ನವರಾತ್ರಿ: ದುರ್ಗಾ ಸಪ್ತಶತಿ ಪಠಣಕ್ಕೂ ಮುನ್ನ ‘ದೇವೀ ಕವಚ’ ಪಠಿಸುವುದು ಯಾಕೆ ಅತ್ಯಾವಶ್ಯಕ?

ಶಾರದೀಯ ನವರಾತ್ರಿ ಮಹೋತ್ಸವವು ಅತ್ಯಂತ ಭಕ್ತಿ-ಶ್ರದ್ಧೆಯಿಂದ ಜರುಗುತ್ತಿದ್ದು, ಈ ವಿಶೇಷ ದಿನಗಳಲ್ಲಿ ಭಕ್ತರು ತಾಯಿ ದುರ್ಗಾದೇವಿಯ ವಿವಿಧ ಸ್ವರೂಪಗಳನ್ನು ಆರಾಧಿಸುತ್ತಾರೆ. ದೇವಿಯ ಕೃಪಾಸಂಪಾದನೆಗಾಗಿ ಕೈಗೊಳ್ಳುವ ಧಾರ್ಮಿಕ ಆಚರಣೆಗಳಲ್ಲಿ ‘ದುರ್ಗಾ ಸಪ್ತಶತಿ’ ಪಠಣಕ್ಕೆ ಅತ್ಯುನ್ನತ ಸ್ಥಾನವಿದೆ. ಒಂಬತ್ತು ದಿನಗಳ ಉಪವಾಸದೊಂದಿಗೆ ಪ್ರಮುಖವಾಗಿ 13 ಅಧ್ಯಾಯಗಳನ್ನು ಹೊಂದಿರುವ ದುರ್ಗಾ ಸಪ್ತಶತಿಯನ್ನು ಭಕ್ತರು ಶ್ರದ್ಧೆಯಿಂದ ಪಠಿಸುತ್ತಾರೆ. ಆದರೆ, ಈ ಪಠಣವನ್ನು ಪ್ರಾರಂಭಿಸುವ ಮುನ್ನ ಕಡ್ಡಾಯವಾಗಿ ‘ದೇವೀ ಕವಚ’ವನ್ನು ಪಠಿಸಬೇಕು ಎಂದು ಶಾಸ್ತ್ರಗಳು ತಿಳಿಸುತ್ತವೆ. ಹಾಗಾದರೆ, ದೇವೀ ಕವಚ ಎಂದರೇನು ಮತ್ತು ಸಪ್ತಶತಿ ಪಠಣಕ್ಕೂ ಮುನ್ನ ಇದನ್ನು ಪಠಿಸುವುದು ಯಾಕೆ ಕಡ್ಡಾಯ? ಸಂಪೂರ್ಣ ವಿವರ ಇಲ್ಲಿದೆ.

ದೇವೀ ಕವಚ ಎಂದರೇನು?

ದೇವೀ ಕವಚವು ದುರ್ಗಾ ಸಪ್ತಶತಿಯ (ದೇವಿ ಮಹಾತ್ಮೆ) ಆರಂಭದಲ್ಲಿ ಬರುವ ಅತ್ಯಂತ ಶಕ್ತಿಶಾಲಿ ಹಾಗೂ ರಕ್ಷಣಾತ್ಮಕ ಸ್ತೋತ್ರವಾಗಿದೆ. ಇದು ಹದಿನೆಂಟು ಪುರಾಣಗಳಲ್ಲಿ ಒಂದಾದ ಮಾರ್ಕಂಡೇಯ ಪುರಾಣದ ಅಂತರ್ಗತವಾಗಿದೆ. ಈ ಮಹಾಫಲದಾಯಕವಾದ ದೇವೀ ಕವಚವನ್ನು ಸ್ವತಃ ಬ್ರಹ್ಮದೇವರು ಮಹರ್ಷಿ ಮಾರ್ಕಂಡೇಯರಿಗೆ ಉಪದೇಶಿಸಿದ್ದಾರೆ. ಈ ಕವಚದಲ್ಲಿ ಒಟ್ಟು 47 ಶ್ಲೋಕಗಳಿದ್ದು, ತಾಯಿ ಪಾರ್ವತಿ ದೇವಿಯ ಒಂಬತ್ತು ವಿಭಿನ್ನ ದೈವಿಕ ನವದುರ್ಗಾ ಸ್ವರೂಪಗಳನ್ನು ಕೊಂಡಾಡಲಾಗಿದೆ. ಬ್ರಹ್ಮದೇವರು ತಿಳಿಸಿದ ಪ್ರಕಾರ, ಶ್ರೀ ದುರ್ಗಾ ಸಪ್ತಶತಿಯ ಕವಚವನ್ನು ನಿತ್ಯವೂ ಶ್ರದ್ಧೆಯಿಂದ ಪಠಿಸುವವರಿಗೆ ತಾಯಿ ದುರ್ಗಾದೇವಿಯ ಅನುಗ್ರಹ ಸದಾ ಕಾಲ ಲಭಿಸುತ್ತದೆ.

