Bhargavastra: ಭಾರತದಿಂದ ಭಾರ್ಗವಾಸ್ತ್ರ ಪರೀಕ್ಷೆ; ಡ್ರೋನ್ಗಳನ್ನು ಚಿಂದಿ ಉಡಾಯಿಸಲು ಭಾರತಕ್ಕೆ ಹೊಸ ಶಕ್ತಿ
Bhargavastra, an anti-drone system developed by Solar Defence: ಡ್ರೋನ್ ಸಮೂಹವನ್ನು ನಾಶ ಮಾಡಲು ಭಾರತವು ಮತ್ತೊಂದು ಪ್ರಬಲ ಆ್ಯಂಟಿ ಡ್ರೋನ್ ಸಿಸ್ಟಂ ಅಭಿವೃದ್ಧಿಪಡಿಸಿದೆ. ಸೋಲಾರ್ ಡಿಫೆನ್ಸ್ ಎನ್ನುವ ಕಂಪನಿ ಇದನ್ನು ನಿರ್ಮಿಸಿದೆ. ಭಾರತದಲ್ಲಿ ಹೆಚ್ಚುತ್ತಿರುವ ಆ್ಯಂಟಿ ಡ್ರೋನ್ ಸಿಸ್ಟಂಗಳ ಸಾಲಿಗೆ ಭಾರ್ಗವಾಸ್ತ್ರ ಹೊಸ ಸೇರ್ಪಡೆ. ಡಿಆರ್ಡಿಒ, ಝೆನ್ ಟೆಕ್ನಾಲಜಿ ಇತ್ಯಾದಿ ಹಲವು ಸಂಸ್ಥೆಗಳು ಆ್ಯಂಟಿ-ಡ್ರೋನ್ ಸಿಸ್ಟಂ ನಿರ್ಮಿಸಬಲ್ಲುವಾಗಿವೆ.
Updated on: May 14, 2025 | 5:21 PM
ನವದೆಹಲಿ, ಮೇ 14: ಭಾರತವು ಕಡಿಮೆ ವೆಚ್ಚದಲ್ಲಿ ದೇಶೀಯವಾಗಿ ಡ್ರೋನ್ ನಿಗ್ರಹ ಅಸ್ತ್ರವನ್ನು ಅಭಿವೃದ್ಧಿಪಡಿಸಿದೆ. ಭಾರ್ಗವಾಸ್ತ್ರ (Bhargavastra) ಎಂದು ಕರೆಯಲಾಗುವ ಈ ಸಿಸ್ಟಂ ಅನ್ನು ಒಡಿಶಾದ ಗೋಪಾಲಪುರ್ ಬಳಿ ಭಾರತ ಇಂದು ಯಶಸ್ವಿಯಾಗಿ ಪರೀಕ್ಷೆ ನಡೆಸಿದೆ. ಸೋಲಾರ್ ಡಿಫೆನ್ಸ್ ಅಂಡ್ ಏರೋಸ್ಪೇಸ್ ಲಿಮಿಟೆಡ್ (Solar Defense and Aerospace Ltd) ಎನ್ನುವ ಖಾಸಗಿ ಕಂಪನಿ ಈ ಆ್ಯಂಟಿ-ಡ್ರೋನ್ ಸಿಸ್ಟಂ ಅನ್ನು ಅಭಿವೃದ್ಧಿಪಡಿಸಿದ್ದು, ಡ್ರೋನ್ಗಳ ಗುಂಪನ್ನು (drone swarms) ನಿಗ್ರಹಿಸಲು ಪರಿಣಾಮಕಾರಿ ಎನಿಸುವ ನಿರೀಕ್ಷೆ ಇದೆ.
ಆಪರೇಷನ್ ಸಿಂದೂರದ ವೇಳೆ ಪಾಕಿಸ್ತಾನದಿಂದ ನೂರಾರು ಡ್ರೋನ್ಗಳನ್ನು ಭಾರತಕ್ಕೆ ನುಗ್ಗಿಸಲಾಗಿತ್ತು. ಭಾರತದ ಪ್ರಬಲ ರಕ್ಷಣಾ ಕೋಟೆಯನ್ನು ಪರೀಕ್ಷಿಸಲು ಈ ಡ್ರೋನ್ಗಳನ್ನು ಬಳಸಲಾಗಿತ್ತು. ರಷ್ಯಾ-ಉಕ್ರೇನ್ ಯುದ್ಧದಲ್ಲೂ ಡ್ರೋನ್ಗಳನ್ನು ಯಥೇಚ್ಛವಾಗಿ ಬಳಸಲಾಗಿದೆ. ಉಕ್ರೇನ್ನ ಡ್ರೋನ್ಗಳು ರಷ್ಯನ್ ಮಿಲಿಟರಿಗೆ ದೊಡ್ಡ ತಲೆನೋವೇ ಆಗಿದೆ. ರಷ್ಯಾದ ಮಿಲಿಟರಿ ನೌಕೆಯನ್ನು ಇವೇ ಡ್ರೋನ್ಗಳು ಮುಳುಗಿಸಿದ್ದುವು.
ಇದನ್ನೂ ಓದಿ: ಇದು ಟಾಪ್ ಸೀಕ್ರೆಟ್… ಆಪರೇಷನ್ ಸಿಂದೂರದಿಂದ ಹಲವರ ಬಣ್ಣ ಬಯಲು; ಅಮೆರಿಕ ನಡುಗಲು ನಿಜ ಕಾರಣ ಏನು ಗೊತ್ತಾ?
