2 ತಲೆ, 2 ಬೆನ್ನುಹುರಿ, ಒಂದೇ ಹೃದಯ: ಒಡಿಶಾದಲ್ಲಿ ಅಪರೂಪದ ಸಯಾಮಿ ಅವಳಿಗಳ ಜನನ, ವೈದ್ಯಕೀಯ ಲೋಕ ದಿಗ್ಭ್ರಮೆ
ಒಡಿಶಾದಲ್ಲಿ ಅಪರೂಪದ ಸಯಾಮಿ ಅವಳಿ ಮಕ್ಕಳ ಜನನವಾಗಿದೆ. ಎರಡು ಪ್ರತ್ಯೇಕ ತಲೆಗಳು ಮತ್ತು ಎರಡು ಬೆನ್ನುಹುರಿಗಳಿದ್ದರೂ, ಅವರಿಗೆ ಒಂದೇ ಹೃದಯ ಮತ್ತು ಒಂದೇ ದೇಹವಿದೆ. ವೈದ್ಯರು ದಿಗ್ಭ್ರಮೆಗೊಂಡಿದ್ದು, ಮಗುವಿನ ಸ್ಥಿತಿ ಗಂಭೀರವಾಗಿದೆ. ಈ ವೈದ್ಯಕೀಯ ಸವಾಲು 'ಡೈಸೆಫಾಲಿಕ್ ಪ್ಯಾರಾಪಾಗಸ್' ಎಂದು ಗುರುತಿಸಲಾಗಿದೆ. ಚಿಕಿತ್ಸಾ ವೆಚ್ಚಕ್ಕಾಗಿ ಪೋಷಕರು ಸರ್ಕಾರದ ನೆರವು ಕೋರಿದ್ದಾರೆ. ಶಸ್ತ್ರಚಿಕಿತ್ಸೆ ಅತ್ಯಂತ ಅಪಾಯಕಾರಿ.
Updated on: Oct 14, 2026 | 11:05 AM
ಬೆರ್ಹಾಂಪುರ, ಅಕ್ಟೋಬರ್ 14: ಒಡಿಶಾದ ಆಸ್ಪತ್ರೆಯಲ್ಲಿ ಅಪರೂಪದ ಅಂಗರಚನೆ ಇರುವ ಸಯಾಮಿ ಅವಳಿಗಳ ಜನನವಾಗಿದೆ. ಈ ನವಜಾತ ಶಿಶುವಿಗೆ ಎರಡು ಪ್ರತ್ಯೇಕ ತಲೆಗಳು ಮತ್ತು ಎರಡು ಬೆನ್ನುಹುರಿಗಳಿದ್ದು, ಎದೆಯ ಭಾಗ ಒಂದಾಗಿದ್ದು ಒಂದೇ ಹೃದಯ ಹಾಗೂ ಒಂದೇ ದೇಹವನ್ನು ಹೊಂದಿದೆ.
ಜನನದ ಬಳಿಕ ಮಗುವಿನ ಅಸಾಮಾನ್ಯ ದೈಹಿಕ ಬೆಳವಣಿಗೆಯನ್ನು ಕಂಡು ವೈದ್ಯರೇ ಆಶ್ಚರ್ಯಚಕಿತರಾಗಿದ್ದು, ತಕ್ಷಣವೇ ಮಗುವನ್ನು ಆಸ್ಪತ್ರೆಯ ಮಕ್ಕಳ ಚಿಕಿತ್ಸಾ ವಿಭಾಗದ ವಿಶೇಷ ನವಜಾತ ಶಿಶು ಆರೈಕೆ ಘಟಕಕ್ಕೆ (SNCU) ಸ್ಥಳಾಂತರಿಸಿ ತೀವ್ರ ನಿಗಾದಲ್ಲಿ ಇರಿಸಲಾಗಿದೆ. ಜನನದ ಸಮಯದಲ್ಲಿ ಮಗು 2.6 ಕಿಲೋಗ್ರಾಂ ತೂಕವಿತ್ತು. ಎದೆಯ ಮೇಲ್ಭಾಗದಲ್ಲಿ ಎರಡು ಪ್ರತ್ಯೇಕ ಮುಖ-ತಲೆಗಳು ಜೋಡಣೆಯಾಗಿದ್ದು, ನರಮಂಡಲದ ಎರಡು ಬೆನ್ನುಹುರಿಗಳು ದೇಹದ ಕೆಳಭಾಗದೊಂದಿಗೆ ಸಂಪರ್ಕ ಹೊಂದಿವೆ.
ಮಗುವಿನ ಪ್ರಮುಖ ಆಂತರಿಕ ಅಂಗಾಂಗಗಳು, ಮುಖ್ಯವಾಗಿ ರಕ್ತಪರಿಚಲನೆ ನಡೆಸುವ ಹೃದಯ ಒಂದೇ ಆಗಿರುವುದರಿಂದ ಸದ್ಯ ಮಗುವಿನ ಆರೋಗ್ಯ ಸ್ಥಿತಿ ಗಂಭೀರವಾಗಿದ್ದು, ಹಿರಿಯ ಮಕ್ಕಳ ತಜ್ಞರ ತಂಡ ನಿರಂತರ ಚಿಕಿತ್ಸೆ ನೀಡುತ್ತಿದೆ. ಪೀಡಿಯಾಟ್ರಿಕ್ ಸರ್ಜರಿ (ಮಕ್ಕಳ ಶಸ್ತ್ರಚಿಕಿತ್ಸಾ) ವಿಭಾಗದ ಪ್ರಾಧ್ಯಾಪಕರು ಮಗುವಿನ ಆಂತರಿಕ ಅಂಗಗಳ ಸಿಟಿ ಸ್ಕ್ಯಾನ್, ಎಂಆರ್‌ಐ ಮತ್ತು ಎಕೋಕಾರ್ಡಿಯೋಗ್ರಾಮ್ ಪರೀಕ್ಷೆಗಳನ್ನು ನಡೆಸುತ್ತಿದ್ದಾರೆ. ಅಗತ್ಯ ಬಿದ್ದರೆ ಹೆಚ್ಚಿನ ತಜ್ಞರ ಚಿಕಿತ್ಸೆಗಾಗಿ ಭುವನೇಶ್ವರದ ಏಮ್ಸ್ (AIIMS) ಆಸ್ಪತ್ರೆಗೆ ಶಿಫಾರಸು ಮಾಡಲು ನಿರ್ಧರಿಸಲಾಗಿದೆ.
