡಿದ್ದಾನೆ. ದಕ್ಷಿಣ ಭಾರತದ ಮೂವರು ಸೆಲೆಬ್ರಿಟಿಗಳ ಫ್ಯಾನ್ಸ್​ ಪೇಜ್​ಗಳನ್ನು ಈತ ನಡೆಸುತ್ತಿದ್ದ. ರಶ್ಮಿಕಾ ಮಂದಣ್ಣ ಅವರ ಫ್ಯಾನ್​ ಪೇಜ್​ನಲ್ಲಿ ಫಾಲೋವರ್ಸ್​ ಸಂಖ್ಯೆಯನ್ನು ಹೆಚ್ಚು ಮಾಡಲು ಈ ರೀತಿ ಡೀಪ್​ಫೇಕ್​ ವಿಡಿಯೋ ಮಾಡಲಾಗಿದೆ ಎಂದು ಆತ ಒಪ್ಪಿಕೊಂಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ. ವಿಡಿಯೋ ವೈರಲ್​ ಆದ ಬಳಿಕ ಫಾಲೋವರ್ಸ್​ ಸಂಖ್ಯೆ ಲಕ್ಷ ಮೀರಿತ್ತು.

#WATCH | Delhi: On main accused arrested in the case of deep fake profiles of actor Rashmika Mandana, DCP IFSO Unit Hemant Tiwari says, “..We’ve arrested the main accused identified as Eemani Naveen, 24, from Andhra Pradesh’s Guntur. Laptop and mobile phone recovered from him.… pic.twitter.com/YzLXMcSaZ8

— ANI (@ANI) January 20, 2024

ಪ್ರಮುಖ ಆರೋಪಿ ಏಮಾನಿ ನವೀನ್​ ಬಳಿ ಇದ್ದ ಮೊಬೈಲ್​ ಫೋನ್​, ಲ್ಯಾಪ್​ ಟಾಪ್​ ವಶಕ್ಕೆ ಪಡೆಯಲಾಗಿದೆ. ಅದರಲ್ಲಿ ಇರುವ ಮಾಹಿತಿಯನ್ನು ಪಡೆದುಕೊಳ್ಳಲಾಗುತ್ತಿದೆ. ಆತನೇ ಡೀಪ್​ಫೇಕ್​ ಮಾಡಿದ್ದಾನೆ ಎಂಬುದಕ್ಕೆ ಪೊಲೀಸರಿಗೆ ಸಾಕ್ಷಿಗಳು ದೊರೆತಿವೆ. ಈ ಕುರಿತು ದೆಹಲಿ ಪೊಲೀಸರು ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದ್ದಾರೆ. ಡೀಪ್​ಫೇಕ್​ ಪ್ರಕರಣಕ್ಕೆ ಸಂಬಂಧಿಸಿದಂತೆ ತನಿಖೆ ನಡೆಯುತ್ತಿದೆ. ರಶ್ಮಿಕಾ ಮಂದಣ್ಣ ಅವರ ಡೀಪ್​ಫೇಕ್​ ವಿಡಿಯೋ ವೈರಲ್​ ಆದ 2 ತಿಂಗಳ ಬಳಿಕ ಪ್ರಮುಖ ಆರೋಪಿಯ ಬಂಧನ ಆಗಿದೆ. ಇನ್ನೂ ಕೆಲವರ ಹೆಸರು ಹೊರಬರುವ ಸಾಧ್ಯತೆ ಇದೆ. ಆಲಿಯಾ ಭಟ್​, ಕಾಜೋಲ್​ ಮುಂತಾದ ಸೆಲೆಬ್ರಿಟಿಗಳ ಡೀಪ್​ಫೇಕ್​ ವಿಡಿಯೋಗಳು ಕೂಡ ವೈರಲ್​ ಆಗಿವೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