ಮೈದಾನದಲ್ಲಿ ಪ್ಲೇಯರ್ಸ್ ಡಿಕ್ಕಿ: ಫುಟ್​ಬಾಲ್ ಆಟಗಾರ ಸಾವು!

ಸ್ಪೇನ್‌ನ ಸೆಗುಂಡಾ ಡಿವಿಸನ್ ಫುಟ್‌ಬಾಲ್ ಪಂದ್ಯದ ವೇಳೆ ಸಂಭವಿಸಿದ ಭೀಕರ ಆನ್‌-ಫೀಲ್ಡ್ ಅಪಘಾತಕ್ಕೆ ಸಿಡಿ ಟೆನೆರೈಫ್ ತಂಡದ ಸ್ಟ್ರೈಕರ್ ಜೀಸಸ್ ಡಿ ಮಿಗುಯೆಲ್ (30) ಬಲಿಯಾಗಿದ್ದಾರೆ. ಸೋಮವಾರ ನಡೆದ ಪಂದ್ಯದ ಇಂಜುರಿ ಟೈಮ್‌ನಲ್ಲಿ ಎದುರಾಳಿ ಗೋಲ್‌ಕೀಪರ್ ಎಸಗಿದ ಅಪಾಯಕಾರಿ ಫೌಲ್‌ನಿಂದಾಗಿ ತೀವ್ರವಾಗಿ ಗಾಯಗೊಂಡಿದ್ದ ಡಿ ಮಿಗುಯೆಲ್  ಆಸ್ಪತ್ರೆಯಲ್ಲಿ ನಿಧನರಾಗಿದ್ದಾರೆ ಎಂದು ಕ್ಲಬ್ ಅಧಿಕೃತವಾಗಿ ಖಚಿತಪಡಿಸಿದೆ. ಈ ಘಟನೆಯು ಜಾಗತಿಕ ಫುಟ್‌ಬಾಲ್ ವಲಯದಲ್ಲಿ ಆಘಾತ ಮೂಡಿಸಿದ್ದು, ಕ್ರೀಡಾಂಗಣಗಳಲ್ಲಿ ಆಟಗಾರರ ಸುರಕ್ಷತೆಯ ಕುರಿತು ದೊಡ್ಡ ಚರ್ಚೆಯನ್ನು ಹುಟ್ಟುಹಾಕಿದೆ.

ಟೆನೆರೈಫ್‌ನ ತವರು ಮೈದಾನವಾದ ಎಸ್ಟಾಡಿಯೊ ಹೆಲಿಯೊಡೊರೊ ರೊಡ್ರಿಗಸ್ ಲೋಪೆಜ್‌ನಲ್ಲಿ ನಡೆದ ಈ ಪಂದ್ಯದಲ್ಲಿ ಸಿಡಿ ಟೆನೆರೈಫ್ ಹಾಗೂ ಎಫ್‌ಸಿ ಅಂಡೋರಾ ತಂಡಗಳು ಮುಖಾಮುಖಿಯಾಗಿದ್ದವು.  ಪಂದ್ಯವು 2–2 ಗೋಲುಗಳ ಸಮಬಲದೊಂದಿಗೆ ಇಂಜುರಿ ಟೈಮ್‌ (90+7ನೇ ನಿಮಿಷ) ತಲುಪಿತ್ತು. ಈ ವೇಳೆ ಚೆಂಡನ್ನು ಬೆನ್ನಟ್ಟುತ್ತಿದ್ದ ಡಿ ಮಿಗುಯೆಲ್ ಅವರಿಗೆ, ಅಂಡೋರಾ ತಂಡದ ಗೋಲ್‌ಕೀಪರ್ ಜೀಸಸ್ ಒವೊನೊ ಡಿಕ್ಕಿ ಹೊಡೆದರು.

ಪೆನಾಲ್ಟಿ ಬಾಕ್ಸ್‌ನಿಂದ ಮುನ್ನುಗ್ಗಿ ಬಂದ ಒವೊನೊ ಅವರ ಮೊಣಕಾಲು ಡಿ ಮಿಗುಯೆಲ್ ಅವರ ಎದೆ ಮತ್ತು ತಲೆಯ ಭಾಗಕ್ಕೆ ಬಲವಾಗಿ ಅಪ್ಪಳಿಸಿತು. ಡಿಕ್ಕಿಯ ತೀವ್ರತೆಗೆ ಡಿ ಮಿಗುಯೆಲ್ ತಕ್ಷಣವೇ ಮೈದಾನದಲ್ಲಿ ಪ್ರಜ್ಞೆ ತಪ್ಪಿ ಬಿದ್ದರು. ರೆಫರಿ ತಕ್ಷಣವೇ ಗೋಲ್‌ಕೀಪರ್ ಒವೊನೊಗೆ ರೆಡ್ ಕಾರ್ಡ್ ತೋರಿಸಿ ಮೈದಾನದಿಂದ ಹೊರಹಾಕಿದರು ಮತ್ತು ಪಂದ್ಯವನ್ನು ಅಲ್ಲಿಗೇ ರದ್ದುಗೊಳಿಸಲಾಯಿತು.

