ಫೈನಲ್ ಮ್ಯಾಚ್ ಪಿಚ್ ಯಾವುದೆಂಬುದು ಬಹಿರಂಗ: ವಿರಾಟ್ ಕೊಹ್ಲಿ ಫುಲ್ ಹ್ಯಾಪಿ

ಚಾಂಪಿಯನ್ಸ್ ಟ್ರೋಫಿ ಫೈನಲ್ ಮ್ಯಾಚ್​ಗೆ ವೇದಿಕೆ ಸಿದ್ಧವಾಗಿದೆ. ದುಬೈನ ಇಂಟರ್​​ನ್ಯಾಷನಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಜರುಗಲಿಯುವ ಈ ಪಂದ್ಯದಲ್ಲಿ ಭಾರತ ಮತ್ತು ನ್ಯೂಝಿಲೆಂಡ್ ತಂಡಗಳು ಮುಖಾಮುಖಿಯಾಗಲಿದೆ. ಈ ನಿರ್ಣಾಯಕ ಪಂದ್ಯವು ಯಾವ ಪಿಚ್​ನಲ್ಲಿ ನಡೆಯಲಿದೆ ಪ್ರಶ್ನೆಗೆ ಕೊನೆಗೂ ಉತ್ತರ ಸಿಕ್ಕಿದೆ. ಈ ಉತ್ತರದಿಂದ ಅತೀ ಹೆಚ್ಚು ಸಂತೋಷಗೊಂಡಿರುವುದು ವಿರಾಟ್ ಕೊಹ್ಲಿ.

ಹೌದು, ಭಾರತ ಮತ್ತು ನ್ಯೂಝಿಲೆಂಡ್ ನಡುವಣ ಕೊನೆಯ ಪಂದ್ಯಕ್ಕಾಗಿ ದುಬೈ ಇಂಟರ್​ನ್ಯಾಷನಲ್ ಸ್ಟೇಡಿಯಂನ 2ನೇ ಪಿಚ್​ ಅನ್ನು ಆಯ್ಕೆ ಮಾಡಗಿದೆ ಎಂದು ವರದಿಯಾಗಿದೆ. ದುಬೈ ಮೈದಾನದಲ್ಲಿ ಒಟ್ಟು 10 ಪಿಚ್​ಗಳಿದ್ದು, ಅದರಲ್ಲಿ 4 ಪಿಚ್​ಗಳನ್ನು ಚಾಂಪಿಯನ್ಸ್​ ಟ್ರೋಫಿ ಪಂದ್ಯಗಳಿಗೆ ಬಳಸಲಾಗಿದೆ.

ಇದೀಗ ಈ ನಾಲ್ಕು ಪಿಚ್​ಗಳಲ್ಲಿ ಒಂದನ್ನು ಫೈನಲ್​ ಮ್ಯಾಚ್​ಗೂ ಮರುಬಳಕೆ ಮಾಡಲು ಆಸ್ಟ್ರೇಲಿಯಾದ ಕ್ಯುರೇಟರ್ ಮ್ಯಾಥ್ಯೂ ಸ್ಯಾಂಡರಿ ನಿರ್ಧರಿಸಿದ್ದಾರೆ. ವಿಶೇಷ ಎಂದರೆ ಸ್ಯಾಂಡರಿ ಆಯ್ಕೆ ಮಾಡಿಕೊಂಡಿರುವುದು ಭಾರತ ಮತ್ತು ಪಾಕಿಸ್ತಾನ್ ನಡುವಣ ಪಂದ್ಯದ ಪಿಚ್.

ಅಂದರೆ ಫೆಬ್ರವರಿ 23 ರಂದು ಭಾರತ ಮತ್ತು ಪಾಕಿಸ್ತಾನ್ ಆಡಿದ ಪಿಚ್​ ಅನ್ನು ಮತ್ತೆ ಸಜ್ಜುಗೊಳಿಸಲು ನಿರ್ಧರಿಸಲಾಗಿದೆ. ಏಕೆಂದರೆ ಈ ಪಿಚ್​ನಲ್ಲಿ ಪಂದ್ಯ ನಡೆದು ಎರಡು ವಾರಗಳು ಕಳೆದಿವೆ. ಹೀಗಾಗಿಯೇ ನಿರ್ಣಾಯಕ ಪಂದ್ಯಕ್ಕೆ ಇದೇ ಪಿಚ್ ಸೂಕ್ತ ಎಂಬ ನಿರ್ಧಾರಕ್ಕೆ ಬರಲಾಗಿದೆ.

