ಒಂದೇ ನಕ್ಷತ್ರ, ದೇವತೆಗಳು ಎರಡೂ… ಅದು ಯಾವ ನಕ್ಷತ್ರ ಗೊತ್ತಾ?

ನಕ್ಷತ್ರ ಪುಂಜಗಳಲ್ಲಿ ಹದಿನಾರನೇ ನಕ್ಷತ್ರ ಇದು ವಿಶಾಖಾ ನಕ್ಷತ್ರ. ಇದರ ದೇವತೆ ಒಬ್ಬರಲ್ಲ, ಇಬ್ಬರು ಇಂದ್ರ ಮತ್ತು ಅಗ್ನಿ. ತೋರಣದ ಆಕಾರದಲ್ಲಿ ಆಕಾಶದಲ್ಲಿ ಕಾಣುವ ಐದು ನಕ್ಷತ್ರಗಳ ಸಮೂಹವಿದು. ರಾಕ್ಷಸ ಗಣಕ್ಕೆ ಸೇರಿರುವ ಈ ನಕ್ಷತ್ರದ ನಾಮಾಕ್ಷರಗಳು ತಿ ತು ತೇ ತೋ. ಕಫ ಪ್ರಕೃತಿಯ ನಕ್ಷತ್ರ ಇದು. ತುಲಾ ಹಾಗೂ ವೃಶ್ಚಿಕದಲ್ಲಿ ಈ ನಕ್ಷತ್ರಗಳ ಹಂಚಿಕೆಯಾಗಿದೆ. ಹೀಗಿರುವ ನಕ್ಷತ್ರದಲ್ಲಿ ಜನಿಸಿದವರು ಎಂತಹವರಾಗಿರುತ್ತಾರೆ ಎನ್ನುವುದು ವಿಸ್ಮಯ. ಇವರಲ್ಲಿ ಅಧಿಕ ಶುಭಾಶುಭ ಗುಣಗಳನ್ನು ನೋಡಬಹುದು.

ಅಸೂಯೆ :

ಇವರಲ್ಲಿ ಇನ್ನೊಬ್ಬರ ಬಗ್ಗೆ ಅಸೂಯೆ ಪಡುವ ಗುಣ ಅಧಿಕ. ಯಾರ ಒಳ್ಳೆಯದನ್ನೂ ಕೂಡಲೇ ಸ್ವೀಕರಿಸಲಾರರು. ಇನ್ನೊಬ್ಬರ ಬಗ್ಗೆ ನಕಾರಾತ್ಮಕ ಅಂಶಗಳನ್ನು ಹುಡುಕುವರು.

ಆತಿ ಆಸೆ :

ಇವರ ಆಸೆ ಅಧಿಕವಾಗಿರುವುದು.‌ ಬೇಕು ಬೇಡಗಳ ನಡುವೆ ಅಂತರವಿರದು. ಪರರ ಸ್ವತ್ತಿನ ಬಗ್ಗೆ ಲಕ್ಷ್ಯವಿರದು. ತನ್ನದಾಗಿಸಿಕೊಳ್ಳುವ ಸ್ವಾರ್ಥವಿರುವುದು.

ವಾಚಾಳಿ :

ಅಧಿಕ ಮಾತುಗಳನ್ನು ಆಡುವವರಾಗುವರು. ಅದಕ್ಕೆ ಕಾರಣ ಅಸತ್ಯ, ಕುಹಕ, ಚಾಡಿ ಎಲ್ಲವನ್ನೂ ರೂಢಿಸಿಕೊಂಡಿರುವರು. ಇದರ ಕಾರಣದಿಂದಲೇ ಪರರ ಜೊತೆ ಕಲಹವನ್ನು ನಡೆಸುವರು.

ಗರ್ವ :

ಅಹಂಕಾರಿಂದ ವ್ಯವಹರಿಸುವರು. ಹಿರಿಯರಿಗೆ ಕೊಡಬೇಕಾದ ಗೌರವವನ್ನು ಕೊಡರು. ಯಾರ ಜೊತೆಗೂ ವಿನಯಶೀಲರಾಗಿರರು.