ದುರ್ಗಾ ಸಪ್ತಶತಿ ಪಠಣಕ್ಕೂ ಮುನ್ನ ದೇವೀ ಕವಚ ಪಠಿಸುವುದು ಯಾಕೆ ಕಡ್ಡಾಯ?

ಶಾಸ್ತ್ರಗಳ ಸ್ಪಷ್ಟ ನಿರ್ದೇಶನದಂತೆ, ಯಾವುದೇ ವ್ಯಕ್ತಿ ದುರ್ಗಾ ಸಪ್ತಶತಿ ಅಥವಾ ಚಂಡೀ ಪಠಣವನ್ನು ಆರಂಭಿಸುವ ಮುಂಚಿತವಾಗಿ ದೇವೀ ಕವಚವನ್ನು ಪಠಿಸುವುದು ಕಡ್ಡಾಯವಾದ ನಿಯಮ. ಇದಕ್ಕೆ ಸಂಬಂಧಿಸಿದಂತೆ ಕವಚದ ಆರಂಭದಲ್ಲೇ “ಓಂ ಅಸ್ಯ ಶ್ರೀಚಂಡೀಕವಚಸ್ಯ ಬ್ರಹ್ಮಾ ಋಷಿಃ, ಅನುಷ್ಟುಪ್ ಛಂದಃ, ಚಾಮುಂಡಾ ದೇವತಾ…” ಎಂಬ ಶ್ಲೋಕ ಬರುತ್ತದೆ. ಇದರರ್ಥ, ದುರ್ಗಾ ಸಪ್ತಶತಿಯ ಪಠಣವನ್ನು ಪ್ರಾರಂಭಿಸುವ ಮೊದಲು ಕವಚ ಪಠಣದ ಮೂಲಕ ದೇವಿಯ ಸಂಕಲ್ಪವನ್ನು ಮಾಡಿಕೊಳ್ಳಬೇಕು. ತಾಯಿ ದುರ್ಗಾದೇವಿಯ ಈ ಕವಚವನ್ನು ಪಠಿಸುವುದು ಅತಿಶಯ ಪ್ರಭಾವಶಾಲಿಯಾಗಿದೆ. ಕವಚವನ್ನು ಮೈಗೂಡಿಸಿಕೊಂಡು ಸಂಚರಿಸುವ ಮನುಷ್ಯನು ತಾನು ತೆರಳುವ ಪ್ರತಿಯೊಂದು ಸ್ಥಳದಲ್ಲೂ ಖಂಡಿತವಾಗಿ ಜಯ ಮತ್ತು ಧನಲಾಭವನ್ನು ಪಡೆಯುತ್ತಾನೆ. ಇದು ಸಾಧಕನಿಗೆ ರಕ್ಷಣಾತ್ಮಕ ಗುರಾಣಿಯಂತೆ ಕೆಲಸ ಮಾಡುತ್ತದೆ.

