ಮೊದಲು ಅಪರಾಧಿ, ಈಗ ಬಾಳೆಹಣ್ಣು ವ್ಯಾಪಾರಿ, ಅಪರಾಧಗಳು ಕಡಿಮೆಯಾಗಿವೆ ಎಂಬುದಕ್ಕೆ ಬೇರೆ ನಿದರ್ಶನ ಬೇಕೆ ಎಂದಿದ್ದರಂತೆ ವ್ಯಾಪಾರಿ, ಹರ್ಷ್​ ಹಾಸ್ಯಕ್ಕೆ ನಕ್ಕ ಸಿಎಂ ಯೋಗಿ

ಲಕ್ನೋ, ಅಕ್ಟೋಬರ್ 28: ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರ ಸಮ್ಮುಖದಲ್ಲಿ ಹಾಸ್ಯ ಕಲಾವಿದ ಹರ್ಷ್ ಗುಜ್ರಾಲ್ ಹೇಳಿದ ಜೋಕ್ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಲಕ್ನೋದಲ್ಲಿ ನಡೆದ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಉತ್ತರ ಪ್ರದೇಶದಲ್ಲಿ ಅಪರಾಧ ಕಡಿಮೆಯಾಗಿರುವ ಬಗ್ಗೆ ಮಾತನಾಡಿದ ಅವರು, ಬಾಳೆಹಣ್ಣು ಮಾರಾಟಗಾರನೊಂದಿಗೆ ನಡೆದಿದ್ದ ಮಾತುಕತೆಯೊಂದನ್ನು ಹಂಚಿಕೊಂಡರು. ಈ ಹಾಸ್ಯಭರಿತ ಮಾತಿಗೆ ಸಭೆಯಲ್ಲಿದ್ದವರೊಂದಿಗೆ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಕೂಡ ನಕ್ಕರು.

ಏನಿದು ಬಾಳೆಹಣ್ಣು ವ್ಯಾಪಾರಿಯ ಜೋಕ್? ಹರ್ಷ್ ಗುಜ್ರಾಲ್ ತಮ್ಮ ಭಾಷಣದ ವೇಳೆ ಲಕ್ನೋಗೆ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಲು ಬಂದಿದ್ದಾಗ ನಡೆದ ಘಟನೆಯೊಂದನ್ನು ನೆನಪಿಸಿಕೊಂಡರು. ಆಗ ಅವರು ಹಣ್ಣು ಮಾರುತ್ತಿದ್ದ ವ್ಯಕ್ತಿಯೊಬ್ಬರನ್ನು ಭೇಟಿಯಾಗಿ, ಉತ್ತರ ಪ್ರದೇಶದಲ್ಲಿ ಅಪರಾಧ ಕಡಿಮೆಯಾಗಿದೆಯೇ ಎಂದು ಕೇಳಿದ್ದರಂತೆ. ಅದಕ್ಕೆ ಆ ವ್ಯಕ್ತಿ, ಅಪರಾಧ ಚಟುವಟಿಕೆಗಳು ಈಗ ಕಡಿಮೆಯಾಗಿವೆ ಎಂದು ಉತ್ತರಿಸಿದ್ದರಂತೆ.

View this post on Instagram

A post shared by Harsh Gujral (@realharshgujral)

ಇದನ್ನು ತಿಳಿದುಕೊಳ್ಳಲು ಕಾರಣವೇನು ಎಂದು ಹರ್ಷ್ ಕೇಳಿದಾಗ, “ನಾನು ಮೊದಲು ಅಪರಾಧಿಯಾಗಿದ್ದೆ, ಈಗ ಬಾಳೆಹಣ್ಣು ಮಾರುತ್ತಿದ್ದೇನೆ” ಎಂದು ಆ ವ್ಯಕ್ತಿ ಹೇಳಿದ್ದಾಗಿ ಅವರು ಹಾಸ್ಯವಾಗಿ ವಿವರಿಸಿದರು. ಈ ಮಾತು ಕೇಳಿ ಸಭೆಯಲ್ಲಿ ಜೋರಾಗಿ ನಗು ಕೇಳಿಬಂತು. ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಕೂಡ ನಗುತ್ತಿರುವುದು ವಿಡಿಯೋದಲ್ಲಿ ಕಂಡುಬಂದಿದೆ.

