Domestic Crude: ದೇಶೀಯ ಕಚ್ಚಾತೈಲದ ಮೇಲೆ ವಿಂಡ್ಫಾಲ್ ಟ್ಯಾಕ್ಸ್ ಹೆಚ್ಚಿಸಿದ ಭಾರತ ಸರ್ಕಾರ, ವೈಮಾನಿಕ ಇಂಧನಕ್ಕೆ ಸೆಸ್ ಬರೆ
ವಿದೇಶಿ ವಿನಿಮಯ ಮೀಸಲು ಸಂಗ್ರಹ, ಜಾಗತಿಕ ಕಚ್ಚಾ ತೈಲ ಬೆಲೆ ಹಾಗೂ ಇತರ ವಿದ್ಯಮಾನಗಳನ್ನು ಆಧರಿಸಿ ಪ್ರತಿ 15 ದಿನಗಳಿಗೆ ಒಮ್ಮೆ ಕೇಂದ್ರ ಸರ್ಕಾರವು ವಿಂಡ್ಫಾಲ್ ಟ್ಯಾಕ್ಸ್ ಪರಿಷ್ಕರಿಸುತ್ತದೆ.
Updated on:Sep 01, 2022 | 9:05 AM
ದೆಹಲಿ: ಸ್ಥಳೀಯವಾಗಿ ಉತ್ಪಾದಿಸಿದ ಕಚ್ಚಾತೈಲದ (Domestic Crude Oil) ಮೇಲೆ ಭಾರತ ಸರ್ಕಾರವು ವಿಂಡ್ಫಾಲ್ ಟ್ಯಾಕ್ಸ್ (Windfall Tax) ಹೆಚ್ಚಿಸಿದೆ. ಒಂದು ಟನ್ ಕಚ್ಚಾತೈಲದ ಮೇಲೆ ₹ 13,300 ವಿಂಡ್ಫಾಲ್ ಟ್ಯಾಕ್ಸ್ ವಿಧಿಸಲು ಕೇಂದ್ರ ಸರ್ಕಾರವು ನಿರ್ಧರಿಸಿದೆ. ಹೊಸ ತೆರಿಗೆ ಗುರುವಾರದಿಂದಲೇ (ಸೆಪ್ಟೆಂಬರ್ 1) ಜಾರಿಗೆ ಬರಲಿದೆ. ಕಳೆದ ಎರಡು ವಾರಗಳಿಂದ ಭಾರತದಲ್ಲಿ ಉತ್ಪಾದನೆಯಾಗುವ ಕಚ್ಚಾತೈಲಕ್ಕೆ ₹ 13,000 ವಿಂಡ್ಫಾಲ್ ಟ್ಯಾಕ್ಸ್ ವಿಧಿಸಲಾಗುತ್ತಿತ್ತು. ಅದಕ್ಕೂ ಮೊದಲು ತೆರಿಗೆ ಪ್ರಮಾಣ ಹೆಚ್ಚಾಗಿತ್ತು. ಆಗಸ್ಟ್ 19ರಲ್ಲಿ ವಿಂಡ್ಫಾಲ್ ಟ್ಯಾಕ್ಸ್ ಮೊತ್ತವನ್ನು ₹ 17,750 ದಿಂದ ₹ 13,000ಕ್ಕೆ ಇಳಿಸಲಾಗಿತ್ತು.
ವೈಮಾನಿಕ ಕ್ಷೇತ್ರದಲ್ಲಿ ಬಳಕೆಯಾಗುವ ಇಂಧನದ (Aviation Turbine Fuel – ATF) ಮೇಲಿದ್ದ ತೆರಿಗೆಯನ್ನು ₹ 2ರಿಂದ ₹ 9ಕ್ಕೆ ಹೆಚ್ಚಿಸಲಾಗಿದೆ. ಡೀಸೆಲ್ ರಫ್ತಿನ ಮೇಲೆ ವಿಧಿಸುತ್ತಿದ್ದ ವಿಶೇಷ ಅಬಕಾರಿ ಸುಂಕವನ್ನು ₹ 6ರಿಂದ ₹ 12ಕ್ಕೆ ಹೆಚ್ಚಿಸಲಾಗಿದೆ. ಕಳೆದ ಜುಲೈ 1ರಂದು ಕೇಂದ್ರ ಸರ್ಕಾರವು ಒಂದು ಲೀಟರ್ ಪೆಟ್ರೋಲ್ ಮತ್ತು ವೈಮಾನಿಕ ಇಂಧನದ ಮೇಲೆ ₹ 6 ಮತ್ತು ಡೀಸೆಲ್ ಮೇಲೆ ಎಟಿಎಫ್ ರಫ್ತಿನ ಮೇಲೆ ₹ 13ರ ಸುಂಕ ವಿಧಿಸಿತ್ತು. ಪ್ರತಿ ಟನ್ ದೇಶೀಯ ಕಚ್ಚಾತೈಲ ಮಾರಾಟದ ಮೇಲೆ ₹ 23,250ರ ವಿಂಡ್ಫಾಲ್ ಟ್ಯಾಕ್ಸ್ ಹೇರಿತ್ತು.
ವಿದೇಶಿ ವಿನಿಮಯ ಮೀಸಲು ಸಂಗ್ರಹ, ಜಾಗತಿಕ ಕಚ್ಚಾ ತೈಲ ಬೆಲೆ ಹಾಗೂ ಇತರ ವಿದ್ಯಮಾನಗಳನ್ನು ಆಧರಿಸಿ ಪ್ರತಿ 15 ದಿನಗಳಿಗೆ ಒಮ್ಮೆ ದೇಶೀಯ ಕಚ್ಚಾ ತೈಲ ಹಾಗೂ ಪೆಟ್ರೋಲಿಯಂ ಉತ್ಪನ್ನಗಳ ಮೇಲಿನ ವಿಂಡ್ಫಾಲ್ ಟ್ಯಾಕ್ಸ್ ಪರಿಷ್ಕರಿಸಲಾಗುವುದು ಎಂದು ಕಂದಾಯ ಇಲಾಖೆ ಕಾರ್ಯದರ್ಶಿ ತರುಣ್ ಬಜಾಜ್ ಹೇಳಿದ್ದಾರೆ.
ಭಾರತ ಸರ್ಕಾರವು ಜುಲೈ 1ರಂದು ಮೊದಲ ಬಾರಿಗೆ ವಿಂಡ್ಫಾಲ್ ಟ್ಯಾಕ್ಸ್ ವಿಧಿಸಿತ್ತು. ರಷ್ಯಾ-ಉಕ್ರೇನ್ ಸಂಘರ್ಷದ ಹಿನ್ನೆಲೆಯಲ್ಲಿ ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಹೆಚ್ಚಾಗಿತ್ತು. ದೇಶೀಯ ಉತ್ಪನ್ನಗಳನ್ನು ಜಾಗತಿಕ ಮಾರುಕಟ್ಟೆಯಲ್ಲಿ ಮಾರುತ್ತಿದ್ದ ತೈಲ ಕಂಪನಿಗಳು ಉತ್ತಮ ಆದಾಯ ಗಳಿಸುತ್ತಿದ್ದವು. ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಪ್ರಾತಿನಿಧಿಕ ಉತ್ಪನ್ನವಾಗಿರುವ ಬ್ರೆಂಟ್ ಕ್ರೂಡ್ ಗರಿಷ್ಠ ಮಟ್ಟದಲ್ಲಿ ವಹಿವಾಟಾಗುತ್ತಿತ್ತು.
Published On - 9:05 am, Thu, 1 September 22