ವಿರಾಟ್ ಕೊಹ್ಲಿ ಫುಲ್ ಖುಷ್:

ಭಾರತ ಮತ್ತು ಪಾಕಿಸ್ತಾನ್ ನಡುವಣ ಪಂದ್ಯದ ಪಿಚ್​ ಅನ್ನು ಮರು ಬಳಕೆ ಮಾಡುತ್ತಿರುವುದರಿಂದ ವಿರಾಟ್ ಕೊಹ್ಲಿ ಫುಲ್ ಖುಷ್ ಆಗಿದ್ದಾರೆ. ಏಕೆಂದರೆ ಇದೇ ಮೈದಾನದಲ್ಲಿ ಪಾಕಿಸ್ತಾನ್ ವಿರುದ್ಧ ಕಿಂಗ್ ಕೊಹ್ಲಿ ಭರ್ಜರಿ ಶತಕ ಸಿಡಿಸಿದ್ದರು. ಹೀಗಾಗಿ ಮತ್ತೊಮ್ಮೆ ಅದೇ ಪಿಚ್​ನಲ್ಲಿ ಬ್ಯಾಟಿಂಗ್ ಮಾಡುವುದು ಕೊಹ್ಲಿಗೆ ಕಷ್ಟವೇನಲ್ಲ.

ಅದರಲ್ಲೂ ಪಾಕಿಸ್ತಾನ್ ವಿರುದ್ಧ ಟೀಮ್ ಇಂಡಿಯಾ ಬೌಲರ್​ಗಳು ಉತ್ತಮ ಪ್ರದರ್ಶನವನ್ನೂ ಸಹ ನೀಡಿದ್ದಾರೆ. ಹಾಗಾಗಿ ಲೀಗ್​ ಹಂತದಲ್ಲಿ ಕಣಕ್ಕಿಳಿದ ಪಿಚ್​ನಲ್ಲೇ ಫೈನಲ್ ಪಂದ್ಯವಾಡಲಿರುವುದು​ ಭಾರತ ತಂಡದ ಪಾಲಿಗೆ ವರದಾನವಾಗಲಿದೆ.

ಇದನ್ನೂ ಓದಿ: IPL 2026: ಐಪಿಎಲ್​ಗೆ ಪಾಕಿಸ್ತಾನ್ ವೇಗಿ ಮೊಹಮ್ಮದ್ ಅಮೀರ್

ಇನ್ನು ಪಾಕಿಸ್ತಾನ್ ವಿರುದ್ಧದ ಆಡಲಾದ ಪಿಚ್​ ಬೌಲರ್​ಗಳಿಗೆ ಸಹಕಾರಿಯಾಗಿತ್ತು. ಇದೀಗ ಅದೇ ಪಿಚ್​ ಅನ್ನು ಮರು ಬಳಕೆ ಮಾಡುತ್ತಿರುವುದರಿಂದ ವಿಕೆಟ್ ಸ್ವಲ್ಪ ಬದಲಾಗಬಹುದು. ಇದರ ಹೊರತಾಗಿ ಒಟ್ಟಾರೆ ಸ್ವರೂಪದಲ್ಲಿ ಹೆಚ್ಚು ಬದಲಾವಣೆ ಕಂಡು ಬರುವುದಿಲ್ಲ. ಹೀಗಾಗಿ ಅಂತಿಮ ಪಂದ್ಯದಲ್ಲೂ ಬ್ಯಾಟರ್-ಬೌಲರ್​ಗಳಿಂದ ಉತ್ತಮ ಪೈಪೋಟಿ ನಿರೀಕ್ಷಿಸಬಹುದು.