RRR Movie: ದಾಖಲೆಯ ಮೊತ್ತಕ್ಕೆ RRR ಚಿತ್ರದ ಆಡಿಯೋ ಹಕ್ಕು ಮಾರಾಟ

ಸೂಪರ್ ಡೂಪರ್ ಹಿಟ್ ಬಾಹುಬಲಿ ಚಿತ್ರ ನಿರ್ದೇಶಕ ರಾಜಮೌಳಿ ಅವರ ಮುಂದಿನ ದೃಶ್ಯಕಾವ್ಯ RRR ಇದೀಗ ಮತ್ತೊಮ್ಮೆ ಸುದ್ದಿಯಲ್ಲಿದೆ. 2 ವರ್ಷಗಳ ಹಿಂದೆ ಸೆಟ್ಟೇರಿದ್ದ ಈ ಚಿತ್ರದ ಅಪ್​ಡೇಟ್​ಗಳು ಒಂದೊಂದಾಗಿ ಹೊರ ಬೀಳುತ್ತಿದ್ದು, ಈ ಬಾರಿ ಗಾಜ ಬಜಾನದೊಂದಿಗೆ ಚಿತ್ರತಂಡ ಸದ್ದು ಮಾಡಿದೆ. ಹೌದು, ಟಾಲಿವುಡ್​ನ ಇಬ್ಬರು ಯಂಗ್ ಅ್ಯಂಡ್ ಎನರ್ಜಿಟಿಕ್ ನಟರನ್ನು ಜೊತೆಗೂಡಿಸಿ ರಾಜಮೌಳಿ ಆರ್​ಆರ್​ಆರ್ ಎಂಬ ಸಿನಿಮಾವನ್ನು ಕೈಗೆತ್ತಿಕೊಂಡಾಗಿನಿಂದಲೂ ಒಂದಲ್ಲ ಒಂದು ರೀತಿಯಲ್ಲಿ ಚಿತ್ರತಂಡ ಸೌಂಡ್ ಮಾಡುತ್ತಾ ಬಂದಿತ್ತು. ಇದೀಗ ಬಹುತೇಕ ಚಿತ್ರೀಕರಣ ಮುಗಿಸಿ ಸಣ್ಣ ಪುಟ್ಟ ಕೆಲಸಗಳನ್ನು ಬಾಕಿ ಇರಿಸಿಕೊಂಡಿರುವ ಚಿತ್ರತಂಡ ಚಿತ್ರದ ಪ್ರಿ ಬಿಸಿನೆಸ್​ಗೆ ಕೈ ಹಾಕಿದೆ. ಅದರ ಮೊದಲ ಹೆಜ್ಜೆಯೇ ಚಿತ್ರದ ಆಡಿಯೋ ಹಕ್ಕು​ ಮಾರಾಟ.

ಈ ಹಿಂದೆ ದಾಖಲೆಯ ಮೊತ್ತಕ್ಕೆ KGF-2 ಆಡಿಯೋ ಹಕ್ಕು ಖರೀದಿಸಿದ ಟಿ ಸಿರೀಸ್ ಹಾಗೂ ಲಹರಿ ಸಂಸ್ಥೆ ಜೊತೆಗೂಡಿ ರಣ ರೌದ್ರ ರುಧಿರ (RRR) ಚಿತ್ರದ ಆಡಿಯೋ ರೈಟ್ಸ್​ ಅನ್ನು ತನ್ನದಾಗಿಸಿಕೊಂಡಿದೆ. ಪಂಚ ಭಾಷೆಗಳಲ್ಲಿ ತೆರೆ ಕಾಣಲಿರುವ ಈ ಚಿತ್ರದ ಹಾಡಿನ ಹಕ್ಕಿಗಾಗಿ ಟಿ ಸಿರೀಸ್-ಲಹರಿ ಸಂಸ್ಥೆಯು 25 ಕೋಟಿ ನೀಡಿದೆ ಎಂದು ಹೇಳಲಾಗಿದೆ. ಅಂದರೆ ಎಂಎಂ ಕೀರವಾಣಿ ಬ್ಯಾಂಡ್ ಬಜಾಯಿಸಿರುವ ಈ ಚಿತ್ರದ ಕನ್ನಡ, ತೆಲುಗು, ತಮಿಳು, ಹಿಂದಿ ಹಾಗೂ ಮಲಯಾಳಂ ಹಾಡುಗಳಿಗಾಗಿ ಈ ಎರಡೂ ಸಂಸ್ಥೆಗಳು ಕಾಲು ಕೋಟಿ ಹಣ ವ್ಯಯಿಸಿದೆ. ಈ ಹಿಂದೆ ಕೆಜಿಎಫ್-2 ಚಿತ್ರದ ದಕ್ಷಿಣ ಭಾಷೆಗಳ ಆಡಿಯೋ ರೈಟ್ಸ್​ಗಾಗಿ ಲಹರಿ ಸಂಸ್ಥೆ 7.2 ಕೋಟಿ ನೀಡಿ ದಾಖಲೆ ಬರೆದಿತ್ತು. ಇದೀಗ ರಣ ರೌದ್ರ ರುಧಿರ ಮೂಲಕ ತಮ್ಮದೇ ದಾಖಲೆಯನ್ನು ಲಹರಿ ಆಡಿಯೋ ಸಂಸ್ಥೆ ಮುರಿದಿದೆ.

ಇನ್ನು RRR ಸಿನಿಮಾ ಈಗಾಗಲೇ 400 ಕೋಟಿಗೂ ಅಧಿಕ ಮೊತ್ತದ ಪ್ರಿ-ರಿಲೀಸ್ ವ್ಯವಹಾರ ನಡೆಸಿದೆ ಎಂದು ಹೇಳಲಾಗುತ್ತಿದೆ. ಇದು ಭಾರತೀಯ ಚಿತ್ರರಂಗದ ಹೊಸ ದಾಖಲೆಯಾಗಿದೆ. ಈ ಹಿಂದೆ ಬಾಹುಬಲಿ 2 ಚಿತ್ರವು ಬಿಡುಗಡೆಗೂ ಮುನ್ನ ಸುಮಾರು 300 ಕೋಟಿ ವ್ಯವಹಾರ ಕುದುರಿಸಿತ್ತು. ಇದೀಗ ರಾಜಮೌಳಿ ಅವರ ಚಿತ್ರವೇ ಈ ಹಿಂದಿನ ದಾಖಲೆಯನ್ನು ಬದಿಗೊತ್ತಿದೆ ಎಂಬ ಮಾತುಗಳು ಟಾಲಿವುಡ್​ನಲ್ಲಿದೆ. ಹಾಗೆಯೇ ಈ ಸಿನಿಮಾ ಭಾರತೀಯ ಚಿತ್ರರಂಗದ ಅತೀ ದೊಡ್ಡ ಪ್ಯಾನ್ ಸಿನಿಮಾ ಎಂಬ ದಾಖಲೆಯನ್ನು ಬರೆಯಲಿದೆ. ಏಕೆಂದರೆ ಆರ್​ಆರ್​ಆರ್​ ಚಿತ್ರವನ್ನು ಇಂಗ್ಲಿಷ್ ಸೇರಿದಂತೆ 10 ಭಾಷೆಯಲ್ಲಿ ಏಕಕಾಲಕ್ಕೆ ರಿಲೀಸ್ ಮಾಡಲು ಭರ್ಜರಿ ಪ್ಲ್ಯಾನ್ ಮಾಡಿಲಾಗಿದ್ದು, ಅದರಂತೆ ಈ ಬಾರಿ ವಿಶ್ವ ಸಿನಿ ಬಾಕ್ಸಾಫೀಸ್ ಮೇಲೆ ಕಣ್ಣಿಟ್ಟಿದ್ದಾರೆ ನಿರ್ದೇಶಕ ರಾಜಮೌಳಿ.

ದೇಶಭಕ್ತಿಯ ಕಥಾಹಂದರವನ್ನು ಹೊಂದಿರುವ ಈ ಚಿತ್ರದಲ್ಲಿ ಜೂ.ಎನ್​ಟಿಆರ್ ಕೋಮರಂ ಭೀಮ್ ಪಾತ್ರದಲ್ಲಿ ಕಾಣಿಸಿಕೊಂಡರೆ, ರಾಮ್​ ಚರಣ್ ತೇಜ ಅಲ್ಲುರಿ ಸೀತಾರಾಮ ರಾಜು ಪಾತ್ರಕ್ಕೆ ಬಣ್ಣ ಹಚ್ಚಿದ್ದಾರೆ. ಹಾಗೆಯೇ ಈ ಬಿಗ್ ಬಜೆಟ್ ಚಿತ್ರಕ್ಕೆ ಡಿ.ವಿ ದಾನಯ್ಯ ಸುಮಾರು 400 ಕೋಟಿ ಬಂಡವಾಳ ಹೂಡಿದ್ದಾರೆ. ಚಿತ್ರದಲ್ಲಿ ರಾಮ್ ಚರಣ್, ಜೂ.ಎನ್​ಟಿಆರ್ ಹೊರತಾಗಿ ಬಾಲಿವುಡ್ ತಾರೆಯಾರಾದ ಅಜಯ್ ದೇವಗನ್, ಆಲಿಯಾ ಭಟ್, ಸೌತ್ ಸುಂದರಿ ಶ್ರಿಯಾ ಶರಣ್, ಹಾಲಿವುಡ್ ಕಲಾವಿದರಾದ ಐರಿಶ್ ಬ್ಯೂಟಿ ಅಲಿಸನ್ ಡೂಡಿ , ರೇ ಸ್ಟೀವನ್ಸನ್​ ಸೇರಿದಂತೆ ಹಲವರು ಬಣ್ಣ ಹಚ್ಚಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ನಡೆದರೆ ಅಕ್ಟೋಬರ್ 13 ರಂದು ವಿಶ್ವದಾದ್ಯಂತ ಚಿತ್ರಮಂದಿರಗಳಲ್ಲಿ ರಣ ರೌದ್ರ ರುಧಿರನ (RRR Movie) ಆರ್ಭಟ ಶುರುವಾಗಲಿದೆ.

ಇದನ್ನೂ ಓದಿ: Viral Story: ಟ್ರಾಫಿಕ್​ ಪೊಲೀಸ್​ ಮನೆಯಲ್ಲಿ ಚಿನ್ನದ ಟಾಯ್ಲೆಟ್

ಇದನ್ನೂ ಓದಿ: ಈವರೆಗೆ ಟೀಮ್ ಇಂಡಿಯಾ ಪರ ಎಷ್ಟು ಮಂದಿ ಆಡಿದ್ದಾರೆ ಗೊತ್ತಾ?

(Lahari acquires RRR Movie audio for one of the biggest ever price)