ಕೇವಲ 9 ಸೆಂಟಿಮೀಟರ್​ನಿಂದ ನೀರಜ್ ಚೋಪ್ರಾಗೆ ಕೈತಪ್ಪಿದ ಅಗ್ರಸ್ಥಾನ!

ಭಾರತದ ಹೆಮ್ಮೆಯ ಜಾವೆಲಿನ್ ತಾರೆ ನೀರಜ್ ಚೋಪ್ರಾ ಅವರು ಲೂಸೇನ್ ಡೈಮಂಡ್ ಲೀಗ್ 2026 ರಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದರೂ, ಕೂದಲೆಳೆ ಅಂತರದಲ್ಲಿ ದ್ವಿತೀಯ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದಾರೆ. ಕೇವಲ 9 ಸೆಂಟಿಮೀಟರ್‌ಗಳ ವ್ಯತ್ಯಾಸದಿಂದ ಶ್ರೀಲಂಕಾದ ಉದಯೋನ್ಮುಖ ತಾರೆ ರುಮೇಶ್ ತರಂಗ ಪತಿರಾಗೆ ಅವರು ಪ್ರಥಮ ಸ್ಥಾನವನ್ನು ತಮ್ಮದಾಗಿಸಿಕೊಂಡಿದ್ದಾರೆ.

ಗಾಯದ ಬಳಿಕ ಭರ್ಜರಿ ಕಂಬ್ಯಾಕ್:

ಬೆನ್ನು ನೋವಿನ ಗಾಯದಿಂದ ಚೇತರಿಸಿಕೊಂಡು ಮೈದಾನಕ್ಕೆ ಮರಳಿದ್ದ ನೀರಜ್ ಚೋಪ್ರಾ, ತಮಗೆ ಸವಾಲಾಗಿದ್ದ 88 ಮೀಟರ್ ಗಡಿಯನ್ನು ಈ ಸೀಸನ್‌ನಲ್ಲಿ ಇದೇ ಮೊದಲ ಬಾರಿಗೆ ದಾಟಿದರು. ತಮ್ಮ ಎರಡನೇ ಯತ್ನದಲ್ಲಿ 88.05 ಮೀಟರ್ ದೂರ ಭರ್ಜಿ ಎಸೆದು ನೀರಜ್ ಪ್ರೇಕ್ಷಕರನ್ನು ರೋಮಾಂಚನಗೊಳಿಸಿದರು.

9 ಸೆಂಟಿಮೀಟರ್‌ಗಳ ವ್ಯತ್ಯಾಸ:

ನೀರಜ್ ಚೋಪ್ರಾ ಅವರ ಈ ಭರ್ಜರಿ ಪ್ರದರ್ಶನಕ್ಕೆ ಶ್ರೀಲಂಕಾದ ರುಮೇಶ್ ಪತಿರಾಗೆ ತಕ್ಷಣವೇ ಕೌಂಟರ್ ನೀಡಿದರು. ತಮ್ಮ ಮೂರನೇ ಯತ್ನದಲ್ಲಿ 88.14 ಮೀಟರ್ ದೂರಕ್ಕೆ ಭರ್ಜಿ ಎಸೆಯುವ ಮೂಲಕ ನೀರಜ್ ಚೋಪ್ರಾ ಅವರನ್ನು ಹಿಂದಿಕ್ಕಿ ಅಗ್ರಸ್ಥಾನವನ್ನು ಭದ್ರಪಡಿಸಿಕೊಂಡರು. ಇದು ಈ 2026 ರ ಸೀಸನ್‌ನಲ್ಲಿ ನೀರಜ್ ವಿರುದ್ಧ ಪತಿರಾಗೆ ಸಾಧಿಸಿದ ಸತತ ಮೂರನೇ ಜಯವಾಗಿದೆ (ದೋಹಾ ಡೈಮಂಡ್ ಲೀಗ್ ಮತ್ತು ಗ್ಲ್ಯಾಸ್ಗೋ ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲೂ ಪತಿರಾಗೆ ಗೆದ್ದಿದ್ದರು). ಆದರೆ ಈ ಬಾರಿ ಇಬ್ಬರ ನಡುವಣ ವ್ಯತ್ಯಾಸ ಕೇವಲ 9 ಸೆಂಟಿಮೀಟರ್‌ಗಳ ಮಾತ್ರ ಎಂಬುದು ವಿಶೇಷ.

ಅಂದರೆ ರುಮೇಶ್ ಪತಿರಾಗೆ 88.14 ಮೀಟರ್ ದೂರಕ್ಕೆ ಎಸೆದು ಅಗ್ರಸ್ಥಾನ ಪಡೆದರೆ, ನೀರಜ್ ಚೋಪ್ರಾ 88.05 ಮೀಟರ್ ದೂರದೊಂದಿಗೆ ದ್ವಿತೀಯ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು.

ಇದನ್ನೂ ಓದಿ: WTC ಫೈನಲ್​ಗೇರಲು ಪಾಕಿಸ್ತಾನ್ ತಂಡಕ್ಕೆ ಇದೆಯೇ ಅವಕಾಶ? ಇಲ್ಲಿದೆ ಲೆಕ್ಕಾಚಾರ!

ಇನ್ನು ಗ್ರೆನಡಾದ ಅಂಡರ್ಸನ್ ಪೀಟರ್ಸ್ 86.69 ಮೀಟರ್ ಎಸೆದು ತೃತೀಯ ಸ್ಥಾನ ಪಡೆದರೆ, ಟ್ರಿನಿಡಾಡ್ ಮತ್ತು ಟೊಬಾಗೋದ ಕೆಶಾರ್ನ್ ವಾಲ್ಕಾಟ್ (83.71 ಮೀಟರ್) ನಾಲ್ಕನೇ ಸ್ಥಾನ ಪಡೆದರು.

ಲೂಸೇನ್ ಡೈಮಂಡ್ ಲೀಗ್ ಫಲಿತಾಂಶಗಳು: