ತಿರುಮಲ ನವರಾತ್ರಿ ಬ್ರಹ್ಮೋತ್ಸವ 2026: ಪ್ರಮುಖ ಆಕರ್ಷಣೆಯಾದ ‘ಪುಷ್ಪಕ ವಿಮಾನ ಸೇವೆ’ ಸಂಪೂರ್ಣ ವಿವರ
ತಿರುಮಲದ ಶರನ್ನವರಾತ್ರಿ ಬ್ರಹ್ಮೋತ್ಸವಗಳಲ್ಲಿ 'ಪುಷ್ಪಕ ವಿಮಾನ ಸೇವೆ' ಭಕ್ತರ ಪ್ರಮುಖ ಆಕರ್ಷಣೆ. ಬ್ರಹ್ಮದೇವನೇ ಆಚರಿಸಿದ ಈ ಉತ್ಸವದಲ್ಲಿ ಅಧಿಕ ಮಾಸದಂದು ಈ ವಿಶಿಷ್ಟ ಸೇವೆ ನಡೆಯುತ್ತದೆ. ಹೂವುಗಳಿಂದ ಅಲಂಕೃತವಾದ ಪುಷ್ಪಕ ವಿಮಾನದಲ್ಲಿ ಸ್ವಾಮಿಯು ಗೋವರ್ಧನ ಕೃಷ್ಣನ ರೂಪದಲ್ಲಿ ದರ್ಶನ ನೀಡುತ್ತಾರೆ. ಈ ದಿವ್ಯ ದರ್ಶನವು ಸಕಲ ಪಾಪಗಳನ್ನು ನಿವಾರಿಸಿ, ಸುಖ-ಶಾಂತಿ ಹಾಗೂ ಐಶ್ವರ್ಯವನ್ನು ಕರುಣಿಸುತ್ತದೆ ಎಂದು ನಂಬಲಾಗಿದೆ. ಇದು ಆಧ್ಯಾತ್ಮಿಕ ತೃಪ್ತಿ ನೀಡುವ ಪರಮ ಪವಿತ್ರ ಉತ್ಸವ.
Updated on:Oct 17, 2026 | 1:04 PM
ತಿರುಮಲದಲ್ಲಿ ಶರನ್ನವರಾತ್ರಿ ಬ್ರಹ್ಮೋತ್ಸವಗಳು ಅತ್ಯಂತ ವೈಭವೋಪೇತವಾಗಿ ಜರುಗುತ್ತಿವೆ. ಬ್ರಹ್ಮದೇವ ಸ್ವತಃ ನೆಲೆಸಿ ಆಚರಿಸಿದನೆಂದು ನಂಬಲಾದ ಈ ಬ್ರಹ್ಮೋತ್ಸವಗಳಲ್ಲಿ ಪ್ರತಿದಿನವೂ ಒಂದಕ್ಕಿಂತ ಒಂದು ವಿಭಿನ್ನವಾದ ವಾಹನ ಸೇವೆಗಳು ಭಕ್ತರನ್ನು ಮಂತ್ರಮುಗ್ಧರನ್ನಾಗಿಸುತ್ತವೆ. ಅದರಲ್ಲೂ ವಿಶೇಷವಾಗಿ ಅಧಿಕ ಮಾಸ ಬರುವ ವರ್ಷಗಳಲ್ಲಿ ಆಚರಿಸಲಾಗುವ ನವರಾತ್ರಿ ಬ್ರಹ್ಮೋತ್ಸವಗಳಲ್ಲಿ ನಡೆಯುವ ‘ಪುಷ್ಪಕ ವಿಮಾನ ಸೇವೆ’ಯ ಕಣ್ತುಂಬಿಕೊಳ್ಳುವುದೇ ಒಂದು ಭಾಗ್ಯ. ಅಕ್ಟೋಬರ್ 17 ಇಂದಿನ ಈ ಪವಿತ್ರ ದಿನದಂದು ನಡೆಯುತ್ತಿರುವ ಈ ಅಪರೂಪದ ಉತ್ಸವದ ರೋಮಾಂಚಕ ಹಾಗೂ ಭಕ್ತಿಪೂರ್ಣ ವಿವರ ಇಲ್ಲಿದೆ.
ತಿರುಮಲ ಬ್ರಹ್ಮೋತ್ಸವಗಳ ಪೌರಾಣಿಕ ಹಿನ್ನೆಲೆ:
ಭೂಲೋಕದ ವೈಕುಂಠವೆಂದೇ ಪ್ರಸಿದ್ಧಿ ಪಡೆದಿರುವ ತಿರುಮಲದಲ್ಲಿ ವರ್ಷವಿಡೀ ನಾನಾ ಉತ್ಸವಗಳು ಜರುಗಿದರೂ, ಬ್ರಹ್ಮೋತ್ಸವಗಳಿಗೆ ಧಾರ್ಮಿಕವಾಗಿ ಅತ್ಯಂತ ಮಹತ್ವದ ಸ್ಥಾನವಿದೆ. ಪುರಾಣಗಳ ಪ್ರಕಾರ, ಸೃಷ್ಟಿಕರ್ತನಾದ ಬ್ರಹ್ಮದೇವನೇ ಇಲ್ಲಿಯ ಸ್ವಾಮಿಗೆ ಈ ಉತ್ಸವವನ್ನು ಏರ್ಪಡಿಸಿ ಪೂಜಿಸಿದ್ದನಂತೆ. ಹಾಗಾಗಿಯೇ ಈ ಮಹೋತ್ಸವಕ್ಕೆ ‘ಬ್ರಹ್ಮೋತ್ಸವಗಳು’ ಎಂಬ ಹೆಸರು ಸ್ಥಿರವಾಯಿತು. ಸಾಮಾನ್ಯವಾಗಿ ಪ್ರತಿವರ್ಷ ವಾರ್ಷಿಕ ಬ್ರಹ್ಮೋತ್ಸವಗಳು ನಡೆದರೆ, ಅಧಿಕ ಮಾಸ ಬಂದ ವಿಶೇಷ ವರ್ಷಗಳಲ್ಲಿ ಹೆಚ್ಚುವರಿಯಾಗಿ ನವರಾತ್ರಿ ಬ್ರಹ್ಮೋತ್ಸವಗಳನ್ನು ಸಂಭ್ರಮದಿಂದ ಆಚರಿಸಲಾಗುತ್ತದೆ. ಈ ವಿಶೇಷ ಸಂದರ್ಭದಲ್ಲೇ ಶ್ರೀಮಲಯಪ್ಪ ಸ್ವಾಮಿಯು ವಿವಿಧ ದಿವ್ಯ ವಾಹನಗಳ ಮೇಲೆ ಆರೂಢರಾಗಿ ಮಾಡ ವೀದಿಗಳಲ್ಲಿ ಭಕ್ತರಿಗೆ ದರ್ಶನ ಕರುಣಿಸುತ್ತಾರೆ.
ಕಣ್ಮನ ಸೆಳೆಯುವ ಸುಂದರ ‘ಪುಷ್ಪಕ ವಿಮಾನ’ ರಚನೆ:
ಈ ಉತ್ಸವದ ಪ್ರಮುಖ ಆಕರ್ಷಣೆಯಾದ ಪುಷ್ಪಕ ವಿಮಾನದ ತಯಾರಿಕೆಯೇ ಒಂದು ಅದ್ಭುತ ಕಲೆ. ತೆಂಗಿನ ಗರಿಗಳನ್ನು ಬಳಸಿ ಅತ್ಯಂತ ಬಲವಾದ ವಿಮಾನದ ಮೂಲ ಆಕೃತಿಯನ್ನು ಸಿದ್ಧಪಡಿಸಿ, ನಂತರ ಹತ್ತಾರು ವಿಧದ ಪರಿಮಳಯುಕ್ತ ಸಾಂಪ್ರದಾಯಿಕ ಹೂವುಗಳಿಂದ ಇದನ್ನು ಕಲಾತ್ಮಕವಾಗಿ ಅಲಂಕರಿಸಲಾಗುತ್ತದೆ. ಸರಿಸುಮಾರು 15 ಅಡಿ ಎತ್ತು ಹಾಗೂ 14 ಅಡಿ ಅಗಲವಿರುವ ಈ ವಿಮಾನವನ್ನು ಮಲ್ಲಿಗೆ, ಕನಕಾಂಬರ, ಸೇವಂತಿ, ಲಿಲ್ಲಿ, ತಾವರೆ ಹಾಗೂ ಗುಲಾಬಿ ಹೂವುಗಳಿಂದ ಮೂರು ಹಂತಗಳಲ್ಲಿ ಅತ್ಯಂತ ಮನಮೋಹಕವಾಗಿ ರೂಪುಗೊಳಿಸಲಾಗುತ್ತದೆ. ಎರಡು ಬದಿಗಳಲ್ಲಿ ಆಂಜನೇಯ ಸ್ವಾಮಿ ಹಾಗೂ ಗರುಡಾ ಕೈಮುಗಿದು ನಿಂತಿರುವ ಪ್ರತಿಮೆಗಳು, ಅಷ್ಟಲಕ್ಷ್ಮಿ ಹಾಗೂ ಪ್ರಾಣಿ-ಪಕ್ಷಿಗಳ ಆಕೃತಿಗಳು ಈ ವಿಮಾನದ ದೈವಿಕ ಸೌಂದರ್ಯವನ್ನು ಇಮ್ಮಡಿಗೊಳಿಸುತ್ತವೆ.
ಇದನ್ನೂ ಓದಿ: ದುರ್ಗಾ ದೇವಿಯ ಕೈಯಲ್ಲಿರುವ ಆಯುಧಗಳ ರಹಸ್ಯವೇನು? ತ್ರಿಶೂಲದಿಂದ ಚಕ್ರದವರೆಗೆ ಎಲ್ಲದರ ಮಹತ್ವ ಇಲ್ಲಿದೆ!
