ಮೊಬೈಲ್ ಬೆಳಕಲ್ಲಿ ಸರ್ಜರಿ ಮಾಡಿದ ಬನಾರಸ್ ಹಿಂದೂ ವಿವಿ ಆಸ್ಪತ್ರೆ ವೈದ್ಯರು; ವೈರಲ್ ಆದ ಫೋಟೋ ನೋಡಿ ಡೀನ್ ಕೆಂಡಾಮಂಡಲ
ಸೋಮವಾರ ಬೆಳಗ್ಗೆ ಡೆಂಟಲ್ ರೋಗಿಗೆ ದಂತದ ಸರ್ಜರಿ ಮಾಡುವುದಾಗಿ ಹಿಂದಿನ ದಿನವೇ ನಿರ್ಧರಿಸಲಾಗಿತ್ತು. ಹಾಗೇ, ಸೋಮವಾರ ಸರ್ಜರಿ ಆರಂಭ ಮಾಡಿದ ಕೆಲವೇ ಹೊತ್ತಲ್ಲಿ ಕರೆಂಟ್ ಹೋಯಿತು. ಇರುವ ಪರ್ಯಾಯ ಮಾರ್ಗಗಳು ಕಾರ್ಯನಿರ್ವಹಿಸುತ್ತಿರಲಿಲ್ಲ ಎಂದು ವೈದ್ಯಕೀಯ ಸಿಬ್ಬಂದಿ ಹೇಳಿದ್ದಾರೆ.
Updated on:Mar 18, 2021 | 3:30 PM
ವಾರಾಣಸಿ: ಬನಾರಸ್ ಹಿಂದೂ ವಿಶ್ವವಿದ್ಯಾಲಯದ ಎಸ್ಎಸ್ಎಲ್ ಆಸ್ಪತ್ರೆಯ ವೈದ್ಯರು, ಆರೋಗ್ಯ ಸಿಬ್ಬಂದಿ ಇದೀಗ ಸುದ್ದಿಯಲ್ಲಿದ್ದಾರೆ. ಸರ್ಜರಿ ಮಾಡುತ್ತಿದ್ದಾಗ ಕರೆಂಟ್ ಹೋಯಿತು ಎಂಬ ಕಾರಣಕ್ಕೆ, ಮೊಬೈಲ್ ಫ್ಲ್ಯಾಶ್ ಬೆಳಕಲ್ಲೇ ಶಸ್ತ್ರಚಿಕಿತ್ಸೆ ಮಾಡಿರುವ ಫೋಟೋಗಳು, ವಿಡಿಯೋಗಳು ಸೋಷಿಯಲ್ ಮೀಡಿಯಾಗಳಲ್ಲಿ ಸಖತ್ ವೈರಲ್ ಆಗುತ್ತಿದ್ದು, ಇದು ಎಷ್ಟರ ಮಟ್ಟಿಗೆ ಸರಿ ಎಂದೂ ಜನರು ಪ್ರಶ್ನಿಸುತ್ತಿದ್ದಾರೆ.
ಇನ್ನು ವೈದ್ಯರು ಮೊಬಲ್ ಬೆಳಕಲ್ಲಿ ಸರ್ಜರಿ ಮಾಡುತ್ತಿರುವ ಫೋಟೋಗಳು ವೈರಲ್ ಆದ ಬೆನ್ನಲ್ಲೇ ವಿಶ್ವವಿದ್ಯಾಲಯದ ಆಡಳಿತ ಇದನ್ನು ಗಂಭೀರವಾಗಿ ಪರಿಗಣಿಸಿದೆ. ಆ ಸರ್ಜರಿಯಲ್ಲಿ ಪಾಲ್ಗೊಂಡಿದ್ದ ವೈದ್ಯರು ಮತ್ತು ಆರೋಗ್ಯ ಸಿಬ್ಬಂದಿಯ ವಿಚಾರಣೆಗೆ ಆದೇಶಿಸಲಾಗಿದೆ. ಘಟನೆ ಬಗ್ಗೆ ಪ್ರತಿಕ್ರಿಯೆ ನೀಡಿದ ದಂತ ವಿಜ್ಞಾನ ವಿಭಾಗದ ಡೀನ್ ಪ್ರೊ.ವಿನಯ್ ಕುಮಾರ್ ಶ್ರೀವಾಸ್ತವ್, ಮೊಬೈಲ್ ಬೆಳಕಲ್ಲಿ ಆಪರೇಶನ್ ಮಾಡಿದ ಎಲ್ಲ ವೈದ್ಯರು, ಸಿಬ್ಬಂದಿಗೂ ನೋಟಿಸ್ ನೀಡಲಾಗಿದೆ ಎಂದು ತಿಳಿಸಿದ್ದಾರೆ.
