‘ಟೋಬಿ’ ಮಾತ್ರವಲ್ಲ, ಈ ವಾರ ಬಿಡುಗಡೆ ಆಗುತ್ತಿವೆ ಇನ್ನೂ ಹಲವು ಸಿನಿಮಾಗಳು

ಸಿನಿಪ್ರಿಯರ ಪಾಲಿಗೆ ಈ ವರ್ಷದ ಆಗಸ್ಟ್​ ತಿಂಗಳು ತುಂಬ ಸ್ಪೆಷಲ್​ ಆಗಿತ್ತು. ಈ ತಿಂಗಳಲ್ಲಿ ಬಿಡುಗಡೆಯಾದ (New Movies) ಒಂದಷ್ಟು ಸಿನಿಮಾಗಳು ಸೂಪರ್​ ಹಿಟ್​ ಆಗಿವೆ. ಆಗಸ್ಟ್​ ಆಟ ಇನ್ನೂ ಮುಗಿದಿಲ್ಲ. ಈ ತಿಂಗಳ ಕೊನೇ ವಾರ ಕೂಡ ಅದ್ದೂರಿಯಾಗಿಯೇ ಇರಲಿದೆ. ಈ ವಾರ (ಆಗಸ್ಟ್​ 25) ಕೆಲವು ಬಹುನಿರೀಕ್ಷಿತ ಸಿನಿಮಾಗಳು ಬಿಡುಗಡೆ ಆಗುತ್ತಿವೆ. ಕನ್ನಡದ ‘ಟೋಬಿ’ (Toby Kannada Movie) ಬಗ್ಗೆ ಬಹಳ ನಿರೀಕ್ಷೆ ಇದೆ. ಅತ್ತ, ಹಿಂದಿಯಲ್ಲಿ ‘ಡ್ರೀಮ್​ ಗರ್ಲ್​ 2’ (Dream Girl 2) ಸಿನಿಮಾ ಪೈಪೋಟಿ ನೀಡಲು ಬರುತ್ತಿದೆ. ಮಲಯಾಳಂನಲ್ಲಿ ದುಲ್ಕರ್​ ಸಲ್ಮಾನ್​ ನಟನೆಯ ‘ಕಿಂಗ್​ ಆಫ್​ ಕೋತ್ತಾ’ ಸಿನಿಮಾ ಕೂಡ ಬಿಡುಗಡೆ ಆಗಿದೆ. ಆ.26ರಂದು ತೆಲುಗಿನಲ್ಲಿ ‘ಬಾಯ್ಸ್​ ಹಾಸ್ಟೆಲ್​’ ತೆರೆಕಾಣಲಿದೆ. ಈ ಎಲ್ಲ ಸಿನಿಮಾಗಳ ಜೊತೆ ಹಾಲಿವುಡ್​ ಚಿತ್ರಗಳು ಕೂಡ ಸ್ಪರ್ಧೆಗೆ ಇಳಿಯುತ್ತಿವೆ. ಹಾಗಾಗಿ ಈ ವಾರ ಸಹ ಸಿನಿಪ್ರಿಯರಿಗೆ ಅನೇಕ ಸಿನಿಮಾಗಳನ್ನು ನೋಡುವ ಅವಕಾಶ ಸಿಗುತ್ತಿದೆ. ಆ ಬಗ್ಗೆ ಇಲ್ಲಿದೆ ಒಂದಷ್ಟು ಮಾಹಿತಿ..

‘ಟೋಬಿ’ ಅವತಾದಲ್ಲಿ ರಾಜ್​ ಬಿ. ಶೆಟ್ಟಿ:

ನಟ ರಾಜ್​ ಬಿ. ಶೆಟ್ಟಿ ಅವರು ಚಿತ್ರರಂಗದಲ್ಲಿ ತಮ್ಮದೇ ಛಾಪು ಮೂಡಿಸಿದ್ದಾರೆ. ಈಗಾಗಲೇ ಅವರು ಬೇರೆ ಬೇರೆ ಪಾತ್ರಗಳ ಮೂಲಕ ಜನರನ್ನು ರಂಜಿಸಿದ್ದಾರೆ. ಈಗ ಅವರ ‘ಟೋಬಿ’ ಸಿನಿಮಾ ಬಿಡುಗಡೆ ಆಗುತ್ತಿದೆ. ಈ ಸಿನಿಮಾದಲ್ಲಿ ಅವರ ಗೆಟಪ್​ ತುಂಬ ಭಿನ್ನವಾಗಿದೆ. ರಿಯಲ್​ ಲೈಫ್​ ಘಟನೆಯನ್ನು ಆಧರಿಸಿ ಈ ಸಿನಿಮಾ ಸಿದ್ಧವಾಗಿದೆ. ಬಾಸಿಲ್​ ಅವರು ಈ ಚಿತ್ರಕ್ಕೆ ನಿರ್ದೇಶನ ಮಾಡಿದ್ದಾರೆ. ಸಂಯುಕ್ತಾ ಹೊರನಾಡು, ಚೈತ್ರಾ ಆಚಾರ್​, ರಾಜ್​ ದೀಪಕ್​ ಶೆಟ್ಟಿ, ಗೋಪಾಲಕೃಷ್ಣ ದೇಶಪಾಂಡೆ ಮುಂತಾದವರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ಮಿಧುನ್​ ಮುಕುಂದನ್​ ಸಂಗೀತ ನೀಡಿದ್ದಾರೆ.

