ಭಾರತಕ್ಕೆ ಶೇ.100ರಷ್ಟು ಸುಂಕದ ಬೆದರಿಕೆ, ತನಗೆ ಬೇಕಾದಾಗ ಯುರೇನಿಯಂ ಖರೀದಿಗಿಲ್ಲ ನಿರ್ಬಂಧ, ಅಮೆರಿಕದ ಇಬ್ಬಗೆ ನೀತಿ ಜಗಜ್ಜಾಹೀರು

ವಾಷಿಂಗ್ಟನ್, ಸೆಪ್ಟೆಂಬರ್ 18: ರಷ್ಯಾದಿಂದ ಕಚ್ಚಾ ತೈಲ ಮತ್ತು ಅನಿಲ ಖರೀದಿಸುತ್ತಿರುವ ಭಾರತ ಹಾಗೂ ಚೀನಾದಂತಹ ದೇಶಗಳ ಮೇಲೆ ಶೇ. 100 ರಷ್ಟು ಆಮದು ಸುಂಕ ವಿಧಿಸಲು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ಗೆ ಅಧಿಕಾರ ನೀಡುವ ಕಠಿಣ ಮಸೂದೆಯನ್ನು ಅಮೆರಿಕ ಕಾಂಗ್ರೆಸ್ ಅಂಗೀಕರಿಸಿದೆ. ಆದರೆ, ಪ್ರಪಂಚದ ಇತರ ರಾಷ್ಟ್ರಗಳಿಗೆ ಕಠಿಣ ನಿರ್ಬಂಧ ವಿಧಿಸಲು ಮುಂದಾಗಿರುವ ಇದೇ ಅಮೆರಿಕ, ತನ್ನ ನಾಗರಿಕ ಪರಮಾಣು ರಿಯಾಕ್ಟರ್‌ಗಳ ಅಗತ್ಯಕ್ಕಾಗಿ ರಷ್ಯಾದಿಂದ ಯುರೇನಿಯಂ ಆಮದು ಮಾಡಿಕೊಳ್ಳುವುದನ್ನು ಮುಂದುವರೆಸಲು ಮಸೂದೆಯಲ್ಲಿ ಗೌಪ್ಯ ವಿನಾಯಿತಿಗಳನ್ನು ಕಾಯ್ದಿರಿಸಿಕೊಂಡಿರುವುದು ಅದರ ಇಬ್ಬಗೆಯ ನಿಲುವನ್ನು ಬಯಲು ಮಾಡಿದೆ.

ಯುಎಸ್ ಸಂಸತ್ತು ಅಂಗೀಕರಿಸಿರುವ ‘ಲಿಂಡ್ಸೆ ಒ. ಗ್ರಹಾಂ ರಷ್ಯಾ ಮತ್ತು ಇರಾನ್ ನಿರ್ಬಂಧ ಕಾಯ್ದೆ 2026’ ರ ಸೆಕ್ಷನ್ 111 ರಷ್ಯಾದ ರೊಸಾಟಮ್ ಸಂಸ್ಥೆಯ ಯುರೇನಿಯಂ ಆಮದನ್ನು ನಿಯಂತ್ರಿಸುತ್ತದೆ ಎಂದು ಹೇಳಿದರೂ, ಸೆಕ್ಷನ್ 114 ರ ಅಡಿಯಲ್ಲಿ ಅಮೆರಿಕ-ರಷ್ಯಾ ನಾಗರಿಕ ಪರಮಾಣು ಒಪ್ಪಂದ ಮತ್ತು ವೈದ್ಯಕೀಯ ಐಸೊಟೋಪ್‌ಗಳ ಜೊತೆಗೆ ರಿಯಾಕ್ಟರ್‌ಗಳಿಗೆ ಬೇಕಾಗುವ ಕಡಿಮೆ-ಪುಷ್ಟೀಕರಿಸಿದ ಯುರೇನಿಯಂಗೆ (LEU) ವಿನಾಯಿತಿ ನೀಡಲಾಗಿದೆ.

