IND vs WI: 139 ಪಂದ್ಯಗಳಲ್ಲಿ ಭಾರತ ಗೆದ್ದಿದ್ದೆಷ್ಟು? ಕೆರಿಬಿಯನ್ನರು ಸೋತಿದ್ದೆಷ್ಟು? ಇಲ್ಲಿದೆ ಮುಖಾಮುಖಿ ವರದಿ

ಎರಡು ಬಾರಿಯ ಏಕದಿನ ವಿಶ್ವಕಪ್ ವಿಜೇತ ವೆಸ್ಟ್ ಇಂಡೀಸ್ ತಂಡವನ್ನು ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಭಾರತ (India vs West Indies) ಇಂದಿನಿಂದ ಎದುರಿಸಲಿದೆ. ವೇಳಾಪಟ್ಟಿಯಂತೆ ಮೊದಲ ಎರಡು ಪಂದ್ಯಗಳು ಬಾರ್ಬಡೋಸ್‌ನ ಬ್ರಿಡ್ಜ್‌ಟೌನ್‌ನಲ್ಲಿರುವ ಕೆನ್ಸಿಂಗ್ಟನ್ ಓವಲ್‌ನಲ್ಲಿ (Kensington Oval in Bridgetown, Barbados) ಜುಲೈ 27 ಮತ್ತು 29 ರಂದು ನಡೆಯಲಿವೆ. ಬಳಿಕ ಸರಣಿಯ ಕೊನೆಯ ಪಂದ್ಯವು ಬ್ರಿಯಾನ್ ಲಾರಾ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಒಂದೆಡೆ ಏಕದಿನ ವಿಶ್ವಕಪ್​ನಲ್ಲಿ (ODI World Cup) ಅವಕಾಶ ಗಿಟ್ಟಿಸಿಕೊಳ್ಳುವಲ್ಲಿ ವಿಫಲರಾಗಿರುವ ಕೆರಿಬಿಯನ್ನರಿಗೆ ಈ ಸರಣಿ ಔಪಚಾರಿಕವಾಗಿದ್ದರೂ, ತವರಿನಲ್ಲಿ ಟೆಸ್ಟ್ ಸರಣಿ ಬಳಿಕ ಏಕದಿನ ಸರಣಿಯನ್ನು ಕಳೆದುಕೊಳ್ಳಲು ಆತಿಥೇಯರು ಬಯಸುವುದಿಲ್ಲ. ಇತ್ತ ವಿಶ್ವಕಪ್​ಗೆ ಆತಿಥ್ಯವಹಿಸುತ್ತಿರುವುದು ಭಾರತವೇ ಆಗಿರುವುದರಿಂದ ಈ ಸರಣಿಯನ್ನು ಗೆದ್ದು ವಿಶ್ವಕಪ್​ಗೆ ಎಂಟ್ರಿಕೊಡಬೇಕಾದ ಅನಿವಾರ್ಯತೆ ಟೀಂ ಇಂಡಿಯಾಕ್ಕೆ (Team India) ಎದುರಾಗಿದೆ.

ಉಭಯ ತಂಡಗಳ ಮುಖಾಮುಖಿ ವರದಿ

ಈ ಉಭಯ ದೇಶಗಳ ನಡವಿನ ಕೊನೆಯ ಎಂಟು ಏಕದಿನ ಪಂದ್ಯಗಳನ್ನು ಗೆದ್ದಿರುವ ಟೀಂ ಇಂಡಿಯಾ, ಈ ಸರಣಿಯಲ್ಲೂ ತನ್ನ ಗೆಲುವಿನ ನಾಗಲೋಟವನ್ನು ಮುಂದುವರೆಸಲು ಬಯಸಿದೆ. ಹಾಗೆಯೇ ಉಭಯ ತಂಡಗಳ ಏಕದಿನ ಕಾಳಗದ ಮುಖಾಮುಖಿ ವರದಿಯನ್ನು ನೋಡುವುದಾದರೆ, ಉಭಯ ತಂಡಗಳ ನಡುವೆ ಇದುವರೆಗೆ 139 ಪಂದ್ಯಗಳು ನಡೆದಿದ್ದು 70ಪಂದ್ಯಗಳಲ್ಲಿ ಟೀಂ ಇಂಡಿಯಾ ಗೆಲುವು ಸಾಧಿಸಿದ್ದರೆ, 63 ಪಂದ್ಯಗಳಲ್ಲಿ ವೆಸ್ಟ್ ಇಂಡೀಸ್ ವಿಜಯಶಾಲಿಯಾಗಿ ಹೊರಹೊಮ್ಮಿದೆ. ಎರಡು ಪಂದ್ಯಗಳು ಟೈ ಆಗಿದ್ದರೆ, ನಾಲ್ಕು ಪಂದ್ಯಗಳು ಯಾವುದೇ ಫಲಿತಾಂಶವಿಲ್ಲದೆ ಕೊನೆಗೊಂಡಿವೆ. ಇನ್ನು ಈ ಎರಡೂ ತಂಡಗಳ 139 ಏಕದಿನ ಮುಖಾಮುಖಿಯಲ್ಲಿ ಕಂಡು ಬಂದ ವಿಶಿಷ್ಟ ಮೈಲಿಗಲ್ಲುಗಳ ಪಕ್ಷಿನೋಟವನ್ನು ನೋಡುವುದಾದರೆ..

