ಆರ್‌ಆರ್‌ಬಿ ಸ್ಟೇಷನ್ ಮಾಸ್ಟರ್ ನೇಮಕಾತಿ: ಪರೀಕ್ಷಾ ಮಾದರಿಯಲ್ಲಿ ಪ್ರಮುಖ ಬದಲಾವಣೆ!

ರೈಲ್ವೆಯಲ್ಲಿ ಸ್ಟೇಷನ್ ಮಾಸ್ಟರ್ ಹುದ್ದೆಗಳಿಗಾಗಿ ಕಾಯುತ್ತಿರುವ ಅಭ್ಯರ್ಥಿಗಳಿಗೆ ಪ್ರಮುಖ ಮಾಹಿತಿಯೊಂದು ಲಭ್ಯವಾಗಿದೆ. 2026ರ ನೇಮಕಾತಿ ಪ್ರಕ್ರಿಯೆಗೆ ಸಂಬಂಧಿಸಿದಂತೆ, ಸ್ಟೇಷನ್ ಮಾಸ್ಟರ್ ಹುದ್ದೆಗಳನ್ನು ಇತರ ನಾನ್-ಟೆಕ್ನಿಕಲ್ ಪಾಪ್ಯುಲರ್ ಕ್ಯಾಟಗರೀಸ್ (NTPC) ಹುದ್ದೆಗಳಿಂದ ಪ್ರತ್ಯೇಕಿಸಿ ಭರ್ತಿ ಮಾಡುವ ನೂತನ ವಿಧಾನವನ್ನು ಪ್ರತ್ಯೇಕವಾಗಿ ಪರಿಚಯಿಸಲಾಗಿದೆ. ಈ ಹುದ್ದೆಗಳಿಗಾಗಿ ರೈಲ್ವೆ ನೇಮಕಾತಿ ಮಂಡಳಿ (RRB) ಪ್ರತ್ಯೇಕ ಕೇಂದ್ರೀಕೃತ ಉದ್ಯೋಗ ಅಧಿಸೂಚನೆಯನ್ನು (CEN) ಬಿಡುಗಡೆ ಮಾಡಲಿದೆ. ಹೊಸ ವಿಧಾನದ ಆಯ್ಕೆ ಪ್ರಕ್ರಿಯೆಯು ಕಂಪ್ಯೂಟರ್ ಆಧಾರಿತ ಪರೀಕ್ಷೆ (CBT), ಕಂಪ್ಯೂಟರ್ ಆಧಾರಿತ ಆಪ್ಟಿಟ್ಯೂಡ್ ಟೆಸ್ಟ್ (CBAT), ದಾಖಲೆಗಳ ಪರಿಶೀಲನೆ ಹಾಗೂ ವೈದ್ಯಕೀಯ ತಪಾಸಣೆ ಎಂಬ ನಾಲ್ಕು ಹಂತಗಳನ್ನು ಒಳಗೊಂಡಿರಲಿದೆ. ಹಿಂದಿನ ವಿಧಾನದಲ್ಲಿದ್ದ ಎರಡು CBTಗಳ ಬದಲಿಗೆ ಒಂದೇ CBT ನಡೆಸುವುದು ಈ ಹೊಸ ಬದಲಾವಣೆಗಳಲ್ಲಿ ಅತ್ಯಂತ ಪ್ರಮುಖವಾಗಿದೆ.

CBT ಮತ್ತು ಪರೀಕ್ಷೆಯ ಅಂಕಗಳ ವಿವರ:

ಹೊಸ ಪರೀಕ್ಷಾ ಮಾದರಿಯ ಪ್ರಕಾರ, ಸ್ಟೇಷನ್ ಮಾಸ್ಟರ್ ಹುದ್ದೆಗಳಿಗೆ ನಡೆಸಲಾಗುವ CBT ಒಟ್ಟು 100 ಅಂಕಗಳಿಗೆ ಇರಲಿದೆ. ಪರೀಕ್ಷೆಯನ್ನು ಪೂರ್ಣಗೊಳಿಸಲು ಅಭ್ಯರ್ಥಿಗಳಿಗೆ 120 ನಿಮಿಷಗಳ (2 ಗಂಟೆ) ಕಾಲಾವಕಾಶ ನೀಡಲಾಗುತ್ತದೆ. ಪ್ರತಿಯೊಂದು ತಪ್ಪು ಉತ್ತರಕ್ಕೂ ಮೂರನೇ ಒಂದು ಭಾಗದಷ್ಟು (1/3) ಋಣಾತ್ಮಕ ಅಂಕ (Negative Marking) ಕಡಿತಗೊಳಿಸಲಾಗುತ್ತದೆ. ಈ CBT ಯಲ್ಲಿ ಅರ್ಹತೆ ಪಡೆದ ಅಭ್ಯರ್ಥಿಗಳು ಮುಂದಿನ ಹಂತವಾದ CBAT ಗೆ ಹಾಜರಾಗಬೇಕಾಗುತ್ತದೆ. ನಂತರ ದಾಖಲೆಗಳ ಪರಿಶೀಲನೆ ಮತ್ತು ವೈದ್ಯಕೀಯ ತಪಾಸಣೆ ನಡೆಸಲಾಗುತ್ತದೆ.

