ಅನಂತ್ ನಾಗ್ ಬಗ್ಗೆ ಯಶ್ ವಿಶೇಷ ಮಾತು; ಪದ್ಮ ಪ್ರಶಸ್ತಿ ಒತ್ತಾಯಕ್ಕೆ ರಾಕಿಂಗ್ ಸ್ಟಾರ್ ಧ್ವನಿ
‘ಪೀಪಲ್ಸ್ ಪದ್ಮ’ ಅಭಿಯಾನದಲ್ಲಿ ನಟ ಅನಂತ್ ನಾಗ್ ಅವರ ಹೆಸರನ್ನು ಅನೇಕರು ಸೂಚಿಸುತ್ತಿದ್ದಾರೆ. ಯಶ್, ರಿಷಬ್ ಶೆಟ್ಟಿ, ರಕ್ಷಿತ್ ಶೆಟ್ಟಿ, ಪುನೀತ್ ರಾಜ್ಕುಮಾರ್ ಸೇರಿದಂತೆ ಅನೇಕರು ಈ ಅಭಿಯಾನದಲ್ಲಿ ಭಾಗಿ ಆಗಿದ್ದಾರೆ.
Updated on:Jul 21, 2021 | 12:29 PM
ಚಂದನವನದ ಹಿರಿಯ ನಟ ಅನಂತ್ ನಾಗ್ (Anant Nag) ಅವರಿಗೆ ಪದ್ಮ ಪ್ರಶಸ್ತಿ (Padma Award) ಸಿಗಬೇಕು ಎನ್ನುವ ಒತ್ತಾಯ ಜೋರಾಗಿ ಕೇಳಿಬರುತ್ತಿದೆ. ಸಾಮಾಜಿಕ ಜಾಲತಾಣದಲ್ಲಿ ಈ ಬಗ್ಗೆ ಅನೇಕರು ಧ್ವನಿ ಎತ್ತುತ್ತಿದ್ದಾರೆ. ಅಪಾರ ಅಭಿಮಾನಿಗಳು, ಸೆಲೆಬ್ರಿಟಿಗಳು ಟ್ವೀಟ್ ಮಾಡುವ ಮೂಲಕ ಅಭಿಯಾನ ಮಾಡುತ್ತಿದ್ದಾರೆ. ಈಗ ರಾಕಿಂಗ್ ಸ್ಟಾರ್ ಯಶ್ (Yash) ಕೂಡ ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡಿದ್ದಾರೆ. ಅನಂತ್ ನಾಗ್ ಅವರಿಗೆ ಪದ್ಮ ಪ್ರಶಸ್ತಿ ಸಿಗಬೇಕು ಎಂಬ ಕೂಗಿಗೆ ಯಶ್ ದನಿ ಸೇರಿಸಿದ್ದಾರೆ.
‘ನಟನೆ ಎಂದರೆ ವರ್ತಿಸುವುದು. ಒಮ್ಮೆ ಅನಂತ್ ನಾಗ್ ಇದನ್ನು ಹೇಳಿದ್ದರು. ಆ ಮಾತು ನನ್ನಲ್ಲಿ ಉಳಿದುಕೊಂಡಿದೆ. ನಾನು ಬೆಳೆಯುವಾಗ ಅವರ ಕಾಮಿಡಿ ಸಿನಿಮಾಗಳನ್ನು ನೋಡಿ ನಕ್ಕಿದ್ದೇನೆ. ಸಿನಿಮಾದಲ್ಲಿ ಅವರು ಅತ್ತಾಗ ನನ್ನ ಕಣ್ಣುಗಳು ತೇವ ಆಗಿವೆ. ಹಾರರ್ ಸಿನಿಮಾಗಳಲ್ಲಿ ನಮ್ಮನ್ನು ಅವರು ಭಯಪಡಿಸಿದಾಗ ನಾನು ಬೆಚ್ಚಿ ಬಿದ್ದಿದ್ದೇನೆ’ ಎನ್ನುವ ಮೂಲಕ ಅನಂತ್ ನಾಗ್ ಬಗ್ಗೆ ಯಶ್ ಬರಹ ಆರಂಭಿಸಿದ್ದಾರೆ.
