India vs Australia 2nd Test | ಟೀಂ ಇಂಡಿಯಾಗೆ ವರದಾನವಾಯ್ತು ಆಸಿಸ್​ ಕಳಪೆ ಫೀಲ್ಡಿಂಗ್

ಮೆಲ್ಬೋರ್ನ್‌: ಬಾಕ್ಸಿಂಗ್​ ಡೇ ಟೆಸ್ಟ್​ನ 2ನೇ ದಿನದಾಟ ಮಳೆಯಿಂದಾಗಿ ನಿಗದಿತ ಸಮಯಕ್ಕೂ ಮುನ್ನವೇ ನಿಲ್ಲಿಸಲಾಗಿದ್ದು, ನಾಯಕ ಅಜಿಂಕ್ಯ ರಹಾನೆ ಹಾಗೂ ರವೀಂದ್ರ ಜಡೇಜಾ ಅವರ ಉತ್ತಮ ಜೊತೆಯಾಟದಿಂದ ಭಾರತ 277 ರನ್​ ಗಳಿಸಿದೆ. ಅಲ್ಲದೆ 82 ರನ್​ಗಳ ಮುನ್ನಡೆ ಸಹ ಸಾಧಿಸಿದೆ.

ಭಾರತ ತಂಡದ ಈ ಅದ್ಭುತ ಆಟಕ್ಕೆ ಭಾರತೀಯ ಆಟಗಾರರು ಮಾತ್ರ ಕಾರಣರಲ್ಲ. ಆಸಿಸ್ ಆಟಗಾರರು ಟೀಂ ಇಂಡಿಯಾ ದಾಂಡಿಗರಿಗೆ ನೀಡಿದ ಜೀವದಾನ ಕೂಡ ಸಹಕಾರಿಯಾಗಿದೆ. ಅಡಿಲೇಡ್‌ನಲ್ಲಿ ನಡೆದ ಮೊದಲನೇ ಟೆಸ್ಟ್​ನ 2ನೇ ಇನ್ನಿಂಗ್ಸ್‌ನಲ್ಲಿ ಭಾರತೀಯರ ಪಾಲಿಗೆ ಯಾವುದೇ ಅದೃಷ್ಟ ಕೈ ಹಿಡಿಯಲಿಲ್ಲ. ಆದರೆ ಇಂದು ಆಸಿಸ್​ ಆಟಗಾರರ ಕಳಪೆ ಫಿಲ್ಡಿಂಗ್​ನಿಂದಾಗಿ 5ಕ್ಕೂ ಹೆಚ್ಚು ಜೀವದಾನ ಪಡೆದರು.

ಮೊದಲನೆಯದಾಗಿ 28 ರನ್​​ ಗಳಿಸಿ ಉತ್ತಮವಾಗಿ ಆಡುತ್ತಿದ್ದ ಶುಭಮನ್ ಗಿಲ್,​​ ಆಸಿಸ್​ ವೇಗಿ ಹ್ಯಾಝಲ್​ವುಡ್ ಎಸೆದ ಎಸೆತವನ್ನು ಸರಿಯಾಗಿ ಜಡ್ಜ್​ ಮಾಡಲಾಗದೆ ನಾಯಕ ಕಂ ವಿಕೆಟ್‌ ಕೀಪರ್​ ಟೀಂ ಪೈನ್​ಗೆ ಕ್ಯಾಚ್​ ನೀಡಿದರು. ಆದರೆ ಗಿಲ್ ಬಾರಿಸಿದ ಬಾಲನ್ನು ಸರಿಯಾಗಿ ಜಡ್ಜ್​ ಮಾಡದ ಕೀಪರ್​ ಟೀಂ ಪೈನ್ ನೆಲಕ್ಕೆ ಚೆಲ್ಲಿದ್ದರು. ಇದರ ಪರಿಣಾಮವಾಗಿ ಗಿಲ್​ ಅಮೋಘ 45 ರನ್​ ಬಾರಿಸಿದರು.

ಎರಡನೆಯದಾಗಿ 26 ರನ್​ ಗಳಿಸಿ ಮೈದಾನದಲ್ಲಿ ಬೌಂಡರಿಗಳ ಅಬ್ಬರ ಶುರು ಮಾಡಿದ್ದ ಟೀಂ ಇಂಡಿಯಾ ಕೀಪರ್​ ರಿಶಬ್​ ಪಂತ್,​ ಪ್ಯಾಟ್​ ಕಮಿನ್ಸ್​ ​ಬೌಲಿಂಗ್​ನಲ್ಲಿ ಕ್ಯಾಮರೂನ್​ ಗ್ರೀನ್ ಕಡೆಗೆ ಜೋರಾಗಿ ಬಾರಿಸಿದರು. ಆದರೆ ಪಂತ್​ರ ರಭಸವಾದ ಹೊಡೆತವನ್ನು ಹಿಡಿಯಲು ವಿಫಲವಾದ ಗ್ರೀನ್ ಕೈಗೆ ಬಂದಿದ್ದ ಕ್ಯಾಚನ್ನು ಕೈಚೆಲ್ಲಿದರು.