ಗೋವರ್ಧನ ಕೃಷ್ಣನ ಅಲಂಕಾರದಲ್ಲಿ ಮಲಯಪ್ಪ ಸ್ವಾಮಿಯ ದರ್ಶನ:
ಇಂದಿನ ಈ ಪುಷ್ಪಕ ವಿಮಾನ ಸೇವೆಯಲ್ಲಿ ಶ್ರೀದೇವಿ ಮತ್ತು ಭೂದೇವಿ ಸಮೇತರಾದ ಶ್ರೀಮಲಯಪ್ಪ ಸ್ವಾಮಿಯು ‘ಗೋವರ್ಧನ ಕೃಷ್ಣ’ ಅಥವಾ ‘ಕೋಲಾಟ ಕೃಷ್ಣ’ನ ವಿಶೇಷ ಅಲಂಕಾರದಲ್ಲಿ ಭಕ್ತರಿಗೆ ಕಟಾಕ್ಷ ಬೀರುತ್ತಿದ್ದಾರೆ. ಹೂವುಗಳ ಸೌಂದರ್ಯದ ನಡುವೆ ವಿರಾಜಮಾನರಾದ ದೇವರನ್ನು ಕಣ್ತುಂಬಿಕೊಳ್ಳಲು ಭಕ್ತ ಸಮೂಹ ಕಾಯುತ್ತದೆ. ಈ ಸುಸಂದರ್ಭದಲ್ಲಿ ಮೊಳಗುವ ಮಂಗಲ ವಾದ್ಯಗಳ ನಾದ, ವೇದ ಪಂಡಿತರ ಮಂತ್ರಘೋಷ ಹಾಗೂ ಹತ್ತಾರು ಸಾವಿರ ಭಕ್ತರ ಬಾಯಿಂದ ಹೊರಡುವ “ಗೋವಿಂದಾ… ಗೋವಿಂದಾ…” ಎಂಬ ನಾಮಸ್ಮರಣೆಯಿಂದ ತಿರುಮಾದ ಬೀದಿಗಳೆಲ್ಲವೂ ಸಂಪೂರ್ಣವಾಗಿ ದೈವಿಕ ಮಯವಾಗಿ ಪರಿವರ್ತನೆಗೊಳ್ಳುತ್ತವೆ.
ಭಕ್ತರ ನಂಬಿಕೆ ಹಾಗೂ ಪುಷ್ಪಕ ವಿಮಾನ ದರ್ಶನದ ಫಲ:
ಹಿಂದೂ ಸನಾತನ ಧರ್ಮದ ಅಡಿಯಲ್ಲಿ, ಪುಷ್ಪಕ ವಿಮಾನದಲ್ಲಿ ವಿಹರಿಸುವ ಶ್ರೀನಿವಾಸನನ್ನು ಕಣ್ಣಾರೆ ಕಾಣುವುದು ಸಕಲ ಪಾಪಗಳ ನಿವಾರಣೆಗೆ ದಾರಿಯೆಂದು ಭಕ್ತರು ಗಾಢವಾಗಿ ನಂಬಿದ್ದಾರೆ. ಈ ದಿವ್ಯ ಸೇವೆಯನ್ನು ಕಣ್ತುಂಬಿಕೊಳ್ಳುವುದರಿಂದ ಮನೆಯಲ್ಲಿ ಸುಖ-ಶಾಂತಿ ನೆಲೆಸುವುದಲ್ಲದೆ, ಸಕಲ ಐಶ್ವರ್ಯ ಹಾಗೂ ಇಷ್ಟಾರ್ಥಗಳು ಸಿದ್ಧಿಸುತ್ತವೆ ಎಂಬುದು ಸತ್ಯ. ಭಕ್ತಿ ಹಾಗೂ ಶ್ರದ್ಧೆಯಿಂದ ಶ್ರೀಹರಿಯನ್ನು ಸ್ಮರಿಸುವುದರಿಂದ ಮನಸ್ಸಿಗೆ ಅಪಾರವಾದ ನೆಮ್ಮದಿಯೂ, ಆಧ್ಯಾತ್ಮಿಕ ತೃಪ್ತಿಯೂ ಪ್ರಾಪ್ತವಾಗುತ್ತದೆ. ಈ ಪರಮ ಪವಿತ್ರ ಉತ್ಸವವು ತಿರುಮಲ ಕ್ಷೇತ್ರದ ಸನಾತನ ಸಂಪ್ರದಾಯವನ್ನು ಮತ್ತು ಪರಂಪರೆಯ ಸೊಬಗನ್ನು ಇಂದಿಗೂ ಸಾರ್ಥಕವಾಗಿ ಜಗತ್ತಿಗೆ ಸಾರುತ್ತಿದೆ.
ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 1:03 pm, Sat, 17 October 26