ಇದನ್ನೂ ಓದಿ: Toby: ಟೋಬಿಯ ಅಷ್ಟ ಅವತಾರಗಳು, ಚಿತ್ರಗಳಲ್ಲಿ ನೋಡಿ

ಬರುತ್ತಿದೆ ‘ಬಯಲುಸೀಮೆ’:

ವರುಣ್​ ಕಟ್ಟಿಮನಿ ನಿರ್ದೇಶನದ ‘ಬಯಲುಸೀಮೆ’ ಸಿನಿಮಾ ಕೂಡ ಈ ವಾರ ಬಿಡುಗಡೆ ಆಗುತ್ತಿದೆ. ಈ ಸಿನಿಮಾದಲ್ಲಿ ವರುಣ್​ ಕಟ್ಟಿಮನಿ ಅವರು ಪ್ರಮುಖ ಪಾತ್ರ ಮಾಡಿದ್ದಾರೆ. ಇನ್ನುಳಿದ ಪಾತ್ರವರ್ಗದಲ್ಲಿ ಅನುಭವಿ ಕಲಾವಿದರಾದ ರವಿಶಂಕರ್​, ಟಿ.ಎಸ್​. ನಾಗಾಭರಣ, ಯಶ್ ಶೆಟ್ಟಿ, ಸಂಯುಕ್ತಾ ಹೊರನಾಡು ಮುಂತಾದವರು ನಟಿಸಿದ್ದಾರೆ. ಅರ್ಚನಾ ಕೊಟ್ಟಿಗೆ ಕೂಡ ಈ ಸಿನಿಮಾದಲ್ಲಿ ಅಭಿನಯಿಸಿದ್ದಾರೆ.

ಆಯುಷ್ಮಾನ್​ ಖುರಾನಾ ಅಭಿಮಾನಿಗಳಿಗೆ ‘ಡ್ರೀಲ್​ ಗರ್ಲ್​ 2’:

2019ರಲ್ಲಿ ‘ಡ್ರೀಮ್​ ಗರ್ಲ್​’ ಸಿನಿಮಾ ಬಿಡುಗಡೆಯಾಗಿ ಯಶಸ್ಸು ಕಂಡಿತ್ತು. ಈಗ ಆ ಸಿನಿಮಾಗೆ ಸೀಕ್ವೆಲ್​ ಸಿದ್ಧವಾಗಿದೆ. ‘ಡ್ರೀಮ್​ ಗರ್ಲ್​ 2’ ಸಿನಿಮಾ ಆಗಸ್ಟ್​ 25ರಂದು ಬಿಡುಗಡೆ ಆಗುತ್ತಿದೆ. ಈಗಾಗಲೇ ಈ ಚಿತ್ರದ ಟ್ರೇಲರ್ ಗಮನ ಸೆಳೆದಿದೆ. ಹುಡುಗಿ ವೇಷ ಹಾಕಿಕೊಂಡು ಭರ್ಜರಿ ಎಂಟರ್​ಟೇನ್ಮೆಂಟ್​ ನೀಡಲು ಆಯುಷ್ಮಾನ್​ ಖುರಾನಾ ಸಜ್ಜಾಗಿದ್ದಾರೆ. ಅವರ ಅಭಿಮಾನಿಗಳು ಈ ಸಿನಿಮಾ ಮೇಲೆ ಸಖತ್​ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ.

ಇದನ್ನೂ ಓದಿ: ವಿಶ್ವಾದ್ಯಂತ 550 ಕೋಟಿ ರೂಪಾಯಿ ಗಳಿಸಿದ ‘ಜೈಲರ್​’; ರಜನಿಕಾಂತ್​ ಚಿತ್ರಕ್ಕೆ ಭಾರತದಲ್ಲಿ 295 ಕೋಟಿ ರೂ. ಕಲೆಕ್ಷನ್​

ನುಸ್ರತ್​ ಬರೂಚಾ ನಟನೆಯ ‘ಅಕೇಲಿ’:

ನಟಿ ನುಸ್ರತ್​ ಬರೂಚಾ ಅವರು ಬಾಲಿವುಡ್​ನಲ್ಲಿ ಫೇಮಸ್​ ಆಗಿದ್ದಾರೆ. ಅವರು ನಟಿಸಿರುವ ‘ಅಕೇಲಿ’ ಸಿನಿಮಾ ಕೂಡ ಆಗಸ್ಟ್​ 25ರಂದು ಬಿಡುಗಡೆ ಆಗುತ್ತಿದೆ. ಐಸಿಎಸ್​ ಆಕ್ರಮಿತ ಪ್ರದೇಶದಲ್ಲಿ ಪಂಜಾಬ್​ನ ಹುಡುಗಿಯೊಬ್ಬಳು ಸಿಕ್ಕಿಹಾಕಿಕೊಳ್ಳುತ್ತಾಳೆ. ಉದ್ಯೋಗ ಹುಡುಗಿ ಹೋದ ಅವಳ ಬದುಕು ಕಷ್ಟದ ಕೂಪಕ್ಕೆ ತಳ್ಳಲ್ಪಡುತ್ತದೆ. ಅಂಥ ಗಂಭೀರವಾದ ಕಥೆ ಇರುವ ‘ಅಕೇಲಿ’ ಸಿನಿಮಾದಲ್ಲಿ ನುಸ್ರತ್​ ಬರೂಚಾ ಮುಖ್ಯಭೂಮಿಕೆ ನಿಭಾಯಿಸಿದ್ದಾರೆ.

ಮಾಸ್​ ಪ್ರೇಕ್ಷಕರಿಗೆ ‘ಕಿಂಗ್​ ಆಫ್​ ಕೋತ್ತಾ’:

ಮಲಯಾಳಂ ನಟ ದುಲ್ಕರ್​ ಸಲ್ಮಾನ್​ ಅವರು ಎಲ್ಲ ಬಗೆಯ ಪಾತ್ರಗಳನ್ನು ಮಾಡಿ ಸೈ ಎನಿಸಿಕೊಂಡಿದ್ದಾರೆ. ಈಗ ಅವರು ‘ಕಿಂಗ್​ ಆಫ್​ ಕೋತ್ತಾ’ ಸಿನಿಮಾದಲ್ಲಿ ಗ್ಯಾಂಗ್​​ಸ್ಟರ್​ ಪಾತ್ರ ಮಾಡಿದ್ದಾರೆ. ಸಖತ್​ ಮಾಸ್​ ಆಗಿ ಈ ಸಿನಿಮಾ ಮೂಡಿಬಂದಿದೆ. ಆಗಸ್ಟ್ 24ರಂದು ಈ ಚಿತ್ರ ಬಿಡುಗಡೆ ಆಗಿದೆ. ಮಲಯಾಳಂನ ಈ ಸಿನಿಮಾ ತೆಲುಗು ಮತ್ತು ತಮಿಳಿಗೂ ಡಬ್​ ಆಗಿ ತೆರೆಕಂಡಿದೆ.

ಇದನ್ನೂ ಓದಿ: ‘500 ಕೋಟಿ ರೂಪಾಯಿ ಕಲೆಕ್ಷನ್​ ಮಾಡಲಿದೆ ಗದರ್​ 2’: ಭವಿಷ್ಯ ನುಡಿದ ಬಾಕ್ಸ್​ ಆಫೀಸ್​ ತಜ್ಞರು

ಹಾಲಿವುಡ್​ನಲ್ಲಿ ‘ಆ್ಯಸ್ಟ್ರಾಯ್ಡ್​ ಸಿಟಿ’ ಮತ್ತು ‘ರೆಟ್ರಿಬ್ಯೂಷನ್​’:

ಹಾಲಿವುಡ್​ ಸಿನಿಮಾಗಳಿಗೆ ಭಾರತದಲ್ಲಿ ದೊಡ್ಡ ಪ್ರೇಕ್ಷಕರ ವರ್ಗ ಇದೆ. ಈ ವಾರ ‘ಆ್ಯಸ್ಟ್ರಾಯ್ಡ್​ ಸಿಟಿ’ ಸಿನಿಮಾ ಬಿಡುಗಡೆ ಆಗುತ್ತಿದೆ. ಈ ಚಿತ್ರಕ್ಕೆ ವೆಸ್​ ಆ್ಯಂಡರ್​ಸನ್​ ನಿರ್ದೇಶನ ಮಾಡಿದ್ದಾರೆ. ಹಾಲಿವುಡ್​ನ ಖ್ಯಾತ ನಟ ಲಿಯಾಂ ನೀಸನ್​ ನಟನೆಯ ‘ರೆಟ್ರಿಬ್ಯೂಷನ್​’ ಸಿನಿಮಾ ಕೂಡ ಈ ವಾರ ತೆರೆಕಾಣುತ್ತಿದೆ. ಈ ಚಿತ್ರದಲ್ಲಿ ಸಸ್ಪೆನ್ಸ್​ ಥ್ರಿಲ್ಲರ್​ ಕಥಾಹಂದರ ಇದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.