ಅಮೆರಿಕಕ್ಕೆ ರಷ್ಯಾದ ಯುರೇನಿಯಂ ಏಕೆ ಅನಿವಾರ್ಯ?: 2025ರ ಅಂಕಿಅಂಶಗಳ ಪ್ರಕಾರ, ಯುಎಸ್ ನಾಗರಿಕ ಪರಮಾಣು ವಿದ್ಯುತ್ ಸ್ಥಾವರಗಳು ಬಳಸಿದ ಒಟ್ಟು ಯುರೇನಿಯಂ ಪುಷ್ಟೀಕರಣ ಸೇವೆಗಳಲ್ಲಿ ಸುಮಾರು ಶೇಕಡಾ 26 ರಷ್ಟು ಕೇವಲ ರಷ್ಯಾದಿಂದಲೇ ಸರಬರಾಜಾಗಿದೆ. ಅಮೆರಿಕದ ಸ್ವಂತ ಪುಷ್ಟೀಕರಣ ಸಾಮರ್ಥ್ಯ ಕೇವಲ ಶೇ. 23 ರಷ್ಟಿದೆ.

ದ್ವಿಮುಖ ನೀತಿಗೆ ಆಕ್ಷೇಪ: ಭಾರತ ಮತ್ತು ಚೀನಾ ತನ್ನ ನಾಗರಿಕರ ಇಂಧನ ಭದ್ರತೆಗಾಗಿ ರಷ್ಯಾದಿಂದ ತೈಲ ಖರೀದಿಸಿದರೆ ಅದನ್ನು ಉಕ್ರೇನ್ ಯುದ್ಧಕ್ಕೆ ನೆರವು ಎಂದು ದಂಡಿಸಲು ಹೊರಟಿರುವ ಅಮೆರಿಕ, ತನ್ನ ವಿದ್ಯುತ್ ಗ್ರಿಡ್‌ಗಳು ಸ್ಥಗಿತಗೊಳ್ಳಬಾರದು ಎಂಬ ಕಾರಣಕ್ಕೆ ರಷ್ಯಾದಿಂದ ಪರಮಾಣು ಇಂಧನ ಪಡೆಯುತ್ತಿರುವುದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.

ಮತ್ತಷ್ಟು ಓದಿ: ಟ್ರಂಪ್ ಕೈಗೆ ಸುಂಕದ ಚಾವಟಿ: ರಷ್ಯಾ-ಭಾರತ ಇಂಧನ ವ್ಯಾಪಾರದ ಮೇಲೆ ಅಮೆರಿಕ ಸಂಸತ್ತಿನ ಕಣ್ಣು

ಮಸೂದೆಗೆ ಟ್ರಂಪ್ ಅಂಕಿತ ಬಾಕಿ: ಪ್ರತಿನಿಧಿ ಸಭೆಯಲ್ಲಿ262-159೯ ಮತಗಳಿಂದ ಮತ್ತು ಸೆನೆಟ್‌ನಲ್ಲಿ 86-11 ಮತಗಳ ಭಾರಿ ಅಂತರದಿಂದ ಅಂಗೀಕಾರಗೊಂಡಿರುವ ಈ ಮಸೂದೆ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಸಹಿಗೆ ರವಾನೆಯಾಗಿದ್ದು, ಶೀಘ್ರದಲ್ಲೇ ಜಾರಿಗೆ ಬರಲಿದೆ.

