ಹಾರ್ಮುಜ್ ಜಲಸಂಧಿ ಬಳಿ ಅಮೆರಿಕ-ಇರಾನ್ ಭೀಕರ ಕದನ: ಯುಎಸ್ ನೆಲೆಗಳ ಮೇಲೆ ಕ್ಷಿಪಣಿ ದಾಳಿ, ಇರಾನ್‌ನಲ್ಲಿ ಏನೂ ಉಳಿಯಲ್ಲ ಎಂದ ಟ್ರಂಪ್

ಟೆಹ್ರಾನ್, ಸೆಪ್ಟೆಂಬರ್ 2: ಕಾರ್ಯತಂತ್ರದ ದೃಷ್ಟಿಯಿಂದ ಅತ್ಯಂತ ಸೂಕ್ಷ್ಮವಾಗಿರುವ ಹಾರ್ಮುಜ್ ಜಲಸಂಧಿ (Strait of Hormuz) ಬಳಿ ಅಮೆರಿಕ ಸೇನೆ ನಡೆಸಿದ ಹೊಸ ಸರಣಿ ವಾಯುದಾಳಿಗಳಲ್ಲಿ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್‌ನ ನೆಲೆಗಳು ಧ್ವಂಸಗೊಂಡ ಬೆನ್ನಲ್ಲೇ, ಮಧ್ಯಪ್ರಾಚ್ಯದಲ್ಲಿ ಅಮೆರಿಕದ ಮಿಲಿಟರಿ ನೆಲೆಗಳನ್ನು ಗುರಿಯಾಗಿಸಿಕೊಂಡು ಇರಾನ್ ವ್ಯಾಪಕ ಬ್ಯಾಲಿಸ್ಟಿಕ್ ಕ್ಷಿಪಣಿ ಮತ್ತು ಡ್ರೋನ್ ಪ್ರತಿದಾಳಿ ಆರಂಭಿಸಿದೆ.

ಇರಾನ್‌ನ ಈ ಪ್ರತೀಕಾರದ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಇರಾನ್ ಮತ್ತೆ ಮುಟ್ಟಿದರೆ ಹಿಂದೆಂದೂ ಕಾಣದ ಅತಿ ಭೀಕರ ಹೊಡೆತ ತಿನ್ನಲಿದೆ, ಆ ದಾಳಿಯ ನಂತರ ಇರಾನ್‌ನಲ್ಲಿ ಏನೂ ಉಳಿಯುವುದಿಲ್ಲ ಎಂದು ಖಡಕ್ ಎಚ್ಚರಿಕೆ ನೀಡಿದ್ದಾರೆ.

ಜೋರ್ಡಾನ್ ಮೇಲೆ ಕ್ಷಿಪಣಿ ದಾಳಿ: ಜೋರ್ಡಾನ್‌ನಲ್ಲಿರುವ ಯುಎಸ್ ಮಿಲಿಟರಿ ನೆಲೆಗಳನ್ನು (ಕ್ಯಾಂಪ್ ಟಿಟಿನ್, ಅಲ್ ಅಜ್ರಾಕ್) ಗುರಿಯಾಗಿಸಿ ಇರಾನ್ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಉಡಾಯಿಸಿದೆ. ಜೋರ್ಡಾನ್ ಸೇನೆಯು ತನ್ನ ವಾಯುಪ್ರದೇಶಕ್ಕೆ ನುಗ್ಗಿದ 13 ಕ್ಷಿಪಣಿಗಳಲ್ಲಿ 10 ಕ್ಷಿಪಣಿಗಳನ್ನು ಆಕಾಶದಲ್ಲೇ ಹೊಡೆದುರುಳಿಸಿದ್ದು, ೩ ಕ್ಷಿಪಣಿಗಳು ದೂರದ ನಿರ್ಜನ ಪ್ರದೇಶಗಳಲ್ಲಿ ಬಿದ್ದಿವೆ.

ಮತ್ತಷ್ಟು ಓದಿ: ಇರಾನ್-ಅಮೆರಿಕ ನೀ ಕೊಡೆ ನಾ ಬಿಡೆ ಜಗ್ಗಾಟ; ಹಾರ್ಮುಜ್ ಜಲಸಂಧಿ ಅಮೆರಿಕದ ಭೂಭಾಗ ಎಂದು ಟ್ರಂಪ್ ಘೋಷಣೆ

ಬಹ್ರೇನ್ ಹಾಗೂ ಕುವೈತ್‌ನಲ್ಲಿ ಡ್ರೋನ್ ಹಾವಳಿ: ಬಹ್ರೇನ್‌ನಲ್ಲಿರುವ ಯುಎಸ್ ನೌಕಾಪಡೆ ನೆಲೆ ಮತ್ತು ಕುವೈತ್‌ನ ಗಡಿ ಭಾಗಗಳಲ್ಲಿ ಶಂಕಿತ ಇರಾನಿಯನ್ ಡ್ರೋನ್‌ಗಳು ಪತ್ತೆಯಾಗಿದ್ದು, ವಾಯು ರಕ್ಷಣಾ ವ್ಯವಸ್ಥೆಗಳು ಪ್ರತಿದಾಳಿ ನಡೆಸಿವೆ.