‘ಯಾವ ಪಾತ್ರವನ್ನಾದರೂ ಜೀವಿಸಬಲ್ಲ ಇಂಥ ಮೋಡಿಗಾರನ ಜೊತೆ ನಟಿಸಬೇಕು ಎಂದು ನಾನು ಮೊದಲಿನಿಂದಲೂ ಬಯಸುತ್ತಿದ್ದೆ. ಎವರ್ಗ್ರೀನ್ ಎಂಬ ಪದವೇ ಅವರಾಗಿದ್ದಾರೆ. ಯಾಕೆಂದರೆ, ಅವರ ಹಳೇ ಸಿನಿಮಾಗಳನ್ನು ಇಂದು ನೋಡಿದಾಗ ಯಾವುದೂ ಔಟ್ಡೇಟೆಡ್ ಎನಿಸಿಲ್ಲ. ಅವರ ನಟನೆ ಮತ್ತು ಸೃಜನಶೀಲತೆ ಕೂಡ ಹಾಗೆಯೇ ಇದೆ. ನನ್ನ ವೃತ್ತಿಜೀವನದ ಆರಂಭದಿಂದಲೂ ಇಂಥ ಅದ್ಭುತ ನಟನ ಜೊತೆ ಅಭಿನಯಿಸುವ ಅವಕಾಶ ನನಗೆ ಸಿಕ್ಕಿತ್ತು. ಯಾವುದೇ ವಿಷಯದ ಬಗ್ಗೆ ಅವರ ಜ್ಞಾನ ಅಪಾರ. ನನಗೆ ಅವರು ಸದಾ ಸ್ಫೂರ್ತಿ’ ಎಂದು ಯಶ್ ಹೇಳಿದ್ದಾರೆ.
‘ಅನಂತ್ ನಾಗ್ ಅವರು ಕರ್ನಾಟಕದ ಹೆಮ್ಮೆ. ಅವರು ಕೇವಲ ನಟರಲ್ಲ. ಭಾರತೀಯ ಸಿನಿಮಾರಂಗದ ದೊಡ್ಡ ಮೇಧಾವಿ. ಪದ್ಮ ಪ್ರಶಸ್ತಿಗೆ ಅವರಿಗಿಂತ ಇನ್ಯಾರು ಉತ್ತಮರು?’ ಎಂದು ಯಶ್ ಪೋಸ್ಟ್ ಮಾಡಿದ್ದಾರೆ. ಕನ್ನಡ ಚಿತ್ರರಂಗದ ನಟ/ನಿರ್ದೇಶಕರಾದ ರಿಷಬ್ ಶೆಟ್ಟಿ, ರಕ್ಷಿತ್ ಶೆಟ್ಟಿ, ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ಸೇರಿದಂತೆ ಅನೇಕರು ಈ ಅಭಿಯಾನದಲ್ಲಿ ಭಾಗಿ ಆಗಿದ್ದಾರೆ.
#AnanthnagforPadma #padmaawards #PeoplesPadma@PMOIndia pic.twitter.com/xFS1BToTJd
— Yash (@TheNameIsYash) July 20, 2021
‘ಕೆಜಿಎಫ್ ಚಾಪ್ಟರ್ 1’ ಸಿನಿಮಾದಲ್ಲಿ ಅನಂತ್ ನಾಗ್ ಪಾತ್ರ ಗಮನ ಸೆಳೆದಿತ್ತು. ಆದರೆ ಎರಡನೇ ಚಾಪ್ಟರ್ನಲ್ಲಿ ಅವರ ಪಾತ್ರದ ಬಗ್ಗೆ ಕೆಲವು ಗುಸುಗುಸು ಕೇಳಿಬಂದಿದೆ. ಅನಂತ್ ನಾಗ್ ನಿಭಾಯಿಸಿದ್ದ ಪಾತ್ರದ ಗೆಟಪ್ ಧರಿಸಿಯೇ ಪ್ರಕಾಶ್ ರಾಜ್ ಅವರು ‘ಕೆಜಿಎಫ್: ಚಾಪ್ಟರ್ 2’ ಚಿತ್ರತಂಡಕ್ಕೆ ಎಂಟ್ರಿ ನೀಡಿರುವುದರಿಂದ ಅಭಿಮಾನಿಗಳಲ್ಲಿ ತೀವ್ರ ಕೌತುಕ ಮೂಡಿದೆ. ಚಿತ್ರ ಬಿಡುಗಡೆ ಆದ ನಂತರವೇ ಈ ಕುತೂಹಲಕ್ಕೆ ತೆರೆ ಬೀಳಬೇಕಿದೆ.
ಇದನ್ನೂ ಓದಿ:
‘ಪ್ರಶಸ್ತಿಗಿಂತ ಜನರ ಪ್ರೀತಿ ದೊಡ್ಡದು’; AnanthnagForPadma ಆಂದೋಲನದ ಬಗ್ಗೆ ಅನಂತ್ನಾಗ್ ಪ್ರತಿಕ್ರಿಯೆ
ರವಿಚಂದ್ರನ್ ‘ದೃಶ್ಯ 2’ ಶೂಟಿಂಗ್ ಶುರು; ಚಿತ್ರತಂಡಕ್ಕೆ ಹೊಸ ಎಂಟ್ರಿ ಅನಂತ್ ನಾಗ್
Published On - 12:22 pm, Wed, 21 July 21