ಪರಿಣಿತರ ಪ್ರಕಾರ, ಮುಂಬರುವ ಯಾವುದೇ ಯುದ್ಧದಲ್ಲೂ ಡ್ರೋನ್ಗಳ ಪಾತ್ರ ಬಹಳ ಮುಖ್ಯವಾಗಿರುತ್ತದೆ. ಭಾರತ ಪಾಕಿಸ್ತಾನ ಸಂಘರ್ಷದಲ್ಲೂ ಇದರ ಸುಳಿವು ಸಿಕ್ಕಿದೆ. ಈ ಹಿನ್ನೆಲೆಯಲ್ಲಿ ಭಾರತದ ಭಾರ್ಗವಾಸ್ತ್ರದ ಆವಿಷ್ಕಾರವು ಗಮನಾರ್ಹ ಎನಿಸುತ್ತದೆ.
ಭಾರತ ಮತ್ತು ಪಾಕಿಸ್ತಾನ ಸಂಘರ್ಷದ ವೇಳೆ ಡ್ರೋನ್ಗಳ ಗುಂಪನ್ನು ತಡೆಯಲು ಮತ್ತು ನಾಶ ಮಾಡಲು ಭಾರತವು ಡಿ4 ಸಿಸ್ಟಂ ಅನ್ನು ಬಳಸಿತ್ತು. ಅದರಲ್ಲಿ ಹೆಚ್ಚುಕಡಿಮೆ ಪೂರ್ಣ ಯಶಸ್ವಿಯಾಗಿದೆ. ಡಿಆರ್ಡಿಒ ಸಂಸ್ಥೆ ಸ್ವಂತವಾಗಿ ಈ ಆ್ಯಂಟಿ ಡ್ರೋನ್ ಸಿಸ್ಟಂ ಅನ್ನು ಅಭಿವೃದ್ದಿಪಡಿಸಿತ್ತು. ಹಮಾಸ್ ರಾಕೆಟ್ಗಳನ್ನು ಇಸ್ರೇಲ್ನ ಐರನ್ ಡೋಮ್ ಡಿಫೆನ್ಸ್ ಸಿಸ್ಟಂ ಹೇಗೆ ಹೊಡೆದುರುಳಿಸಿತ್ತೋ, ಡಿಆರ್ಡಿಒನ ಡ್ರೋನ್ ಡಿಫೆನ್ಸ್ ಸಿಸ್ಟಂ ಕೂಡ ಅಪಾಯಕಾರಿ ಡ್ರೋನ್ಗಳನ್ನು ಹೊಡೆದೊಡೆದು ಹಾಕಿತ್ತು.
ಭಾರತದಲ್ಲಿ ಡ್ರೋನ್ಗಳನ್ನು ತಯಾರಿಸುವ 300ಕ್ಕೂ ಹೆಚ್ಚು ಕಂಪನಿಗಳಿವೆ. ಹಾಗೆಯೇ, ಆ್ಯಂಟಿ-ಡ್ರೋನ್ ಸಿಸ್ಟಮ್ಸ್ ಅಭಿವೃದ್ಧಿಸುವ ಹಲವು ಕಂಪನಿಗಳಿವೆ. ಝೆನ್ ಟೆಕ್ನಾಲಜಿ ಕಂಪನಿಯ ಆ್ಯಂಟಿ ಡ್ರೋನ್ ಸಿಸ್ಟಂಗಳು ಭಾರತೀಯ ವಾಯುಪಡೆಯಲ್ಲಿ ಮಾತ್ರವಲ್ಲ, ಆರ್ಮೇನಿಯಾಗೂ ಸರಬರಾಜಾಗಿವೆ. ಅಮೆರಿಕದ ಅಪ್ಲೈಡ್ ವಿಷುವಲ್ ಟೆಕ್ನಾಲಜಿ ಜೊತೆ ಸಹಭಾಗಿತ್ವ ಹೊಂದಿದ್ದು ಅಮೆರಿಕದ ಮಾರುಕಟ್ಟೆಗೂ ಆ್ಯಂಟಿ ಡ್ರೋನ್ ಸಿಸ್ಟಮ್ಸ್ ಸರಬರಾಜು ಮಾಡುತ್ತಿದೆ.
ಇದನ್ನೂ ಓದಿ: ಪಾಕಿಸ್ತಾನಕ್ಕೆ ಡ್ರೋನ್ ಜೊತೆಗೆ ಜನರನ್ನೂ ಕಳುಹಿಸಿದ್ದ ಟರ್ಕಿ; ಈ ದೇಶದ ಜೊತೆ ಭಾರತದ ವ್ಯಾಪಾರ ಸಂಬಂಧ ಎಷ್ಟಿದೆ?
ಡ್ರೋನ್ ಮತ್ತು ಆ್ಯಂಟಿ ಡ್ರೋನ್ ಸಿಸ್ಟಂ ಅಭಿವೃದ್ಧಿಯಲ್ಲಿ ಅಮೆರಿಕ ಮುಂಚೂಣಿಯಲ್ಲಿದೆ. ಫ್ರಾನ್ಸ್, ಟರ್ಕಿ ಇತ್ಯಾದಿ ಹಲವು ಐರೋಪ್ಯ ದೇಶಗಳು ಡ್ರೋನ್ ಮ್ಯಾನುಫ್ಯಾಕ್ಚರಿಂಗ್ನಲ್ಲಿವೆ. ಲಾಕ್ಹೀಡ್ ಮಾರ್ಟಿನ್, ರಫೇಲ್ ಇತ್ಯಾದಿ ಜೆಟ್ ಕಂಪನಿಗಳೂ ಕೂಡ ಪ್ರಬಲ ಆ್ಯಂಟಿ ಡ್ರೋನ್ ಸಿಸ್ಟಂಗಳನ್ನು ಅಭಿವೃದ್ಧಿಪಡಿಸಿವೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
