ಆಗಮ ದೇವಾಲಯಗಳಿಗೆ ಅನ್ಯಧರ್ಮೀಯರ ಪ್ರವೇಶಕ್ಕೆ ಕಠಿಣ ನಿಯಮ

ಮಧುರೈ, ಅಕ್ಟೋಬರ್ 28: ತಮಿಳುನಾಡಿನ ಆಗಮ ಶಾಸ್ತ್ರದ ಪ್ರಕಾರ ಪೂಜೆ ನಡೆಯುವ ದೇವಾಲಯಗಳ ಪ್ರವೇಶಕ್ಕೆ ಸಂಬಂಧಿಸಿದಂತೆ ಮದ್ರಾಸ್ ಹೈಕೋರ್ಟ್ ಮಹತ್ವದ ಆದೇಶ ನೀಡಿದೆ. ಇಂತಹ ದೇವಾಲಯಗಳಿಗೆ ಪ್ರವೇಶಿಸಲು ಬಯಸುವ ಹಿಂದೂಯೇತರರು, ದೇವತೆಯ ಮೇಲಿನ ಭಕ್ತಿ ಮತ್ತು ದೇವಾಲಯದ ಸಂಪ್ರದಾಯಗಳಿಗೆ ಗೌರವವನ್ನು ಘೋಷಣೆಯ ಮೂಲಕ ದೃಢಪಡಿಸಬೇಕು ಎಂದು ನ್ಯಾಯಾಲಯ ತಿಳಿಸಿದೆ. ಈ ನಿಯಮವನ್ನು ದೇವಾಲಯದ ಒಳಾಂಗಣಕ್ಕೆ ಮಾತ್ರವಲ್ಲ, ಇಡೀ ದೇವಾಲಯದ ಆವರಣಕ್ಕೂ ಅನ್ವಯಿಸುವಂತೆ ಆದೇಶಿಸಲಾಗಿದೆ ಎಂದು ವರದಿಯಾಗಿದೆ. ಇದು ಎಲ್ಲ ದೇವಾಲಯಗಳಿಗೂ ಅನ್ವಯಿಸುವುದಿಲ್ಲ, ಆಗಮ ಪದ್ಧತಿಯನ್ನು ಅನುಸರಿಸುವ ನಿರ್ದಿಷ್ಟ ದೇವಾಲಯಗಳಿಗೆ ಮಾತ್ರ ಸೀಮಿತವಾಗಿದೆ.

ನ್ಯಾಯಮೂರ್ತಿಗಳಾದ ಜಿ.ಆರ್. ಸ್ವಾಮಿನಾಥನ್ ಮತ್ತು ಪಿ. ಮುರುಗನ್ ಅವರನ್ನೊಳಗೊಂಡ ವಿಭಾಗೀಯ ಪೀಠವು ದೇವಾಲಯಗಳ ಪಾವಿತ್ರ್ಯತೆ ಮತ್ತು ಆಗಮ ನಿಯಮಗಳ ರಕ್ಷಣೆ ಕೋರಿ ಸಲ್ಲಿಸಲಾದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯ ವಿಚಾರಣೆ ನಡೆಸಿ ಈ ಆದೇಶ ಹೊರಡಿಸಿದೆ. ಈ ಹಿಂದೆ ಜಾರಿಯಲ್ಲಿದ್ದ ವ್ಯವಸ್ಥೆಯ ಪ್ರಕಾರ, ಹಿಂದೂಯೇತರ ವ್ಯಕ್ತಿಗಳು ದೇವಾಲಯದ ಧ್ವಜಸ್ತಂಭವನ್ನು (ಕೊಡಿಮರಂ) ದಾಟಿ ಒಳಪ್ರವೇಶಿಸಲು ಬಯಸಿದರೆ ಮಾತ್ರ ದೇವರಲ್ಲಿ ನಂಬಿಕೆ ವ್ಯಕ್ತಪಡಿಸುವ ಘೋಷಣೆಗೆ ಸಹಿ ಹಾಕಬೇಕಿತ್ತು.

