Cyber Crime: ಸೈಬರ್ ಕ್ರಿಮಿನಲ್, ನಕಲಿ ಫೋನ್ ಕಾಲ್ ಬಗ್ಗೆ ಎಚ್ಚರ!; ಸರ್ಕಾರ ಸೂಚನೆ
ಸರ್ಕಾರಿ ಅಧಿಕಾರಿಗಳ ಹೆಸರಿನಲ್ಲಿ ಇತ್ತೀಚೆಗೆ ಜನರು ಮೋಸ ಮಾಡುತ್ತಿದ್ದಾರೆ. ತಾವು ನಿಜವಾದ ಅಧಿಕಾರಿಗಳೆಂದು ಜನರನ್ನು ನಂಬಿಸಲು ಈ ವಂಚಕರು ಪೊಲೀಸ್ ಠಾಣೆಗಳು ಮತ್ತು ಸರ್ಕಾರಿ ಕಚೇರಿಗಳನ್ನು ಹೋಲುವ ಸ್ಟುಡಿಯೋಗಳನ್ನು ಬಳಸುತ್ತಾರೆ. ಜನರ ಜೊತೆಗಿನ ಮಾತುಕತೆಯ ವೇಳೆ ಅವರು ಸಾಮಾನ್ಯವಾಗಿ ಸಮವಸ್ತ್ರವನ್ನು ಧರಿಸುತ್ತಾರೆ. ಈ ರೀತಿ ಯಾಮಾರಿಸುವವರ ಬಗ್ಗೆ ಎಚ್ಚರಿಕೆಯಿಂದ ಇರಲು ಗೃಹ ಸಚಿವಾಲಯ ಸೂಚಿಸಿದೆ.
Updated on: May 14, 2024 | 6:19 PM
ನವದೆಹಲಿ: ವಿವಿಧ ಸರ್ಕಾರಿ ಏಜೆನ್ಸಿಗಳ ಅಧಿಕಾರಿಗಳ ಸೋಗಿನಲ್ಲಿ ಬ್ಲ್ಯಾಕ್ಮೇಲ್ ಮತ್ತು ‘ಡಿಜಿಟಲ್ ಅರೆಸ್ಟ್’ನಂತಹ ಮೋಸದ ಚಟುವಟಿಕೆಗಳಲ್ಲಿ ತೊಡಗಿರುವ ಸೈಬರ್ ಅಪರಾಧಿಗಳ (Cyber Criminals) ಹೆಚ್ಚಳದ ಕುರಿತು ಗೃಹ ಸಚಿವಾಲಯ (MHA) ಮಂಗಳವಾರ ಕಠಿಣ ಎಚ್ಚರಿಕೆ ನೀಡಿದೆ. ಈ ಕ್ರಿಮಿನಲ್ಗಳು ಎನ್ಸಿಬಿ, ಸಿಬಿಐ, ಆರ್ಬಿಐ, ಹಾಗೂ ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶದ ಪೊಲೀಸ್ನಂತಹ ಏಜೆನ್ಸಿಗಳ ಪ್ರತಿನಿಧಿಗಳಂತೆ ನಟಿಸುತ್ತಿದ್ದಾರೆ.
ಕೇಂದ್ರ ಗೃಹ ಸಚಿವಾಲಯ ಬಿಡುಗಡೆ ಮಾಡಿರುವ ಹೇಳಿಕೆಯಲ್ಲಿ ರಾಷ್ಟ್ರೀಯ ಸೈಬರ್ ಕ್ರೈಮ್ ರಿಪೋರ್ಟಿಂಗ್ ಪೋರ್ಟಲ್ (NCRP)ನಲ್ಲಿ ಬೆದರಿಕೆ, ಬ್ಲ್ಯಾಕ್ಮೇಲ್, ಸುಲಿಗೆ ಮತ್ತು ಕಾನೂನು ಜಾರಿ ಅಧಿಕಾರಿಗಳಂತೆ ನಟಿಸುವ ಸೈಬರ್ ಅಪರಾಧಿಗಳು ಮಾಡುವ ಡಿಜಿಟಲ್ ಅರೆಸ್ಟ್ ಕುರಿತು ವರದಿಯಾಗುತ್ತಿರುವ ದೂರುಗಳ ಸಂಖ್ಯೆ ಹೆಚ್ಚಾಗಿದೆ.
