200 ಬಿಲಿಯನ್ ಡಾಲರ್ ಸಂಪತ್ತು ಹೊಂದಿದ ವಿಶ್ವದ ಮೊದಲ ವ್ಯಕ್ತಿ ಜೆಫ್ ಬಿಜೊಸ್

ಕೊವಿಡ್-19 ಸೋಂಕಿ ಇಡೀ ಪ್ರಪಂಚದ ಜನ ಮತ್ತು ಉದ್ಯಮಗಳನ್ನು ತತ್ತರಿಸುವಂತೆ ಮಾಡಿದ್ದರೆ, ಕುಬೇರರನ್ನು ಮತ್ತಷ್ಟು ಶ್ರೀಮಂತರನ್ನಾಗಿಸಿದೆ. ಇದು ವಿಚಿತ್ರವಾದರೂ ಸತ್ಯ ಸಂಗತಿ.

1995 ರಲ್ಲಿ ಅಮೆಜಾನ್ ಸಂಸ್ಥೆಯನ್ನು ಹುಟ್ಟುಹಾಕಿದ ಜೆಫ್ ಬಿಜೊಸ್ ಯಾರಿಗೆ ಗೊತ್ತಿಲ್ಲ. ಅಂದಹಾಗೆ ಈ ಮನುಷ್ಯನ ಸಂಪತ್ತು ಎಷ್ಡಿರಬಹುದೆಂದು ಅಂದಾಜಿಸಬಲ್ಲಿರಾ? 200 ಬಿಲಿಯನ್ ಡಾಲರ್​ಗಳು! ಒಂದು ಬಿಲಿಯನ್ ಡಾಲರ್​ಗಳನ್ನು ರುಪಾಯಿಗಳಲ್ಲಿ ಪರಿವರ್ತಿಸಿದರೆ ಅದು 7,500 ಕೋಟಿ ರುಪಾಯಿಗಳಾಗುತ್ತದೆ. 200 ಬಿಲಿಯನ್ ಡಾಲರ್​ಗಳೆಂದರೆ, 15 ಲಕ್ಷಕೋಟಿ ರುಪಾಯಿಗಳು!! ಇದು, ವಿಶ್ವದ ಆಗರ್ಭ ಶ್ರೀಮಂತರ ಸಂಪತ್ತನ್ನು ಪ್ರತಿದಿನದ ಗಳಿಕೆಯ ಆಧಾರದಲ್ಲಿ ಲೆಕ್ಕಾಚಾರಮಾಡಿ ನಿಖರವಾದ ಅಂಕಿಅಂಶಗಳನ್ನು ನೀಡುವ ಬ್ಲೂಮ್​ಬರ್ಗ್ ಬಿಲಿಯನ್ನೇರ್ಸ್ ಇಂಡೆಕ್ಸ್ ಬುಧವಾರದಂದು ಪ್ರಕಟಿಸಿರುವ ವರದಿ.ಅಂದಹಾಗೆ, ಬಿಜೊಸ್ ಮಾನವ ಇತಿಹಾಸದಲ್ಲೇ ಮೊಟ್ಟಮೊದಲ ಬಾರಿಗೆ 200 ಬಿಲಿಯನ್ ಡಾಲರ್​ಗಳಿಗೂ ಜಾಸ್ತಿ ಸಂಪತ್ತು ಹೊದಿರುವ ಮೊದಲ ವ್ಯಕ್ತಿ ಎನಿಸಿಕೊಡಿದ್ದಾರೆ. ಅವರ ಶ್ರೀಮಂತಿಕೆ ಕುರಿತು ಮತ್ತೂ ಸೋಜಿಗ ಹುಟ್ಟಿಸುವ ಸಂಗತಿಯೆಂದರೆ, ಇತ್ತೀಚಿಗೆ ಅವರಿಂದ ಡಿವೋರ್ಸ್ ಪಡೆದ ಅವರ ಹೆಂಡತಿ ಮೆಕಂಜಿ ಸ್ಕಾಟ್​ಗೆ ಅವರು ತಮ್ಮ ಸಂಪತ್ತಿನ ಶೇಕಡಾ 25ರಷ್ಟನ್ನು ಅವರು ಜೀವನಾಂಶ ರೂಪದಲ್ಲಿ ನೀಡಿದ್ದಾರೆ. ಅವರಿಂದ ಅಷ್ಟು ಸಂಪತ್ತು ಪಡೆದ ಸ್ಕಾಟ್ ಈಗ ವಿಶ್ವದ 14ನೇ ಅತಿ ಶ್ರೀಮಂತ ವ್ಯಕ್ತಿ ಹಾಗೂ ಎರಡನೇ ಅತಿ ಸಿರಿವಂತ ಮಹಿಳೆ. ಎಲ್’ಆರಿಯಲ್ ಸಂಸ್ಥೆಯ ಒಡತಿಯಾಗಿರುವ ಫ್ರಾಂಕಾಯಿಸ್ ಬಿಟೆನ್​ಕೋರ್ಟ್ಮೇಯರ್ಸ್ ಅವರ ಸಂಪತ್ತು, ಸ್ಕಾಟ್​ರ ಆಸ್ತಿಗಿಂತ ಕೊಂಚ ಜಾಸ್ತಿಯಿದೆ. ಪುರುಷರಲ್ಲಿ ವಿಶ್ವದ ಎರಡನೇ ಅತಿ ದೊಡ್ಡ ಕುಬೇರನಂದರೆ, ಮೈಕ್ರೊಸಾಫ್ಟ್​ನ ಮಾಲೀಕ ಬಿಲ್ ಗೇಟ್ಸ್. ಅವರು ಒಟ್ಟು ಸಂಪತ್ತು 124 ಬಿಲಿಯನ್ ಡಾಲರ್​ಗಳಷ್ಟಿದೆ. ಟೆಲ್ಸಾ ಐಎನ್​ಸಿ ಸಂಸ್ಥೆಯ ಇಲಾನ್ ಮಸ್ಕ್ ಸಹ ನೂರುಶತಕೋಟಿ ಡಾಲರ್​ಗಳಿಗಿಂತ ಹೆಚ್ಷು ಆಸ್ತಿ ಹೊಂದಿರುವ ವಿಶ್ವದ ನಾಲ್ಕನೇ ವ್ಯಕ್ತಿಯೆನಿಸಿಕೊಂಡಿದ್ದಾರೆ. ಈ ಗುಂಪಿಗೆ ಸೇರಿದ ಮತ್ತೊಬ್ಬ ವ್ಯಕ್ತಿಯಂದರೆ, ಫೇಸ್​ಬುಕ್​ನ ಮಾರ್ಕ್ ಜಕರ್​ಬರ್ಗ್.

ಆಗಲೇ ಹೇಳಿದಂತೆ ಕೊವಿಡ್ ಮತ್ತು ತತ್ಸಂಬಂಧದ ಲಾಕ್​ಡೌನ್​ಗಳ ಅವಧಿಯಲ್ಲಿ ಜಗತ್ತಿನಾದ್ಯಂತ ಉದ್ಯಮಗಳು ತೀವ್ರ ನಷ್ಟ ಅನುಭವಿಸಿದರೆ, ಈ ಕುಬೇರರ ಸಂಸ್ಥೆಗಳು ಮಾತ್ರ ವಹಿವಾಟು ಹಾಗೂ ಲಾಭಾಂಶವನ್ನು ಗಣನೀಯವಾಗಿ ಹೆಚ್ಚಿಸಿಕೊಂಡಿವೆ. ತಗ್ಗಿರುವ ಕಡೆಯೇ ನೀರು ಹರಿಯೋದು ಅಂತ ಹೇಳುತ್ತಾರಲ್ಲ, ಅದು ಅಕ್ಷರಶಃ ನಿಜ ಅನಿಸುತ್ತಿದೆ.