ತುಮಕೂರು: ವಿದೇಶಿ ವಲಸಿಗರ ಕೇಂದ್ರದಿಂದ ಮಹಿಳೆ ಪರಾರಿ; ಕಿಟಕಿ ಸರಳು ಕಟ್ ಮಾಡಿ ಎಸ್ಕೇಪ್

ತುಮಕೂರು, ಅಕ್ಟೋಬರ್​​ 24: ವಿದೇಶಿ ವಲಸಿಗರ ಕೇಂದ್ರದಲ್ಲಿದ್ದ ಮಹಿಳೆಯೊಬ್ಬರು ನಾಪತ್ತೆ ಆಗಿರುವ ಆರೋಪ ಕೇಳಿಬಂದಿದೆ. ಅಡೆವೋಲೆ ಅನು ಅಲಿಯಾಸ್ ರೆಜಿನಾ ಜಾರ ಅಲಿಯಾಸ್​ ಆಯಿಶಾ ನಾಪತ್ತೆಯಾಗಿರುವ ವಿದೇಶಿ ಮಹಿಳೆ. ಮಹಿಳಾ ಕೊಠಡಿಯ ಕಿಟಕಿಯ ಕಬ್ಬಿಣದ ಸರಳುಗಳನ್ನ ಕತ್ತರಿಸಿ ಪಾರಾರಿ ಆಗಿರುವ ಶಂಕೆ ವ್ಯಕ್ತವಾಗಿದೆ. ತುಮಕೂರು ನಗರದ ದಿಬ್ಬೂರಿನ ಎಫ್​ಡಿಸಿಯಲ್ಲಿ ಅ.21ರಂದು ಈ ಘಟನೆ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ.

ನಡೆದಿದ್ದೇನು?

ವಿದೇಶಿ ವಲಸಿಗರ ಕೇಂದ್ರದಲ್ಲಿ ಒಟ್ಟು 32 ಮಹಿಳೆಯರಿದ್ದಾರೆ. ಆದರೆ ಅಕ್ಟೋಬರ್​​ 21ರ ಬೆಳಿಗ್ಗೆ ಟೀ ಕುಡಿಯಲು 31 ಮಹಿಳೆಯರು ಮಾತ್ರ ಕೊಠಡಿಯಿಂದ ಹೊರಬಂದಿದ್ದರು. ಈ ವೇಳೆ ಅಡೆವೋಲೆ ಕಾಣದ ಹಿನ್ನಲೆ ಅಡುಗೆ ಸಿಬ್ಬಂದಿ ಅನುಮಾನಗೊಂಡಿದ್ದಾರೆ. ಕೂಡಲೇ ವಾರ್ಡನ್​​ಗೆ ಕರೆ ಮಾಡಿ ಮಾಹಿತಿ ನೀಡಿದ್ದಾರೆ.

ಇದನ್ನೂ ಓದಿ: ‘3 ತಿಂಗಳಲ್ಲಿ ಅಕ್ರಮ ವಲಸಿಗರ ಪತ್ತೆಗೆ ವಿಶೇಷ ಸಮಿತಿ ರಚಿಸಿ’: ರಾಜ್ಯ ಸರ್ಕಾರಕ್ಕೆ ಹೈಕೋರ್ಟ್​ ನಿರ್ದೇಶನ

ಇನ್ನು ಸ್ಥಳಕ್ಕೆ ಬಂದ ವಾರ್ಡನ್​ ಪರಿಶೀಲನೆ ಮಾಡಿದ್ದಾರೆ. ಇತರರಿಂದಲೂ ಮಾಹಿತಿ ಪಡೆದುಕೊಂಡಿದ್ದಾರೆ. ರಾತ್ರಿ ಮಲಗುವಾಗ ಎಲ್ಲರ ಜೊತೆಗಿದ್ದ ವಿದೇಶಿ ಮಹಿಳೆ, ಮುಂಜಾನೆ ನಾಪತ್ತೆಯಾಗಿದ್ದಾರೆ ಎಂಬ ಮಾಹಿತಿಯೊಂದಿಗೆ ಮಹಿಳೆ ವಾಸವಾಗಿದ್ದ ಕೊಠಡಿ ಪರಿಶೀಲನೆ ಮಾಡಿದಾಗ ಒಂದು ಕ್ಷಣ ವಾರ್ಡನ್​​ ಶಾಕ್​ ಆಗಿದ್ದಾರೆ. ಕೊಠಡಿ ಕಿಟಕಿಯ ಕೆಳಭಾಗದ ಕಬ್ಬಿಣದ ಸರಳುಗಳು ಕಟ್ ಮಾಡಿರುವುದು ಪತ್ತೆ ಆಗಿದೆ. ಎಲ್ಲಾ ಕಡೆ ಹುಡುಕಾಡಿದರು ಸಹ ಪತ್ತೆಯಾಗಿಲ್ಲ.

ತುಮಕೂರು ನಗರ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲು 

ಎರಡು ಸರಳುಗಳನ್ನ ಕಟ್ ಮಾಡಿ ಮಹಿಳೆ ತಪ್ಪಿಸಿಕೊಂಡಿರುವ ಬಗ್ಗೆ ತುಮಕೂರು ನಗರ ಠಾಣೆಗೆ ವಾರ್ಡನ್​ ದೂರು ನೀಡಿದ್ದಾರೆ. ಇತ್ತ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ವಿದೇಶಿ ಮಹಿಳೆ ಪಾರಾರಿ ಆಗಿರುವ ಬಗ್ಗೆ ಇಲಾಖೆಯ ಮೇಲಾಧಿಕಾರಿಗಳು ಸೇರಿದಂತೆ ಬೆಂಗಳೂರಿನ ಎಫ್ಆರ್​ಆರ್​ಒ ಅಧಿಕಾರಿಗಳಿಗೂ ಮಾಹಿತಿ ರವಾನಿಸಿದ್ದಾರೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.