ಲೈಂಗಿಕ ಹಗರಣದಿಂದ ಎನ್​ವಿಡಿಯಾದಿಂದ ಹೊರಬೀಳಲಿರುವ ಜೆನ್ಸೆನ್ ಹುವಾಂಗ್​ಗೆ ಇಲಾನ್ ಮಸ್ಕ್ ಅವರಿಂದ ಮಸ್ತ್ ಆಫರ್

ವಾಷಿಂಗ್ಟನ್, ನವೆಂಬರ್ 12: ಚೀನೀ ಮೂಲದ ಗೂಢಚಾರಿಣಿ ಎನ್ನಲಾದ ಮಹಿಳೆಯೊಬ್ಬಳೊಂದಿಗೆ ಅಕ್ರಮ ಸಂಬಂಧ ಹೊಂದಿದ್ದ ಜೆನ್ಸೆನ್ ಹುವಾಂಗ್ ಅವರನ್ನು ಎನ್​ವಿಡಿಯಾದ ಸಿಇಒ ಸ್ಥಾನದಿಂದ ಕೆಳಗಿಳಿಸಲು ಕಂಪನಿಯ ಆಡಳಿತ ಮಂಡಳಿಯು ಯೋಜಿಸಿದೆ. ಇದರ ಬೆನ್ನಲ್ಲೇ ವಿಶ್ವದ ನಂಬರ್ ಒನ್ ಉದ್ಯಮಿ ಇಲಾನ್ ಮಸ್ಕ್ ಅವರು ಜೆನ್ಸೆನ್ ಅವರನ್ನು ಬರಮಾಡಿಕೊಳ್ಳಲು ಸಿದ್ಧವಾಗಿದ್ದಾರೆ.

ಜೆನ್ಸೆನ್ ಅವರು ಎನ್​ವಿಡಿಯಾ ತೊರೆದು ಬಂದರೆ ಕೆಲಸ ಕೊಡಿ ಎಂದು ಎಕ್ಸ್ ಬಳಕೆದಾರರೊಬ್ಬರು ಇಲಾನ್ ಮಸ್ಕ್ ಅವರನ್ನು ಟ್ಯಾಗ್ ಮಾಡಿ ಬಹಿರಂಗವಾಗಿ ಕೇಳಿದ್ದರು. ಇದಕ್ಕೆ ಉತ್ತರಿಸಿರುವ ಇಲಾನ್ ಮಸ್ಕ್ ಅವರು ಜೆನ್ಸೆನ್ ಅವರನ್ನು ನೇಮಕ ಮಾಡುವುದು ತಮಗೆ ಒಂದು ಗೌರವ ಎಂದು ಹೇಳಿಕೊಂಡಿದ್ದಾರೆ.

ಇದನ್ನೂ ಓದಿ: ಎನ್​ವಿಡಿಯಾ ಸಿಇಒ ಜೆನ್ಸೆನ್ ಹುವಾಂಗ್ ಹಗರಣದಲ್ಲಿ ಟ್ವಿಸ್ಟ್ ಮೇಲೆ ಟ್ವಿಸ್ಟ್; ಚೀನಾದ ಗೂಢಚಾರಿಣಿ ಮತ್ತಾಕೆಯ ಪತಿ ಮತ್ತು ಕಾರ್ಪೊರೇಟ್ ನೆಟ್ವರ್ಕ್

ಈ ಹಿಂದೆಯೂ ಇಲಾನ್ ಮಸ್ಕ್ ಅವರು ಜೆನ್ಸೆನ್ ಹುವಾಂಗ್ ಅವರಿಗೆ ನೈತಿಕ ಬೆಂಬಲ ನೀಡಿದ್ದಿದೆ. ಜೆನ್ಸೆನ್ ಅವರ ಅಕ್ರಮ ಸಂಬಂಧ ಬಹಿರಂಗಗೊಂಡಾಗ ಅವರಿಗೆ ಇಲಾನ್ ಮಸ್ಕ್ ಸೇರಿ ಕೆಲ ಪ್ರಮುಖ ಉದ್ಯಮಿಗಳು ಬೆಂಬಲ ಕೊಟ್ಟಿರುವುದುಂಟು.

ಜೆನ್ಸೆನ್ ಬಂದರೆ ಮಸ್ಕ್​ಗೆ ಏನು ಲಾಭ?

ಜೆನ್ಸೆನ್ ಹುವಾಂಗ್ ಅವರು ಎನ್​ವಿಡಿಯಾದ ಮೂವರು ಸಹ-ಸಂಸ್ಥಾಪಕರಲ್ಲಿ ಒಬ್ಬರು. ಇವತ್ತು ಜಾಗತಿಕವಾಗಿ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡುತ್ತಿರುವ ಎಐ ಮಾಡಲ್​ಗಳಿಗೆ ಶಕ್ತಿ ನೀಡುತ್ತಿರುವುದು ಎನ್​ವಿಡಿಯಾದ ಶಕ್ತಿಶಾಲಿ ಚಿಪ್​ಗಳೇ.