ಇದನ್ನೂ ಓದಿ: ನವರಾತ್ರಿಯ 9 ದಿನಗಳ ಮಹತ್ವವೇನು? ನವದುರ್ಗೆಯ ಒಂಬತ್ತು ರೂಪಗಳ ವಿಶೇಷತೆ ತಿಳಿಯಿರಿ

ದೇವೀ ಕವಚ ಪಠಣದಿಂದ ದೊರೆಯುವ ಮಹತ್ವ ಹಾಗೂ ಫಲಗಳು ಯಾವುವು?

ದುರ್ಗಾ ಸಪ್ತಶತಿಯಲ್ಲಿ ದೇವೀ ಕವಚದ ಮಹಿಮೆಯನ್ನು ವಿಸ್ತಾರವಾಗಿ ವಿವರಿಸಲಾಗಿದೆ. ಈ ಕವಚವನ್ನು ಪಠಿಸಿ ಮನೆಯಿಂದ ಹೊರಡುವ ವ್ಯಕ್ತಿಗೆ ಯಾವುದೇ ರೀತಿಯ ಅನಿರೀಕ್ಷಿತ ತೊಂದರೆಗಳು ಅಥವಾ ಅಪಾಯಗಳು ಎದುರಾಗುವುದಿಲ್ಲ. ಇದರ ಪ್ರಭಾವದಿಂದ ವ್ಯಕ್ತಿಯು ತಾನು ಬಯಸಿದ ವಸ್ತುಗಳನ್ನು ಪಡೆದುಕೊಳ್ಳುತ್ತಾನೆ ಮತ್ತು ಈ ಭೂಲೋಕದಲ್ಲಿ ಮಹಾಸಂಪತ್ತು ಹಾಗೂ ಅಪಾರ ಐಶ್ವರ್ಯವನ್ನು ಪ್ರಾಪ್ತಿ ಮಾಡಿಕೊಳ್ಳುತ್ತಾನೆ. ಕವಚಧಾರಿಯಾದ ಮನುಷ್ಯನು ನಿರ್ಭೀತನಾಗುತ್ತಾನೆ, ಸಮಾಜದಲ್ಲಿ ಹಾಗೂ ಮೂರು ಲೋಕಗಳಲ್ಲಿ ವಿಶೇಷ ಗೌರವ-ಮರ್ಯಾದೆಗಳನ್ನು ಗಳಿಸುತ್ತಾನೆ. ನಿಯಮಬದ್ಧವಾಗಿ ನಿತ್ಯವೂ ಶ್ರದ್ಧೆಯಿಂದ ಇದನ್ನು ಪಠಿಸುವುದರಿಂದ ಅಕಾಲಿಕ ಮೃತ್ಯುವಿನ ಭಯ ದೂರಾಗುತ್ತದೆ ಹಾಗೂ ಸಮಸ್ತ ರೋಗ-ದೋಷಗಳು ನಿವಾರಣೆಯಾಗಿ ದೀರ್ಘಕಾಲ ಆರೋಗ್ಯಕರ ಜೀವನವನ್ನು ನಡೆಸಬಹುದು.

ಬ್ರಹ್ಮದೇವರು ಮಹರ್ಷಿ ಮಾರ್ಕಂಡೇಯರಿಗೆ ತಿಳಿಸಿದಂತೆ, ಭಕ್ತರು ಯಾವುದೇ ಸಪ್ತಶತಿ ಪಠಣ ಅಥವಾ ಅನುಷ್ಠಾನವನ್ನು ಕೈಗೊಳ್ಳುವ ಮುನ್ನ ದೇವೀ ಕವಚವನ್ನು ಪಠಿಸುವುದು ಅತ್ಯಂತ ಮಂಗಳಕರ. ಇದು ಸಾಧಕನಿಗೆ ದೈವಿಕ ಶಕ್ತಿಯನ್ನು ಕರುಣಿಸಿ, ಜೀವನದ ಹಾದಿಯಲ್ಲಿ ಎದುರಾಗುವ ಸಕಲ ಅಡಚಣೆಗಳನ್ನು ಹೊಡೆದೋಡಿಸುತ್ತದೆ ಎಂದು ನಂಬಲಾಗಿದೆ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