ಕೆಲವು ಕೆಲಸ, ನಿರ್ವಹಣೆ ನಿಮಿತ್ತ ಸರ್ಜಿಕಲ್ ವಿಭಾಗಗಳಲ್ಲಿ ವಿದ್ಯುತ್ ಕಡಿತ ಆಗಲಿದೆ ಎಂಬ ಬಗ್ಗೆ 15 ದಿನಗಳ ಹಿಂದೆಯೇ ಅಧಿಸೂಚನೆ ನೀಡಲಾಗಿದೆ. ಈ ನೋಟಿಫಿಕೇಶನ್ ನೀಡಿದ ಬಳಿಕವೂ ಆಪರೇಶನ್ ಥಿಯೇಟರ್ ತೆರೆದಿದ್ದು ನನ್ನ ಗಮನಕ್ಕೆ ಬಂದಿಲ್ಲ. ಫೋಟೋಗಳೆಲ್ಲ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿವೆ. ಇದು ದೊಡ್ಡ ಅಚಾತುರ್ಯ ಎಂದು ವಿನಯ್ಕುಮಾರ್ ಹೇಳಿದ್ದಾರೆ. ವೈದ್ಯರು, ಸಿಬ್ಬಂದಿಯನ್ನು ವಿಚಾರಿಸಲು, ಘಟನೆಯನ್ನು ಪರಿಶೀಲಿಸಲು ಸಮಿತಿಯೊಂದನ್ನು ರಚಿಸಲಾಗಿದೆ. ಅದರ ವರದಿಯ ನಂತರ ಕ್ರಮ ಕೈಗೊಳ್ಳಲಾಗುವುದು ಎಂದೂ ಹೇಳಿದ್ದಾರೆ.
ಮಾಡಿದ್ದು ದಂತ ಶಸ್ತ್ರಚಿಕಿತ್ಸೆ ವೈದ್ಯರು ಮೊಬೈಲ್ ಫ್ಲ್ಯಾಶ್ ಬೆಳಕಲ್ಲಿ ನಡೆಸಿದ್ದು ದಂತ ಶಸ್ತ್ರಚಿಕಿತ್ಸೆ ಎಂಬುದು ಫೋಟೋ ನೋಡಿದರೆ ಗೊತ್ತಾಗುತ್ತಿದೆ. ಸೋಮವಾರ ಬೆಳಗ್ಗೆ ಡೆಂಟಲ್ ರೋಗಿಗೆ ದಂತದ ಸರ್ಜರಿ ಮಾಡುವುದಾಗಿ ಹಿಂದಿನ ದಿನವೇ ನಿರ್ಧರಿಸಲಾಗಿತ್ತು. ಹಾಗೇ, ಸೋಮವಾರ ಸರ್ಜರಿ ಆರಂಭ ಮಾಡಿದ ಕೆಲವೇ ಹೊತ್ತಲ್ಲಿ ಕರೆಂಟ್ ಹೋಯಿತು. ಇರುವ ಪರ್ಯಾಯ ಮಾರ್ಗಗಳು ಕಾರ್ಯನಿರ್ವಹಿಸುತ್ತಿರಲಿಲ್ಲ. ಹಾಗಾಗಿ ಅನಿವಾರ್ಯವಾಗಿ ಮೊಬೈಲ್ ಬೆಳಕಲ್ಲಿ ಸರ್ಜರಿ ಮಾಡಬೇಕಾಯಿತು. ಸಂಪೂರ್ಣ ಸರ್ಜರಿಯೂ ಮೊಬೈಲ್ ಬೆಳಕಲ್ಲೇ ನಡೆದಿದೆ ಎಂದು ದಂತ ವಿಭಾಗದ ಸಿಬ್ಬಂದಿ ಒಪ್ಪಿಕೊಂಡಿದ್ದಾರೆ.
ಇದನ್ನೂ ಓದಿ: Viral Video: ಚಲಿಸುತ್ತಿದ್ದ ಕಾರಿನಿಂದ ದೊಪ್ಪನೆ ರಸ್ತೆಗೆ ಬಿದ್ದ ಮಗು; ಮುಂದೇನಾಯ್ತು ನೀವೇ ನೋಡಿ..
ಉತ್ತರಾಖಂಡದಲ್ಲಿ 35 ಕಿಮೀ ದೂರ ಹಿಮ್ಮುಖವಾಗಿ ಚಲಿಸಿದ ರೈಲು; ಅದರ ವೇಗಕ್ಕೆ ಪ್ರಯಾಣಿಕರು ಕಂಗಾಲು !
Published On - 3:28 pm, Thu, 18 March 21
