ಕೇವಲ 37 ಎಸೆತಗಳಲ್ಲಿ ಶತಕ: 2 ಎಸೆತಗಳಿಂದ ಎಬಿಡಿ ಕೈತಪ್ಪಿದ ಭರ್ಜರಿ ದಾಖಲೆ!
ಎಬಿಡಿ ಅವರ ಬ್ಯಾಟಿಂಗ್ ಖದರ್ ಮಾತ್ರ ಕಿಂಚಿತ್ತೂ ಕಡಿಮೆಯಾಗಿಲ್ಲ. ಅದಕ್ಕೆ ಸಾಕ್ಷಿ ಎಂಬಂತೆ ವಿಶ್ವ ಚಾಂಪಿಯನ್‌ಷಿಪ್ ಆಫ್ ಲೆಜೆಂಡ್ಸ್ ಟೂರ್ನಿಯಲ್ಲಿ ಆಸ್ಟ್ರೇಲಿಯಾ ಚಾಂಪಿಯನ್ಸ್ ವಿರುದ್ಧದ ಪಂದ್ಯದಲ್ಲಿ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿದ್ದಾರೆ. ಈ ಭರ್ಜರಿ ಬ್ಯಾಟಿಂಗ್ ಪ್ರದರ್ಶನದ ಹೊರತಾಗಿಯೂ ಕೇವಲ ಹೆಚ್ಚುವರಿ 2 ಎಸೆತಗಳಿಂದಾಗಿ ಟೂರ್ನಿಯ ಇತಿಹಾಸದ ಸಾರ್ವಕಾಲಿಕ ದಾಖಲೆಯೊಂದು ಅವರ ಕೈತಪ್ಪಿ ಹೋಗಿದೆ!
Updated on: Oct 10, 2026 | 12:52 PM
‘ಮಿಸ್ಟರ್ 360 ಡಿಗ್ರಿ’ ಖ್ಯಾತಿಯ ಎಬಿ ಡಿವಿಲಿಯರ್ಸ್ ಅವರ ಸಿಡಿಲಬ್ಬರ ಇಂದಿಗೂ ಮುಂದುವರಿದಿದೆ. ಈ ಬಾರಿ ಅವರು ಅಬ್ಬರಿಸಿದ್ದು ವಿಶ್ವ ಚಾಂಪಿಯನ್‌ಷಿಪ್ ಆಫ್ ಲೆಜೆಂಡ್ಸ್ ಟೂರ್ನಿಯಲ್ಲಿ. ಅದು ಸಹ ಕೇವಲ 37 ಎಸೆತಗಳಲ್ಲಿ 11 ಸಿಕ್ಸರ್ಗಳೊಂದಿಗೆ ಭರ್ಜರಿ ಸೆಂಚುರಿ ಸಿಡಿಸುವ ಮೂಲಕ ವಿಶೇಷ. ಶಾರ್ಜಾದ ಇಂಟರ್ನ್ಯಾಷನಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ವಿಶ್ವ ಚಾಂಪಿಯನ್‌ಷಿಪ್ ಆಫ್ ಲೆಜೆಂಡ್ಸ್ ಟೂರ್ನಿಯ 9ನೇ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಚಾಂಪಿಯನ್ಸ್ ಹಾಗೂ ಸೌತ್ ಆಫ್ರಿಕಾ ಚಾಂಪಿಯನ್ಸ್ ತಂಡಗಳು ಮುಖಾಮುಖಿಯಾಗಿದ್ದವು.
ಈ ಪಂದ್ಯದಲ್ಲಿ ಟಾಸ್ ಗೆದ್ದ ಆಸ್ಟ್ರೇಲಿಯಾ ತಂಡದ ನಾಯಕ ಡೇವಿಡ್ ವಾರ್ನರ್ ಬ್ಯಾಟಿಂಗ್ ಆಯ್ದುಕೊಂಡರು. ಅದರಂತೆ ಮೊದಲು ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ ತಂಡವು 20 ಓವರ್ಗಳಲ್ಲಿ 5 ವಿಕೆಟ್ ಕಳೆದುಕೊಂಡು 209 ರನ್ ಕಲೆಹಾಕಿತು.