ಹೊಸ ಆದೇಶ: ಈಗ ನ್ಯಾಯಾಲಯವು ಈ ನಿರ್ಬಂಧವನ್ನು ಇಡೀ ದೇವಾಲಯದ ಆವರಣಕ್ಕೆ ವಿಸ್ತರಿಸಿದೆ. ಇತರ ಧರ್ಮಗಳ ಗುರುತುಗಳನ್ನು ಧರಿಸಿರುವವರು ದೇವಾಲಯದ ಆವರಣ ಪ್ರವೇಶಿಸುವ ಮುನ್ನವೇ ದೇವತೆಯ ಮೇಲಿನ ಭಕ್ತಿಯನ್ನು ಮತ್ತು ದೇವಾಲಯದ ಆಚಾರ-ವಿಚಾರಗಳನ್ನು ಗೌರವಿಸುವುದಾಗಿ ಸೂಚಿತ ನಮೂನೆಯಲ್ಲಿ ದೃಢೀಕರಿಸುವುದು ಕಡ್ಡಾಯವಾಗಿದೆ. ಈ ತೀರ್ಪು ಅನ್ಯಧರ್ಮೀಯರ ಮೇಲೆ ಸಂಪೂರ್ಣ ನಿಷೇಧ ಹೇರುವುದಿಲ್ಲ. ಯಾರೇ ಆದರೂ ದೇವತೆಯ ಮೇಲಿನ ಗೌರವ ಮತ್ತು ಭಕ್ತಿಯ ಘೋಷಣಾಪತ್ರಕ್ಕೆ ಸಹಿ ಹಾಕಿದರೆ ಅವರಿಗೆ ಪ್ರವೇಶದ ಹಕ್ಕಿದೆ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.

ಇದನ್ನೂ ಓದಿ:

ಬಿಹಾರದ ವಿಚಿತ್ರ ಸಂಪ್ರದಾಯ: ನವರಾತ್ರಿಯ 10 ದಿನ ಮಹಿಳೆಯರಿಗೆ ಪ್ರವೇಶವಿಲ್ಲದ ಆಶಾಪುರಿ ದೇವಿ ದೇವಾಲಯ!

ತಿರುವಣ್ಣಾಮಲೈ ಅರುಣಾಚಲೇಶ್ವರ ದೇಗುಲದ ವಿಡಿಯೋ: ಭಕ್ತರ ಪ್ರತಿಭಟನೆಯ ನಡುವೆಯೂ ಕೆಲವರು ಟೋಪಿ ಧರಿಸಿ ತಿರುವಣ್ಣಾಮಲೈ ಅರುಣಾಚಲೇಶ್ವರ ದೇವಸ್ಥಾನ ಪ್ರವೇಶಿಸಿದ ವೈರಲ್ ವಿಡಿಯೋವನ್ನು ನ್ಯಾಯಾಧೀಶರು ಉಲ್ಲೇಖಿಸಿದರು. ಈ ವೇಳೆ ದೇವಾಲಯದ ಸಿಬ್ಬಂದಿ ಮೂಕಪ್ರೇಕ್ಷಕರಾಗಿದ್ದನ್ನು ಪೀಠ ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿತು. ಮಧುರೈ ಸೆಂಟ್ರಲ್ ಶಾಸಕ ಬದ್ರುದ್ದೀನ್ ಮುಸ್ತಫಾ ಅವರು ನಿಯಮ ಪಾಲಿಸದೆ ಮೀನಾಕ್ಷಿ ದೇವಸ್ಥಾನ ಪ್ರವೇಶಿಸಿ ಗೋಪುರಗಳನ್ನು ಹತ್ತಿದ್ದು ಮತ್ತು ಕ್ರಿಶ್ಚಿಯನ್ ಸಚಿವರೊಬ್ಬರು ಅಗತ್ಯ ಮುಚ್ಚಳಿಕೆ ನೀಡದೆ ತಿರುಚೆಂದೂರು ಮುರುಗನ್ ದೇಗುಲಕ್ಕೆ ಭೇಟಿ ನೀಡಿದ್ದನ್ನು ನ್ಯಾಯಾಲಯ ಪ್ರಸ್ತಾಪಿಸಿತು.

