ಟ್ರಂಪ್ ಸಹಿಗೆ ಅಮೆರಿಕ ಸಂಸತ್ ಅಸ್ತು: ಭಾರತ, ಚೀನಾ ಆಮದು ಮೇಲೆ ನೂರಕ್ಕೆ ನೂರು ಸುಂಕ ವಿಧಿಸೋ ಅಧಿಕಾರ

ವಾಷಿಂಗ್ಟನ್, ಸೆಪ್ಟೆಂಬರ್ 17: ಉಕ್ರೇನ್ ವಿರುದ್ಧದ ಯುದ್ಧದಲ್ಲಿ ರಷ್ಯಾದ ಆರ್ಥಿಕ ಮೂಲಗಳನ್ನು ಸಂಪೂರ್ಣವಾಗಿ ಹತ್ತಿಕ್ಕುವ ಉದ್ದೇಶದಿಂದ ಅಮೆರಿಕ ಕಾಂಗ್ರೆಸ್ ಅತ್ಯಂತ ಕಠಿಣ ಹಾಗೂ ಸಮಗ್ರ ನಿರ್ಬಂಧಗಳ ಮಸೂದೆಯನ್ನು ಬುಧವಾರ ಅಂತಿಮವಾಗಿ ಅಂಗೀಕರಿಸಿದೆ. ರಿಪಬ್ಲಿಕನ್ ಪ್ರಾಬಲ್ಯದ ಯುಎಸ್ ಪ್ರತಿನಿಧಿ ಸಭೆಯು (ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್) 262-159 ಮತಗಳ ಅಂತರದಿಂದ ಈ ಮಸೂದೆಗೆ ಒಪ್ಪಿಗೆ ಸೂಚಿಸಿದ್ದು, ಶಾಸನಕ್ಕೆ ಅಂಕಿತ ಹಾಕಲು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಬಳಿಗೆ ಕಳುಹಿಸಲಾಗಿದೆ. ಈ ಕಾಯ್ದೆಯ ಅನ್ವಯ ರಷ್ಯಾದಿಂದ ಕಚ್ಚಾ ತೈಲ ಮತ್ತು ಅನಿಲ ಖರೀದಿಸುವ ಭಾರತ ಹಾಗೂ ಚೀನಾದಂತಹ ರಾಷ್ಟ್ರಗಳ ಉತ್ಪನ್ನಗಳ ಮೇಲೆ ಬರೋಬ್ಬರಿ ಶೇಕಡಾ 100 ರಷ್ಟು ಆಮದು ಸುಂಕ ವಿಧಿಸುವ ಅಪಾರ ಪರಮಾಧಿಕಾರ ಟ್ರಂಪ್ ಅವರಿಗೆ ಸಿಗಲಿದೆ.

ಉಭಯ ಸದನಗಳಲ್ಲಿ ಅನುಮೋದನೆ: ಕಳೆದ ತಿಂಗಳು ಸೆನೆಟ್‌ನಲ್ಲಿ 86-11 ಮತಗಳಿಂದ ಅಂಗೀಕಾರವಾಗಿದ್ದ ಈ ಮಸೂದೆಗೆ ಈಗ ಕೆಳಮನೆಯಲ್ಲೂ ಹಸಿರು ನಿಶಾನೆ ಸಿಕ್ಕಿದೆ. ಅಧ್ಯಕ್ಷ ಟ್ರಂಪ್ ಶೀಘ್ರದಲ್ಲೇ ಇದಕ್ಕೆ ಸಹಿ ಹಾಕಿ ಕಾನೂನಾಗಿ ಜಾರಿಗೊಳಿಸುವುದಾಗಿ ತಿಳಿಸಿದ್ದಾರೆ. ರಷ್ಯಾದ ಇಂಧನ, ರಕ್ಷಣಾ ವಲಯ, ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಸೇರಿದಂತೆ ಉನ್ನತ ಅಧಿಕಾರಿಗಳು ಹಾಗೂ ನಿರ್ಬಂಧಗಳಿಂದ ತಪ್ಪಿಸಿಕೊಳ್ಳಲು ರಷ್ಯಾ ಬಳಸುತ್ತಿದ್ದ ‘ನೆರಳು ತೈಲ ಟ್ಯಾಂಕರ್‌ಗಳ’ ಮೇಲೆ ಇದು ನೇರ ಕಠಿಣ ನಿರ್ಬಂಧಗಳನ್ನು ಹೇರುತ್ತದೆ. ಜೊತೆಗೆ ಇರಾನ್ ಮೇಲಿನ ನಿರ್ಬಂಧಗಳನ್ನೂ ವಿಸ್ತರಿಸಿದೆ.

ದ್ವಿತೀಯ ಸುಂಕ: ಮಾಸ್ಕೋಗೆ ಹರಿದುಬರುವ ತೈಲ ಆದಾಯವನ್ನು ತಡೆಯಲು, ರಷ್ಯಾದಿಂದ ಇಂಧನ ಖರೀದಿಸುವ ದೇಶಗಳ ಮೇಲೆ ಶೇ.100 ರಷ್ಟು ದಂಡನಾತ್ಮಕ ಆಮದು ಸುಂಕ ವಿಧಿಸುವ ವಿವೇಚನಾಧಿಕಾರವನ್ನು ಶ್ವೇತಭವನಕ್ಕೆ ನೀಡಲಾಗಿದೆ.

