ಇರಾನ್‌ನ ಪ್ರಮುಖ ತೈಲ ಕೇಂದ್ರ ಖಾರ್ಗ್ ದ್ವೀಪದ ಬಳಿ ಅಮೆರಿಕ ಕ್ಷಿಪಣಿ ದಾಳಿ: ತೈಲ ಟ್ಯಾಂಕರ್ ಧ್ವಂಸ, ಸರಣಿ ಸ್ಫೋಟ

ಟೆಹ್ರಾನ್, ಸೆಪ್ಟೆಂಬರ್ 05: ಅಮೆರಿಕ ಮತ್ತು ಇರಾನ್ ನಡುವಿನ ಕಾದಾಟವು ತೀವ್ರಗೊಂಡಿದ್ದು, ಇರಾನ್‌ನ ಪ್ರಮುಖ ಕಚ್ಚಾ ತೈಲ ರಫ್ತು ಕೇಂದ್ರವಾದ ‘ಖಾರ್ಗ್ ದ್ವೀಪ’ದ ಸಮೀಪ ಶನಿವಾರ ಭಾರೀ ಸ್ಫೋಟಗಳು ಸಂಭವಿಸಿವೆ. ಇರಾನ್‌ನ ತೈಲ ಟ್ಯಾಂಕರ್ ಮೇಲೆ ಅಮೆರಿಕ ಕ್ಷಿಪಣಿ ದಾಳಿ ನಡೆಸಿದ ಬೆನ್ನಲ್ಲೇ ಈ ಸರಣಿ ಸ್ಫೋಟಗಳು ಕೇಳಿಬಂದಿವೆ ಎಂದು ರಾಯಿಟರ್ಸ್ ವರದಿ ಮಾಡಿವೆ. ಜಾಗತಿಕ ಇಂಧನ ಪೂರೈಕೆಯ ಪ್ರಮುಖ ಜೀವನಾಡಿಯಾಗಿರುವ ಹಾರ್ಮುಜ್ ಜಲಸಂಧಿಯಲ್ಲಿ ಉಭಯ ದೇಶಗಳ ಸೇನಾ ಮುಖಾಮುಖಿಯು ಸಮುದ್ರ ಯುದ್ಧವಾಗಿ ಬದಲಾಗುತ್ತಿರುವುದು ಜಾಗತಿಕ ಮಾರುಕಟ್ಟೆಯಲ್ಲಿ ಆತಂಕ ಮೂಡಿಸಿದೆ.

ಖಾರ್ಗ್ ದ್ವೀಪದ ಬಳಿ ಟ್ಯಾಂಕರ್ ಗುರಿ: ಇರಾನ್‌ನ ಎಸ್‌ಎನ್‌ಎನ್ (SNN) ಮತ್ತು ಫಾರ್ಸ್ ಸುದ್ದಿ ಸಂಸ್ಥೆಗಳ ಪ್ರಕಾರ, ಖಾರ್ಗ್ ದ್ವೀಪದ ಸಮೀಪದಲ್ಲಿದ್ದ ಇರಾನ್ ತೈಲ ಟ್ಯಾಂಕರ್ ಒಂದನ್ನು ಅಮೆರಿಕ ಸೇನೆ ಗುರಿಯಾಗಿಸಿಕೊಂಡಿದೆ. ಸತತ ಸ್ಫೋಟಗಳ ಶಬ್ದ ಸುತ್ತಮುತ್ತಲ ಕರಾವಳಿ ಪ್ರದೇಶಕ್ಕೆ ಕೇಳಿಬಂದಿದ್ದು, ಹಾನಿಯ ಪ್ರಮಾಣವನ್ನು ಪರಿಶೀಲಿಸಲಾಗುತ್ತಿದೆ.

ಆಗಸ್ಟ್ 30 ರಂದು ಅಮೆರಿಕವು ಹಾರ್ಮುಜ್ ಸಮೀಪದ ಲಾರಕ್ ದ್ವೀಪದಲ್ಲಿದ್ದ ಇರಾನ್ ಸೇನಾ ನೆಲೆಗಳ ಮೇಲೆ ದಾಳಿ ನಡೆಸಿತ್ತು. ಇದಕ್ಕೆ ಪ್ರತಿಯಾಗಿ ಇರಾನ್ ಜೋರ್ಡಾನ್‌ನಲ್ಲಿರುವ ಅಮೆರಿಕ ಸೇನಾ ನೆಲೆಗಳ ಮೇಲೆ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಉಡಾಯಿಸಿತ್ತು.

ಸೆಪ್ಟೆಂಬರ್ 1 ರ ವಾಯುದಾಳಿ: ಸೆಪ್ಟೆಂಬರ್ ಆರಂಭದಲ್ಲೇ ಅಮೆರಿಕವು ಇರಾನ್‌ನ ಕಡಲ ಕಣ್ಗಾವಲು, ರೇಡಾರ್, ಸಂವಹನ ಗೋಪುರಗಳು ಮತ್ತು ಗಣಿ ಹಾಕುವ ವ್ಯವಸ್ಥೆಗಳನ್ನು ಗುರಿಯಾಗಿಸಿ ದಾಳಿ ನಡೆಸಿತ್ತು. ಇದಕ್ಕೆ ಪ್ರತಿಯಾಗಿ ಇರಾನ್ ಇರಾಕ್, ಬಹ್ರೇನ್ ಮತ್ತು ಜೋರ್ಡಾನ್‌ನಲ್ಲಿರುವ ಯುಎಸ್ ಪಡೆಗಳ ಮೇಲೆ ಕ್ಷಿಪಣಿ ದಾಳಿ ನಡೆಸಿ ಎಚ್ಚರಿಕೆ ನೀಡಿತ್ತು.