ಮೂರನೆಯದಾಗಿ ತಂಡಕ್ಕೆ ಅವಶ್ಯಕವಾದ ಶತಕ ಬಾರಿಸಿ ಅಜೇಯರಾಗಿ ಉಳಿದಿರುವ ಅಜಿಂಕ್ಯ ರಹಾನೆ 66 ರನ್​ ಗಳಿಸಿ ಆಡುವ ವೇಳೆ ನಾಥನ್ ಲಿಯಾನ್​ ಬೌಲಿಂಗ್​ನಲ್ಲಿ ಸ್ಲಿಪ್ ಕಡೆಗೆ ಬಾರಿಸಿದರು. ಆದರೆ ನಾಯಕ ಟೀಂ ಪೈನ್ ಹಾಗೂ ಸ್ಮಿತ್​ ನಡುವಿನ ಸಂವಹನದ ಕೊರತೆಯಿಂದಾಗಿ ಇದೂ ಆಸ್ಟ್ರೇಲಿಯನ್ನರ ಕೈತಪ್ಪಿತು.

​ಅಲ್ಲಿಗೆ ಸುಮ್ಮನಾಗದ ಅಜಿಂಕ್ಯ ರಹಾನೆ 73 ರನ್​ ಗಳಿಸಿ ಆಡುವ ವೇಳೆ ಸ್ಟಾರ್ಕ್ ಎಸೆದ ಬೆಂಕಿಯುಗುಳುವ ಚೆಂಡಿಗೆ ತಮ್ಮ ಬ್ಯಾಟ್​ನಿಂದ ಸುಮ್ಮನೆ ಮುತ್ತಿಕ್ಕಿದರು. ಮುತ್ತು ಪಡೆದ ಚೆಂಡು ಸೀದ ಸ್ಲಿಪ್​ನಲ್ಲಿ ನಿಂತಿದ್ದ ಸ್ಟೀವ್​ ಸ್ಮಿತ್ ಕಡೆಗೆ ಚಿಮ್ಮಿತ್ತು. ರಹಾನೆ ಬ್ಯಾಟ್​ನ ಕಿಸ್​ ಹೊಳಪಿಗೆ ಹೆದರಿದ ಸ್ಮಿತ್,​ ಕ್ಯಾಚ್​ ಹಿಡಿಯುವಲ್ಲಿ ಎಡವಿ ರಹಾನೆಗೆ 2ನೇ ಜೀವದಾನ ನೀಡಿದರು. ಸ್ಮಿತ್ ನೀಡಿದ ಜೀವದಾನ ಸದುಪಯೋಗ ಪಡಿಸಿಕೊಂಡ ನಾಯಕ ರಹಾನೆ ಅಮೋಘ ಶತಕ ಬಾರಿಸಿ ಮಿಂಚಿದರು.

ಎರಡು ಜೀವದಾನಗಳನ್ನು ಮರೆತ ಅಜಿಂಕ್ಯ ರಹಾನೆ 104 ರನ್​ ಗಳಿಸಿದ್ದಾಗ ಸ್ಟಾರ್ಕ್ ಬೌಲಿಂಗ್​ನಲ್ಲಿ, ಮಿಡ್ಲ್​ನಲ್ಲಿ ಫಿಲ್ಡಿಂಗ್​ ಮಾಡುತ್ತಿದ್ದ ಟ್ರಾವಿಸ್​ ಹೆಡ್​ಗೆ ಅತೀ ಸುಲಭವಾಗಿ ಹಿಡಿಯುವಂತ ಕ್ಯಾಚ್​ ನೀಡಿದರು. ಆದರೆ ಈಗಾಗಲೇ ರಹಾನೆ ಬ್ಯಾಟಿಂಗ್​ ನೋಡಿ ಹೆದರಿದ್ದ ಹೆಡ್, ರಹಾನೆ ನೀಡಿದ ಕ್ಯಾಚ್​ ಹಿಡಿಯುವಲ್ಲಿ ವಿಫಲರಾದರು.

ಆಸಿಸ್​ ಆಟಗಾರರು ನೀಡಿದ ಜೀವದಾನಗಳನ್ನು ಸದುಪಯೋಗಪಡಿಸಿಕೊಂಡ ಟೀಂ ಇಂಡಿಯಾ ಆಟಗಾರರು ತಂಡದ ಮೊತ್ತ ಹೆಚ್ಚಿಸುವಲ್ಲಿ ಯಶಸ್ವಿಯಾದರು. ಮೂರು ಜೀವದಾನ ಪಡೆದ ನಾಯಕ ರಹಾನೆ ಮೂರನೇ ದಿನದ ಆಟಕ್ಕೂ ಬ್ಯಾಟಿಂಗ್​ ಉಳಿಸಿಕೊಂಡಿದ್ದಾರೆ.

India vs Australia 2nd Test | ಭಾರತಕ್ಕೆ 82 ರನ್ ಮುನ್ನಡೆ, ಶತಕ ಬಾರಿಸಿದ ರಹಾನೆಗೆ ಉತ್ತಮ ಸಾಥ್​ ನೀಡಿದ ಜಡೇಜಾ

Published On - 3:54 pm, Sun, 27 December 20