210 ರನ್ಗಳ ಗುರಿ ಬೆನ್ನತ್ತಿದ ಸೌತ್ ಆಫ್ರಿಕಾ ಪರ ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಎಬಿ ಡಿವಿಲಿಯರ್ಸ್ ಅಕ್ಷರಶಃ ಅಬ್ಬರಿಸಿದರು. ಆಸ್ಟ್ರೇಲಿಯಾ ಬೌಲರ್ಗಳನ್ನು ಮನಬಂದಂತೆ ದಂಡಿಸಿದ ಎಬಿಡಿ ಸಿಕ್ಸ್-ಫೋರ್ಗಳ ಸುರಿಮಳೆಗೈದರು. ಪರಿಣಾಮ ಡಿವಿಲಿಯರ್ಸ್ ಬ್ಯಾಟ್ನಿಂದ ಕೇವಲ 37 ಎಸೆತಗಳಲ್ಲಿ ಸ್ಫೋಟಕ ಶತಕ ಮೂಡಿಬಂತು.
𝐀𝐁ility beyond human comprehension 🥵
#ABdeVilliers smashed a 37-BALL HUNDRED to make a 210-run chase LOOK LIKE A WALK IN THE PARK! 🤯
Watch the #WCL 2026 LIVE on Star Sports! https://t.co/t4y7OtqXrH
— Star Sports (@StarSportsIndia) October 10, 2026
ಕೈ ತಪ್ಪಿದ ಭರ್ಜರಿ ದಾಖಲೆ:
ಈ ಪಂದ್ಯದಲ್ಲಿ ಎಬಿ ಡಿವಿಲಿಯರ್ಸ್ ಕೇವಲ 37 ಎಸೆತಗಳಲ್ಲಿ ಶತಕ ಸಿಡಿಸಿದರೂ, ಹೆಚ್ಚುವರಿ 2 ಎಸೆತಗಳ ಕಾರಣದಿಂದಾಗಿ ಆ ಭರ್ಜರಿ ದಾಖಲೆಯನ್ನು ತನ್ನದಾಗಿಸಿಕೊಳ್ಳುವ ಅವಕಾಶವನ್ನು ಕೈಚೆಲ್ಲಿಕೊಂಡರು. ಅಂದರೆ, ವಿಶ್ವ ಚಾಂಪಿಯನ್‌ಷಿಪ್ ಆಫ್ ಲೆಜೆಂಡ್ಸ್ ಟೂರ್ನಿ ಇತಿಹಾಸದಲ್ಲೇ ಅತ್ಯಂತ ಕಡಿಮೆ ಎಸೆತಗಳಲ್ಲಿ ಸೆಂಚುರಿ ಬಾರಿಸಿದ ಸಾರ್ವಕಾಲಿಕ ದಾಖಲೆ ಎಬಿಡಿಗೆ ಕೂದಲೆಳೆ ಅಂತರದಲ್ಲಿ ಮಿಸ್ ಆಗಿದೆ. ಪ್ರಸ್ತುತ ಈ ಐತಿಹಾಸಿಕ ದಾಖಲೆಯು ಆಸ್ಟ್ರೇಲಿಯಾದ ಬ್ಯಾಟರ್ ಬೆನ್ ಡಂಕ್ ಹೆಸರಿನಲ್ಲಿದೆ.
2024ರ ವಿಶ್ವ ಚಾಂಪಿಯನ್‌ಷಿಪ್ ಆಫ್ ಲೆಜೆಂಡ್ಸ್ ಟೂರ್ನಿಯಲ್ಲಿ ಆಸ್ಟ್ರೇಲಿಯಾ ಚಾಂಪಿಯನ್ಸ್ ಪರ ಕಣಕ್ಕಿಳಿದಿದ್ದ ಬೆನ್ ಡಂಕ್ ವೆಸ್ಟ್ ಇಂಡೀಸ್ ವಿರುದ್ಧ ಕೇವಲ 35 ಎಸೆತಗಳಲ್ಲಿ ಶತಕ ಬಾರಿಸಿದ್ದರು. ಈ ಮೂಲಕ WCL ಇತಿಹಾಸದಲ್ಲೇ ಅತೀ ವೇಗದ ಸೆಂಚುರಿ ಸಿಡಿಸಿದ ದಾಖಲೆ ನಿರ್ಮಿಸಿದ್ದಾರೆ.
