ATM cash: ಸಮಯಕ್ಕೆ ಸರಿಯಾಗಿ ಹಣ ತುಂಬದೆ ಎಟಿಎಂ ಖಾಲಿಯಿದ್ದಲ್ಲಿ ಬ್ಯಾಂಕ್ಗಳಿಗೆ 10 ಸಾವಿರ ರೂ. ದಂಡ
ಒಂದು ವೇಳೆ ಎಟಿಎಂನಲ್ಲಿ ನಗದು ಲಭ್ಯ ಇಲ್ಲದಂತೆ ಆದಲ್ಲಿ ಅದಕ್ಕೆ ಬ್ಯಾಂಕ್ಗಳಿಗೆ 10 ಸಾವಿರ ರೂಪಾಯಿ ದಂಡ ಹಾಕಲಾಗುತ್ತದೆ ಎಂದು ಆರ್ಬಿಐ ತಿಳಿಸಿದೆ. ಇದು ಅಕ್ಟೋಬರ್ 1ರಿಂದ ಅನ್ವಯ ಆಗುತ್ತದೆ.
Updated on: Aug 10, 2021 | 10:09 PM
ಬ್ಯಾಂಕ್ಗಳ ಗ್ರಾಹಕರಿಗೆ ದೊಡ್ಡ ಮಟ್ಟದಲ್ಲಿ ನಿರಾಳ ಆಗುವಂಥ ಘೋಷಣೆಯೊಂದನ್ನು ಮಂಗಳವಾರ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದಿಂದ (Reserve Bank Of India) ಮಾಡಲಾಗಿದೆ. ಅದರ ಪ್ರಕಾರವಾಗಿ, ಒಂದು ವೇಳೆ ಎಟಿಎಂನಲ್ಲಿ ನಗದು ಇಲ್ಲದಂತಾದಲ್ಲಿ ಹಣಕಾಸು ಶುಲ್ಕವನ್ನು ವಿಧಿಸಲಾಗುತ್ತದೆ. 2021ರ ಅಕ್ಟೋಬರ್ 1ನೇ ತಾರೀಕಿನಿಂದ ಇದು ಅನ್ವಯ ಆಗುತ್ತದೆ. “ಎಟಿಎಂಗಳಲ್ಲಿ ನಗದು ಇಲ್ಲದಿರುವ ಸಮಯದ ಪರಿಶೀಲನೆಯನ್ನು ಕೈಗೊಳ್ಳಲಾಯಿತು. ಎಟಿಎಂ ಕಾರ್ಯಾಚರಣೆಗಳು ನಗದು ಕೊರತೆಯಿಂದಾಗಿ ಹಣದ ಅಲಭ್ಯತೆಗೆ ಕಾರಣವಾಗುತ್ತಿದೆ. ಈಗಿನ ನಡೆಯಿಂದ ಸಾರ್ವಜನಿಕರಿಗೆ ತೊಂದರೆ ತಪ್ಪಿಸಬಹುದು,” ಎಂದು ಆರ್ಬಿಐ ಹೇಳಿಕೆಯಲ್ಲಿ ತಿಳಿಸಿದೆ. ಇನ್ನೂ ಮುಂದುವರಿದು, ಆದ್ದರಿಂದ ಬ್ಯಾಂಕ್ಗಳು/ವೈಟ್ಲೇಬಲ್ ಎಟಿಎಂ ಆಪರೇಟರ್ಸ್ (WLAOs) ಅವುಗಳ ಕಾರ್ಯ ನಿರ್ವಹಣೆಯನ್ನು ಬಲಪಡಿಸಲು, ಎಟಿಎಂಗಳಲ್ಲಿ ನಗದು ಇರುವುದನ್ನು ನಿಗಾ ಮಾಡಲು ಬಯಸುತ್ತೇವೆ. nಗದು ಕೊರತೆ ಆಗದಂತೆ ಹಣ ತುಂಬುವುದನ್ನು ಖಾತ್ರಿಪಡಿಸಬೇಕು. ಈ ಸಂಬಂಧಹವಾಗಿ ನಿಯಮ ಉಲ್ಲಂಘನೆ ಮಾಡಿದಲ್ಲಿ ಅದನ್ನು ಗಂಭೀರವಾಗಿ ಪರಿಗಣಿಸಲಾಗುವುದು ಹಾಗೂ ಹಣಕಾಸು ದಂಡ ವಿಧಿಸಲಾಗುವುದು ಎಂದು ಆರ್ಬಿಐ ಹೇಳಿದೆ.