ಮುಖ್ಯಮಂತ್ರಿ ಜೋಸೆಫ್ ವಿಜಯ್ ಉದಾಹರಣೆ: ಇದಕ್ಕೆ ಪ್ರತಿಯಾಗಿ, ಮುಖ್ಯಮಂತ್ರಿ ಜೋಸೆಫ್ ವಿಜಯ್ ಅವರ ನಡವಳಿಕೆಯನ್ನು ನ್ಯಾಯಾಲಯ ಶ್ಲಾಘಿಸಿತು. ನಂಬಿಕೆಯಿಂದ ಕ್ರಿಶ್ಚಿಯನ್ ಆಗಿದ್ದರೂ ವಿಜಯ್ ಅವರು ನಿಯಮಾನುಸಾರ ಒಪ್ಪಂದಕ್ಕೆ ಸಹಿ ಹಾಕಿ ಮಧುರೈ ಮೀನಾಕ್ಷಿ ಅಮ್ಮನವರ ಸನ್ನಿಧಿಯಲ್ಲಿ ಗೌರವಯುತವಾಗಿ ಪೂಜೆ ಸಲ್ಲಿಸಿದ್ದರು. “ಇಲ್ಲಿ ಯಾರನ್ನೂ ಮತಾಂತರಗೊಳ್ಳಲು ಕೇಳುವುದಿಲ್ಲ, ಬದಲಿಗೆ ದೇವತೆಯ ಮೇಲಿನ ಭಕ್ತಿಯನ್ನು ದೃಢೀಕರಿಸಲು ಮಾತ್ರ ಕೇಳಲಾಗುತ್ತದೆ” ಎಂದು ನ್ಯಾಯಪೀಠ ಹೇಳಿತು.

ತೀರ್ಪಿನ ವ್ಯಾಪ್ತಿ ಮತ್ತು ಐತಿಹಾಸಿಕ ಹಿನ್ನೆಲೆ ಆಗಮಿಕ್ ದೇವಾಲಯಗಳಿಗೆ ಮಾತ್ರ ಸೀಮಿತ: ಈ ಕಟ್ಟುನಿಟ್ಟಿನ ನಿಯಮವು ಕೇವಲ ಆಗಮ ಶಾಸ್ತ್ರದ ಪ್ರಕಾರ ಪೂಜಾ ವಿಧಿವಿಧಾನಗಳು ನಡೆಯುವ ದೇವಾಲಯಗಳಿಗೆ ಮಾತ್ರ ಅನ್ವಯಿಸುತ್ತದೆ. ಧರ್ಮದ ಗಡಿಗಳನ್ನು ಮೀರಿ ಎಲ್ಲಾ ಭಕ್ತರನ್ನು ಮುಕ್ತವಾಗಿ ಸ್ವಾಗತಿಸುವ ಶಬರಿಮಲೆ ಅಯ್ಯಪ್ಪ ಹಾಗೂ ಶಿರಡಿ ಸಾಯಿಬಾಬಾ ಅವರಂತಹ ದೇವಾಲಯಗಳಿಗೆ ಇದು ಅನ್ವಯಿಸುವುದಿಲ್ಲ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.

1972 ರ ಕಲ್ಯಾಣ್ ದಾಸ್ ವರ್ಸಸ್ ತಮಿಳುನಾಡು ಸರ್ಕಾರ ಪ್ರಕರಣ ಮತ್ತು 2024 ರ ಡಿ. ಸೆಂಥಿಲ್‌ಕುಮಾರ್ ಪ್ರಕರಣಗಳ ಹಿಂದಿನ ತೀರ್ಪುಗಳನ್ನು ಪರಿಶೀಲಿಸಿದ ಪೀಠ, ದೇವಾಲಯಗಳ ಸಾಂಪ್ರದಾಯಿಕ ಪದ್ಧತಿ ಮತ್ತು ಭಕ್ತರ ಭಾವನೆಗಳನ್ನು ರಕ್ಷಿಸಲು ಭಕ್ತಿಯ ದೃಢೀಕರಣ ಅತ್ಯಗತ್ಯ ಎಂದು ತೀರ್ಪು ನೀಡಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