ಡೆಮೋಕ್ರಾಟ್‌ಗಳಲ್ಲಿ ಭಿನ್ನಾಭಿಪ್ರಾಯ: ಉಕ್ರೇನ್‌ಗೆ ಬೆಂಬಲ ನೀಡುವ ವಿಚಾರದಲ್ಲಿ ಎಲ್ಲರೂ ಒಗ್ಗಟ್ಟಾಗಿದ್ದರೂ, ವ್ಯಾಪಾರ ಮತ್ತು ಸುಂಕಗಳ ಮೇಲೆ ಅಧ್ಯಕ್ಷ ಟ್ರಂಪ್‌ಗೆ ಇಷ್ಟೊಂದು ವ್ಯಾಪಕ ಏಕಪಕ್ಷೀಯ ಅಧಿಕಾರ ನೀಡುವುದನ್ನು ಹೌಸ್ ವಿದೇಶಾಂಗ ಸಮಿತಿಯ ಉನ್ನತ ಡೆಮೋಕ್ರಾಟ್ ನಾಯಕ ಗ್ರೆಗೊರಿ ಮೀಕ್ಸ್ ಸೇರಿದಂತೆ ಹಲವರು ವಿರೋಧಿಸಿದ್ದಾರೆ. ಆದಾಗ್ಯೂ ಹಲವು ಡೆಮೋಕ್ರಾಟ್‌ಗಳು ಮಸೂದೆಯ ಪರವಾಗಿ ಮತ ಚಲಾಯಿಸಿದ್ದಾರೆ.

ಮತ್ತಷ್ಟು ಓದಿ: ಉಕ್ರೇನ್ ಮೇಲೆ ರಷ್ಯಾದಿಂದ ಭೀಕರ ದಾಳಿ; ಕೈವ್​​ನಲ್ಲಿ 37 ಜನ ಸಾವು

ಭಾರತದ ಮೇಲಿನ ಪ್ರಭಾವ ಮತ್ತು ಭಾರತದ ನಿಲುವು: ರಷ್ಯಾದಿಂದ ರಿಯಾಯಿತಿ ದರದಲ್ಲಿ ಅಪಾರ ಪ್ರಮಾಣದ ಕಚ್ಚಾ ತೈಲವನ್ನು ಆಮದು ಮಾಡಿಕೊಳ್ಳುತ್ತಿರುವ ಭಾರತಕ್ಕೆ ಇದು ಕಳವಳಕಾರಿ ವಿಚಾರವಾಗಿದೆ. ಆದಾಗ್ಯೂ, ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಬೆಲೆ ನಿಯಂತ್ರಣ ಕಾಯ್ದುಕೊಳ್ಳಲು ಮತ್ತು ತನ್ನ 140 ಕೋಟಿ ನಾಗರಿಕರ ಇಂಧನ ಭದ್ರತೆ ಕಾಪಾಡಲು ತನ್ನ ತೈಲ ಆಮದು ನೀತಿ ಸ್ವತಂತ್ರವಾಗಿದೆ ಎಂದು ಭಾರತೀಯ ವಿದೇಶಾಂಗ ಸಚಿವಾಲಯ ಈ ಹಿಂದೆಯೇ ಸ್ಪಷ್ಟಪಡಿಸಿದೆ. ಟ್ರಂಪ್‌ಗೆ ಸುಂಕ ವಿಧಿಸುವ ಅಧಿಕಾರ ಸಿಕ್ಕಿದೆಯಾದರೂ, ಭಾರತದಂತಹ ಪ್ರಮುಖ ಕಾರ್ಯತಂತ್ರದ ಪಾಲುದಾರ ದೇಶದ ಮೇಲೆ ನೇರವಾಗಿ ಶೇ.100ರಷ್ಟು ತೆರಿಗೆ ವಿಧಿಸುತ್ತಾರೆಯೇ ಅಥವಾ ರಾಜತಾಂತ್ರಿಕ ಸಂಧಾನದ ಅಸ್ತ್ರವಾಗಿ ಬಳಸುತ್ತಾರೆಯೇ ಎಂಬುದು ಕುತೂಹಲ ಮೂಡಿಸಿದೆ.

ಉಕ್ರೇನ್ ನಿರಾಳ: ರಷ್ಯಾ ಪ್ರತಿ ತಿಂಗಳು 30 ಸಾವಿರ ಸೈನಿಕರನ್ನು ಕಳೆದುಕೊಳ್ಳುತ್ತಿದ್ದರೂ ಯುದ್ಧ ನಿಲ್ಲಿಸುತ್ತಿಲ್ಲ, ಮಾಸ್ಕೋವನ್ನು ಮಾತುಕತೆಯ ಮೇಜಿಗೆ ತರಲು ಕಠಿಣ ಆರ್ಥಿಕ ದಿಗ್ಬಂಧನವೇ ಏಕೈಕ ದಾರಿ ಎಂದು ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಈ ನಿರ್ಧಾರವನ್ನು ಸ್ವಾಗತಿಸಿದ್ದಾರೆ. ನವೆಂಬರ್‌ನಲ್ಲಿ ನಡೆಯಲಿರುವ ಅಮೆರಿಕದ ಮಧ್ಯಂತರ ಚುನಾವಣೆಗಳ ಪ್ರಚಾರಕ್ಕೆ ಶಾಸಕರು ತೆರಳುವ ಮುನ್ನವೇ ಈ ಮಹತ್ವದ ಮಸೂದೆಯನ್ನು ಅಂಗೀಕರಿಸಿರುವುದು ಜಾಗತಿಕ ರಾಜಕೀಯದಲ್ಲಿ ಅಮೆರಿಕದ ನಿಲುವನ್ನು ಮತ್ತೊಮ್ಮೆ ಗಟ್ಟಿಯಾಗಿ ಸಾಬೀತುಪಡಿಸಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 7:29 am, Thu, 17 September 26