ಕಂಧಮಾಲ್ ಜಿಲ್ಲೆಯ ತುಮುಡಿಬಂಧ್ ವ್ಯಾಪ್ತಿಯ ತಿಡಿಪದರ್ ಗ್ರಾಮದ ತ್ರಿಲೋಚನ್ ಮಾಝಿ ಮತ್ತು ರೂನಿ ಮಾಝಿ ದಂಪತಿಯ ಮೊದಲ ಮಗು ಇದಾಗಿದೆ. ಮೊದಲ ಮಗುವಿನ ಜನನದ ನಿರೀಕ್ಷೆಯಲ್ಲಿದ್ದ ದಂಪತಿಗೆ ಮಗುವಿನ ಈ ಅಸಾಮಾನ್ಯ ರೂಪ ತೀವ್ರ ಆಘಾತವನ್ನುಂಟುಮಾಡಿದೆ.
ಮತ್ತಷ್ಟು ಒದಿ: ಅತಿಸಾರದಿಂದಾಗಿ ಆಸ್ಪತ್ರೆಯ ನೆಲದ ಮೇಲೆ ಆಕಸ್ಮಿಕವಾಗಿ ಮಲ ವಿಸರ್ಜನೆ ಮಾಡಿದ ವ್ಯಕ್ತಿ, ಆತನ ತಾಯಿ ಕೈಯಿಂದಲೇ ನೆಲ ಸ್ವಚ್ಛಗೊಳಿಸಿದ ಸಿಬ್ಬಂದಿ
ಚಿಕಿತ್ಸಾ ವೆಚ್ಚದ ಚಿಂತೆ: ಕಡು ಬಡತನದಲ್ಲಿರುವ ಈ ಬುಡಕಟ್ಟು ಕುಟುಂಬಕ್ಕೆ ಮುಂದಿನ ದಿನಗಳಲ್ಲಿ ಶಸ್ತ್ರಚಿಕಿತ್ಸೆ ಮತ್ತು ತೀವ್ರ ನಿಗಾ ಚಿಕಿತ್ಸೆಯ ಭಾರಿ ವೆಚ್ಚವನ್ನು ಭರಿಸಲು ಸಾಧ್ಯವಾಗದೆ ಕಂಗಾಲಾಗಿದ್ದು, ಮಗುವಿನ ಜೀವ ಉಳಿಸಲು ಸಾರ್ವಜನಿಕರು ಹಾಗೂ ಸರ್ಕಾರದ ನೆರವನ್ನು ಎದುರುನೋಡುತ್ತಿದ್ದಾರೆ.
ಏನಿದು ಡೈಸೆಫಾಲಿಕ್ ಪ್ಯಾರಾಪಾಗಸ್?: ವೈದ್ಯಕೀಯ ವಿಜ್ಞಾನದಲ್ಲಿ ಇಂತಹ ಪರಿಸ್ಥಿತಿಯನ್ನು ‘ಡೈಸೆಫಾಲಿಕ್ ಪ್ಯಾರಾಪಾಗಸ್’ (ಎಂದು ಕರೆಯಲಾಗುತ್ತದೆ. ಇದು ಅತ್ಯಂತ ಅಪರೂಪದ ಜೋಡಣೆಯಾದ ಸಯಾಮಿ ಅವಳಿಗಳ ರೂಪವಾಗಿದೆ.
ಕಾರಣವೇನು?: ಗರ್ಭಾವಸ್ಥೆಯ ಆರಂಭಿಕ ಹಂತದಲ್ಲಿ ಫಲವತ್ತಾದ ಒಂದೇ ಭ್ರೂಣವು ಎರಡು ಪ್ರತ್ಯೇಕ ಅವಳಿಗಳಾಗಿ ಸಂಪೂರ್ಣವಾಗಿ ವಿಭಜನೆಯಾಗಲು ವಿಫಲವಾದಾಗ ಇಂತಹ ಜನನಗಳು ಸಂಭವಿಸುತ್ತವೆ. ಎರಡೂ ತಲೆಗಳಿಗೆ ಪ್ರತ್ಯೇಕ ಮೆದುಳು ಮತ್ತು ಬೆನ್ನುಹುರಿ ಇದ್ದರೂ, ಪ್ರಮುಖ ಜೀವನಾಧಾರ ಅಂಗವಾದ ಹೃದಯ ಒಂದೇ ಆಗಿರುವುದರಿಂದ ಇಂತಹ ಮಕ್ಕಳನ್ನು ಶಸ್ತ್ರಚಿಕಿತ್ಸೆಯ ಮೂಲಕ ಪ್ರತ್ಯೇಕಿಸುವುದು ವೈದ್ಯಕೀಯವಾಗಿ ಅತ್ಯಂತ ಸವಾಲಿನ ಮತ್ತು ಅಪಾಯಕಾರಿ ಕೆಲಸವಾಗಿದೆ.
ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