IND vs WI: ಭಾರತ- ವಿಂಡೀಸ್ ನಡುವಿನ ಮೊದಲ ಏಕದಿನ ಪಂದ್ಯಕ್ಕೆ ಮಳೆ ಕಾಟ..?

ಉಭಯ ತಂಡಗಳ ಮುಖಾಮುಖಿಯ ವಿಶಿಷ್ಟ ಮೈಲಿಗಲ್ಲುಗಳಿವು

1. ಅತ್ಯಧಿಕ ರನ್: ವಿರಾಟ್ ಕೊಹ್ಲಿ (42 ಪಂದ್ಯಗಳಲ್ಲಿ 2261 ರನ್)
2. ಗರಿಷ್ಠ ವೈಯಕ್ತಿಕ ಸ್ಕೋರ್: ಡಿಸೆಂಬರ್ 8, 2011 ರಂದು ಇಂದೋರ್‌ನ ಹೋಲ್ಕರ್ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಆರಂಭಿಕ ವೀರೇಂದ್ರ ಸೆಹ್ವಾಗ್, 149 ಎಸೆತಗಳಲ್ಲಿ 219 ಕಲೆಹಾಕಿದ್ದರು.
3. ಅತಿ ಹೆಚ್ಚು ಶತಕ: ವಿರಾಟ್ ಕೊಹ್ಲಿ (42 ಪಂದ್ಯಗಳಲ್ಲಿ 9 ಶತಕ)
4. ಅತಿ ಹೆಚ್ಚು ಅರ್ಧಶತಕ: ರೋಹಿತ್ ಶರ್ಮಾ (36 ಪಂದ್ಯಗಳಲ್ಲಿ 12 ಅರ್ಧಶತಕ)
5. ಅತಿ ಹೆಚ್ಚು ಸಿಕ್ಸರ್‌ಗಳು: ರೋಹಿತ್ ಶರ್ಮಾ (36 ಪಂದ್ಯಗಳಲ್ಲಿ 35 ಸಿಕ್ಸರ್)
6. ಸರಣಿಯಲ್ಲಿ ಅತಿ ಹೆಚ್ಚು ರನ್: 2002/03 ರಲ್ಲಿ ನಡೆದ ಏಳು ಪಂದ್ಯಗಳ ಸರಣಿಯಲ್ಲಿ ಕ್ರಿಸ್ ಗೇಲ್ 455 ರನ್ ಬಾರಿಸಿದ್ದರು.
7. ಅತಿ ದೊಡ್ಡ ಜೊತೆಯಾಟ: ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಅಕ್ಟೋಬರ್ 21, 2018 ರಂದು ಗುವಾಹಟಿಯ ಬರ್ಸಾಪರಾ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಏಕದಿನ ಪಂದ್ಯದಲ್ಲಿ 2 ನೇ ವಿಕೆಟ್‌ಗೆ 246 ರನ್ ಕಲೆಹಾಕಿದ್ದರು.
8. ಹೆಚ್ಚಿನ ಪಂದ್ಯಗಳು: ಶಿವನಾರಾಯಣ ಚಂದ್ರಪಾಲ್ (46 ಪಂದ್ಯ)
9. ಹೆಚ್ಚು ವಿಕೆಟ್‌ಗಳು: ಕರ್ಟ್ನಿ ವಾಲ್ಷ್ – 38 ಪಂದ್ಯಗಳಲ್ಲಿ 44 ವಿಕೆಟ್​ಗಳು.

ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 7:58 am, Thu, 27 July 23