🔵⚪️ | Golpe fortísimo de Owono sobre Jesús de Miguel que hace que salten todas las alarmas. 🇪🇸👀

🙏🏼 Pronta recuperación a Jesús y que todo quede en un susto

🏟️ Tenerife – Andorra https://t.co/NXopIJ7p9H

— Laliga News (@laligaa_neews) November 2, 2026

ಆಸ್ಪತ್ರೆಯಲ್ಲಿ ಕೊನೆಯುಸಿರು:

ಮೈದಾನದಲ್ಲೇ ಐದು ನಿಮಿಷಗಳಿಗೂ ಹೆಚ್ಚು ಕಾಲ ತುರ್ತು ಚಿಕಿತ್ಸೆ ನೀಡಿದ ಬಳಿಕ, ಅವರನ್ನು ಆಂಬ್ಯುಲೆನ್ಸ್ ಮೂಲಕ ಆಸ್ಪತ್ರೆಗೆ ಸಾಗಿಸಲಾಯಿತು. ಆಸ್ಪತ್ರೆಗೆ ಕೊಂಡೊಯ್ಯುವ ಮಾರ್ಗಮಧ್ಯದಲ್ಲಿ ಅವರಿಗೆ ಕಾರ್ಡಿಯಾಕ್ ಅರೆಸ್ಟ್ (ಹೃದಯ ಸ್ತಂಭನ) ಆಗಿತ್ತು ಎಂದು ವೈದ್ಯಕೀಯ ವರದಿಗಳು ತಿಳಿಸಿವೆ.

ತೀವ್ರ ನಿಗಾ ಘಟಕದಲ್ಲಿ (ICU) ಜೀವನ್ಮರಣ ಹೋರಾಟ ನಡೆಸುತ್ತಿದ್ದ ಅವರ ಮೆದುಳಿನ ಆರೋಗ್ಯ ಸ್ಥಿತಿ ರಾತ್ರೋರಾತ್ರಿ ಕ್ಷೀಣಿಸಿತು. ಮಂಗಳವಾರ ಮುಂಜಾನೆ 8:00 ಗಂಟೆಗೆ ಅವರು ಚಿಕಿತ್ಸೆ ಫಲಕಾರಿಯಾಗದೆ ಸಾವನ್ನಪ್ಪಿದ್ದಾರೆ ಎಂದು ಟೆನೆರೈಫ್ ಕ್ಲಬ್ ಅಧಿಕೃತವಾಗಿ ಪ್ರಕಟಿಸಿದೆ.

ಜಾಗತಿಕ ಫುಟ್‌ಬಾಲ್ ವಲಯದಿಂದ ಸಂತಾಪ:

ಡಿ ಮಿಗುಯೆಲ್ ಅವರ ಅಕಾಲಿಕ ಮರಣಕ್ಕೆ ಇಡೀ ಕ್ರೀಡಾಲೋಕ ಕಂಬನಿ ಮಿಡಿದಿದೆ.  ಈ ವಾರ ನಡೆಯಲಿರುವ ಎಲ್ಲಾ ಚಾಂಪಿಯನ್ಸ್ ಲೀಗ್ ಮತ್ತು ಯುರೋಪಾ ಲೀಗ್ ಪಂದ್ಯಗಳ ಆರಂಭಕ್ಕೂ ಮುನ್ನ ಡಿ ಮಿಗುಯೆಲ್ ಸ್ಮರಣಾರ್ಥ ಒಂದು ನಿಮಿಷದ ಮೌನಾಚರಣೆ ಇರಲಿದೆ ಎಂದು ಯುಇಎಫ್‌ಎ ಘೋಷಿಸಿದೆ.

ಸಿಡಿ ಟೆನೆರೈಫ್ ಕ್ಲಬ್ 6 ದಿನಗಳ ಅಧಿಕೃತ ಶೋಕಾಚರಣೆ ಪ್ರಕಟಿಸಿದ್ದು, ತನ್ನ ಎಲ್ಲಾ ಚಟುವಟಿಕೆಗಳನ್ನು ಸ್ಥಗಿತಗೊಳಿಸಿದೆ. ಅಭಿಮಾನಿಗಳು ಕ್ರೀಡಾಂಗಣದ ಹೊರಗೆ ಜಮಾಯಿಸಿ ಮೇಣದಬತ್ತಿ ಬೆಳಗಿ ಶ್ರದ್ಧಾಂಜಲಿ ಸಲ್ಲಿಸುತ್ತಿದ್ದಾರೆ.

ಇದನ್ನೂ ಓದಿ: ಯಾರಿಂದಲೂ ಸಾಧ್ಯವಾಗದ ವಿಶ್ವ ದಾಖಲೆ ಬರೆದ ವಿರಾಟ್ ಕೊಹ್ಲಿ

ಇನ್ನು ರಿಯಲ್ ಮ್ಯಾಡ್ರಿಡ್, ಬಾರ್ಸಿಲೋನಾ ಸೇರಿದಂತೆ ವಿಶ್ವದ ಪ್ರಮುಖ ಕ್ಲಬ್‌ಗಳು ಹಾಗೂ ಲಿಯೋನೆಲ್ ಮೆಸ್ಸಿ ಅವರಂತಹ ಜಾಗತಿಕ ತಾರೆಗಳು ಡಿ ಮಿಗುಯೆಲ್ ಕುಟುಂಬ ಮತ್ತು ಅಭಿಮಾನಿಗಳಿಗೆ ತೀವ್ರ ಸಂತಾಪ ಸೂಚಿಸಿದ್ದಾರೆ.