ಬೆನ್ ಡಂಕ್ ಹೆಸರಿನಲ್ಲಿದ್ದ ಈ ಮಹತ್ತರ ದಾಖಲೆಯನ್ನು ಮುರಿಯುವ ಸುವರ್ಣ ಅವಕಾಶ ಎಬಿ ಡಿವಿಲಿಯರ್ಸ್‌ಗೆ ಇತ್ತಾದರೂ, ಹೆಚ್ಚುವರಿ ಎರಡು ಎಸೆತಗಳನ್ನು ತೆಗೆದುಕೊಂಡ ಕಾರಣ, ಅಂದರೆ ಒಟ್ಟು 37 ಎಸೆತಗಳ ಮೂಲಕ ಶತಕ ಪೂರೈಸಿ ಆ ಭರ್ಜರಿ ದಾಖಲೆಯನ್ನು ತನ್ನದಾಗಿಸಿಕೊಳ್ಳುವ ಅವಕಾಶವನ್ನು ಕೂದಲೆಳೆ ಅಂತರದಲ್ಲಿ ಕೈಚೆಲ್ಲಿಕೊಂಡರು.
ಸೌತ್ ಆಫ್ರಿಕಾಗೆ ಭರ್ಜರಿ ಜಯ:
ಈ ಪಂದ್ಯದಲ್ಲಿ ಒಟ್ಟು 40 ಎಸೆತಗಳನ್ನು ಎದುರಿಸಿದ ಎಬಿ ಡಿವಿಲಿಯರ್ಸ್ 11 ಸಿಕ್ಸರ್ ಹಾಗೂ 6 ಫೋರ್ಗಳೊಂದಿಗೆ ಅಜೇಯ 111 ಬಾರಿಸಿದರು. ಈ ಭರ್ಜರಿ ಸೆಂಚುರಿ ನೆರವಿನೊಂದಿಗೆ ಸೌತ್ ಆಫ್ರಿಕಾ ಚಾಂಪಿಯನ್ಸ್ ತಂಡವು ಆಸ್ಟ್ರೇಲಿಯಾ ಚಾಂಪಿಯನ್ಸ್ ನೀಡಿದ 210 ರನ್ಗಳ ಗುರಿಯನ್ನು ಕೇವಲ 15.4 ಓವರ್‌ಗಳಲ್ಲೇ ಚೇಸ್ ಮಾಡಿ 8 ವಿಕೆಟ್ಗಳ ಅಮೋಘ ಗೆಲುವು ದಾಖಲಿಸಿದೆ.
ಆಸ್ಟ್ರೇಲಿಯಾ ಚಾಂಪಿಯನ್ಸ್ ಪ್ಲೇಯಿಂಗ್ 11: ಡೇವಿಡ್ ವಾರ್ನರ್ (ನಾಯಕ) , ಉಸ್ಮಾನ್ ಖ್ವಾಜಾ , ಡಾರ್ಸಿ ಶಾರ್ಟ್ , ಜೋ ಬರ್ನ್ಸ್ , ಕ್ಯಾಲಮ್ ಫರ್ಗುಸನ್ , ಬೆನ್ ಡಂಕ್ (ವಿಕೆಟ್ ಕೀಪರ್ ), ಜೊನಾಥನ್ ವೆಲ್ಸ್ , ಬೆನ್ ಲಾಫ್ಲಿನ್ , ಕೇನ್ ರಿಚರ್ಡ್ಸನ್ , ಬೆನ್ ಹಿಲ್ಫೆನ್‌ಹೌಸ್ , ಫವಾದ್ ಅಹ್ಮದ್.
ಇದನ್ನೂ ಓದಿ: ಭಾರತದ ವಿರುದ್ಧದ ಸರಣಿಗೂ ಮುನ್ನ ನ್ಯೂಝಿಲೆಂಡ್ಗೆ ಮತ್ತೊಂದು ಆಘಾತ!
ಸೌತ್ ಆಫ್ರಿಕಾ ಚಾಂಪಿಯನ್ಸ್ ಪ್ಲೇಯಿಂಗ್ 11: ರಿಚರ್ಡ್ ಲೆವಿ , ಫಾಫ್ ಡು ಪ್ಲೆಸಿಸ್ , ಎಬಿ ಡಿವಿಲಿಯರ್ಸ್ (ನಾಯಕ) , ಸರೆಲ್ ಎರ್ವೀ , ಮೋರ್ನೆ ವ್ಯಾನ್ ವೈಕ್ (ವಿಕೆಟ್ ಕೀಪರ್) , ಜೆಪಿ ಡುಮಿನಿ , ವೇಯ್ನ್ ಪಾರ್ನೆಲ್ , ಹಾರ್ಡಸ್ ವಿಲ್ಜೋಯೆನ್ , ಮಾರ್ಚಂಟ್ ಡಿ ಲ್ಯಾಂಗ್ , ಇಮ್ರಾನ್ ತಾಹಿರ್ , ಆರನ್ ಫಾಂಗಿಸೊ.