ಸಿಲಬಸ್‌ನಲ್ಲಿ ಹೊಸದಾಗಿ ಸೇರ್ಪಡೆಗೊಂಡ ಇಂಗ್ಲಿಷ್ ಕಾಂಪ್ರಿಹೆನ್ಷನ್:

ನೂತನ ಪರೀಕ್ಷಾ ವಿಧಾನದಲ್ಲಿ ‘ಇಂಗ್ಲಿಷ್ ರೀಡಿಂಗ್ ಕಾಂಪ್ರಿಹೆನ್ಷನ್’ ಅನ್ನು ವಿಶೇಷವಾಗಿ ಸೇರಿಸಲಾಗಿದೆ. ಲಾಜಿಕಲ್ ಎಬಿಲಿಟಿ ವಿಭಾಗದ ಭಾಗವಾಗಿ ಇದನ್ನು ಪರಿಗಣಿಸಲಾಗಿದ್ದು, ಇಂಗ್ಲಿಷ್‌ನಲ್ಲಿ ನೀಡಲಾದ ಪ್ಯಾರಾಗಳನ್ನು ಓದಿ ಅವುಗಳ ಆಧಾರದ ಮೇಲೆ ಕೇಳಲಾದ ಪ್ರಶ್ನೆಗಳಿಗೆ ಉತ್ತರಗಳನ್ನು ಗುರುತಿಸಬೇಕಾಗುತ್ತದೆ. ಇತಿಹಾಸ, ಸಮಾಜ, ಸಾಹಿತ್ಯ, ವಿಜ್ಞಾನ, ಪರಿಸರ, ತಂತ್ರಜ್ಞಾನ, ಸಂಸ್ಕೃತಿ ಮತ್ತು ಪುರಾಣಗಳಿಗೆ ಸಂಬಂಧಿಸಿದ ಪರಿಕಲ್ಪನಾತ್ಮಕ ಪ್ಯಾರಾಗಳ ಮೇಲೆ ಪ್ರಶ್ನೆಗಳು ಬರುವ ಸಾಧ್ಯತೆಯಿದೆ.

ಗಣಿತ ಮತ್ತು ಮೂಲಭೂತ ವಿಜ್ಞಾನದ ಸಿಲಬಸ್:

ಗಣಿತ ಮತ್ತು ಮೂಲಭೂತ ವಿಜ್ಞಾನ ವಿಭಾಗಗಳಿಗೆ ಒಟ್ಟಾಗಿ 30 ಅಂಕಗಳ ವೆಟೇಜ್ ಇರುತ್ತದೆ. ಗಣಿತ ವಿಷಯದಲ್ಲಿ ಸಂಖ್ಯಾ ಪದ್ಧತಿ, ಅನುಪಾತ ಮತ್ತು ಸಮಾನುಪಾತ, ಶೇಕಡಾವಾರು, ಲಾಭ-ನಷ್ಟ, ಸಮಯ-ದೂರ, ಬೀಜಗಣಿತ, ತ್ರಿಕೋನಮಿತಿ ಹಾಗೂ ಸಂಭವನೀಯತೆಯಂತಹ ಪ್ರಮುಖ ವಿಷಯಗಳ ಮೇಲೆ ಗಮನಹರಿಸಬೇಕು. ಇನ್ನು ಮೂಲಭೂತ ವಿಜ್ಞಾನದಲ್ಲಿ ಪ್ರಮಾಣಗಳು, ಅಳತೆಗಳು, ದ್ರವ್ಯರಾಶಿ, ಶಕ್ತಿ, ಚಲನೆ, ಘರ್ಷಣೆ, ಉಷ್ಣತೆ ಹಾಗೂ ವಿದ್ಯುತ್ ಮುಂತಾದ ವಿಷಯಗಳ ಪ್ರಶ್ನೆಗಳಿರುತ್ತವೆ.