“ಈ ಸೈಬರ್ ಕ್ರಿಮಿನಲ್ಗಳು ಅಕ್ರಮ ಸರಕುಗಳು, ಔಷಧಗಳು, ನಕಲಿ ಪಾಸ್ಪೋರ್ಟ್ಗಳು ಅಥವಾ ಇತರ ನಿಷಿದ್ಧ ವಸ್ತುಗಳನ್ನು ಕಳುಹಿಸುತ್ತಿದ್ದಾರೆ” ಎಂದು MHA ಹೇಳಿದೆ. ಕೆಲವು ಸಂದರ್ಭಗಳಲ್ಲಿ, ಈ ಅಪರಾಧಿಗಳು ನಿಮ್ಮ ಕುಟುಂಬದ ಸದಸ್ಯರು ಅಥವಾ ನಿಕಟ ಸಹಚರರು ಅಪರಾಧ ಅಥವಾ ಅಪಘಾತದಲ್ಲಿ ಭಾಗಿಯಾಗಿದ್ದಾರೆ ಮತ್ತು ತಮ್ಮ ವಶದಲ್ಲಿದ್ದಾರೆ ಎಂದು ಜನರಿಗೆ ತಿಳಿಸುತ್ತಾರೆ. ಇದನ್ನು ನಂಬುವ ಜನರನ್ನು ಯಾಮಾರಿಸುತ್ತಾರೆ ಎಂದು ಗೃಹ ಸಚಿವಾಲಯ ವಿವರಿಸಿದೆ.
ಇದನ್ನೂ ಓದಿ: ವಿಡಿಯೋ ಕಾಲ್ನಲ್ಲಿ ಬೆಂಗಳೂರು ಮಹಿಳೆಯ ಬೆತ್ತಲಾಗಿಸಿ 14.57 ಲಕ್ಷ ರೂ. ಎಗರಿಸಿದ ಸೈಬರ್ ವಂಚಕರು!
ಪೊಲೀಸ್ ಅಧಿಕಾರಿಗಳು, ಸೆಂಟ್ರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ (ಸಿಬಿಐ), ಮಾದಕ ದ್ರವ್ಯ ಇಲಾಖೆ, ರಿಸರ್ವ್ ಬ್ಯಾಂಕ್ ಆಫ್ ಸೈಬರ್ ಅಪರಾಧಿಗಳಿಂದ ಬೆದರಿಕೆ, ಬ್ಲ್ಯಾಕ್ಮೇಲ್, ಸುಲಿಗೆ ಮತ್ತು ಡಿಜಿಟಲ್ ಅರೆಸ್ಟ್ಗೆ ಸಂಬಂಧಿಸಿದಂತೆ ರಾಷ್ಟ್ರೀಯ ಸೈಬರ್ ಕ್ರೈಮ್ ರಿಪೋರ್ಟಿಂಗ್ ಪೋರ್ಟಲ್ (ಎನ್ಸಿಆರ್ಪಿ)ನಲ್ಲಿ ಹೆಚ್ಚಿನ ಸಂಖ್ಯೆಯ ದೂರುಗಳು ವರದಿಯಾಗುತ್ತಿವೆ.
Alert against incidents of ‘Blackmail’ and ‘Digital Arrest’ by Cyber Criminals Impersonating Police, NCB, CBI, RBI and other Law Enforcement Agencies. (1/2)@PIB_India @DDNewslive @airnewsalerts @Cyberdost
Press Release-https://t.co/TJa4nIpzJn
— Spokesperson, Ministry of Home Affairs (@PIBHomeAffairs) May 14, 2024