ಕೆಶ್ಮ್ ಮತ್ತು ಲಾರಕ್ ದ್ವೀಪಗಳ ಮೇಲೆ ದಾಳಿ: ಹಾರ್ಮುಜ್ ಜಲಸಂಧಿಯಲ್ಲಿ ಕಡಲ ಗಣಿಗಳನ್ನು ಅಳವಡಿಸಲು ಸಜ್ಜಾಗಿದ್ದ ಐಆರ್‌ಜಿಸಿ ರಾಕೆಟ್ ಲಾಂಚರ್‌ಗಳು ಹಾಗೂ ಜಿರೋಫ್ಟ್ ವಿಮಾನ ನಿಲ್ದಾಣದಂತಹ ಪ್ರಮುಖ ಕೇಂದ್ರಗಳ ಮೇಲೆ ಅಮೆರಿಕದ ಸೆಂಟ್ರಲ್ ಕಮಾಂಡ್ ಭಾರಿ ದಾಳಿ ನಡೆಸಿದೆ.

ಟ್ರಂಪ್ ಖಡಕ್ ವಾರ್ನಿಂಗ್: ಟ್ರೂತ್ ಸೋಶಿಯಲ್‌ನಲ್ಲಿ ಪೋಸ್ಟ್ ಮಾಡಿರುವ ಅಧ್ಯಕ್ಷ ಟ್ರಂಪ್, ಜಲಸಂಧಿಯಲ್ಲಿ ಗಣಿಗಳನ್ನು ಹಾಕುವ ಇರಾನ್‌ನ ವಿಫಲ ಪ್ರಯತ್ನಕ್ಕೆ ನಾವು ತಕ್ಕ ಪ್ರಹಾರ ನೀಡಿದ್ದೇವೆ. ಇರಾನ್ ಮತ್ತೆ ಪ್ರತೀಕಾರಕ್ಕೆ ಮುಂದಾದರೆ ನಾವು ಇನ್ನಷ್ಟು ದೊಡ್ಡ ಮತ್ತು ವಿನಾಶಕಾರಿ ಮಟ್ಟದಲ್ಲಿ ದಾಳಿ ಮಾಡುತ್ತೇವೆ ಎಂದು ಗುಡುಗಿದ್ದಾರೆ.

ಕಚ್ಚಾ ತೈಲ ದರ ಏರಿಕೆ: ವಿಶ್ವದ ಒಟ್ಟು ತೈಲ ಮತ್ತು ಅನಿಲ ಸಾಗಣೆಯ ಸುಮಾರು ಶೇಕಡಾ 20 ರಷ್ಟು ಭಾಗ ಹಾದುಹೋಗುವ ಹಾರ್ಮುಜ್ ಜಲಸಂಧಿಯಲ್ಲಿ ಉದ್ವಿಗ್ನತೆ ಮಿತಿಮೀರಿರುವ ಕಾರಣ, ಬ್ರೆಂಟ್ ಕಚ್ಚಾ ತೈಲ ದರದಲ್ಲಿ ತಕ್ಷಣವೇ ಪ್ರತಿ ಬ್ಯಾರೆಲ್‌ಗೆ ಶೇ. 2 ಕ್ಕೂ ಹೆಚ್ಚು ಏರಿಕೆ ಕಂಡುಬಂದಿದೆ.

ನಾಗರಿಕರ ಸಾವು-ನೋವು ಆರೋಪ: ಅಮೆರಿಕ ನಡೆಸಿದ ದಾಳಿಯ ಚರ್ರೆಗಳು ಸಿರಿಕ್ ಕೌಂಟಿಯ ಕೊಹೆಸ್ತಕ್‌ನಲ್ಲಿ ಮದುವೆ ಸಮಾರಂಭ ನಡೆಯುತ್ತಿದ್ದ ಮನೆಯೊಂದಕ್ಕೆ ತಗುಲಿ ಮಗು ಸೇರಿದಂತೆ 4ಮಂದಿ ಸಾವನ್ನಪ್ಪಿದ್ದಾರೆ ಎಂದು ಇರಾನಿನ ರೆಡ್ ಕ್ರೆಸೆಂಟ್ ಆರೋಪಿಸಿದ್ದು, ಪ್ರಾದೇಶಿಕ ಉದ್ವಿಗ್ನತೆ ಮತ್ತಷ್ಟು ಜಟಿಲಗೊಂಡಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