ಮತ್ತಷ್ಟು ಓದಿ: ಇರಾನ್‌ ಜೊತೆ ಮಾತುಕತೆ ಓಕೆ, ವ್ಯಾಪಾರ ಒಪ್ಪಂದಕ್ಕೆ ಕೈಹಾಕಬೇಡಿ: ಭಾರತಕ್ಕೆ ನಯವಾಗಿಯೇ ಎಚ್ಚರಿಕೆ ರವಾನಿಸಿದ ಅಮೆರಿಕ

ಹಾರ್ಮುಜ್ ಜಲಸಂಧಿ ಮತ್ತು ಜಾಗತಿಕ ಇಂಧನ ಆತಂಕ

ತೈಲ ಸರಬರಾಜಿನ ಕುತ್ತು: ವಿಶ್ವದ ಒಟ್ಟು ಸಮುದ್ರ ಮಾರ್ಗದ ಕಚ್ಚಾ ತೈಲ ಸಾಗಣೆಯ ಸುಮಾರು ಶೇ.20 ಕ್ಕೂ ಹೆಚ್ಚು ಪಾಲು ಹಾರ್ಮುಜ್ ಜಲಸಂಧಿಯ ಮೂಲಕವೇ ಹಾದುಹೋಗುತ್ತದೆ. ಈ ಜಲಮಾರ್ಗದಲ್ಲಿ ಇರಾನ್ ವಿಧಿಸಿರುವ ನಿರ್ಬಂಧಗಳನ್ನು ಮುರಿಯಲು ಅಮೆರಿಕ ನೌಕಾಪಡೆ ಯತ್ನಿಸುತ್ತಿದ್ದು, ಎರಡೂ ಕಡೆಯ ಕ್ಷಿಪಣಿ ಕಾಳಗದಿಂದಾಗಿ ವಾಣಿಜ್ಯ ಹಡಗುಗಳ ಸಂಚಾರ ಸಂಪೂರ್ಣ ಅಸ್ತವ್ಯಸ್ತಗೊಂಡಿದೆ.

ತೈಲ ದರ ಏರಿಕೆ ಭೀತಿ: ಖಾರ್ಗ್ ದ್ವೀಪವು ಇರಾನ್‌ನ ಒಟ್ಟು ಕಚ್ಚಾ ತೈಲ ರಫ್ತಿನ ಶೇ. 90 ರಷ್ಟನ್ನು ನಿರ್ವಹಿಸುವ ಪ್ರಮುಖ ಟರ್ಮಿನಲ್ ಆಗಿದೆ. ಈ ಪ್ರದೇಶದಲ್ಲಿ ಯುದ್ಧದ ಕಾರ್ಮೋಡ ಕವಿದಿರುವುದು ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ (Crude Oil) ಬೆಲೆ ದಿಢೀರ್ ಏರಿಕೆಯಾಗುವ ಸಾಧ್ಯತೆಯನ್ನು ಹೆಚ್ಚಿಸಿದೆ.

ಅಂತಾರಾಷ್ಟ್ರೀಯ ಜಲಮಾರ್ಗಗಳಲ್ಲಿ ಇರಾನ್ ಸಮುದ್ರ ಗಣಿಗಳನ್ನು ಅಳವಡಿಸಿ ಜಾಗತಿಕ ಸರಕು ಸಾಗಣೆಗೆ ಬೆದರಿಕೆ ಒಡ್ಡುತ್ತಿದೆ ಎಂದು ಪೆಂಟಗನ್ ಆರೋಪಿಸಿದೆ. ಇದೇ ಕಾರಣಕ್ಕೆ ಅಮೆರಿಕ ಸೆಂಟ್ರಲ್ ಕಮಾಂಡ್ ಇರಾನ್‌ನ ಕಡಲ ಸ್ವತ್ತುಗಳನ್ನು ನಾಶಪಡಿಸಲು ಕಾರ್ಯಾಚರಣೆ ಚುರುಕುಗೊಳಿಸಿದೆ.

ಈ ಹಿಂದಿನ ಕದನ ವಿರಾಮಗಳು ಮುರಿದುಬಿದ್ದ ನಂತರ, ಸಂಘರ್ಷವು ಭೂಪ್ರದೇಶದಿಂದ ಕಡಲ ಮಾರ್ಗಕ್ಕೆ ಸ್ಥಳಾಂತರಗೊಂಡಿದೆ. ಇರಾನ್ ಮಿತ್ರಪಡೆಗಳು ಮತ್ತು ಅಮೆರಿಕದ ಜಂಟಿ ಸೇನೆಗಳ ನಡುವಿನ ಗುಂಡಿನ ಚಕಮಕಿಯು ಇಡೀ ಗಲ್ಫ್ ಪ್ರಾಂತ್ಯವನ್ನು ಪೂರ್ಣ ಪ್ರಮಾಣದ ಸಮರಕ್ಕೆ ದೂಡುವ ಆತಂಕವನ್ನು ಹೆಚ್ಚಿಸಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