ಅವಕಾಡೊ ಅಸ್ತಮಾ ನಿಯಂತ್ರಣಕ್ಕೆ ಉಪಯುಕ್ತವೇ? ಈ ಬಗ್ಗೆ ವೈದ್ಯರ ಅಭಿಪ್ರಾಯವೇನು ತಿಳಿದುಕೊಳ್ಳಿ

ಇತ್ತೀಚಿನ ದಿನಗಳಲ್ಲಿ ಆರೋಗ್ಯಕರ ಆಹಾರ ಪದ್ಧತಿಯ ಬಗ್ಗೆ ಜನರಲ್ಲಿ ಆಸಕ್ತಿ ಹೆಚ್ಚುತ್ತಿದೆ. ಪೌಷ್ಟಿಕಾಂಶಗಳಿಂದ ಸಮೃದ್ಧವಾಗಿರುವ ಹಣ್ಣುಗಳಲ್ಲಿ ಅವಕಾಡೊ ಕೂಡ ಒಂದು. ಇದರಲ್ಲಿ ಆರೋಗ್ಯಕರ ಕೊಬ್ಬುಗಳು, ನಾರಿನಾಂಶ, ಜೀವಸತ್ವಗಳು ಹಾಗೂ ಇತರ ಪೋಷಕಾಂಶಗಳು ಹೇರಳವಾಗಿವೆ. ಹೃದಯದ ಆರೋಗ್ಯ, ಜೀರ್ಣಕ್ರಿಯೆ ಮತ್ತು ಒಟ್ಟಾರೆ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಅವಕಾಡೊವನ್ನು ಸಮತೋಲಿತ ಆಹಾರದ ಭಾಗವಾಗಿ ಸೇವಿಸಬಹುದು. ಆದರೆ ಕೆಲವು ನಂಬಿಕೆಗಳ ಪ್ರಕಾರ ಅವಕಾಡೊ ಸೇವನೆಯಿಂದ ಆಸ್ತಮಾ ಸಂಪೂರ್ಣವಾಗಿ ಗುಣವಾಗುತ್ತದೆ ಎನ್ನಲಾಗುತ್ತದೆ ಇದು ಎಷ್ಟರ ಮಟ್ಟಿಗೆ ನಿಜ. ಅಸ್ತಮಾಕ್ಕೆ ಅವಕಾಡೊ ಮದ್ದಾಗುತ್ತದೆಯೇ ಎಂಬುದನ್ನು ಸ್ಟೋರಿ ಮೂಲಕ ತಿಳಿದುಕೊಳ್ಳಿ.

ಅಸ್ತಮಾ ಸಮಸ್ಯೆಗೆ ಅವಕಾಡೊ ಸಹಾಯ ಮಾಡುತ್ತದೆಯೇ?

ಅಸ್ತಮಾ ಎನ್ನುವುದು ಉಸಿರಾಟದ ನಾಳಗಳಲ್ಲಿ ಉರಿಯೂತ ಉಂಟಾಗಿ ಉಸಿರಾಟದ ತೊಂದರೆ, ಕೆಮ್ಮು, ಎದೆಯಲ್ಲಿ ಬಿಗಿತ ಮತ್ತು ಉಬ್ಬಸದಂತಹ ಲಕ್ಷಣಗಳು ಕಾಣಿಸಿಕೊಳ್ಳುವ ದೀರ್ಘಕಾಲದ ಕಾಯಿಲೆಯಾಗಿದೆ. ಪೌಷ್ಟಿಕ ಆಹಾರ ಸೇವನೆಯು ಒಟ್ಟಾರೆ ಆರೋಗ್ಯಕ್ಕೆ ಸಹಕಾರಿ. ಅವಕಾಡೊದಲ್ಲಿರುವ ಪೋಷಕಾಂಶಗಳು ಆರೋಗ್ಯಕರ ಆಹಾರ ಪದ್ಧತಿಯ ಭಾಗವಾಗಬಹುದು. ಆದರೆ, ಅವಕಾಡೊ ಜ್ಯೂಸ್ ಕುಡಿಯುವುದರಿಂದ ಅಸ್ತಮಾ ಗುಣವಾಗುತ್ತದೆ ಅಥವಾ ಅದರ ಲಕ್ಷಣಗಳು ಖಚಿತವಾಗಿ ಕಡಿಮೆಯಾಗುತ್ತವೆ ಎಂದು ಹೇಳಲು ಸಾಧ್ಯವಿಲ್ಲ. ವೈದ್ಯರು ಸೂಚಿಸಿರುವ ಔಷಧಿ ಮತ್ತು ಇನ್ಹೇಲರ್‌ಗಳಿಗೆ ಬದಲಿಯಾಗಿ ಇದನ್ನು ಬಳಸಬಾರದು.

ಹೃದಯದ ಆರೋಗ್ಯಕ್ಕೆ ಪ್ರಯೋಜನಕಾರಿ

ಅವಕಾಡೊದಲ್ಲಿ ಏಕ ಅಪರ್ಯಾಪ್ತ ಕೊಬ್ಬುಗಳು (Monounsaturated fats) ಇರುತ್ತವೆ. ಇವುಗಳನ್ನು ಸ್ಯಾಚುರೇಟೆಡ್ ಕೊಬ್ಬುಗಳಿಗೆ ಬದಲಿಯಾಗಿ ಸೇವಿಸುವುದು ಹೃದಯದ ಆರೋಗ್ಯಕ್ಕೆ ಪ್ರಯೋಜನಕಾರಿಯಾಗಬಹುದು. ಸಮತೋಲಿತ ಆಹಾರ ಪದ್ಧತಿಯೊಂದಿಗೆ ಅವಕಾಡೊ ಸೇವಿಸುವುದರಿಂದ ಆರೋಗ್ಯಕರ ಕೊಲೆಸ್ಟ್ರಾಲ್ ಮಟ್ಟವನ್ನು ಕಾಪಾಡಿಕೊಳ್ಳಲು ಸಹಾಯವಾಗಬಹುದು. ಆದರೆ, ಇದು ಕೆಟ್ಟ ಕೊಲೆಸ್ಟ್ರಾಲ್ ಅನ್ನು ಸಂಪೂರ್ಣವಾಗಿ ನಿವಾರಿಸುತ್ತದೆ ಎಂದು ಭಾವಿಸಬಾರದು.

ಇದನ್ನೂ ಓದಿ: ಬಾಳೆಹಣ್ಣು, ಪಪ್ಪಾಯಿ ತಿನ್ನಲು 2ರಿಂದ 3 ಗಂಟೆ ಗ್ಯಾಪ್ ಬೇಕೇ? ಈ ಬಗ್ಗೆ ತಜ್ಞರ ಅಭಿಪ್ರಾಯವೇನು ತಿಳಿದುಕೊಳ್ಳಿ

ಜೀರ್ಣಕ್ರಿಯೆ ಮತ್ತು ತೂಕ ನಿರ್ವಹಣೆ

ಅವಕಾಡೊದಲ್ಲಿರುವ ನಾರಿನಾಂಶವು ಕರುಳಿನ ಆರೋಗ್ಯವನ್ನು ಬೆಂಬಲಿಸುತ್ತದೆ. ಸಾಕಷ್ಟು ನೀರು ಕುಡಿಯುವುದರ ಜೊತೆಗೆ ನಾರಿನಾಂಶವಿರುವ ಆಹಾರ ಸೇವಿಸುವುದರಿಂದ ಮಲಬದ್ಧತೆಯ ಸಮಸ್ಯೆಯನ್ನು ನಿಯಂತ್ರಿಸಲು ನೆರವಾಗಬಹುದು. ಅಲ್ಲದೆ, ಅವಕಾಡೊ ಸೇವನೆಯಿಂದ ಹೊಟ್ಟೆ ತುಂಬಿದ ಅನುಭವ ಹೆಚ್ಚು ಕಾಲ ಇರುವುದರಿಂದ ಸಹಾಯವಾಗಬಹುದು. ಇದರಿಂದ ಆಹಾರದ ಪ್ರಮಾಣವನ್ನು ನಿಯಂತ್ರಿಸಿಕೊಳ್ಳಲು ಅನುಕೂಲವಾಗಬಹುದು.

ಚರ್ಮ, ಕಣ್ಣು ಮತ್ತು ರಕ್ತದಲ್ಲಿನ ಸಕ್ಕರೆ

ಅವಕಾಡೊದಲ್ಲಿ ವಿಟಮಿನ್ ಇ, ವಿಟಮಿನ್ ಕೆ, ಫೋಲೇಟ್ ಮತ್ತು ಇತರ ಪೋಷಕಾಂಶಗಳಿವೆ. ಇವು ದೇಹದ ಸಾಮಾನ್ಯ ಕಾರ್ಯಚಟುವಟಿಕೆಗಳಿಗೆ ಅಗತ್ಯವಾಗಿವೆ. ಇದರಲ್ಲಿರುವ ಆರೋಗ್ಯಕರ ಕೊಬ್ಬುಗಳು ಕೆಲವು ಪೋಷಕಾಂಶಗಳ ಹೀರಿಕೊಳ್ಳುವಿಕೆಗೆ ಸಹಾಯ ಮಾಡುತ್ತವೆ. ಆದರೆ, ಅವಕಾಡೊ ಸೇವನೆಯಿಂದ ಚರ್ಮ ಹೊಳೆಯುತ್ತದೆ, ಕಣ್ಣಿನ ಕಾಯಿಲೆಗಳು ದೂರವಾಗುತ್ತವೆ ಅಥವಾ ಮಧುಮೇಹ ಸಂಪೂರ್ಣ ನಿಯಂತ್ರಣಕ್ಕೆ ಬರುತ್ತದೆ ಎಂದು ಖಚಿತವಾಗಿ ಹೇಳಲಾಗುವುದಿಲ್ಲ.

ಅವಕಾಡೊವನ್ನು ಹೇಗೆ ಸೇವಿಸಬೇಕು?

ಅವಕಾಡೊವನ್ನು ಹಣ್ಣಿನ ರೂಪದಲ್ಲಿ, ಸಲಾಡ್‌ನಲ್ಲಿ ಅಥವಾ ಸಕ್ಕರೆ ಸೇರಿಸದ ಪಾನೀಯವಾಗಿ ಸೇವಿಸಬಹುದು. ಇಷ್ಟು ಬಾರಿ ಸೇವಿಸಲೇಬೇಕು ಎಂಬ ನಿರ್ದಿಷ್ಟ ನಿಯಮವಿಲ್ಲ. ವ್ಯಕ್ತಿಯ ಆಹಾರ ಪದ್ಧತಿ ಮತ್ತು ಅಗತ್ಯಕ್ಕೆ ಅನುಗುಣವಾಗಿ ಪ್ರಮಾಣವನ್ನು ನಿರ್ಧರಿಸಬಹುದು. ಅಸ್ತಮಾ ಇರುವವರು ವೈದ್ಯರ ಸಲಹೆಯಂತೆ ಚಿಕಿತ್ಸೆ ಮುಂದುವರಿಸಬೇಕು. ಉಸಿರಾಟದ ತೊಂದರೆ ತೀವ್ರವಾದರೆ ತಕ್ಷಣ ವೈದ್ಯಕೀಯ ನೆರವು ಪಡೆಯಬೇಕು.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