ಈ ವಂಚಕರು ಸಾಮಾನ್ಯವಾಗಿ ಜನರನ್ನು ಟಾರ್ಗೆಟ್ ಮಾಡಿ ಫೋನ್ ಮಾಡುತ್ತಾರೆ. ನಿಮ್ಮ ಕಡೆಯವರು ಅಥವಾ ಸಂಬಂಧಿಗಳು ಅಕ್ರಮ ಸರಕುಗಳು, ಔಷಧಗಳು, ನಕಲಿ ಪಾಸ್ಪೋರ್ಟ್ಗಳು, ಡ್ರಗ್ಸ್ ಅಥವಾ ಯಾವುದೇ ಇತರ ನಿಷಿದ್ಧ ವಸ್ತುಗಳನ್ನು ಒಳಗೊಂಡಿರುವ ಪಾರ್ಸೆಲ್ ಅನ್ನು ಕಳುಹಿಸಿದ್ದಾರೆ. ಹೀಗಾಗಿ, ನಾವು ಕ್ರಮ ತೆಗೆದುಕೊಳ್ಳುತ್ತೇವೆ ಎಂದು ತಿಳಿಸುತ್ತಾರೆ. ಸರ್ಕಾರಿ ಅಧಿಕಾರಿಗಳ ಸೋಗಿನಲ್ಲಿ ಮಾತನಾಡುವ ಇವರನ್ನು ಜನರು ನಂಬಿ ತಮ್ಮ ಆಧಾರ್, ಪ್ಯಾನ್ ಮತ್ತಿತರ ದಾಖಲೆಗಳನ್ನು ನೀಡುತ್ತಾರೆ. ಇನ್ನು ಕೆಲವೊಮ್ಮೆ ಸಿಕ್ಕಿಹಾಕಿಕೊಂಡಿದ್ದಾರೆ ಎನ್ನಲಾದವರನ್ನು ಬಿಡಲು ಹಣ ಕೊಡಬೇಕೆಂಬ ರಾಜಿ ಮಾತುಕತೆಯೂ ನಡೆಯುತ್ತದೆ. ಅವರ ಬೇಡಿಕೆಗಳನ್ನು ಪೂರೈಸುವವರೆಗೆ ವಂಚಕರಿಗೆ ಸ್ಕೈಪ್ ಅಥವಾ ಇತರ ವೀಡಿಯೊ ಕಾನ್ಫರೆನ್ಸಿಂಗ್ ಪ್ಲಾಟ್ಫಾರ್ಮ್ನಲ್ಲಿ ಲಭ್ಯವಿರುತ್ತದೆ. ವಂಚಕರು ಪೊಲೀಸ್ ಠಾಣೆಗಳು ಮತ್ತು ಸರ್ಕಾರಿ ಕಚೇರಿಗಳ ಮಾದರಿಯ ಸ್ಟುಡಿಯೋಗಳನ್ನು ಬಳಸುತ್ತಾರೆ. ತಾವು ಅಸಲಿಯಾಗಿ ಕಾಣಿಸಿಕೊಳ್ಳಲು ಸಮವಸ್ತ್ರವನ್ನು ಧರಿಸುತ್ತಾರೆ.
ಇದನ್ನೂ ಓದಿ: ಸೈಬರ್ ಕ್ರೈಂ: 5.17 ಕೋಟಿ ರೂ. ಕಳೆದುಕೊಂಡ ಬೆಂಗಳೂರು ಉದ್ಯಮಿ
ಮೈಕ್ರೋಸಾಫ್ಟ್ ಸಹಯೋಗದೊಂದಿಗೆ ಇಂತಹ ಚಟುವಟಿಕೆಗಳಲ್ಲಿ ತೊಡಗಿರುವ 1,000ಕ್ಕೂ ಹೆಚ್ಚು ಸ್ಕೈಪ್ ಐಡಿಗಳನ್ನು I4C ನಿರ್ಬಂಧಿಸಿದೆ. ಅಂತಹ ವಂಚಕರು ಬಳಸುವ ಸಿಮ್ ಕಾರ್ಡ್ಗಳು, ಮೊಬೈಲ್ ಸಾಧನಗಳು ಮತ್ತು ಮ್ಯೂಲ್ ಖಾತೆಗಳನ್ನು ನಿರ್ಬಂಧಿಸಲು ಸಹ ಇದು ಸುಗಮಗೊಳಿಸುತ್ತದೆ. I4C ತನ್ನ ಸಾಮಾಜಿಕ ಮಾಧ್ಯಮ ಪ್ಲಾಟ್ಫಾರ್ಮ್ ‘ಸೈಬರ್ಡೋಸ್ಟ್’ನಲ್ಲಿ ಇನ್ಫೋಗ್ರಾಫಿಕ್ಸ್ ಮತ್ತು ವೀಡಿಯೊಗಳ ಮೂಲಕ ವಿವಿಧ ಎಚ್ಚರಿಕೆಗಳನ್ನು ನೀಡಿದೆ
ಇಂತಹ ವಂಚನೆಗಳ ಬಗ್ಗೆ ನಾಗರಿಕರು ಜಾಗೃತರಾಗಿ ಜಾಗೃತಿ ಮೂಡಿಸಬೇಕು ಎಂದು ಸರ್ಕಾರ ಸಲಹೆ ನೀಡಿದೆ. ಅಂತಹ ಕರೆಗಳನ್ನು ಸ್ವೀಕರಿಸಿದ ನಂತರ, ನಾಗರಿಕರು ಸಹಾಯಕ್ಕಾಗಿ ತಕ್ಷಣವೇ ಸೈಬರ್ ಕ್ರೈಮ್ ಸಹಾಯವಾಣಿ ಸಂಖ್ಯೆ 1930 ಅಥವಾ www.cybercrime.gov.in ಕ್ಕೆ ದೂರು ನೀಡಬೇಕು ಎಂದು ಗೃಹ ಸಚಿವಾಲಯ ತಿಳಿಸಿದೆ.
ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
