ಬಿಗ್ಬಾಸ್ ಇತಿಹಾಸದಲ್ಲೇ ಮೊದಲು, ಮನೆಯ ಕ್ಯಾಪ್ಟನ್ನೇ ಹೊರಗೆ
Bigg Boss: ಈ ಬಾರಿ ಬಿಗ್ಬಾಸ್ ಮನೆಯಲ್ಲಿ ಹಲವು ವಿಶೇಷತೆಗಳು ನಡೆದಿವೆ. ವಿವಾದದಿಂದಲೂ, ಒಳ್ಳೆಯ ಮನೊರಂಜನೆ ಎರಡರಿಂದಲೂ ಬಿಗ್ಬಾಸ್ ಗಮನ ಸೆಳೆದಿದೆ. ಏಳನೇ ವಾರದ ಎಲಿಮಿನೇಷನ್ನಲ್ಲಿ ಬಿಗ್ಬಾಸ್ ಇತಿಹಾಸದಲ್ಲಿ ನಡೆಯದಿದ್ದ ಘಟನೆಯೊಂದು ನಡೆದಿದೆ.
ಬಿಗ್ಬಾಸ್ (Bigg Boss) ಕನ್ನಡ ಸೀಸನ್ 10 ಹಲವು ಅಪರೂಪದ ಘಟನೆಗಳಿಗೆ ಸಾಕ್ಷಿಯಾಗುತ್ತಿದೆ. ಆರಂಭದಲ್ಲಿ ವರ್ತೂರು ಸಂತೋಷ್ ಪ್ರಕರಣದಿಂದ ಸುದ್ದಿಯಾಯ್ತು. ಬಳಿಕ ಬಿಗ್ಬಾಸ್ ಮನೆಯಲ್ಲಿ ಮಹಿಳೆಯರಿಗೆ, ಮಹಿಳೆ ಧರಿಸುವ ಬಳೆಗೆ ಅಪಮಾನ ಮಾಡಲಾಯ್ತು ಅದೂ ಸಹ ಹೊರಗೆ ಚರ್ಚೆಗೆ ಕಾರಣವಾಯ್ತು. ಅದಾದ ಬಳಿಕ ತನಿಷಾರ ಮಾತೊಂದರ ವಿರುದ್ಧ ದೂರು ದಾಖಲಾಯ್ತು. ಇವೆಲ್ಲದರ ನಡುವೆ ಮನೆಯ ಒಳಗೂ ಕೆಲವು ಅಪರೂಪದ ಘಟನೆಗಳು ನಡೆದವು. ಬಿಗ್ಬಾಸ್ ಇತಿಹಾಸದಲ್ಲಿ ಇದೇ ಮೊದಲನೇ ಬಾರಿಗೆ ಮನೆಯ ಕ್ಯಾಪ್ಟನ್ ಎಲಿಮಿನೇಟ್ ಆಗಿದ್ದಾರೆ.
ಈ ವಾರ ನೀತು ವನಜಾಕ್ಷಿ ಅವರು ಮನೆಯ ಕ್ಯಾಪ್ಟನ್ ಆಗಿದ್ದರು. ಆದರೆ ಈ ಬಾರಿ ಅವರೇ ಮನೆಯಿಂದ ಹೊರಗೆ ಹೋಗಿದ್ದಾರೆ. ಬಿಗ್ಬಾಸ್ ನಿಯಮದ ಪ್ರಕಾರ, ಯಾರು ಕ್ಯಾಪ್ಟನ್ ಆಗಿರುತ್ತಾರೋ ಅವರು ಮುಂದಿನ ವಾರ ನಾಮಿನೇಷನ್ನಿಂದ ಹೊರಗೆ ಇರುತ್ತಾರೆ. ಹಾಗಾಗಿ ನೀತು ಈ ಒಂದು ವಾರ ಉಳಿದುಕೊಂಡಿದ್ದರೆ ಇನ್ನೂ ಎರಡು ವಾರಗಳ ಕಾಲ ಮನೆಯಲ್ಲಿ ಕಳೆಯಬಹುದಿತ್ತು ಆದರೆ ಅವರ ಅದೃಷ್ಟ ಸರಿಯಿರಲಿಲ್ಲ. ಒಂದೇ ಸೀಸನ್ನಲ್ಲಿ ಎರಡು ಬಾರಿ ಮನೆಯ ಕ್ಯಾಪ್ಟನ್ ಆದ ಮಹಿಳಾ ಸ್ಪರ್ಧಿಯಾಗಿರುವ ನೀತು ಕ್ಯಾಪ್ಟನ್ ಆಗಿದ್ದಾಗಲೇ ಮನೆಯಿಂದ ಹೊರ ಹೊಗಬೇಕಾಯ್ತು.
