Crime News: ಪೊಲೀಸರು ಅಪಘಾತವೆಂದು ನಂಬಿದ್ದ ಪ್ರಕರಣಕ್ಕೆ ಶಾಕಿಂಗ್ ಟ್ವಿಸ್ಟ್​; ಉದ್ಯಮಿಯ ಜೀವ ತೆಗೆದ ಗೆಳೆಯ !

ಲಖನೌ: 15ದಿನಗಳ ಹಿಂದೆ ಉತ್ತರ ಪ್ರದೇಶದ ಅಂಬೇಡ್ಕರ್​ನಗರ ಜಿಲ್ಲೆಯಲ್ಲಿ ಪುಂಥಾರ್​ ಹೆದ್ದಾರಿಯಲ್ಲಿ, ಕಾರೊಂದು ನಿಂತಿದ್ದ ಟ್ರಕ್​​ಗೆ​ ಡಿಕ್ಕಿ ಹೊಡೆದು ಕಾರಿನಲ್ಲಿದ್ದ ವ್ಯಕ್ತಿ ಮೃತಪಟ್ಟಿದ್ದ ಘಟನೆ ನಡೆದಿತ್ತು. ಕಾರು ಕೂಡ ಸಿಕ್ಕಾಪಟ್ಟೆ ನುಜ್ಜುಗುಜ್ಜಾಗಿತ್ತು. ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೆತ್ತಿಕೊಂಡ ಪೊಲೀಸರು, ಮೃತ ವ್ಯಕ್ತಿಯನ್ನು ಉದ್ಯಮಿ ಸಂಜಯ್​ ವರ್ಮಾ ಎಂದು ಗುರುತಿಸಿದ್ದರು. ಸಂಜಯ್ ವರ್ಮಾ ಒಬ್ಬರೇ ಕಾರಿನಲ್ಲಿ ಇದ್ದರು. ಮೊದಲು ಪೊಲೀಸರು, ಸಂಜಯ್​ ವರ್ಮಾ ಕುಡಿದು ಕಾರು ಚಾಲನೆ ಮಾಡಿದ ಪರಿಣಾಮ ಟ್ರಕ್​ಗೆ ಡಿಕ್ಕಿ ಹೊಡೆದು ಮೃತಪಟ್ಟಿದ್ದಾನೆ ಎಂದೇ ಭಾವಿಸಿದ್ದರು. ಆದರೆ ಈ ಪ್ರಕರಣಕ್ಕೀಗ ಊಹಿಸಲು ಸಾಧ್ಯವಾಗದ ಟ್ವಿಸ್ಟ್​ ಸಿಕ್ಕಿದೆ. ಇದೊಂದು ಕೊಲೆ ಎಂದು ಪಕ್ಕಾ ಆಗಿದೆ. 

ಪ್ರಕರಣಕ್ಕೆ ಟ್ವಿಸ್ಟ್​ ಸಿಕ್ಕಿದ್ದು ಮೃತ ಉದ್ಯಮಿಯ ಮರೋಣತ್ತರ ಪರೀಕ್ಷೆಯ ನಂತರ. ವರದಿ ಬಂದ ಬಳಿಕ ಪೊಲೀಸರೇ ಶಾಕ್​ ಆಗಿದ್ದಾರೆ. ಈತ ಸತ್ತಿದ್ದು ಉಸಿರುಗಟ್ಟಿಸುವಿಕೆಯ ಕಾರಣದಿಂದ. ಕತ್ತು ಹಿಸುಕಿ ಕೊಲೆ ಮಾಡಲಾಗಿದೆ ಎಂದು ಪೋಸ್ಟ್​ಮಾರ್ಟಮ್​ ರಿಪೋರ್ಟ್ ಬಂತು. ಈ ವರದಿ ಆಧರಿಸಿ ತನಿಖೆ ಶುರು ಮಾಡಿದ ಪೊಲೀಸರು ಸದ್ಯ ಸಂಜಯ್​ನ ಆತ್ಮೀಯ ಸ್ನೇಹಿತನಾಗಿದ್ದ ಪ್ರವೀಣ್​ ಪಟೇಲ್​ ಮತ್ತು ಆತನ ಸಹಾಯಕನನ್ನು ಬಂಧಿಸಿದ್ದಾರೆ. ಹೌದು ತಾವೇ ಸಂಜಯ್​​ನನ್ನು ಕೊಲೆ ಮಾಡಿದ್ದೇವೆ ಎಂದು ಅವರಿಬ್ಬರೂ ಒಪ್ಪಿಕೊಂಡಿದ್ದಾರೆ.

