ಮುಖದ ಅಂದ ಹೆಚ್ಚಿಸಲು ಉಳಿದ ಚಹಾ ಪುಡಿಯನ್ನು ಹೀಗೆ ಬಳಸಿ

ಕೆಲವರಿಗಂತೂ ಬೆಳಗ್ಗೆ ಎದ್ದ ತಕ್ಷಣ ಟೀ ಕಾಫಿ ಇರಲೇಬೇಕು. ಇನ್ನು ದಿನಕ್ಕೆ ಮೂರು ನಾಲ್ಕು ಸಲವಾದರೂ ಕಾಫಿ ಹೀರುವ ಚಟವಿರುತ್ತದೆ. ಈ ಕೆಲಸದ ಒತ್ತಡದಲ್ಲಿದ್ದಾಗ ಬಿಸಿ ಬಿಸಿ ಟೀ ಕುಡಿದರೆ ಮನಸ್ಸು ಹಾಗೂ ದೇಹ ಎರಡು ಕೂಡ ರಿಲ್ಯಾಕ್ಸ್ ಆಗುತ್ತದೆ. ಅದಲ್ಲದೇ, ನಮ್ಮಲ್ಲಿ ಹೆಚ್ಚಿನವರು ಚಹಾವನ್ನು ಸೋಸಿದ ಬಳಿಕ ಆ ಚಹಾ ಪುಡಿಯನ್ನು ಎಸೆದು ಬಿಡುತ್ತಾರೆ. ಆದರೆ ಈ ನಿರುಪಯುಕ್ತ ಚಹಾ ಪುಡಿಯೂ ವಿವಿಧ ರೀತಿಯ ಉಪಯೋಗಗಳನ್ನು ಹೊಂದಿದೆ ಎನ್ನುವುದು ಬಹುತೇಕರಿಗೆ ತಿಳಿದಿಲ್ಲ. ಹೀಗಾಗಿ ಚಹಾ ಸೋಸಿದ ಬಳಿಕ ಚಹಾ ಪುಡಿ ಬಿಸಾಡುವ ಮುನ್ನ ಈ ಬಗ್ಗೆ ನಿಮಗೆ ತಿಳಿದಿರುವುದು ಉತ್ತಮ.

1. ಅಡುಗೆ ಮನೆಯಲ್ಲಿ ನೊಣಗಳ ಕಾಟಗೂ ಹೆಚ್ಚಾಗಿದ್ದರೆ ಅವುಗಳನ್ನು ಓಡಿಸಲು, ಉಳಿದ ಚಹಾ ಪುಡಿಯನ್ನು ಬಳಸಿಕೊಳ್ಳಬಹುದು. ಚಹಾಪುಡಿಯನ್ನು ಎಸೆಯುವ ಬದಲು ಹತ್ತಿ ಬಟ್ಟೆಯಲ್ಲಿ ಸುತ್ತಿ ಅಡುಗೆಮನೆಯಲ್ಲಿ ಇರಿಸಿದರೆ ನೊಣಗಳು ಆ ಕಡೆ ಸುಳಿಯುವುದಿಲ್ಲ.
2. ಮನೆಯಲ್ಲಿ ಹಳೆಯ ಪೀಠೋಪಕರಣಗಳಿಂದ ಹೊಳಪು ಕಳೆದುಕೊಂಡಿದ್ದರೆ ಬಳಸಿದ ಚಹಾ ಪುಡಿಯನ್ನು ನೀರಿಗೆ ಹಾಕಿ ಕುದಿಸಿ ಸ್ಪ್ರೇ ಬಾಟಲಿಯಲ್ಲಿ ಬೆರೆಸಿ ಪೀಠೋಪಕರಣಗಳ ಮೇಲೆ ಸ್ಪ್ರೇ ಮಾಡುವುದರಿಂದ ಕಳೆಗುಂದಿದ ಉಪಕರಣಗಳು ಹೊಳೆಯುತ್ತದೆ.
3. ನಿರುಪಯುಕ್ತ ಚಹಾ ಪುಡಿಯೂ ಕೂದಲಿಗೆ ಆರೈಕೆಯಲ್ಲಿ ಪ್ರಮುಖ ಪಾತ್ರವಹಿಸುತ್ತದೆ. ಚಹಾ ಪುಡಿಯನ್ನು ಎಸೆಯುವ ಬದಲು, ಕುದಿಸಿ ಈ ನೀರನ್ನು ಕಂಡಿಷನರ್ ಆಗಿ ಬಳಸಬಹುದು. ಇದರಿಂದ ಕೂದಲಿನ ಹೊಳಪು ಹೆಚ್ಚಾಗುತ್ತದೆ.
4. ಚಹಾ ಪುಡಿಯಲ್ಲಿ ಉತ್ಕರ್ಷಣ ನಿರೋಧಕಗಳು ಅಧಿಕವಾಗಿದ್ದು, ಇದು ಗಾಯಗಳನ್ನು ಗುಣಪಡಿಸಲು ಸಹಾಯ ಮಾಡುತ್ತದೆ. ಉಳಿದ ಚಹಾ ಪುಡಿಯನ್ನು ತೊಳೆದು, ಬಿಸಿ ನೀರಿನಲ್ಲಿ ಕುದಿಸಿ ಗಾಯದ ಜಾಗಕ್ಕೆ ಹಚ್ಚಿ ನಂತರ ತೊಳೆಯುವುದರಿಂದ ಗಾಯವು ಮಾಗುತ್ತದೆ.
5. ಚಹಾ ಸೋಸಿದ ಬಳಿಕ ಉಳಿದ ಚಹಾ ಪುಡಿಯನ್ನು ಬಿಸಾಡುವ ಬದಲು ಇದರಿಂದ ಪಾತ್ರೆಗಳನ್ನು ಸ್ವಚ್ಛಗೊಳಿಸಬಹುದು. ಚಹಾ ಪುಡಿಯನ್ನು ನೀರಿನಲ್ಲಿ ಕುದಿಸಿ ಇದರಲ್ಲಿ ಪಾತ್ರೆಯನ್ನು ತೊಳೆದರೆ ಎಣ್ಣೆಯ ಕಲೆಗಳು ಮಾಯವಾಗಿ ಪಾತ್ರೆಯೂ ಸ್ವಚ್ಛವಾಗುವುದಲ್ಲದೆ ಫಳಫಳನೇ ಹೊಳೆಯುತ್ತದೆ.
6. ಚರ್ಮವು ಟ್ಯಾನ್ ಆದಾಗ ಉಳಿದ ಚಹಾ ಪುಡಿಯನ್ನು ಬಿಸಿಲಿನಲ್ಲಿ ಒಣಗಿಸಿ ರುಬ್ಬಿ ಅದಕ್ಕೆ ಸೋಡಾ ಮತ್ತು ನೀರಿನೊಂದಿಗೆ ಬೆರೆಸಿ ಪೇಸ್ಟ್ ತಯಾರಿಸಿ. ಇದನ್ನು ಮೊಣಕಾಲುಗಳು, ಮೊಣಕೈಗಳು, ಕುತ್ತಿಗೆ ಸೇರಿದಂತೆ ಚರ್ಮಕ್ಕೆ ಅನ್ವಯಿಸುವುದರಿಂದ ಕಲೆಗಳನ್ನು ನಿವಾರಿಸಿ ಆ ಜಾಗವನ್ನು ಬಿಳುಪಾಗಿಸುತ್ತದೆ.

ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