ಇದನ್ನೂ ಓದಿ:ಬಿಗ್ಬಾಸ್ ಏಳನೇ ವಾರದಲ್ಲಿ ಯಾರಿಗೆ ಹೆಚ್ಚು ಮತ? ಸಂಗೀತಾಗೆ ಎಷ್ಟನೇ ಸ್ಥಾನ?
ಈ ವಾರ ನಾಮಿನೇಟ್ ಆದವರಿಗೆ ಜನರು ಹಾಕಿರುವ ಮತಗಳ ಆಧಾರದಲ್ಲಿ ನಾಮಿನೇಷನ್ನಿಂದ ಸೇಫ್ ಮಾಡಲಾಯ್ತು. ಅತಿ ಹೆಚ್ಚು ಮತ ಗಳಿಸಿದ್ದ ಡ್ರೋನ್ ಪ್ರತಾಪ್, ತನಿಷಾ, ಸಂಗೀತಾ, ವಿನಯ್ ಅವರುಗಳು ಶನಿವಾರದ ಎಪಿಸೋಡ್ನಲ್ಲಿಯೇ ಸೇಫ್ ಆದರು. ಭಾನುವಾರದ ಎಪಿಸೋಡ್ನಲ್ಲಿ ಸ್ನೇಹಿತ್, ನಮ್ರತಾ, ತುಕಾಲಿ, ಸಿರಿ, ನೀತು ಅವರುಗಳು ಉಳಿದುಕೊಂಡಿದ್ದರು.
ಮತಗಳ ಆಧಾರದಲ್ಲಿ ಮೊದಲು ನಮ್ರತಾ ಸೇಫ್ ಆದರು, ಬಳಿಕ ತುಕಾಲಿ ಸೇಫ್ ಆದರು. ಆ ಬಳಿಕ ಸ್ನೇಹಿತ್ ಸೇಫ್ ಅಂತಿಮವಾಗಿ ಸಿರಿ ಹಾಗೂ ನೀತು ಬಾಕಿ ಉಳಿದರು. ಕೊನೆಗೆ ಕಡಿಮೆ ಮತ ಗಳಿಸಿದ್ದ ನೀತು ಮನೆಯಿಂದ ಹೊರಗೆ ಹೋಗಲೇ ಬೇಕಾಯ್ತು. ನೀತು ಹೊರಗೆ ಹೋಗುವ ಸಮಯದಲ್ಲಿ ಡ್ರೋನ್ ಪ್ರತಾಪ್ ಬಹಳ ಅತ್ತರು. ಹೋಗಬೇಡಿ ಎಂದು ಗೋಗರೆದರು. ನೀತು ಸಹ ಬಹಳ ಭಾವುಕರಾದರು. ನೀತು ಈ ವಾರ ಕ್ಯಾಪ್ಟನ್ ಸಹ ಆಗಿದ್ದರಿಂದ, ತಮ್ಮ ಕ್ಯಾಪ್ಟೆನ್ಸಿಯನ್ನು ಮೈಖಲ್ಗೆ ವರ್ಗಾವಣೆ ಮಾಡಿ ಮನೆಯಿಂದ ಹೊರಗೆ ನಡೆದರು.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