ನಗದು ಅಗತ್ಯ ಪ್ರಮಾಣದಲ್ಲಿ ಇಲ್ಲದಿದ್ದಾಗ ದಂಡ ವಿಧಿಸುವ ಯೋಜನೆ ಆರಂಭಿಸಲಾಗಿದೆ. ಆರ್ಬಿಐ ಹೇಳಿರುವ ಪ್ರಕಾರ, ಒಂದು ತಿಂಗಳಲ್ಲಿ 10 ಗಂಟೆಗಳ ಹೆಚ್ಚು ಸಮಯ ನಗದು ಇಲ್ಲದಿದ್ದಲ್ಲಿ ಪ್ರತಿ ಎಟಿಎಂಗೆ 10 ಸಾವಿರ ರೂಪಾಯಿ ದಂಟ ವಿಧಿಸಲಾಗುತ್ತದೆ. ವೈಟ್ ಲೇಬಲ್ ಎಟಿಎಂಗಳ ವಿಚಾರಕ್ಕೆ ಬಂದಲ್ಲಿ ಆ ನಿರ್ದಿಷ್ಟ ವೈಟ್ಲೇಬಲ್ ಎಟಿಎಂಗಳಿಗೆ ಸಂಬಂಧಿಸಿದಂತೆ ಬ್ಯಾಂಕ್ಗೆ ದಂಡ ಹಾಕಲಾಗುತ್ತದೆ. ಆ ವೈಟ್ ಲೇಬಲ್ ಎಟಿಎಂ ಆಪರೇಟರ್ನಿಂದ ಹಣ ವಸೂಲಿ ಮಾಡಬೇಕೋ ಬೇಡವೋ ಎಂಬುದು ಆ ಬ್ಯಾಂಕ್ನ ವಿವೇಚನೆಗೆ ಬಿಟ್ಟಿದ್ದು ಎಂದು ಆರ್ಬಿಐ ಹೇಳಿದೆ.
ನಗದು ತುಂಬದೆ ಎಷ್ಟು ಸಮಯ ಎಟಿಎಂ ಖಾಲಿ ಇತ್ತು ಎಂಬ ಬಗ್ಗೆ ಬ್ಯಾಂಕ್ಗಳೇ ಸಿಸ್ಟಮ್ ಚಾಲಿತ ಹೇಳಿಕೆಯನ್ನು ತಯಾರಿಸಿ, ಆರ್ಬಿಐನ ವಿತರಣೆ ಇಲಾಖೆಗೆ, ಅದರಲ್ಲೂ ಯಾವ ವ್ಯಾಪ್ತಿಯಲ್ಲಿ ಇದೆಯೋ ಅಲ್ಲಿಗೆ ಸಲ್ಲಿಸಬಹುದು. ವೈಟ್ ಲೇಬಲ್ ಎಟಿಎಂಗಳಿಗೆ ಸಂಬಂಧಿಸಿದಂತೆ WLAOs ಪರವಾಗಿ ಎಟಿಎಂಗಳಲ್ಲಿ ಎಷ್ಟು ಸಮಯ ನಗದು ಇರಲಿಲ್ಲ ಎಂಬ ಮಾಹಿತಿ ಒದಗಿಸಬಹುದು. ಇಂಥ ಸ್ಟೇಟ್ಮೆಂಟ್ ಅನ್ನು ಪ್ರತಿ ತಿಂಗಳು ನೀಡಬೇಕು. ಅದು ಮಾರನೇ ತಿಂಗಳ ಐದನೇ ತಾರೀಕಿನೊಳಗೆ ಸಲ್ಲಿಸಸಬೇಕು. ಅಂಥ ಮೊದಲ ಸ್ಟೇಟ್ಮೆಂಟ್ 2021ರ ಅಕ್ಟೋಬರ್ನದು ಮುಂದಿನ ತಿಂಗಳಾದ ನವೆಂಬರ್ 5ನೇ ತಾರೀಕೊಳಗೆ ಸಂಬಂಧಪಟ್ಟ ವಿತರಣೆ ಇಲಾಖೆಗೆ ಸಲ್ಲಿಕೆ ಮಾಡಬೇಕು.
ಸಕ್ಷಮ ಪ್ರಾಧಿಕಾರವು ವಿಧಿಸಿದ ದಂಡದ ವಿರುದ್ಧ ಮೇಲ್ಮನವಿ ಸಲ್ಲಿಸಬೇಕು ಅಂದುಕೊಂಡಲ್ಲಿ ಬ್ಯಾಂಕ್ಗಳು/WLAOsನಿಂದ ಪ್ರಾದೇಶಿಕ ನಿರ್ದೇಶಕರು/ಅಧಿಕಾರಿಗಳಿಗೆ ಲ್ಲಿಸಬಹುದು. ಅದೂ ದಂಡ ವಿಧಿಸಿದ ಒಂದು ತಿಂಗಳ ಒಳಗಾಗಿ ಮಾತ್ರ. ಈ ಯೋಜನೆಯ ಉದ್ದೇಶವೇ ಸರಿಯಾದ ಸಮಯಕ್ಕೆ ಎಟಿಎಂಗಳಿಗೆ ನಗದು ತುಂಬುವಂತೆ ಆಗಬೇಕು ಎಂಬುದು. ಒಂದು ಬ್ಯಾಂಕ್ಗಳು/WLAOsಗಳ ಹತೋಟಿಗೂ ಮೀರಿದ ಕಾರಣಗಳಿದ್ದಲ್ಲಿ, ಉದಾಹರಣೆಗೆ ಲಾಕ್ಡೌನ್, ಬಂದ್ ಹೀಗೆ. ಅಂಥ ಸಂದರ್ಭದಲ್ಲಿ ಮನವಿಯನ್ನು ಪರಿಗಣಿಸಬಹುದು ಎಂದು ಆರ್ಬಿಐ ಹೇಳಿದೆ.
ಇದನ್ನೂ ಓದಿ: ATM Withdrawal Charges: ಈ ಮೂರು ಬ್ಯಾಂಕ್ಗಳ ಗ್ರಾಹಕರಿಗೆ ಎಟಿಎಂ ವಹಿವಾಟುಗಳು ಅನಿಯಮಿತವಾಗಿ ಫ್ರೀ
(If ATM Out Of Cash Penalty Of Rs 10000 Will Be Imposed On Banks From October 1st Announced By RBI )