ಇಲಾನ್ ಮಸ್ಕ್ ಅವರ ಸೂಪರ್ ಕಂಪ್ಯೂಟರ್​ಗಳಿಗೆ ಎನ್​ವಿಡಿಯಾದ ಚಿಪ್​ಗಳನ್ನೇ ಬಳಸಲಾಗುತ್ತಿದೆ. ಜೆನ್ಸೆನ್ ಅವರು ಮನಸ್ಸು ಮಾಡಿದರೆ ಎನ್​ವಿಡಿಯಾ ರೀತಿಯಲ್ಲೇ ಮತ್ತೊಂದು ಚಿಪ್ ಕಂಪನಿ ಕಟ್ಟಬಲ್ಲುರು. ಮಸ್ಕ್ ಅವರ ವಿಸ್ತೃತ ಉದ್ಯಮಗಳಿಗೆ ಹೊಸ ಸೇರ್ಪಡೆಯಾಗಬಹುದು. ಎಐ ಟೆಕ್ನಾಲಜಿ ಅಭಿವೃದ್ಧಿಯಲ್ಲಿ ಬಹುತೇಕ ಸ್ವಾವಲಂಬನೆ ಸಾಧಿಸಲು ಸಾಧ್ಯವಾಗುತ್ತದೆ.

ಇದನ್ನೂ ಓದಿ: ಜೆನ್ಸೆನ್ ಸಂಪತ್ತಿಗೆ ಡಬಲ್ ಹೊಡೆತ; ಎಐ ಶಾಕ್ ಜೊತೆಗೆ ಈಗ ಲೈಂಗಿಕ ಹಗರಣದ ಆಘಾತ; ಟಾಪ್-10 ಪಟ್ಟಿಯಿಂದ ಹೊರಕ್ಕೆ

ಜೆನ್ಸೆನ್ ಹುವಾಂಗ್ ಅವರ ಹಗರಣಗಳೇನು?

62 ವರ್ಷದ ಜೆನ್ಸೆನ್ ಹುವಾಂಗ್ ಅವರು ತಾನು ಚೀನಾ ಮೂಲದ ಅಲೈಸ್ ಹುವಾಂಗ್ ಜೊತೆ ಅಕ್ರಮ ಸಂಬಂಧ ಹೊಂದಿದ್ದೆ. ತನ್ನ ಮಡದಿ ಮತ್ತು ಮಕ್ಕಳಿಗೆ ಹಾಗೂ ಕಂಪನಿ ಉದ್ಯೋಗಿಗಳಿಗೆ ದ್ರೋಹ ಎಸಗಿಬಿಟ್ಟೆ ಎಂದು ಕೆಲ ದಿನಗಳ ಹಿಂದೆ ತಪ್ಪೊಪ್ಪಿಕೊಂಡು ಕ್ಷಮೆ ಕೋರಿದ್ದರು. ಆದರೆ, ಅಲೈಸ್ ಹುವಾಂಗ್ ಅವರು ಚೀನಾದ ಗೂಢಚಾರಿಣಿ ಎನ್ನುವ ಆರೋಪ ಇದೆ. ಈಕೆಯನ್ನು ಬಳಸಿ ಚೀನಾ ಎನ್​ವಿಡಿಯಾದ ಅತ್ಯಾಧುನಿಕ ಚಿಪ್​ಗಳನ್ನು ಪಡೆಯುತ್ತಿತ್ತು ಎನ್ನಲಾಗಿದೆ.

ಚೀನೀ ಗೂಢಚಾರಿಣಿ ಜೊತೆಗಿನ ಅಫೇರ್ ಬೆಳಕಿಗೆ ಬಂದ ಬೆನ್ನಲ್ಲೇ ಎನ್​ವಿಡಿಯಾದ ಹೆಲ್ತ್​ಕೇರ್ ವಿಭಾಗದ ಉಪಾಧ್ಯಕ್ಷೆಯೊಬ್ಬಳೊಂದಿಗೂ ಜೆನ್ಸೆನ್ ಅಕ್ರಮ ಸಂಬಂಧ ಇಟ್ಟುಕೊಂಡಿರುವ ಪ್ರಕರಣವೂ ಬೆಳಕಿಗೆ ಬಂದಿದೆ. ಈ ಹಿನ್ನೆಲೆಯಲ್ಲಿ ಎನ್​ವಿಡಿಯಾದ ಆಡಳಿತ ಮಂಡಳಿಯು ಸಿಇಒ ಸ್ಥಾನದಿಂದ ಜೆನ್ಸೆನ್ ಅವರನ್ನು ಕೆಳಗಿಳಿಸಲು ಯೋಜಿಸಿದೆ. ಹಂಗಾಮಿಯಾಗಿ ಸಿಇಒ ಸ್ಥಾನಕ್ಕಾಗಿ ಅಭ್ಯರ್ಥಿಯನ್ನು ಶೋಧಿಸುತ್ತಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