ಇದನ್ನೂ ಓದಿ: ಬೆಂಗಳೂರು ಗ್ರಾಮಾಂತರ ಜಿಲ್ಲಾ ನ್ಯಾಯಾಲಯ ನೇಮಕಾತಿ: 86 ಜವಾನ, ಬೆರಳಚ್ಚುಗಾರ ಹುದ್ದೆಗಳಿಗೆ ಅರ್ಜಿ ಆಹ್ವಾನ

ಡೇಟಾ ವಿಶ್ಲೇಷಣೆ ಮತ್ತು ರೀಸನಿಂಗ್ ವಿಭಾಗದ ಅಂಕಗಳು:

ಮಾಹಿತಿ ವಿಶ್ಲೇಷಣೆ ಮತ್ತು ಅರ್ಥೈಸಿಕೊಳ್ಳುವ ಸಾಮರ್ಥ್ಯವನ್ನು ಪರೀಕ್ಷಿಸುವ ಡೇಟಾ ಇಂಟರ್‌ಪ್ರಿಟೇಶನ್ ವಿಭಾಗಕ್ಕೆ 30 ಅಂಕಗಳನ್ನು ನೀಡಲಾಗಿದೆ. ಇದರಲ್ಲಿ ಕೋಷ್ಟಕಗಳು, ಗ್ರಾಫ್‌ಗಳು, ಪೈ ಚಾರ್ಟ್‌ಗಳು ಹಾಗೂ ವೆನ್ ರೇಖಾಚಿತ್ರಗಳ ಪ್ರಶ್ನೆಗಳಿರಲಿವೆ. ಇದರೊಂದಿಗೆ ಲಾಜಿಕಲ್ ಮತ್ತು ಮೆಂಟಲ್ ರೀಸನಿಂಗ್ ವಿಭಾಗಕ್ಕೆ ಒಟ್ಟು 40 ಅಂಕಗಳ ವೆಟೇಜ್ ಇದ್ದು, ಬೈನರಿ ಲಾಜಿಕ್, ಸಿಲೋಗಿಸಮ್ಸ್, ಕೋಡಿಂಗ್-ಡಿಕೋಡಿಂಗ್ ಹಾಗೂ ರಕ್ತ ಸಂಬಂಧಗಳಿಗೆ ಸಂಬಂಧಿಸಿದ ಪ್ರಶ್ನೆಗಳನ್ನು ಕೇಳಲಾಗುತ್ತದೆ.

ಅಂತಿಮ ಮೆರಿಟ್ ಪಟ್ಟಿ ಮತ್ತು ಹಳೆಯ ಪದ್ಧತಿಗೆ ವ್ಯತ್ಯಾಸ:

ಸ್ಟೇಷನ್ ಮಾಸ್ಟರ್ ಹುದ್ದೆಗಳ ಅಂತಿಮ ಆಯ್ಕೆ ಪ್ರಕ್ರಿಯೆಯಲ್ಲಿ CBT ಅಂಕಗಳಿಗೆ ಶೇ. 70 ರಷ್ಟು ಹಾಗೂ CBAT ಅಂಕಗಳಿಗೆ ಶೇ. 30 ರಷ್ಟು ವೆಟೇಜ್ ನೀಡಿ ಅಂತಿಮ ಮೆರಿಟ್ ಪಟ್ಟಿ ತಯಾರಿಸಲಾಗುತ್ತದೆ. ಹಳೆಯ ಪದ್ಧತಿಯಲ್ಲಿದ್ದ ಎರಡು CBTಗಳ ಬದಲಿಗೆ ಈಗ ಒಂದೇ ಪರೀಕ್ಷೆ ಇರಲಿದೆ ಮತ್ತು ಪರೀಕ್ಷಾ ಸಮಯವನ್ನು 90 ನಿಮಿಷಗಳಿಂದ 120 ನಿಮಿಷಗಳಿಗೆ ಹೆಚ್ಚಿಸಲಾಗಿದೆ. ಅಭ್ಯರ್ಥಿಗಳು ಅರ್ಜಿ ಸಲ್ಲಿಸುವ ಮುನ್ನ ಅಧಿಕೃತ RRB ಅಧಿಸೂಚನೆಯನ್ನು ಕಡ್ಡಾಯವಾಗಿ ಪರಿಶೀಲಿಸುವುದು ಸೂಕ್ತ.

ಉದ್ಯೋಗಕ್ಕೆ ಸಂಬಂಧಿಸಿದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