ಲೈಟ್ ಆಫ್ ಆದಾಗ ತಪ್ಪು ಮಾಡಿದ ಬಿಗ್ ಬಾಸ್ ಮನೆ ಮಂದಿ; ಚೈತ್ರಾ, ಮಾನಸಾಗೆ ಶಿಕ್ಷೆ

ಒಮ್ಮೆ ಬಿಗ್ ಬಾಸ್ ಮನೆಯೊಳಗೆ ಸ್ಪರ್ಧಿಗಳು ಕಾಲಿಟ್ಟ ಬಳಿಕ ಅವರಿಗೆ ಹೊರಜಗತ್ತಿನ ಸಂಪರ್ಕ ಕಡಿತ ಆಗುತ್ತದೆ. ಫ್ಯಾಮಿಲಿಯವರಿಂದ ಕೂಡ ಸಂಪರ್ಕ ಇರುವುದಿಲ್ಲ. ತೀರಾ ಅಪರೂಪಕ್ಕೆ ಮಾತ್ರ ಕುಟುಂಬದವರ ಜೊತೆ ಮಾತನಾಡುವ ಅಥವಾ ಪತ್ರ ಪಡೆಯುವ ಅವಕಾಶ ಇರುತ್ತದೆ. ಹಾಗಂತ ಆ ಅವಕಾಶ ಸುಲಭವಾಗಿ ಸಿಗುವುದಿಲ್ಲ. ಅದಕ್ಕಾಗಿ ಕಷ್ಟಪಡಬೇಕು. ಇತ್ತೀಚೆಗೆ ಬಿಗ್ ಬಾಸ್ ಒಂದು ಟಾಸ್ಕ್ ನೀಡಿದ್ದರು. ಆ ಟಾಸ್ಕ್ ಆಡುವಾಗ ಬೇರೆಯವರು ತಪ್ಪು ಮಾಡಿದ್ದರಿಂದ ಚೈತ್ರಾ ಕುಂದಾಪುರ ಮತ್ತು ಮಾಸನಾ ಅವರಿಗೆ ಕುಟುಂಬದವರ ಸಂದೇಶ ಮಿಸ್ ಆಗಿದೆ.

ಆಟದ ನಿಯಮ ಹೀಗಿತ್ತು. ಬಝರ್ ಆದಾಗ ಬಿಗ್ ಬಾಸ್ ಮನೆಗೆ ಹೊರಗಿನವರು ಬಂದು ಡಿಸ್ಟರ್ಬ್​ ಮಾಡುತ್ತಾರೆ. ಆದರೆ ಸ್ಪರ್ಧಿಗಳು ಯಾರೂ ಕೂಡ ಪ್ರತಿಕ್ರಿಯಿಸುವಂತಿಲ್ಲ. ಸ್ಪೀಕರ್​, ಟಿವಿಯಲ್ಲಿ ಏನೇ ಬಂದರೂ ಅದಕ್ಕೆ ರಿಯಾಕ್ಟ್ ಮಾಡಬಾರದು. ಆದರೆ ಅದರ ಜೊತೆಗೆ ಇನ್ನೊಂದು ಟ್ವಿಸ್ಟ್​ ಸಹ ನೀಡಲಾಯಿತು. ಏಕಾಏಕಿ ಲೈಟ್ ಆಫ್​ ಮಾಡಲಾಯಿತು. ಆಗ ಕೆಲವರು ತಪ್ಪು ಮಾಡಿದರು.

ಏನದು ತಪ್ಪು? ಲೈಟ್​ ಆಫ್​ ಆದಾಗ ಪ್ರತಿಕ್ರಿಯಿಸಿದ್ದು. ಹೌದು, ಸಾಮಾನ್ಯವಾಗಿ ಬಿಗ್ ಬಾಸ್ ಮನೆಯಲ್ಲಿ ಬೆಳಗ್ಗೆ, ಮಧ್ಯಾಹ್ನ ಅಥವಾ ಸಂಜೆ ಲೈಟ್​ ಆಫ್​ ಆಗುವುದಿಲ್ಲ. ರಾತ್ರಿ ಲೈಟ್ ಆಫ್ ಆದಾಗ ಮಲಗಬೇಕು. ಆದರೆ ಶುಕ್ರವಾರದ ಎಪಿಸೋಡ್​ನಲ್ಲಿ ತುಸು ಮುಂಚೆಯೇ ಲೈಟ್ ಆಫ್​ ಆದಾಗ ಬಹುತೇಕರಿಗೆ ಶಾಕ್ ಆಯಿತು. ‘ಈಗಲೇ ಮಲಗಬೇಕಾ’ ಎಂದು ಪ್ರತಿಕ್ರಿಯೆ ನೀಡಿದರು. ಈ ತಪ್ಪಿನಿಂದಾಗಿ ಮಾಸನಾ ಮತ್ತು ಚೈತ್ರಾ ಅವರಿಗೆ ಸಿಗಬೇಕಿದ್ದ ಮನೆಯವರ ಸಂದೇಶವನ್ನು ಬಿಗ್ ಬಾಸ್ ಕ್ಯಾನ್ಸಲ್ ಮಾಡಿದರು.

ಇದನ್ನೂ ಓದಿ: ನೀವು ಹೊರಗಡೆ ಚೆನ್ನಾಗಿ ಕಾಣಿಸಲ್ಲ: ಮಾನಸಾಗೆ ನೇರವಾಗಿ ಹೇಳಿದ ಐಶ್ವರ್ಯಾ

ಕೆಲವು ವಾರಗಳ ಹಿಂದೆ ಮಾಸನಾ ಅವರಿಗೆ ಪತಿ ತುಕಾಲಿ ಸಂತೋಷ್ ಅವರಿಂದ ಫೋನ್ ಕರೆ ಬಂದಿತ್ತು. ಆದರೆ ಚೈತ್ರಾ ಅವರಿಗೆ ಈ ರೀತಿಯ ಯಾವುದೇ ಅವಕಾಶ ಸಿಕ್ಕಿರಲಿಲ್ಲ. ಹಾಗಾಗಿ ಅವರಿಗೆ ಈ ಬಾರಿ ಕೂಡ ಸಂದೇಶ ಮಿಸ್ ಆಗಿದ್ದಕ್ಕೆ ಸಖತ್ ದುಃಖ ಆಗಿದೆ. ಒಬ್ಬರೇ ಕುಳಿತು ಅವರು ಕಣ್ಣೀರು ಸುರಿಸಿದ್ದಾರೆ. ಅದೇ ರೀತಿ ಧನರಾಜ್​ ಕೂಡ ಹಿಂದಿನ ಸುತ್ತಿನಲ್ಲಿ ಅವಕಾಶ ಕಳೆದುಕೊಂಡರು. ಅವರು ಸಹ ಮಗುವನ್ನು ನೆನಪಿಸಿಕೊಂಡು ಜೋರಾಗಿ ಅತ್ತರು. ಅವರನ್ನು ಸಮಾಧಾನ ಮಾಡಲು ಇನ್ನುಳಿದವರು ಪ್ರಯತ್ನಿಸಿದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.