2028 ರವರೆಗಿನ ವಿನಾಯಿತಿ ಹಿನ್ನೆಲೆ: ಯುಎಸ್ ಈ ಹಿಂದೆ ಮೇ 2024 ರಲ್ಲಿ ರಷ್ಯಾದ ಯುರೇನಿಯಂ ಆಮದನ್ನು ಸಂಪೂರ್ಣ ನಿಷೇಧಿಸುವ ಕಾನೂನು ತಂದಿತ್ತಾದರೂ, ದೇಶೀಯ ಪರ್ಯಾಯ ಪೂರೈಕೆ ಕೊರತೆಯಿಂದಾಗಿ ಅಲ್ಲಿನ ವಿದ್ಯುತ್ ಕಂಪನಿಗಳಿಗೆ ಜನವರಿ 1, 2028 ರವರೆಗೆ ವಿನಾಯಿತಿ ನೀಡುವ ಷರತ್ತನ್ನು ಸೇರಿಸಿತ್ತು. ಅಲ್ಲದೆ, ಸ್ವಾವಲಂಬನೆ ಸಾಧಿಸಲು 2.72 ಶತಕೋಟಿ ಡಾಲರ್ ಅನುದಾನ ಮೀಸಲಿಟ್ಟಿದ್ದರೂ ತಕ್ಷಣಕ್ಕೆ ರಷ್ಯಾವನ್ನು ಸಂಪೂರ್ಣವಾಗಿ ಕೈಬಿಡಲು ಸಾಧ್ಯವಾಗಿಲ್ಲ.

ಜಾಗತಿಕ ಯುರೇನಿಯಂ ಪುಷ್ಟೀಕರಣ ಮಾರುಕಟ್ಟೆ: ರಷ್ಯಾ ವಿಶ್ವದ ಅತ್ಯಂತ ದೊಡ್ಡ ವಾಣಿಜ್ಯ ಯುರೇನಿಯಂ ಪುಷ್ಟೀಕರಣ ಮೂಲಸೌಕರ್ಯವನ್ನು ಹೊಂದಿದೆ. ಕಚ್ಚಾ ತೈಲವನ್ನು ಬೇರೆ ದೇಶಗಳಿಂದ ಸುಲಭವಾಗಿ ಬದಲಾಯಿಸಬಹುದಾದರೂ, ಪರಮಾಣು ರಿಯಾಕ್ಟರ್‌ಗಳಿಗೆ ಬೇಕಾದ ಪುಷ್ಟೀಕರಿಸಿದ ಇಂಧನವನ್ನು ತಕ್ಷಣಕ್ಕೆ ಬೇರೆಡೆಯಿಂದ ಸರಬರಾಜು ಮಾಡುವುದು ತಾಂತ್ರಿಕವಾಗಿ ಅತ್ಯಂತ ಜಟಿಲವಾಗಿದೆ.

ಭಾರತದ ಪಾಲಿಗೆ ಬಲವಾದ ರಾಜತಾಂತ್ರಿಕ ಅಸ್ತ್ರ: ಅಮೆರಿಕವು ರಷ್ಯಾ ತೈಲ ಖರೀದಿಯ ವಿಚಾರದಲ್ಲಿ ಭಾರತಕ್ಕೆ ಶೇ.100 ಸುಂಕದ ಎಚ್ಚರಿಕೆ ನೀಡುತ್ತಿರುವ ಈ ಸಂದರ್ಭದಲ್ಲಿ, ಅಮೆರಿಕ ಸ್ವತಃ ರಷ್ಯಾದಿಂದ ಬಿಲಿಯನ್ ಡಾಲರ್ ಮೌಲ್ಯದ ಯುರೇನಿಯಂ ಆಮದು ಮಾಡಿಕೊಳ್ಳುತ್ತಿರುವ ಈ ವಿಚಾರವು ಭಾರತದ ವಿದೇಶಾಂಗ ಸಚಿವಾಲಯಕ್ಕೆ ಜಾಗತಿಕ ವೇದಿಕೆಯಲ್ಲಿ ಅಮೆರಿಕದ ಒತ್ತಡವನ್ನು ಸಮರ್ಥವಾಗಿ ಎದುರಿಸಲು ಬಲವಾದ ಅಸ್ತ್ರವಾಗಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