ಭಯಂಕರ ಸಂಚು ! ಉದ್ಯಮಿ ಸಂಜಯ್ ತನ್ನ ಪತ್ನಿಯೊಂದಿಗೆ ಅಫೇರ್​ ಇಟ್ಟುಕೊಂಡಿದ್ದ ಎಂಬ ಅನುಮಾನ ನನಗೆ ಕಾಡುತ್ತಿತ್ತು. ಹಾಗಾಗಿಯೇ ಹತ್ಯೆ ಮಾಡಿದ್ದೇನೆ ಎಂದು ಪ್ರವೀಣ್​ ಹೇಳಿಕೊಂಡಿದ್ದಾಗಿ ಅಂಬೇಡ್ಕರ್ ನಗರ ಎಸ್​ಪಿ ಅಲೋಕ್​ ಪ್ರಿಯದರ್ಶಿ ಹೇಳಿದ್ದಾರೆ. ಪ್ರವೀಣ್​ಗೆ ತನ್ನ ಪತ್ನಿ ಸಂಜಯ್ ಜತೆ ಅಕ್ರಮ ಸಂಬಂಧ ಇಟ್ಟುಕೊಂಡಿದ್ದಾಳೆ ಎಂಬ ಅನುಮಾನವಿತ್ತು. ಹಾಗಾಗಿ ಆತನನ್ನು ಕೊಲ್ಲಲು ತನ್ನ ಸಹಾಯಕ ಅಜಿತ್​​ ನೆರವು ಕೋರಿದ. ಇಬ್ಬರೂ ಸೇರಿ ಪ್ಲ್ಯಾನ್​ ಮಾಡಿದರು. ಅದರಂತೆ ಈಗೊಂದು 15 ದಿನಗಳ ಹಿಂದೆ ಪ್ರವೀಣ್​ ಪಟೇಲ್​ ತಮ್ಮ ಮನೆಯಲ್ಲಿ ಪಾರ್ಟಿ ಆಯೋಜಿಸಿ ಸಂಜಯ್​​ಗೆ ಆಹ್ವಾನ ನೀಡಿದ. ಸಂಜಯ್​ ಕೂಡ ಪಾರ್ಟಿಗೆ ಬಂದು, ಮದ್ಯಪಾನ ಮಾಡಿದ. ಮದ್ಯದ ಅಮಲಿನಲ್ಲಿದ್ದ ಸಂಜಯ್​​ನ ಕತ್ತನ್ನು ಹಗ್ಗದಿಂದ ಹಿಸುಕಿದ್ದು ಅಜಿತ್​. ಹೀಗೆ ಸತ್ತ ಸಂಜಯ್​​ನನ್ನು ಕಾರಿನಲ್ಲಿ ಹೈವೇಗೆ ಕರೆದುಕೊಂಡು ಬಂದು, ಒಂದು ಜಾಗದಲ್ಲಿ ನಿಲ್ಲಿಸಿದ ಅಜಿತ್​ ತಾನು ಡ್ರೈವರ್ ಸೀಟಿಂದ ಇಳಿದ. ಬಳಿಕ ಸಂಜಯ್​ನನ್ನು ಡ್ರೈವರ್​ ಸೀಟ್​​ನಲ್ಲಿ ಕೂರಿಸಿ ಒಂದೇ ಸಲ ಜೋರಾಗಿ ಎಕ್ಸ್​​ಲೇಟರ್​ ಕೊಟ್ಟ. ಆಗ ಆ ಕಾರು ನಿಯಂತ್ರಣ ತಪ್ಪಿ ಹೋಗಿ ಟ್ರಕ್​ಗೆ ಗುದ್ದಿದೆ. ಗುದ್ದಿದ ರಭಸಕ್ಕೆ ಕಾರು ನುಜ್ಜುಗುಜ್ಜಾಗಿದೆ. ಮೇಲ್ನೋಟಕ್ಕೆ ನೋಡಿದರೆ ಇದು ಡ್ರಂಕ್​ ಆ್ಯಂಡ್ ಡ್ರೈವ್​ ಕೇಸ್​ ಎಂದೇ ಯಾರಿಗಾದರೂ ಅನ್ನಿಸುತ್ತದೆ. ಈಗ ಆರೋಪಿಗಳಿಬ್ಬರೂ ಸತ್ಯ ಒಪ್ಪಿಕೊಂಡಿದ್ದು, ಸದ್ಯ ಪೊಲೀಸ್​ ಕಸ್ಟಡಿಯಲ್ಲಿದ್ದಾರೆ.

ಇದನ್ನೂ ಓದಿ: ಹೊಸ ತಳಿಯ ಕೊರೊನಾ ಆತಂಕ ಹಿನ್ನೆಲೆ; ಆರೋಗ್ಯ ಇಲಾಖೆ, ತಾಂತ್ರಿಕ ಸಲಹಾ ಸಮಿತಿ ಜೊತೆ ಸಚಿವ ಸುಧಾಕರ್ ಸಭೆ