Feng Shui Home Guide: ಮನೆಯಲ್ಲಿ ಸಂಪತ್ತು ಮತ್ತು ಸಮೃದ್ಧಿ ಹೆಚ್ಚಿಸಲು ಅನುಸರಿಸಿ ಈ ಸರಳ ಪರಿಹಾರಗಳು!

ಫೆಂಗ್ ಶೂಯಿ ಶಾಸ್ತ್ರದಲ್ಲಿ ಮನೆಯಲ್ಲಿ ವಸ್ತುಗಳನ್ನು ಇಡುವ ಸರಿಯಾದ ದಿಕ್ಕಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಗುತ್ತದೆ. ಮನೆಯ ವಾತಾವರಣವನ್ನು ಸಕಾರಾತ್ಮಕವಾಗಿ ಹಾಗೂ ಸಮತೋಲಿತವಾಗಿ ಇರಿಸುವುದರಿಂದ ಸಂತೋಷ, ನೆಮ್ಮದಿ ಮತ್ತು ಸಮೃದ್ಧಿ ಆಕರ್ಷಿತವಾಗುತ್ತದೆ. ನಿಮ್ಮ ಮನೆಯಲ್ಲಿ ಸಕಾರಾತ್ಮಕ ಶಕ್ತಿಯ ಹರಿವನ್ನು ಹೆಚ್ಚಿಸಲು ಅನುಸರಿಸಬೇಕಾದ ಪ್ರಮುಖ ಫೆಂಗ್ ಶೂಯಿ ಪರಿಹಾರಗಳು ಇಲ್ಲಿವೆ.

ಮುಖ್ಯ ದ್ವಾರವನ್ನು ‘ಸಂಪತ್ತಿನ ಆಕರ್ಷಕ ಕೇಂದ್ರ’ವಾಗಿ ಮಾಡಿ:

ಫೆಂಗ್ ಶೂಯಿ ಪ್ರಕಾರ, ಮನೆಯ ಮುಖ್ಯ ಬಾಗಿಲು ಶಕ್ತಿಯ ಪ್ರವೇಶದ್ವಾರವಾಗಿದೆ. ಹಾಗಾಗಿ ಪ್ರವೇಶದ್ವಾರದ ಸುತ್ತಲೂ ಕಸ, ಮುರಿದ ಮಡಕೆಗಳು ಅಥವಾ ಅನುಪಯುಕ್ತ ವಸ್ತುಗಳನ್ನು ಸಂಗ್ರಹಿಸಿಡಬಾರದು. ಮುಖ್ಯ ಬಾಗಿಲಿನ ಮೇಲೆ ಚಿನ್ನದ ಬಣ್ಣದ ನಾಮಫಲಕ ನಹಾಕುವುದು ಮತ್ತು ಅಲ್ಲಿ ಸದಾ ಸಾಕಷ್ಟು ಬೆಳಕಿರುವಂತೆ ನೋಡಿಕೊಳ್ಳುವುದು ಶುಭ. ಬಾಗಿಲ ಬಳಿ ಮನಿ ಪ್ಲಾಂಟ್ ಅಥವಾ ಜೇಡ್ ಪ್ಲಾಂಟ್ ಇಡುವುದರಿಂದ ಸಂಪತ್ತು ಆಕರ್ಷಿತವಾಗುತ್ತದೆ.

ನೀರಿನ ಬಳಕೆಯಲ್ಲಿ ಇರಲಿ ವಿಶೇಷ ಕಾಳಜಿ:

ಫೆಂಗ್ ಶೂಯಿಯಲ್ಲಿ ಹರಿಯುವ ಶುದ್ಧ ನೀರನ್ನು ಸಂಪತ್ತು ಮತ್ತು ಅಭಿವೃದ್ಧಿಯ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಮನೆಯಲ್ಲಿ ಶುದ್ಧ ನೀರಿನಿಂದ ಕೂಡಿದ ಅಕ್ವೇರಿಯಂ ಅಥವಾ ಸಣ್ಣ ನೀರಿನ ಕಾರಂಜಿ (Water Fountain) ಇಡುವುದು ಶ್ರೇಯಸ್ಕರ. ಆದರೆ ನೀರು ಸದಾ ಸ್ವಚ್ಛವಾಗಿರಬೇಕು. ಮನೆಯಲ್ಲಿ ಯಾವುದೇ ನಲ್ಲಿಯಿಂದ ನೀರು ತೊಟ್ಟಿಕ್ಕುತ್ತಿದ್ದರೆ (Leaking tap) ಅದನ್ನು ತಕ್ಷಣ ದುರಸ್ತಿ ಮಾಡಿಸಿ, ಏಕೆಂದರೆ ನೀರಿನ ವ್ಯರ್ಥವು ಧನ ನಷ್ಟದ ಸಂಕೇತವಾಗಿದೆ.

