ನಿಂಗೆ ಸರಿಯಾಗಿ ಗೂಸಾ ಕೊಡ್ಬೇಕು ಅನ್ನಿಸುತ್ತಿದೆ -ಪತ್ನಿ ಬಗ್ಗೆ ಪ್ರಶ್ನಿಸಿದ್ದಕ್ಕೆ ಬ್ರೆಜಿಲ್​ ಅಧ್ಯಕ್ಷ ಗರಂ!

ಭ್ರಷ್ಟಾಚಾರದ ಹಗರಣ ಒಂದರಲ್ಲಿ ನಿಮ್ಮ ಪತ್ನಿ ಮಿಶೆಲ್​ ಬೋಲ್ಸನಾರೊ ಹೆಸರು ತಳುಕು ಹಾಕಿಕೊಂಡಿದೆ. ಈ ಬಗ್ಗೆ ನಿಮ್ಮ ಪ್ರತಿಕ್ರಿಯೆ ಏನು ಎಂದು ಪ್ರಶ್ನಿಸಿದ ಪತ್ರಕರ್ತರೊಬ್ಬನಿಗೆ ಬ್ರೆಜಿಲ್​ ಅಧ್ಯಕ್ಷ ಜೈರ್​ ಬೋಲ್ಸನಾರೊ ‘ಗೂಸಾ ಕೊಡುವುದಾಗಿ’ ಹೇಳಿರುವ ಸ್ವಾರಸ್ಯಕರ ಪ್ರಸಂಗ ನಿನ್ನೆ ನಡೆದಿದೆ.

ನಿನ್ನೆ ಭಾನುವಾರ ಬ್ರೆಜಿಲ್​ ಅಧ್ಯಕ್ಷ ಚರ್ಚ್​ಗೆ ಭೇಟಿ ಕೊಟ್ಟ ಬಳಿಕ ಪತ್ರಕರ್ತರ ಗುಂಪೊಂದು ಎಂದಿನಂತೆ ಬೋಲ್ಸನಾರೊರನ್ನು ಭೇಟಿಯಾಗಿದ್ದರಂತೆ. ಈ ವೇಳೆ ಸ್ಥಳೀಯ ಪತ್ರಕರ್ತ ಕೇಳಿದ ಈ ಪ್ರಶ್ನೆಗೆ ಕೆರಳಿದ ಅಧ್ಯಕ್ಷ ಬೋಲ್ಸನಾರೊ ನಿನ್ನ ಮುಖಕ್ಕೆ ಗೂಸಾ ಕೊಡಬೇಕೆಂದು ತುಂಬಾ ಆಸೆಯಾಗುತ್ತಿದೆ ಎಂದು ಹೇಳುತ್ತಾ ಅಲ್ಲಿಂದ ಹೊರಟುಹೋದರಂತೆ. ಅಧ್ಯಕ್ಷರ ಉದ್ಧಟತನದ ಮಾತಿಗೆ ಪತ್ರಕರ್ತರ ಗುಂಪು ಸಿಟ್ಟಾಗಿದೆ.  ಆದ್ರೂ ಕ್ಯಾರೇ ಅನ್ನದೇ ಅಧ್ಯಕ್ಷ ಮಹೋದಯ ಅಲ್ಲಿಂದ ಹೊರಟುಹೋದರಂತೆ.

ಅಧ್ಯಕ್ಷ ಜೈರ್​ ಬೋಲ್ಸನಾರೊರ ಹಿರಿಯ ಪುತ್ರ ಹಾಗೂ ಮಾಜಿ ಸಂಸದ ಫ್ಲಾವಿಯೋ ಬೋಲ್ಸನಾರೊರ ಆಪ್ತ ಸಹಾಯಕ ಫಾಬ್ರೀಜಿಯೋ ಕ್ವೇರೋಜ್​ ಎಂಬಾತನ ಹೆಸರು ದೊಡ್ಡ ಹಗರಣವೊಂದರಲ್ಲಿ ಕೇಳಿಬಂದಿದೆ.

ಇದಕ್ಕೆ ಸಂಬಂಧಿಸಿ ಅಲ್ಲಿನ ಪೊಲೀಸರು ಆತನನ್ನು ಬಂಧಿಸಿದ್ದರು. ಈ ನಡುವೆ ಕಳೆದ ತಿಂಗಳು ಬ್ರೆಜಿಲ್​ನ ಕೆಲ ಸುದ್ದಿವಾಹಿನಿಗಳು ಅಧ್ಯಕ್ಷ ಬೋಲ್ಸನಾರೊರ ಪತ್ನಿ ಮಿಶೆಲ್​ರ ಬ್ಯಾಂಕ್​ ಖಾತೆಗೆ ಫಾಬ್ರೀಜಿಯೋ ಸಾಕಷ್ಟು ಹಣವನ್ನು ಪಾವತಿಸಿದ್ದನು ಎಂದು ವರದಿ ಮಾಡಿದ್ದವು. ಆದ್ದರಿಂದ, ಈ ವಿಚಾರವಾಗಿ ಯಾರಾದರೂ ಪ್ರಶ್ನಿಸಿದರೆ ಅಧ್ಯಕ್ಷರಿಗೆ ಸಿಕ್ಕಾಪಟ್ಟೆ ಕೋಪಬರುತ್ತದ್ದಂತೆ!

Published On - 12:52 pm, Mon, 24 August 20