ವಾರ್ನರ್​ಗೆ ತಟ್ಟಿದ ಶಾಪ; ರಾಜಮೌಳಿ ಜೊತೆ ಕೆಲಸ ಮಾಡಿ ಅನ್​ಸೋಲ್ಡ್ ಆದ ಆಸ್ಟ್ರೇಲಿಯಾ ಆಟಗಾರ  

ಎಸ್​ಎಸ್​ ರಾಜಮೌಳಿ ಜೊತೆ ಸಿನಿಮಾ ಮಾಡಿದರೆ ಆ ಹೀರೋನ ಮುಂದಿನ ಸಿನಿಮಾ ಸೋಲು ಕಾಣುತ್ತದೆ ಎಂಬುದು ಅನೇಕರ ನಂಬಿಕೆ. ಕಾಕತಾಳಿಯ ಎಂಬಂತೆ ಇದು ಅನೇಕ ಬಾರಿ ನಿಜ ಕೂಡ ಆಗಿದೆ. ಜೂನಿಯರ್​ ಎನ್​ಟಿಆರ್, ರಾಮ್ ಚರಣ್ ಸೇರಿ ಅನೇಕರಿಗೆ ಈ ಅನುಭವ ಆಗಿದೆ. ಈಗ ವಾರ್ನರ್​ ಅವರಿಗೂ ರಾಜಮೌಳಿ ಜೊತೆ ಕೆಲಸ ಮಾಡಿದ ಶಾಪ ತಟ್ಟಿದೆ ಎಂದು ಅನೇಕರು ಹೇಳಿದ್ದಾರೆ! ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ.

ರಾಜಮೌಳಿ ಅವರು ಹಲವು ಸ್ಟಾರ್ ಹೀರೋಗಳ ಜೊತೆ ಕೆಲಸ ಮಾಡಿದ್ದಾರೆ. ಅವರು ನಿರ್ದೇಶನ ಮಾಡಿದ ಬಹುತೇಕ ಸಿನಿಮಾಗಳು ಸೂಪರ್ ಹಿಟ್. ಆದರೆ, ಈ ಹೀರೋಗಳ ಮುಂದಿನ ಸಿನಿಮಾ ಸೋಲೋದು ಪಕ್ಕಾ. ಈ ಬಗ್ಗೆ ಅನೇಕರಿಗೆ ಅನುಭವ ಆಗಿದೆ. ಪ್ರಭಾಸ್ ನಟನೆಯ ‘ಬಾಹುಬಲಿ 2’ ಸೂಪರ್ ಹಿಟ್ ಆಯಿತು. ನಂತರ ಬಂದ ‘ಸಾಹೋ’ ಫ್ಲಾಪ್ ಆಯಿತು. ‘ಆರ್​ಆರ್​ಆರ್​’ ಬಳಿಕ ರಾಮ್ ಚರಣ್ ಅವರು ‘ಆಚಾರ್ಯ’ ಮೂಲಕ ಸೋಲು ಕಂಡರು. ಜೂನಿಯರ್​ ಎನ್​ಟಿಆರ್ ‘ಆರ್​ಆರ್​ಆರ್​’ ಬಳಿಕ ಮಾಡಿದ ‘ದೇವರ’ ಸಾಧಾರಣ ಯಶಸ್ಸು ಕಂಡಿತು.

ಇದನ್ನೂ ಓದಿ: ‘ಆ ನಟನ ಜೊತೆ ಸಿನಿಮಾ ಮಾಡೋ ಅವಕಾಶ ತಪ್ಪಿತ್ತು’: ನಿರ್ದೇಶಕ ರಾಜಮೌಳಿ ಬೇಸರ

ಹೀಗಾಗಿ, ಇದು ಶಾಪ ಎಂದು ಅನೇಕರು ಪರಿಗಣಿಸುತ್ತಾರೆ. ಈಗ ಈ ಶಾಪ ಡೇವಿಡ್ ವಾರ್ನರ್​ಗೂ ತಟ್ಟಿದೆ ಎಂದು ಅನೇಕರು ಮಾತನಾಡಿಕೊಂಡಿದ್ದಾರೆ. ರಾಜಮೌಳಿ ಹಾಗೂ ವಾರ್ನರ್ ಕ್ರೆಡ್ ಜಾಹೀರಾತಿನಲ್ಲಿ ಒಟ್ಟಾಗಿ ನಟಿಸಿದ್ದರು. ರಾಜಮೌಳಿ ಅವರು ವಾರ್ನರ್ ಜೊತೆ ಸಿನಿಮಾ ಮಾಡುವ ರೀತಿಯಲ್ಲಿ ಜಾಹೀರಾತು ಮೂಡಿ ಬಂದಿತ್ತು.

Rajamouli curse for real pic.twitter.com/Gerwgd2Rr3

— Surya (@msdian_dhfm7) November 26, 2024

ಈ ಜಾಹೀರಾತು ಈಗ ಮತ್ತೆ ವೈರಲ್ ಆಗಿದೆ. ರಾಜಮೌಳಿ ಅವರ ಜೊತೆ ವಾರ್ನರ್ ಕೆಲಸ ಮಾಡಿದ ಕಾರಣಕ್ಕೆ ಅವರು ಅನ್​ಸೋಲ್ಡ್ ಆಗಿ ಉಳಿದರು ಎಂದು ಅನೇಕರು ಮಾತನಾಡಿಕೊಂಡಿದ್ದಾರೆ. ‘ರಾಜಮೌಳಿ ಶಾಪ ನಿಜ’ ಎಂದು ಕೆಲವರು ಹೇಳಿದ್ದಾರೆ. ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಈ ಬಗ್ಗೆ ಮೀಮ್​ಗಳು ಹರಿದಾಡುತ್ತಿವೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.

Published On - 2:58 pm, Wed, 27 November 24