ಇದನ್ನೂ ಓದಿ: ಮೊದಲ ಭೇಟಿಯಲ್ಲೇ ಎಲ್ಲರನ್ನೂ ಸೆಳೆಯುವ ಶಕ್ತಿ ಈ 3 ರಾಶಿಯವರಿಗಿದೆ; ಇವರ ಮೋಡಿಗೆ ಬೀಳದವರಿಲ್ಲ!

ಮನೆಯಲ್ಲಿ ಸೊಂಪಾದ ಸಸ್ಯಗಳನ್ನು ಬೆಳೆಸಿ:

ಹಸಿರು ಸಸ್ಯಗಳು ಬೆಳವಣಿಗೆ ಮತ್ತು ಜೀವಕಳೆಯ ಸಂಕೇತ. ಮನೆಯ ಒಳಾಂಗಣದಲ್ಲಿ ಮನಿ ಪ್ಲಾಂಟ್, ಲಕ್ಕಿ ಬ್ಯಾಂಬೂ (ಬಿದಿರು) ಅಥವಾ ಇತರ ಆರೋಗ್ಯಕರ ಒಳಾಂಗಣ ಸಸ್ಯಗಳನ್ನು ಇಡುವುದರಿಂದ ವಾತಾವರಣವು ಆಹ್ಲಾದಕರವಾಗಿರುತ್ತದೆ. ಸಸ್ಯಗಳು ಒಣಗದಂತೆ ನೋಡಿಕೊಳ್ಳುವುದು ಮುಖ್ಯ. ಒಣಗಿದ ಅಥವಾ ಬಾಡಿದ ಗಿಡಗಳನ್ನು ಮನೆಯಲ್ಲಿ ಇಡದೆ ತಕ್ಷಣ ತೆಗೆದುಹಾಕಬೇಕು.

ಸಂಪತ್ತು ನೆಲೆಸಲು ಅನುಸರಿಸಬೇಕಾದ ದೈನಂದಿನ ನಿಯಮಗಳು:

ಮನೆಯಲ್ಲಿ ಅನಗತ್ಯ ಕಸ ಸಂಗ್ರಹವಾಗಲು ಬಿಡಬೇಡಿ. ನಿಮ್ಮ ಪರ್ಸ್ ಹಾಗೂ ಹಣ ಇಡುವ ಬೀರೊ ಅಥವಾ ಲಾಕರ್ ಅನ್ನು ಸದಾ ಅಚ್ಚುಕಟ್ಟಾಗಿ ಮತ್ತು ಸ್ವಚ್ಛವಾಗಿಡಿ. ಮನೆಯಲ್ಲಿ ಒಡೆದ ಗಾಜು ಅಥವಾ ಕೆಟ್ಟುಹೋದ ಎಲೆಕ್ಟ್ರಾನಿಕ್ ಸಾಧನಗಳಿದ್ದರೆ ತಕ್ಷಣ ದುರಸ್ತಿ ಮಾಡಿಸಿ ಅಥವಾ ಮನೆಯಿಂದ ಹೊರಹಾಕಿ. ದಿನನಿತ್ಯದ ಸ್ವಚ್ಛತೆಯು ಮನೆಯಲ್ಲಿ ಸಕಾರಾತ್ಮಕ ಶಕ್ತಿಯ ನಿರಂತರ ಪರಿಚಲನೆಗೆ ನೆರವಾಗುತ್ತದೆ.

ಈ ಸರಳ ಫೆಂಗ್ ಶೂಯಿ ಬದಲಾವಣೆಗಳನ್ನು ಅಳವಡಿಸಿಕೊಳ್ಳುವುದರ ಮೂಲಕ ನಿಮ್ಮ ಮನೆಯಲ್ಲಿ ಸದಾ ಸುಖ, ಶಾಂತಿ ಮತ್ತು ಆರ್ಥಿಕ ಪ್ರಗತಿಯನ್ನು ಕಾಣಬಹುದು.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