ಉತ್ತರ ಪ್ರದೇಶದ ಬದಲಾವಣೆಯ ಬಗ್ಗೆ ಹರ್ಷ್ ಮಾತು ತಮ್ಮ ಭಾಷಣದಲ್ಲಿ ಹರ್ಷ್ ಗುಜ್ರಾಲ್ ಉತ್ತರ ಪ್ರದೇಶದ ಅಭಿವೃದ್ಧಿಯ ಬಗ್ಗೆಯೂ ಮಾತನಾಡಿದರು. ರಾಜ್ಯದಲ್ಲಿ ಸುಮಾರು 30 ಕೋಟಿ ಜನರ ಜವಾಬ್ದಾರಿ ಹೊತ್ತಿರುವ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರನ್ನು ಯುವಕರು ಮತ್ತು ಹಿರಿಯರು ಮೆಚ್ಚುತ್ತಿದ್ದಾರೆ ಎಂದು ಹೇಳಿದರು.

ಹಿಂದೆ ಉತ್ತರ ಪ್ರದೇಶದ ಬಗ್ಗೆ ಮಾತನಾಡುವಾಗ ಅಪರಾಧದ ವಿಚಾರವೇ ಹೆಚ್ಚಾಗಿ ಚರ್ಚೆಯಾಗುತ್ತಿತ್ತು. ಆದರೆ ಈಗ ರಾಜ್ಯದ ಬಗ್ಗೆ ಜನರ ಅಭಿಪ್ರಾಯ ಬದಲಾಗುತ್ತಿದೆ ಎಂದು ಹರ್ಷ್ ಅಭಿಪ್ರಾಯಪಟ್ಟರು. ವಿದೇಶಗಳಲ್ಲಿ ಕಾರ್ಯಕ್ರಮ ನೀಡಿದಾಗಲೂ ಉತ್ತರ ಪ್ರದೇಶದ ಪ್ರಗತಿಯ ಬಗ್ಗೆ ಜನರು ಮಾತನಾಡುವುದನ್ನು ಗಮನಿಸಿದ್ದಾಗಿ ತಿಳಿಸಿದರು.

ಇದನ್ನೂ ಓದಿ: ಕುಶಿನಗರದಲ್ಲಿ ಪ್ರವಾಹದ ಸ್ಥಳಗಳಿಗೆ ಸಿಎಂ ಯೋಗಿ ಆದಿತ್ಯನಾಥ್ ಭೇಟಿ; ನಾರಾಯಣಿ ನದಿ ಹೂಳೆತ್ತಲು ಆದೇಶ

ಪ್ರಶಸ್ತಿ ಸ್ವೀಕರಿಸಿದ ಹರ್ಷ್ ಗುಜ್ರಾಲ್ ಯುಪಿ ಕ್ರಿಯೇಟರ್ಸ್ ಶೃಂಗಸಭೆ ಮತ್ತು ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಹರ್ಷ್ ಗುಜ್ರಾಲ್ ಅವರಿಗೆ ಪ್ರಶಸ್ತಿ ನೀಡಲಾಯಿತು. ಈ ಗೌರವಕ್ಕಾಗಿ ಆಯೋಜಕರಿಗೆ ಧನ್ಯವಾದ ತಿಳಿಸಿದ ಅವರು, ತಮ್ಮ ಸಾಧನೆಯಿಂದ ಪೋಷಕರಿಗೂ ಸಂತೋಷವಾಗಿದೆ ಎಂದು ಹೇಳಿದರು. ಕಾನ್ಪುರದವರಾದ ತಾವು ಜನರನ್ನು ನಗಿಸುವುದು ಮತ್ತು ಅವರ ಒತ್ತಡವನ್ನು ಕಡಿಮೆ ಮಾಡುವುದು ತಮ್ಮ ಕೆಲಸ ಎಂದು ಹರ್ಷ್ ತಿಳಿಸಿದರು. ಕಾರ್ಯಕ್ರಮದ ವೇಳೆ ಅವರು ಹಂಚಿಕೊಂಡ ಬಾಳೆಹಣ್ಣು ವ್ಯಾಪಾರಿಯ ಜೋಕ್‌ನ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಹಾಸ್ಯಪ್ರಿಯರ ಗಮನ ಸೆಳೆಯುತ್ತಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