ನೀವು ನಮ್ಮ ಸೇತುವೆ ಕೆಡವಿದ್ರಾ? ನಾವು ಈ 8 ಸೇತುವೆಗಳನ್ನು ಹೇಗೆ ಕೆಡಗ್ತೀವಿ ನೋಡಿ, ಇರಾನ್ ಸವಾಲು
ಅಮೆರಿಕದ ಕರಾಜ್ ಸೇತುವೆ ದಾಳಿಗೆ ಪ್ರತಿಕ್ರಿಯೆಯಾಗಿ, ಇರಾನ್ ಎಂಟು ಗಲ್ಫ್ ಸೇತುವೆಗಳನ್ನು ಗುರಿಯಾಗಿಸುವುದಾಗಿ ಬೆದರಿಕೆ ಹಾಕಿದೆ. ಕುವೈತ್, ಯುಎಇ ಮತ್ತು ಜೋರ್ಡಾನ್ನಲ್ಲಿರುವ ಪ್ರಮುಖ ಸೇತುವೆಗಳು ಈ ಪಟ್ಟಿಯಲ್ಲಿವೆ. ಕರಾಜ್ ದಾಳಿಯಿಂದ ಎಂಟು ನಾಗರಿಕರು ಸಾವನ್ನಪ್ಪಿ 95 ಮಂದಿ ಗಾಯಗೊಂಡಿದ್ದರು. ಈ ಬೆಳವಣಿಗೆ ಮಧ್ಯಪ್ರಾಚ್ಯದಲ್ಲಿ ಯುದ್ಧದ ವ್ಯಾಪ್ತಿಯನ್ನು ಹೆಚ್ಚಿಸುವ ಸಾಧ್ಯತೆಯಿದೆ.
Updated on: Apr 03, 2026 | 12:09 PM
ಟೆಹ್ರಾನ್, ಏಪ್ರಿಲ್ 03: ಇರಾನಿನ ಕರಾಜ್ ಸೇತುವೆ(Bridge)ಯ ಮೇಲೆ ದಾಳಿ ಮಾಡುವ ಮೂಲಕ ಅಮೆರಿಕವು ಗಲ್ಫ್ ಮಿತ್ರ ರಾಷ್ಟ್ರಗಳ ಮೇಲೆ ಮತ್ತಷ್ಟು ಹೊರೆಯನ್ನು ಹೆಚ್ಚಿಸಿದೆ. ಮಧ್ಯಪ್ರಾಚ್ಯದ ಅತಿ ಎತ್ತರದ ಸೇತುವೆ ಎಂದು ಪರಿಗಣಿಸಲಾದ ಕರಾಜ್ ಸೇತುವೆಯ ಮೇಲಿನ ದಾಳಿಯ ನಂತರ, ದಿಗ್ಭ್ರಮೆಗೊಂಡ ಇರಾನ್ ವಿವಿಧ ಗಲ್ಫ್ ದೇಶಗಳಲ್ಲಿರುವ ಎಂಟು ಹೊಸ ಸೇತುವೆಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದೆ.ಇರಾನ್ ಈಗ ಈ ಎಂಟು ಸೇತುವೆಗಳನ್ನು ಗುರಿಯಾಗಿಸುವುದಾಗಿ ಹೇಳಿಕೊಂಡಿದೆ.
ಕರಾಜ್ ಬಳಿಯ ಪ್ರಮುಖ ಸೇತುವೆಯ ಮೇಲೆ ಮಾರಕ ವಾಯುದಾಳಿ ನಡೆದ ಕೆಲವೇ ಗಂಟೆಗಳ ನಂತರ ಈ ಕ್ರಮ ಕೈಗೊಳ್ಳಲಾಗಿದೆ. ಕನಿಷ್ಠ ಎಂಟು ನಾಗರಿಕರು ಸಾವನ್ನಪ್ಪಿದರು ಮತ್ತು 95 ಜನರು ಗಾಯಗೊಂಡಿದ್ದಾರೆ. ಯುದ್ಧ ಪ್ರಾರಂಭವಾದ ನಂತರ ಸಾರ್ವಜನಿಕ ಮೂಲಸೌಕರ್ಯಗಳ ಮೇಲೆ ದಾಳಿ ನಡೆದಿರುವುದು ಇದೇ ಮೊದಲು. ಅಲ್ಬೋರ್ಜ್ ಪ್ರಾಂತ್ಯದ ಕರಾಜ್ಗೆ ಟೆಹ್ರಾನ್ ಅನ್ನು ಸಂಪರ್ಕಿಸುವ ಬಿ1 ಸೇತುವೆ ದಾಳಿಯ ಗುರಿಯಾಗಿತ್ತು.
ಇರಾನಿನ ಮಾಧ್ಯಮಗಳು ಮುಂದೆ ಗುರಿಯಾಗಿಸಬಹುದಾದ ಸೇತುವೆಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದವು. ಇದರಲ್ಲಿ ಕುವೈತ್ನ 36 ಕಿಲೋಮೀಟರ್ ಉದ್ದದ ಶೇಖ್ ಜಾಬರ್ ಅಲ್ ಅಹ್ಮದ್ ಅಲ್ ಸಬಾ ಸೇತುವೆಯೂ ಸೇರಿದೆ.
ಯುಎಇಯಲ್ಲಿರುವ ಅಬುಧಾಬಿಯ ಮೂರು ಪ್ರಮುಖ ಸೇತುವೆಗಳಾದ ಶೇಖ್ ಜಾಯೆದ್, ಅಲ್ ಮಕ್ತಾ ಮತ್ತು ಶೇಖ್ ಖಲೀಫಾ ಸೇತುವೆಗಳು ಸಹ ಪಟ್ಟಿಯಲ್ಲಿದ್ದು, ದ್ವೀಪವನ್ನು ಮುಖ್ಯ ಭೂಭಾಗಕ್ಕೆ ಸಂಪರ್ಕಿಸುತ್ತವೆ.
ಮತ್ತಷ್ಟು ಓದಿ: Video: ಇರಾನ್ ಮೇಲೆ ಅಮೆರಿಕ-ಇಸ್ರೇಲ್ ದಾಳಿ, ಪ್ರಮುಖ ಸೇತುವೆ ಧ್ವಂಸ
ಜೋರ್ಡಾನ್ನಲ್ಲಿರುವ ಕಿಂಗ್ ಹುಸೇನ್ ಸೇತುವೆ (ಅಲೆನ್ಬಿ ಸೇತುವೆ), ಡಾಮಿಯಾ ಸೇತುವೆ ಮತ್ತು ಅಬ್ದೌನ್ ಸೇತುವೆಗಳು ಸಹ ಈ ಪಟ್ಟಿಯಲ್ಲಿ ಸೇರಿವೆ. ಜೋರ್ಡಾನ್ ಮತ್ತು ಪಶ್ಚಿಮ ದಂಡೆಯ ನಡುವಿನ ಸಂಚಾರಕ್ಕೆ ಮತ್ತು ಅಮ್ಮನ್ ನಗರದ ಸಂಚಾರಕ್ಕೆ ಈ ಸೇತುವೆಗಳು ಅತ್ಯಗತ್ಯ.
ಈ ಸೇತುವೆಗಳ ಮೇಲಿನ ಯಾವುದೇ ದಾಳಿಗಳನ್ನು ಇನ್ನೂ ಅಧಿಕೃತವಾಗಿ ಘೋಷಿಸಲಾಗಿಲ್ಲವಾದರೂ, ಯುದ್ಧದ ವ್ಯಾಪ್ತಿ ಹೆಚ್ಚಾಗಬಹುದು ಎಂದು ಈ ಪಟ್ಟಿಯು ಸ್ಪಷ್ಟವಾಗಿ ಸೂಚಿಸುತ್ತದೆ. ಗಲ್ಫ್ ರಾಷ್ಟ್ರಗಳು ಇರಾನಿನ ದಾಳಿಯನ್ನು ಈ ಹಿಂದೆ ಖಂಡಿಸಿದ್ದರೂ, ಇನ್ನೂ ಔಪಚಾರಿಕವಾಗಿ ಪ್ರತಿಕ್ರಿಯಿಸಿಲ್ಲ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