ಪತ್ನಿಗೆ ವಶ :

ಎಂತಹ ಅಹಂಕಾರವಿದ್ದರೂ ಪತ್ನಿಯ ಮುಂದೆ ಇವರ ಯಾವ ದರ್ಪವೂ ನಡೆಯದು. ಆಕೆ ಹೇಳಿದಂತೆ ಕೇಳಿಕೊಂಡು, ಮಾಡಿಕೊಂಡು ಇರಬೇಕು.

ನಿಶ್ಶತ್ರು :

ಇವರ ಪ್ರಭಾವಕ್ಕೆ ಶತ್ರುಗಳು ಇರಲಾರರು. ಇದ್ದರೂ ಇವರ ಮಿತ್ರರಾಗುವರು ಅಥವಾ ತಟಸ್ಥರಾಗುವರು. ಶತ್ರುತ್ವವನ್ನು ಬೆಳೆಸರು.

ಅಧಿಕಕ್ರೋಧ :

ಬೇಗ ಸಿಟ್ಟುಗೊಳ್ಳುವವರು ಇವರು. ಸಣ್ಣ ವಿಚಾರಕ್ಕೂ ಕೋಪ ಹಾಗೂ ದೀರ್ಘಕಾಲ ಅದು ಉಳಿದುಕೊಳ್ಳುವುದು.

ಧಾತುಕ್ರಿಯಾ :

ಭೂಮಿಯ ಉತ್ಪನ್ನಗಳಿಂದ ಆದಾಯವನ್ನು ಪಡೆಯುವವರಾಗಿರುವರು. ಅಥವಾ ಅಂತಹ ಉತ್ಪನ್ನಗಳ‌ ಮಾರಾಟದಿಂದ ಜೀವನ ನಿರ್ವಹಣೆ ಆಗಲಿದೆ.

ಮಿತ್ರಹೀನ :

ಯಾವದೇ ಮಿತ್ರರನ್ನು ಇಟ್ಟುಕೊಳ್ಳಲಾರರು. ಇವರ ಸ್ವಭಾವಕ್ಕೆ ಮಿತ್ರರೂ ದೂರಾಗುವರು.‌ ಒಂಟಿಯಾಗಿ ಇರಬೇಕಾಗುವುದು.

ವೇಶ್ಯಸಹವಾಸ :

ಪರಸ್ತ್ರೀಯರ ಸಹವಾಸ ಅಧಿಕವಾಗಿರುವುದು. ವೇಶ್ಯೆಯ ಸಹವಾಸ ಅಥವಾ ವೇಶ್ಯೆಗೆ ಸಮಾಮವಾದ ವ್ಯಕ್ತಿಗಳ ಸಂಪರ್ಕ ಇರುವುದು.

ಇಂತಹ ವಿಲಕ್ಷಣ ಸ್ವಭಾವದವರು ಈ ವಿಶಾಖಾ ನಕ್ಷತ್ರದಲ್ಲಿ‌ ಜನಿಸಿದವರು. ಇದಕ್ಕೆ ಕಾರಣ ಆ ನಕ್ಷತ್ರ ಅಧಿಪತಿಗಳು ಇಂದ್ರ ಹಾಗೂ ಅಗ್ನಿ. ಸಿಟ್ಟು, ಭೂಮಿಯ ಉತ್ಪನ್ನಗಳ ಮಾರಟ ಅಗ್ನಿಯ ಸ್ವಭಾವದ್ದಾರೆ, ಗರ್ವ, ನಿಶ್ಶತ್ರು, ಅತಿಯಾಸೆ, ಅಸೂಯೆ ಇವೆಲ್ಲ ಇಂದ್ರನ ಸ್ವಭಾವಕ್ಕೆ ಹೋಲುವುದಾಗಿದೆ. ಹಾಗಾಗಿ ಸ್ವಭಾವವೂ ಹಾಗೆಯೇ ಇರಲಿದೆ.

– ಲೋಹಿತ ಹೆಬ್ಬಾರ್ – 8762924271